Bihain Long De Bilong Marit
1, 2. 1 gat wanem narapela narapela kain marit i kamap long Japan?
WANPELA nius (Time bilong Desemba 6, 1982) i tok, long Japan ol i mekim bikpela wok bisnis long marit na ol i kisim mani inap K17,000,000,000. Dispela em inap olsem K22,000 bilong olgeta man na meri i marit. Tasol long hap bilong Japan planti man na meri marit ol i katim marit.
2 Narapela nius (Hokuu Shimbun) i stori long wanpela man na meri bilong Noshiro em tupela i no tromoi bikpela mani bilong baim ol samting bilong de bilong marit. Tupela i Witnes Bilong Jehova na nius i tok: ‘Tupela i strongpela Kristen, olsem na tupela i no tingting long baim planti samting. Tupela i save, maski i no gat planti bilas samting, tasol olgeta man inap amamas long dispela marit.’ Planti manmeri ol i save tromoi bikpela mani tru bilong baim ol samting bilong de bilong marit, olsem na ol i kirap nogut long marit bilong dispela tupela Witnes na ol i raitim stori bilong en long nius. Na nius i stori moa olsem: ‘Maski ol i no tromoi bikpela mani, tasol planti manmeri i go long dispela marit na amamas wantaim tupela na mekim gutpela tok long tupela.’
3. Ol samting bilong de bilong marit inap mekim wanem long yu?
3 Tingting bilong man na meri long de bilong marit na ol samting ol i mekim long dispela de em inap helpim tupela long i stap amamas long bihain o em inap givim hevi long ol long bihain. Olsem wanem long dispela? Dokta Sally Witte i tok, sampela taim gutpela samting i kamap em inap givim hevi long yu wankain olsem samting nogut i save mekim. Sampela dokta i gat save long ol samting bilong helpim tingting bilong man ol i tok, taim bilong marit inap givim hevi long man na mekim em i tingting planti, winim hevi em i pilim sapos bos i pinisim em long wok. Na sapos yu wokim planti samting long de bilong marit na singautim planti man, bai yu pilim bikpela hevi moa.
4. Sapos ol i wokim planti samting long de bilong marit, ating bihain bai ol i pilim olsem wanem?
4 Planti manmeri i marit long nau ol i tingting tasol long de bilong marit na ol amamas bilong en na bihain ol i pilim bikpela hevi. Wanpela meri i marit nupela em i tok: ‘Inap planti mun olgeta pren bilong mi, i no mi tasol, i tingim de bilong marit. Olgeta tingting bilong mipela i go long dispela de tasol. Tasol ol samting bilong dispela de i kamap i go pinis wantu tasol na taim kaikai bilong marit i pinis na mipela kam bek long haus, mi bel hevi na pilim nogut.’ Na wanpela yangpela man (long buk Getting Married) em i tok:
‘Taim yu makim wanpela meri bilong marit, yu amamas. Na taim de bilong marit i kamap na planti manmeri i bung, yu amamas tru. Yu pilim olsem taim yu marit narapela kain gutpela samting bai painim yu. Tasol wantu olgeta narapela man i go pinis na yu stap wantaim dispela meri tasol.’
5. Ol Kristen i mas kisim wanem stretpela tingting long de bilong marit?
5 Tru man na meri i laik marit ol i mas tingim de bilong marit, long wanem marit em i bikpela samting. Tasol tupela i no ken tingim tasol dispela de. Tupela i mas tingim ol wok Kristen tupela wantaim i mas mekim taim ol i marit pinis. Dispela i bikpela samting moa. Sapos ol i mekim olsem, dispela bai helpim ol long i stap amamas tru.
Redi Bambai Yu Inap i Stap Amamas
6. Paslain long de bilong marit, gutpela sapos ol i mekim wanem?
6 Jisas i mekim wanpela tok i tru na ol singel i ken tingim. Em i tok: “Sapos wanpela man namel long yupela em i laik wokim wanpela longpela haus i go antap, orait em i save sindaun pastaim na i save tingim gut pe bilong dispela haus. Em i laik save, bai mani bilong en inap long pinisim dispela haus, o nogat.” (Luk 14:28) Tru tumas, sapos yu laik mekim wanpela wok na yu tingting gut pastaim, yu bihainim savepasin. Na i stret long marit tu. Ol man i wok bisnis long givim tingting long ol marit, ol i save tokim ol man na meri i laik marit, gutpela sapos ol i skul pastaim na lain long ol samting ol i mas mekim taim ol i marit na bai tupela inap stretim ol hevi na sindaun gut wantaim. Wanpela i tok: ‘Ol yangpela i winim haiskul, ol i gat bikpela save long ol masin kompiuta i wok olsem wanem. Sapos ol i save liklik tasol long marit i wok olsem wanem, taim ol i marit bai ol inap i stap amamas.’
7. Yu inap painim we sampela gutpela tok long marit?
7 Ol Witnes Bilong Jehova i save givim gutpela tok long ol manmeri long marit. Tingting bilong ol man i save senis senis, tasol dispela kain tingting i no as bilong ol dispela tok. Nogat. Tok bilong God, em i As bilong marit, em i as bilong en. (Sam 119:98-105) Wastaua na Kirap! i save putim kain kain tok long marit. Sapos yu lukim Indeks bilong Wastaua na Kirap! bai yu save, dispela tupela nius i kamapim planti tok long marit. Kongrigesen i save lainim ol dispela tok long Stadi “Wastaua.” Ol Kristen i marit na ol i save stadi gut long Baibel, taim ol i bekim tok long Stadi, gutpela tok bilong ol inap helpim ol narapela Kristen em ol i tingting long marit.
8. Sapos yu tingting long marit, gutpela sapos yu mekim wanem?
8 Sapos yu tingting long marit, yu mas lukim tu sampela buk bilong Baibel, olsem buk Rot Bilong Kamapim Amamas Insait long Famili. Dispela buk i kamapim planti tok bilong Baibel na planti gutpela tok bilong helpim yumi. Nem bilong sampela sapta bilong dispela buk em olsem: “Marit i Mas i Gat Gutpela As Bilong En,” “Ol Nupela Marit,” “Dispela Kain Man, Meri Bilong Em i Save Harim Tok Bilong Em,” “Dispela Kain Meri, Man Bilong Em i Laikim Tru Em,” “Pasin Sori, Em i Save ‘Pasim Olgeta Wantaim.”’ Gutpela sapos yu wantaim poroman bilong yu, yutupela i skelim ol dispela tok paslain long taim yupela i marit. Na gutpela sapos yutupela i toktok wantaim wanpela strongpela brata Kristen, em yutupela i save laikim em na harim tok bilong em, na bai em inap givim sampela gutpela tok long yupela. (Provep 4:1-9) Dispela bai helpim yupela long kisim stretpela tingting long de bilong marit na tingim gut ol wok yutupela i mas mekim taim yupela i marit pinis. Em bikpela samting.
Mas Mekim Wok
9, 10. (a) Bilong wanem yu mas tingim ol samting tru i kamap insait long marit na yu no ken giamanim bel bilong yu? (b) I gat wanem samting bilong helpim ol Kristen long dispela samting?
9 Tasol sampela manmeri i olsem ol i driman nating na ol i ting, taim ol i marit bai ol i stap amamas tasol. Sapos ol i giamanim bel bilong ol olsem na ol i no tingim ol samting tru i save kamap insait long marit, bai ol i no inap i stap amamas. Tupela wantaim i mas wok strong bambai marit bilong tupela i ken wok gut na tupela i ken i stap amamas. Ating tupela i mekim bikpela wok bilong redim ol samting bilong de bilong marit, tasol ol i mas mekim bikpela wok moa bambai marit bilong ol i ken wok gut. Sapos tupela i ting ol inap amamas nating, bai hevi i kamap. Wanpela yangpela meri, nem bilong em Beti, em i tokim wanpela profesa (E. M. Pattison): ‘Mi ting taim man na meri i marit, tupela i stap amamas tasol. Tasol taim mi marit pinis, nau mi save, marit i gat hatwok bilong en.’
10 Ol Kristen i tingting long marit, sapos ol i lukim gut ol tok bilong God long Baibel, dispela inap helpim ol long redi long marit. Olsem wanem na dispela inap helpim ol? Long wanem Baibel i tok yumi olgeta manmeri i gat sin, yumi kisim long Adam. Rom 3:23 i tok: “Yumi olgeta man yumi bin mekim sin.” Olsem na poroman bilong yu bai popaia long sampela taim. Taim yutupela i marit pinis na i mas mekim ol wok bilong olgeta de, ating sampela taim bai man bilong yu i kros kwik o em i les, o ating em i no mekim ol wok Baibel i tok man marit i mas mekim. O taim yu marit pinis, ating bai yu kirap nogut long sampela pasin bilong meri bilong yu. Ating bai yu lukim em i hambak liklik, o em i laik bosim yu, o em i laik kisim planti samting.
11, 12. Sapos yu stap Kristen, olsem wanem dispela inap helpim yu long marit bilong yu?
11 Yutupela wantaim i Kristen na yupela i save bilip long gutpela tok bilong God, olsem na yupela i gat rot bilong stretim ol hevi i kamap. Yutupela i ken toktok gut wantaim na narapela i ken helpim narapela long save olsem wanem em i ken stretim pasin bilong em na bihainim moa yet ol tok bilong God. Skelim gut taim bilong toktok olsem. Nogut poroman i kros long wanpela samting na nau yu laik toktok wantaim em long sampela pasin bilong em i kranki liklik. Taim yutupela i toktok wantaim, gutpela sapos yu no sakim tok bilong poroman bilong yu. Yu mas harim na tingim.—Provep 15:28;18:13.
12 Sampela taim, taim tupela i mekim famili-stadi bilong tupela ol inap toktok long ol dispela kain hevi. Em gutpela taim bilong toktok long ol dispela samting, long wanem tupela wantaim i laik bihainim tok bilong God na amamasim poroman. Baibel i tok, yumi mas tingting long mekim pasin poroman i laikim. Pol i tok: “Yupela man wan wan: ‘Yu mas sori long meri bilong yu, olsem yu sori long yu yet.’ Na meri i mas litimapim nem bilong man bilong en.”—Efesas 5:33; skelim wantaim 1 Korin 13:4-7.
Narapela i Mas Bilip long Narapela
13. Olsem wanem long pasin bilong bilip long poroman bilong yu?
13 Ol Kristen i marit ol i mas bilip tru long poroman bilong ol na dispela samting bai helpim ol long stretim ol hevi i kamap insait long marit bilong ol. Dispela gutpela pasin i no i stap long planti marit bilong ausait. Hevi i kamap olsem long ol Isrel bipo, em Baibel i tok: “Yu no ken bilip long wanpela poroman. Yu no ken bilip long gutpela pren bilong yu. Yu no ken opim maus bilong yu long meri bilong yu.” (Maika 7:5, NW; Jeremaia 9:4, 5) Man i no bilip long meri bilong em. Em i pret long tokim meri long sampela samting bilong em yet, nogut meri i go tokim ol narapela man long dispela samting. Sapos narapela i no bilip long narapela, bai tupela i no inap pas gut wantaim na bai tupela i no inap toktok gut wantaim na stretim ol hevi, a?
14. Bilong wanem i bikpela samting narapela i mas bilip long narapela? Baibel i tok wanem long dispela samting?
14 Narapela i mas bilip long narapela, em bikpela samting. Profesa Ned L. Gaylin i tok: ‘I gat tupela samting i save strongim marit na bai marit i wok gut na tupela i stap amamas. Dispela tupela samting i olsem: Sori na bilip. . . . Sapos narapela i no bilip long narapela, marit bilong tupela i no ken wok gut.’ Olsem na Provep 31:11 i stori long gutpela meri marit na i tok: “Bai man bilong dispela kain meri i save gut long meri i bihainim gutpela pasin oltaim. Na meri bai helpim em na em i gat planti samting.” Man bilong em i wanpela hetman bilong ples, olsem wanpela elda, na i gat sampela samting bilong kongrigesen em i no tokim meri bilong em long en. Em i mekim gut long meri, long wanem sapos em i tokim meri long sampela samting meri i no ken save long en, dispela bai putim hevi long meri bilong em. (Provep 31:23; 20:19) Tasol long ol narapela samting tupela i save toktok gut wantaim. Man wantaim meri i save, em inap kamapim olgeta tingting bilong em long poroman bilong em na poroman i no ken lap long em o toktok nabaut long dispela samting long ol narapela man, long wanem em i sori long em.
15. Taim yumi skelim pasin Jisas i mekim long ol disaipel, olsem wanem dispela inap helpim yumi long marit bilong yumi?
15 Jisas i save bilip tru long “meri” bilong em, em lain 144,000. (Efesas 5:22-32; 2 Korin 11:2) 1 gat sampela samting em i no tokim ol disaipel long en, long wanem ol i no inap kisim long dispela taim bipo. Em i no tokim ol long de o long aua bilong bikpela de bilong God; God i no bin tokim Pikinini bilong em long dispela samting. (Jon 16:12; Matyu 24:36) Tasol long olgeta narapela samting Jisas i save toktok gut long en wantaim ol disaipel bilong em. Em i no save haitim tok long ol dispela manmeri bihain bai ol i kamap olsem “meri” bilong em long heven. Em i laik toktok wantaim ol na em i save toktok wantaim ol na pulim tok i go inap planti aua. Na em i save tokim ol long sampela samting bihain bai ol i save long en.—Jon 13:7; Mak 8:17.
16. Sapos narapela i bilip long narapela, olsem wanem dispela inap strongim marit?
16 Taim yu wantaim poroman bilong yu i save gut olsem narapela i no save giamanim narapela, bai narapela i bilip tru long narapela na bai yutupela i pas gut wantaim. Bai yu save yu ken kamapim tingting tru i stap long bel bilong yu. Na taim yu laik toktok long wanpela hevi i bin kamap o yu laik toktok long wanpela pasin bilong poroman bilong yu, orait yu ken save, em i no ken sakim tok bilong yu, em bai harim. Na taim poroman bilong yu i mekim sampela tok long wanpela pasin bilong yu, yu no ken kros, long wanem yu save, em i laikim yu tru na em i mekim dispela tok bilong helpim yu.—Provep 27:6.
17. Sapos yumi marit pinis o yumi tingting long marit, gutpela sapos yumi mekim wanem?
17 Taim yutupela i tingting long marit na long de bilong marit, yu laikim tru poroman bilong yu na givim bel long em, a? Orait, yu mas tingim dispela samting na dispela bai helpim yu long daunim kros na yu no ken bel nogut long tok bilong poroman bilong yu. Na sapos nau yu tingting long marit o yu redim ol samting bilong de bilong marit, orait, mekim olgeta samting bambai bel bilong yu i ken i stap isi na i stap gutpela bihain bihain long de bilong marit.—Song Bilong Solomon 3:11.
Yu Kisim Sampela Save?
□ Yumi ken mekim wanem na bai ol samting i kamap gutpela long kaikai bilong marit?
□ Ol manmeri i wokim bikpela kaikai bilong marit na singautim planti man, bihain ol i gat wanem hevi?
□ Dispela inap mekim wanem long marit bilong ol?
□ Yu wanpela Kristen na olsem wanem dispela inap helpim yu long marit bilong yu na bai yu stap amamas?
□ Bilong wanem i bikpela samting narapela i mas bilip long narapela?