“Bikpela Lain” Bilong Jehova Ol i Stap Wanbel, Bai Ol i Pulap Long Olgeta Hap Bilong Graun
“Man nating em bai kamap planti olsem wan tausen, na man i liklik em bai kamap olsem wanpela bikpela lain, Mi Jehova, mi yet bai mi hariapim dispela wok long taim stret bilong en.”—AISAIA 60:22, NW.
1, 2. (a) Olsem wanem long pasin bilong i stap wanbel na sindaun gut long nau? (b) Ol lain man i bruk bruk nabaut, tasol olsem wanem long lain bilong Jehova?
OL MAN i gat save ol i tok, ol lain bilong dispela graun ol i bruk bruk moa yet na ol i no sindaun gut. Wanpela nius (The New York Times) i tok: ‘Pait bilong politik i kamap moa yet long olgeta hap. … Planti taim ol man i mekim pait na bagarapim man.’ Na dispela nius i tok: ‘Ol man i no bosim moa dispela graun; i no gat lo.’ Baibel i tok kain pasin olsem bai kamap long taim bilong yumi.—2 Timoti 3:1-5, 13; Matyu 24:3-13.
2 Tasol ol wokboi bilong Jehova i stap wanbel na taim ol i lukim ol lain man i bruk bruk nabaut ol i save, dispela pasin bilong nau i laik pinis na nupela taim i laik kamap. (Luk 21:28) Ol manmeri bilong dispela graun ol i bihainim moa yet pasin bilong God giaman bilong dispela graun, em Seten. Lain bilong Jehova ol i stap namel long ol dispela manmeri na Jehova i wok long stretim ol na bringim ol i go long Nupela Taim. Em i bungim ol bilong lotu long em. Lotu bilong em i stap antap, olsem long wanpela maunten, na i winim olgeta narapela lotu. Ol manmeri i kam na lotuim dispela wanpela God em i God tru, ol i stap wanbel na ol i save tokim ol narapela manmeri: “Yupela ol man yupela kam, na yumi go antap long maunten bilong Jehova, na long haus bilong God bilong Jekop; na bai em i lainim yumi long pasin bilong em, na bai yumi wokabaut long rot bilong em.” (Aisaia 2:2, 3, NW) Ol dispela manmeri i wetim ‘nupela heven na nupela graun i kamap, em stretpela pasin tasol bai stap long en.’—2 Pita 3:13.
Tilim “Ol Sipsip” na “Ol Meme”
3, 4.(a) Wanem wanem samting i bin kamap kirap long yia 1914? (b) Jisas i tilim ol man olsem wanem bilong kisim laíp?
3 Tok profet bilong God long Baibel i makim ‘nupela heven,’ (em Kingdom bilong God long heven long han bilong Krais) em i kamap long yia 1914. Kirap long dispela yia na i kam inap long nau God i bin makim ol manmeri ol i bilong mekim wok king wantaim Krais long dispela ‘nupela heven’ Klostu dispela lain 144,000 em inap pinis. (Revelesen 14:1-4) Nau Jehova i wok long singautim ol manmeri ol i bilong i stap long graun aninit long dispela Kingdom. Bai ol i winim taim bilong “bikpela hevi tru.” Kingdom bai bosim ol na bai ol i mekim ol wok bilong kamapim stretpela nupela taim long graun.—Revelesen 7:9, 14; Matyu 24:21.
4 Jisas i stori long dispela wok bilong bungim ol man, em i tok: “Bihain bai Pikinini Bilong Man [Krais] i kam bek olsem king [bilong Kingdom bilong heven], na olgeta ensel wantaim em, long dispela taim bai em i sindaun long sia king bilong en. Na olgeta lain manmeri bai ol i bung long pes bilong em. Na em bai i tilim ol na i putim long tupela lain, olsem wasman i save tilim ol sipsip i go long hap na ol meme i go long hap. Em bai i putim ol sipsip long han sut bilong en, na ol meme long han kais.” Na wanem samting i kamap? Jisas i tok: “Olsem na king bai i tokim ol man i stap long han sut bilong en, i spik, ‘Yupela i gat blesing bilong Papa bilong mi! Yupela i kam kisim kingdom Papa i bin redim na makim bilong yupela pinis, long taim graun i kamap nupela yet.’ … Olsem na bai em i tokim ol sampela i stap long han kais, ‘Yupela man bilong lus! Yupela klia long mi na yupela i go long paia i no save dai [dispela i makim ol bai lus olgeta], dispela paia Papa i putim bilong Seten wantaim ol ensel bilong en.’ … Olsem na ol dispela lain man ol bai i go kisim pe nogut, … Tasol ol stretpela man bai i kisim laip i stap oltaim oltaim.”—Matyu 25:31-46.
5. Jehova i mekim wanem long nau na em i marimari long ol man?
5 Tasol Jehova em i God bilong marimari. Baibel i tok: “Em i no laikim wanpela man bai i lus. Em i laikim olgeta man i tanim bel.” (2 Pita 3:9) Olsem na taim God i no pinisim yet ol lain bilong dispela graun, em ol i bruk bruk na ol i save pait, pastaim em i salim ol wokboi bilong em i go autim gutpela tok long ol long rot bilong kisim laip i stap oltaim long stretpela Nupela Taim. Olsem na Pikinini bilong em i tok: “Bai ol i autim dispela gutnius bilong kingdom long olgeta hap bilong graun, bai olgeta lain manmeri i ken harim, na bihain tasol bai las de i kamap.”—Matyu 24:14.
6. Jehova i givim wok long husat bilong autim tok bilong Kingdom?
6 Husat ol i autim dispela gutpela tok bilong Kingdom paslain long las de? Jehova i no givim dispela wok long ol man i no laik mekim wok bilong em. Em i givim dispela wok long ol man i daun long em na ol i amamas long mekim wok bilong em. Long lain remnan bilong ol Isrel bilong spirit tok profet i kamap tru, olsem: “Bai mi putim ol i stap gut, olsem lain sipsip insait long banis.” (Maika 2:12, NW) Na ol “arapela sipsip” tu ol i stap gut o i stap wanbel wantaim ol. (Jon 10:16) Olgeta dispela manmeri bilong olgeta lain bilong graun ol i witnes bilong Jehova. Sampela i lapun, sampela i yangpela, i gat ol man na ol meri, long wanem sam i tok: “Litimapim nem bilong Bikpela! … ol yangpela man na ol yangpela meri, na ol lapun na ol pikinini, yupela olgeta litimapim nem bilong Bikpela!” “Planti meri i go autim dispela tok.”—Sam 68:11; 148:1, 12, 13.
Stap Wanbel na Autim Tok
7. (a) Ol Witnes Bilong Jehova i wanbel olsem wanem? (b) Olsem wanem yumi inap save dispela pasin bilong wanbel i no ken pinis?
7 Jehova na Krais Jisas na ol ensel holi i was long oganaisesen bilong God hia long graun na ol dispela manmeri bilong autim tok bilong Kingdom ol i stap wanbel na autim tok bilong God. (Matyu 28:19, 20; Jon 14:26; Revelesen 14:6, 7) Olsem na ol Witnes Bilong Jehova i mekim olsem Baibel i tok, ol i “stap wanlain tru long wankain tingting na wankain laik.” Ol i “stap wanbel, na wanmaus na litimapim nem bilong God, em i God na Papa bilong Bikpela bilong yumi Jisas Krais.”—1 Korin 1:10; Rom 15:6.
8. Ol manmeri i mas mekim wanem bambai ol inap wanbel na lotuim God?
8 Oltaim ol witnes Bilong Jehova i save lainim ol tok i tru bilong God long Baibel bambai ol inap i stap wanbel long wankain tingting na wanmaus long autim tok. Ol yet i save stadi na lainim ol tok bilong Baibel, na ol i save lainim ol tok bilong Baibel, na ol i save lainim long ol kibung na long 5-pela miting bilong kongrigesen long olgeta wik. Long dispela rot olgeta wantaim i kisim kaikai bilong spirit long tebol bilong Jehova na ol i stap wanbel. (Matyu 24:45-47; Hibru 10:24, 25) Dispela save ol i kisim long Baibel i as bilong wanbel bilong ol. Wanpela Katolik, em William Whalen, em i raitim tok long wanpela nius bilong Katolik (U.S. Catholic) na em i tok: ‘Long olgeta haus kingdom [bilong ol Witnes Bilong Jehova], ol manmeri inap kisim gutpela skul, winim tru ol Katolik.’ Tru tumas, yumi mas skul long Baibel bambai yumi gat “wankain tingting” na “wankain laik” na yumi “wanmaus.”
9. Olsem wanem yumi inap save long ol manmeri God i bin givim wok long ol bilong autim tok bilong Kingdom?
9 Sapos yu no save God i givim wok long husat bilong autim gutpela tok bilong Kingdom, orait askim skin bilong yu yet: Husat ol i save go long haus bilong ol man na toktok wantaim ol long Jehova na long Kingdom bilong em? Em ol Witnes bilong Jehova, a? Olsem wanem? Ol manmeri bilong ol narapela lotu ol i save kam planti taim long haus bilong yu na toktok wantaim yu long Jehova na long Kingdom bilong em? Ol lotu bilong dispela graun i bruk bruk na ol manmeri i bihainim ol dispela lotu ol i no save autim tok long Jehova na long Kingdom bilong em. Planti ol i no save long Jehova na ol i no save long ol samting Kingdom bilong em bai mekim hia long graun. Tasol tok bilong Jehova na Kingdom bilong em i bikpela tok tru, long wanem Danyel 2:44 i tok, liklik taim na bai Kingdom bilong Jehova ‘i bagarapim na pinisim olgeta narapela gavman na em wanpela bai bosim graun inap oltaim oltaim.’
Liklik Lain Bilong Pastaim i Kamap Bikpela Kwiktaim
10. Paslain long yia 1914 i gat planti wokboi bilong Jehova o olsem wanem? Tasol yumi mas ting olsem wanem long wok ol i bin mekim?
10 Paslain long 1914 lain bilong autim tok bilong Kingdom ol i liklik lain tasol. Tasol ol i stap gut long wok na lain bilong ol i kamap bikpela. Yumi tingim tok bilong Baibel i tok, yumi ‘no ken sakim taim bilong ol liklik samting.’ (Sekaraia 4:10) Paslain long 1914 i olsem “taim bilong ol liklik samting” bilong lain bilong Jehova. Long dispela taim ol i liklik lain. Tasol bihain lain bilong ol i kamap bikpela.
11, 12. (a) Wanem samting i kamap bihain long yia 1914 na yumi save, spirit holi i wok strong?
11 Taim Namba Wan Pait Bilong Olgeta Hap i kirap long 1914, “las taim” bilong dispela olpela pasin i kirap. (2 Timoti 3:1) Na Kingdom tu i kirap mekim wok bilong en long 1914. (Revelesen 12:10-12) Na Krais i kisim namba bilong kirap tilim “ol sipsip” na “ol meme” na putim long tupela lain. Spirit bilong God i kirap mekim bikpela wok long ol gutpela wokboi bilong Em. (Lukim Aposel 2:16-21.) Long 1918 i gat 4,000 manmeri tasol ol i autim tok bilong Kingdom. Tasol dispela lain i kamap bikpela kwiktaim na long 1948 i gat 260,000 samting ol i autim tok. Long dispela taim profesa C. S. Braden i tok: ‘Ol Witnes Bilong Jehova i bin autim tok na pulapim olgeta hap bilong graun long tok bilong ol … Ol i wok strong moa, winim olgeta narapela lotu, long autim gutpela tok bilong Kingdom.’
12 Tasol em longtaim bipo, winim 30 yia samting! Long nau lain bilong autim tok bilong Kingdom i kamap bikpela moa, winim lain bilong 1948 inap 10-pela taim! Long 1948 samting Braden i bin tok, ol Witnes Bilong Jehova ‘pulapim graun long tok bilong Kingdom,’ tasol olsem wanem long nau? Wok bilong Kingdom i kamap bikpela moa! Na bihain bai i kamap bikpela moa yet!
13. Wanem samting i kamap long olgeta hap na i soim olsem tok bilong Aisaia 60:22 i kamap tru long nau?
13 Mipela kisim ripot long planti kantri, winim 200 samting, na ol dispela ripot i tok, lain bilong autim tok bilong Kingdom i go bikpela. Sosaiti Was Taua i wokim ol nupela brens-ofis na skruim sampela olpela brens-ofis i go bikpela. Ol i gat planti nupela masin bilong wokim ol buk na magasin na ol i mekim wok long ol masin kompiuta tu. Lain bilong wok long ol Betel i go bikpela long olgeta hap. Wok i kamap bikpela kwiktaim na yumi save, yumi lukim truim bilong wanpela tok promis God i bin mekim long ol gutpela wokboi bilong em, em i tok: “Man nating em bai kamap planti olsem wan tausen, na man i liklik em bai kamap olsem wanpela bikpela lain. Mi Jehova, mi yet bai mi hariapim dispela wok long taim stret bilong en.” (Aisaia 60:22, NW) Tru tumas, olgeta samting i kamap bilong redim ol Witnes na oganaisesen bilong ol bambai ol inap mekim bikpela wok moa yet long autim tok bilong Jehova na Kingdom bilong em, winim olgeta taim bipo!
14. Olsem wanem na yumi inap tok, lain bilong Jehova i wok long kamap “wanpela bikpela lain”?
14 Long nau planti planti wokman Kristen i wok strong long autim dispela gutpela tok. Lain bilong ol i winim 2 milion hap. Ol i stap long ol 46,000 kongrigesen bilong ol Witnes Bilong Jehova long olgeta hap bilong graun. Long taim bilong Memorial, long Mas 29, 1983, inap olsem 6,767,707 manmeri i bin bung. Long dispela rot ol i kamapim bel bilong ol, ol i laikim tru Kingdom bilong God. Dispela lain i bikpela lain, winim lain bilong planti kantri! Tru tumas, nau lain bilong Jehova i wok long kamap “wanpela bikpela lain.” Tru ol i liklik lain sapos yumi skelim lain bilong ol wantaim olgeta planti planti manmeri i stap long graun, em ol inap olsem 4 bilion hap. Tasol lain bilong ol i wok long kamap bikpela.—Matyu 7:13, 14.
15. Olsem wanem long wok bilong bungim “ol sipsip” nau long dispela taim?
15 Na long dispela taim nau dispela samting i kamap hariap. Planti “sipsip” olsem ol manmeri i laikim stretpela pasin, ol i kam bung wantaim lain bilong Jehova. Ol i mekim olsem na ol i insait bilong truim bilong tok bilong Hagai 2:7. Long Hagai 2:7 (NW) Jehova i tok: “Bai mi seksekim olgeta lain man bambai ol gutpela samting bilong olgeta lain ol i ken i kam insait; na bai biknem bilong mi i pulap long dispela haus.” Ol dispela gutpela man i gat pasin daun ol i tokim ol wokboi bilong Jehova: “Mipela bai go wantaim yupela long wanem, mipela harim ol i tok God i stap wantaim yupela.”—Sekaraia 8:23, NW.
16, 17. Jehova bai givim wanem wok long lain bilong em paslain long taim em i pinisim dispela pasin nogut nau i stap long graun?
16 Na Jehova i laik givim narapela bikpela wok long lain bilong em hia long graun, em olsem: Bilong autim laspela tok bilong em long ol manmeri bi long dispela taim nau. Bai i olsem ol samting ol Isrel i mekim long namba seven de bilong wokabaut raunim Jeriko. Ol i wokabaut raunim Jeriko wanpela taim long wanpela de inap 6-pela de na God i tokim ol: “Long de namba seven, yu wantaim ol soldia i mas wokabaut raunim taun 7-pela taim olgeta. Na taim yupela wokabaut ol pris i mas winim biugel. Taim ol i pulim krai bilong biugel i go longpela, orait yupela olgeta i mas singaut bikpela moa, na banis bilong dispela taun bai i bruk.” Olsem na long laspela de, wok i go bikpela inap 7-pela taim! Ol pris i winim biugel na ol manmeri i singaut bikpela moa na “ol banis bilong taun i bruk.”—Josua 6:2-5, 20.
17 Long nau yumi mekim tok “isi”—yumi autim tok i tru long ol manmeri na kirapim ol long tanim bel i go long Jehova. Tasol bihain liklik bai dispela tok “isi” i kamap “hatpela” tok. Dispela tok bai tokaut long pinis bilong olgeta samting Seten i bin kamapim. Dispela strongpela tok long strafe bilong God i laik painim ol man bai kamap olsem “ren ais.” Em “olgeta hap ais wan wan i gat hevi olsem bek rais.” Olsem na Baibel i tok bai “ol i bagarap nogut tru long ais.”—Revelesen 16:21.
“Bikpela Lain” i Pulap long Olgeta Hap Bilong Graun
18. (a) Kingdom bilong God i samting tru?
18 Ol Witnes Bilong Jehova i givim bel long Kingdom bilong God na dispela Kingdom i wanpela gavman tru. Krais wantaim ol 144,000 wanwok bilong em ol i stap king bilong dispela gavman long heven. Dispela kingdom o gavman i gat ol lo bilong en na buk bilong lo, em Baibel. Dispela gavman tru i gat ol manmeri i stap aninit long en na dispela lain bilong en i wok long kamap bikpela bikpela, na olgeta i stap wanbel. Na Baibel i tok, taim dispela Kingdom bilong Krais i pinisim pinis olgeta gavman bilong graun, bai em i ‘pulap long olgeta hap bilong graun.’ (Danyel 2:35) Dispela samting bai kamap olsem wanem?
19, 20 Olsem wanem bai lain bilong Jehova i kamap “wanpela bikpela lain” tru?
19 Ol manmeri i winim taim bilong Amagedon bai ol i wok long kamapim dispela Paradais long graun em Jisas i bin tok long en long Luk 23:43. (Revelesen 16:14, 16) Na bihain “God bai i kirapim ol daiman, ol stretpela man na ol man nogut wantaim.” (Aposel 24:15) Kingdom bilong Krais bai bosim graun inap 1,000 yia na insait long dispela taim bai olgeta manmeri i gat rot bilong daun long Kingdom. Ol manmeri i no laik bihainim stretpela lo bilong en, bai ol i pinis. (Revelesen 20:6, 11-15) Olsem na taim dispela 1,000 yia i pinis bai olgeta manmeri i stap long graun ol i givim bel tru long Jehova na lotuim em! Long dispela taim bai tok bilong Aisaia 11:9 (NW) i kamap tru olgeta, olsem: “Save i kam long Jehova em bai pulap long olgeta hap bilong graun, olsem wara i pulap long solwara.”
20 Em bai gutpela taim tru! Long dispela taim bihain bai olgeta manmeri i lotuim Jehova, bai olgeta i gat “wankain tingting,” na “wankain laik,” na bai ol i “wanmaus.” Planti milion milion manmeri ol i stap gutpela olgeta na wanbel long lotu bai ol i pulap long olgeta hap bilong graun. Bai ol i kamap olsem “wanpela bikpela lain” tru, winim olgeta narapela lain i bin i stap long dispela graun. Dispela samting bai kamap tru. Nau em i wok long kamap! Yu insait long dispela samting?
Sampela Askim long Ol Dispela Tok
□ Ol lain bilong dispela graun i bruk bruk moa yet, tasol olsem wanem long lain bilong Jehova?
□ Wanem bikpela wok bilong tilim ol man i kamap long nau?
□ Bilong wanem yumi ken bilip olsem pasin wanbel bilong lain bilong Jehova i no ken pinis?
□ Lain bilong Jehova i mekim wanem na “wanpela bikpela lain” i wok long kamap? Olsem wanem long dispela lain long bihain?
(b) Winim 30 yia bipo wanpela man i tok wanem long wok bilong Kingdom? Na olsem wanem long nau?
(b) Bihain bai Kingdom i mekim wanem olsem Danyel 2:35 i tok?
[Piksa long pes 15]
Olsem wasman i tilim ol sipsip na ol meme, olsem tasol King Krais Jisas i tilim ol manmeri long nau
[Piksa long pes 17]
Ol i wokim ol nupela haus Betel na faktori olsem ol dispela haus na faktori, o skruim i go bikpela, bilong helpim wok bilong Kingdom
Ebina, Japan
Abijan, Aivori Kos
Ingleburn, Australia
Enebak, Nowe
Ajalvir (Madrid), Spen