Tok Bilong God i Gat Laip
God i Save Harim Wanem
YU LUKIM dispela piksa? Em piksa bilong Jisas i beten taim em i stap long Getsemani. Ol man i slip em ol aposel bilong em, Pita i Jems na Jon. Jisas i save, tok profet bilong Baibel i makim ol man bai kilim em i dai wantaim man nogut. Tasol em i beten olsem: “Papa, sapos yu laik, yu tekewe dispela kap [em laik bilong God long Jisas i mas karim sem na i dai] long mi. Tasol yu no bihainim laik bilong mi. Nogat. Yu bihainim laik bilong yu tasol.”—Luk 22:42; Aisaia 53:12.
Long dispela nait Jisas i kisim bikpela hevi. Baibel i tok: “Jisas i pilim hevi nogut tru, na em i beten strong moa. Na tuhat bilong en i kamap olsem blut na i pundaun long graun.” (Luk 22:44) Olsem wanem? God i harim beten long Jisas na helpim em?
Em i harim, long wanem ating Pol i tingim dispela taim na em i tok: “Bipo” Jisas i stap man long graun, long dispela taim em i mekim prea na beten long God. God em inap long kisim bek em long dai, olsem na em i beten long em wantaim bikpela singaut, na em i krai planti. Em i save daunim laik bilong em yet na i aninit long God, olsem na God i harim beten bilong em.”—Hibru 5:7.
God i harim beten bilong Jisas. Bilong wanem em i harim? Long wanem Jisas “i save daunim laik bilong em yet na i aninit long God.” Jisas i no laik mekim wanpela samting na bai God i kros long em. Em i tok: “Oltaim mi save mekim ol samting em i laikim.” (Jon 8:29) Yes, Jisas i laikim tru Papa bilong em long heven, na oltaim em i save bihainim laik bilong Em. I olsem Baibel i tok: “Sapos yumi bihainim laik bilong God yet na yumi beten long wanpela samting, orait bai em i harim beten bilong yumi.”—1 Jon 5:14.
God i mekim wanem bilong helpim Jisas? Em i no tekewe em long dispela traim. Nogat. Ol man i kam holim Jisas na ol i mekim nogut long em olsem em i wanpela raskol na ol i kilim em i dai. Tasol lukim dispela piksa. Dispela piksa i makim ol samting God i bin mekim bilong strongim Jisas bambai em inap karim dispela pen na hevi. Jisas i beten i stap na “wanpela ensel bilong heven i kam long em na i strongim em.”—Luk 22:43;1 Korin 10:13.
Dispela samting Baibel i Stori long en em inap givim save long yumi na lainim yumi. Olsem: Sapos yumi laik bai God i harim beten bilong yumi, yumi mas bihainim ol lo bilong God. Baibel i tok klia: “Na Sapos yumi beten long wanpela samting, orait em i save givim long yumi. “Long wanem yumi save bihainim lo bilong em, na yumi save mekim pasin em i laikim.” (1 Jon 3:22) Olsem na yumi wok long mekim pasin i stret wantaim ol tok yumi mekim long beten.Olsem bai God i ken save, yumi no giaman. Yumi save mekim olsem?