Bilong Wanem Sampela Pris i No Laik Baptaisim Ol Liklik Pikinini?
ALAN tupela Sonia i laik bai pris i givim baptais long liklik pikinini bilong tupela. Tasol pris bilong ol long Misin Angliken em i no laik mekim. Tupela i kirap nogut, long wanem pris i no laik mekim na em i tokim tupela, ‘Yupela yet i ken baptaisim em.’ Bilong wanem pris i no laik baptaisim dispela bebi? Long wanem Alan tupela Sonia i save go long lotu wan wan taim tasol.—Nius The Christian Century bilong Jun 3-10, 1981.
Long nau sampela misin i no laik baptaisim ol bebi, olsem na yumi save ol i senisim tingting bilong ol long dispela samting. Tingim Misin Katolik: Ol bikpela man bilong misin i mekim namba tu kibung bilong Vatiken na ol i senisim tu liklik long givim baptais long ol bebi. Misin i strong yet long givim baptais long ol bebi, tasol nau ol i tok, pastaim papamama i mas tok promis long mekim bikpela long pikinini insait long lotu Katolik. Ol i tok, ‘Sapos papamama i no tok promis tru, ating misin i no ken baptaisim kwik pikinini bilong ol; na sapos ol i no laik mekim tok promis olsem, orait ating misin i mas sakim ol na i no ken baptaisim pikinini bilong ol.’—Nius L’Osservatore Romano bilong Desemba 1, 1980, “Instruction on Infant Baptism”
Wanpela pris Katolik, em Joseph M. Champlin, em i tok dispela pasin em i narapela kain tru long bipo. Em i tok, bipo ‘ol misineri Katolik i save wok strong long baptaisim ol liklik pikinini bilong ol haiden, em papamama i lusim ol nating long rot,’ na ol pris i save tok strong long ol papamama na tokim ol, ‘Sapos pikinini i winim wan mun pinis na em i no bin baptais, bai papamama i gat bikpela rong.’
Tasol wanem samting i mekim na ol i senisim tingting? Wanpela samting em olsem: Nau ol pris i save, baptais tasol i no mekim man i kamap Kristen. Ol bikpela man bilong misin i tingting planti, long wanem long nau liklik lain tasol ol i save go oltaim long lotu na planti Katolik i baptais pinis ol i no givim bel long lotu. Olsem na wanpela nius i tok, ‵Misin i no laik givim baptais long ol pikinini ol i no ken kamap strongpela Katolik long bihain na bai dispela hevi i kamap bikpela.—Nius U.S. Catholic.
Dispela nupela strongpela tok ol i mekim long baptais i kamapim long ples klia olsem ol saveman bilong lotu ol i no wanbel. Wanpela Katolik em i man bilong raitim ol buk samting, nem bilong em Joseph Martos, em i tok planti pris i no bilip moa olsem baptais ol i givim long ol bebi i olsem wanpela samting i wokim mirakel insait long bel bilong pikinini. Ol i pilim olsem dispela tingting em i bilong bipo, na ol man bilong nau ol i no ken bihainim.
Olsem na planti gutpela Katolik ol i gat askim long dispela samting. Bipo Misin i save tok, pikinini i no baptais, sapos em i dai em inap i go long’ bikpaia o i go long klinpaia (pegatori). Sampela Katolik i pilim olsem, sapos dispela tok i tru, orait maski papamama bilong pikinini i no i go oltaim long lotu o i gat narapela samting, tasol misin i mas givim baptais long pikinini; ol i no ken sakim. Dispela samting em i bikpela samting, long wanem, olsem pris Katolik, nem bilong em Vincent Wilkin, i tok, ‘bikpela hap lain tru bilong ol man i dai pinis ol i no bin kisim baptais.’
Orait, gutpela sapos yumi stori liklik long pasin bilong givim baptais long ol bebi. Yumi ken skelim as bilong dispela pasin, olsem em i bin kamap olsem wanem, na bipo ol misin i gat wanem tingting long en; na yumi ken skelim tu ol tok bilong Baibel—Baibel i tok wanem long dispela samting?