Ripot long Wok Bilong Kingdom
Ol Man i Dai Pinis Bai Ol i Kirap Bek
Tok long ol man i dai pinis bai ol i kirap bek em wanpela as tok bilong Baibel, na dispela tok i strongim man long spirit taim i dai i laik painim em. (Hibru 6:1, 2; Jon 5:28, 29) Jehova i tok promis long kirapim bek ol man i dai pinis. Wanpela manki long Japan i bilipim dispela tok na em i save tokim ol narapela man long dispela gutpela samting em bai kamap.
Pastaim dispela manki i no laik kisim ol buk o nius bilong Baibel. Em i tok, em i no laik kaunim buk. Tasol ol i singautim em i go long miting bilong ol Witnes Bilong Jehova long Haus Kingdom na ol brata sista i sekanim em na mekim gut long em. Em i amamas long ol tok em i harim na em i singautim tripela wanskul i go wantaim em long narapela miting bihain. Olgeta fopela ol i go long miting. Ol tisa long skul i save tingim dispela fopela manki i pikinini “nogut.”
Ol i lainim tok bilong buk Rot Bilong i Stap Amamas Taim Yu Yangpela Yet na ol i lusim pasin bikhet. Tisa i lukim ol i senisim pasin bilong ol na em tu i laik harim tok. Em i insait long Baibel stadi bilong ol. Nambawan bilong dispela lain manki “nogut” em i gat sik na taim em i gat 15 krismas em i dai pinis. Liklik taim tasol em i bin i go long ol miting Kristen bilong ol Witnes Bilong Jehova, tasol em i gat strongpela bilip. Paslain liklik long taim em i dai, em i raitim wanpela pas na em i kamapim bilip bilong em olsem ol man i dai pinis bai ol i kirap bek. Em i tok:
“Mi gat 15 krismas tasol na bai mi dai, long wanem mi gat wanpela kain sik. Mi stap laip inap liklik taim tasol, tasol insait long dispela 15 yia mi stap amamas. Long namba 15 yia bilong mi, mi stap amamas tru. ․․․ Long wanem, nau mi save God em i stap na em i gat olgeta strong na em inap pinisim sik na i dai. Mi save man i dai pinis em inap kirap bek na dispela save i mekim gut bel bilong mi na mi stap amamas.”
Dispela yangpela man i laikim tru tok bilong Baibel i tok long “nupela skai na nupela graun” i gat “stretpela pasin tasol i stap long en.” (2 Pita 3:13) Em i tok: “Bai mi slip inap liklik taim. Na sapos em i laik bilong God, bai mi lukim yu gen long Paradais. ․․․ Yu no ken krai. Bai mi slip tasol na bihain liklik bai mi kirap. Yu mas painim mi long Kingdom bilong 1,000 yia. Wetim mi, bai mi kam.”
Strongpela bilip bilong dispela manki i strongim ol narapela man. Tupela tisa na tripela pren bilong em ol i stadi yet na ol i save go long ol miting bilong ol Witnes Bilong Jehova. Tok promis bilong God long ol man i dai pinis bai ol i kirap bek, dispela tok promis i strongim dispela yangpela man na dispela tok inap strongim olgeta manmeri i bilipim ol tok promis bilong God Jehova.