Bikpela Amamas i Kamap Long Lain Bilong God
LONG tok bilong King Devit long Sam 68, ves 2-4, em i singautim olgeta manmeri ol i laikim pasin bilong i stap fri tru, na em i tokim ol: “Yumi mas singim song bilong litimapim nem bilong God. Em i save sindaun long ol klaut na wokabaut i go. Stretim rot bilong em! Nem bilong em [Ja]. Yumi amamas long ai bilong em.” Em i gutpela samting tru long yumi ken amamas long ai bilong God bilong yumi, a? (Aisaia 12:2, 3) Long yia 1986, Jehova i bin strongim tru ol Witnes bilong em taim ol i wok long tokaut long olgeta lain bilong graun, olsem: ‘Yupela kalabusman i ken lusim kalabus!’
Ol pes i kamap bihain long dispela i kamapim wok bilong ol Witnes Bilong Jehova long yia 1986. I gat as tru bilong dispela bikpela amamas bilong ol! Long 208 hap bilong graun i gat 3,229,022 Witnes ol i mekim wok bilong autim tok, na dispela lain i go bikpela inap 6.8 pesen long 1986. Na i gat 225,868 manmeri ol i kisim baptais.
Bung Bilong Tingim Dai Bilong Jisas
Namba wan bikpela miting bilong ol long olgeta yia, em Memorial bilong tingim dai bilong Jisas. Dispela lain i bung long dispela miting long 1986, em tu i go bikpela, na 8,160,597 i bung; namba tru i antap long dispela, tasol ripot bilong sampela kantri i no kamap, long wanem, i gat planti hevi i kamap long ol dispela hap na ol i no inap salim ripot bilong en. Ol man i kisim bret na wain bilong Memorial em 8,927; dispela namba i go daun liklik, long wanem, sampela man, em spirit holi i makim ol pinis, ol i lapun na ol i dai na pinisim wok bilong ol long graun.—Revelesen 2:10.
Planti manmeri ol i bihainim tok bilong Jisas na ol i bung long dispela miting ol i gat hatwok tru long i kam, tasol ol i strongim bel na ol i no pret. (1 Korin 11:23-26; Jon 16:33) Long wanpela hap bilong Afrika ol i tambuim wok bilong Jehova long en, kongrigesen i bung long haus bilong wanpela sista bilong mekim Memorial. Ol i kirapim tok bilong miting na 8-pela minit bihain, taim brata i toktok yet, ol polis i kam bilong holim ol brata. Polis i tokim ol long pasim miting. Tasol long pasin isi ol brata i tokim ol, ol i mas mekim dispela miting bilong Memorial bilong tingim dai bilong Jisas. Ol i toktok gut long polis long dispela, na polis i larim ol i mekim miting na ol polis i harim. Ol i pinisim gut miting na nau ol polis i holim olgeta brata na bringim ol i long polis-stesen. Ol polis i sutim planti tok na askim long ol na ol i kalabusim 5-pela. Ol i kalabus inap liklik taim na bihain ol i lusim kalabus. Tasol ol i amamas tru long ol i bin mekim miting bilong Kaikai Bilong Bikpela, bilong tingim i dai bilong em!—1 Jon 5:3, 4.
Long Naijiria lain Witnes i go bikpela na nau i gat 128,461 ol i stap, na inap 394,370 ol i bung long Memorial—em i winim ol narapela taim bipo. Ol i mekim wanpela bung bilong Memorial long hap bilong nupela haus Betel ol i wokim long Igieduma, na klostu olgeta manmeri bilong ples ol i kam bung—winim 700!
Ripot bilong Meksiko i tok: “Maski mipela i go we we long dispela kantri, ol lain bilong autim tok ol i amamas tru long wok bilong ol, na tok i tru i wok long kisim olgeta hap olsem bus i paia. Tok i tru em i namba wan samting long i stap bilong ol dispela brata, na olgeta samting ol i mekim, em ol i tingim tok i tru na ol i mekim. Ol papa na mama na pikinini, olsem olgeta wan wan long famili, ol i wok long kam insait long tok i tru. Planti man, taim ol i kirap nupela long stadi wantaim ol Witnes, long dispela taim yet ol i kirap long kam long ol miting. Dispela pasin i save helpim ol long kamap strong hariap.” Long Meksiko i gat 838,467 manmeri ol i bung long Memorial. Long mun Ogas, 198,003 Witnes ol i autim tok bilong Kingdom long dispela hap; ol i wokim 327,664 Baibel-stadi long haus bilong ol man. Em nau, yumi ken ting olsem lain Witnes long Meksiko bai go bikpela tru long bihain!
Lain Bilong Autim Tok i Go Bikpela long Ol Narapela Hap Tu
Long hap bilong Itali tu, em as ples bilong bikpela lotu ol i kolim Kristen, ol manmeri i autim tok ol i kamap planti tru. Ripot bilong dispela hap i tok, long mun Ogas i gat 139,570 ol i autim tok, em namba wan taim ol i kisim bikpela namba olsem; na 301,009 ol i bung long Memorial, olsem Kaikai Bilong Bikpela. Yumi lukim ripot bilong ol na yumi save, ol Witnes Bilong Jehova i bihainim tok bilong Jisas, em i tok, “Lait bilong yupela i mas lait long ai bilong ol manmeri.” (Matyu 5:16) Yumi ken stori long wanpela Witnes long dispela hap na yumi save, lait bilong ol i lait tru long ai bilong ol man. “Wanpela sista i laik kisim bas na em i wok long putim mani long wanpela masin bilong baim tiket bilong bas na wanpela meri em i save long em em i tokim em, ‘Maski long baim, long wanem yu laik i go klostu tasol.’ Tasol sista i tok, i stret em i mas baim tiket bilong bas, maski em i laik i go klostu tasol. Orait bihain narapela meri i go daun. Nau draiva bilong bas i tokim sista, ‘Yu wanpela Witnes Bilong Jehova, a?’ Sista i tok, ‘Em i stret. Yu askim long wanem?’ Draiva i tok, ‘Yu toktok long baim bas na mi harim, na mi save ol Witnes Bilong Jehova i save mekim olsem, na ol i no save stil o paulim mani o giaman long wanpela samting.’ Orait sampela mun bihain sista i stap long wanpela miting bilong ol na wanpela man i kamap long em na i tok, ‘Yu save long mi? Mi draiva bilong bas na mi toktok wantaim yu long baim tiket bilong bas. Mi lukim gutpela pasin bilong yu na mi tingting nau na mi kirap stadi long Baibel wantaim ol Witnes Bilong Jehova.’”
Long Englan i gat 107,767 manmeri ol i autim tok bilong Kingdom, na wanpela bilong ol em nupela brata, nau tasol em i kisim baptais. Nem bilong em Jos (George). Ripot bilong Englan i stori long em na i tok, “Nau Jos i gat 84 krismas. Inap 50 yia pinis em i mekim wok olsem pasto long haus lotu long ples bilong em, na bihain em i kisim save long tok i tru. Taim em i kirap stadi nupela yet, em i pinis long stadi na em i save sut i go insait long narapela rum na smok. Em i bin smok inap 70 krismas. Tasol taim em i stadi i go inap long sapta 26 bilong buk Yu Inap i Stap Oltaim long Paradais long Graun, em i lusim smok olgeta na em i no smok moa. Nau Jos i baptais pinis inap wanpela yia, na em i givim bel long autim tok na tokim ol man long ol gutpela samting Jehova bai givim long ol man long nupela taim bai Em i kamapim long graun.”
Long hap bilong Federal Ripablik bilong Jemani i gat 118,645 manmeri ol i autim tok. Na i gat planti tausen Witnes moa ol i harim ‘lait bilong ol i lait long ol manmeri’ long narapela hap bilong Jemani ol i kolim Jeman Demokratik Ripablik. Long Jemani ol lapun i wok strong na ol i no laik lusim ‘bainat bilong spirit.’ Ol i laik holim yet na mekim wok long en. (Efesas 6:16, 17) Wanpela kongrigesen i salim dispela stori: “Mipela i gat wanpela sista em i winim pinis 103 krismas na em i stap wanpis yet long haus bilong em. Ol elda i stretim tok na ol i makim wanpela grup inap olsem 7-pela o 8-pela sista na ol i ken senis senis long olgeta wik na lukautim dispela lapun sista. Ol i mekim olsem inap 3-pela o 4-pela yia pinis. Sampela lain olsem welfe, em ol manmeri bilong ples i save baim ol long mekim sampela wok, na ol i save kam wasim em na senisim klos bilong em. Tasol sampela taim ol i gat sik o ol i gat malolo bilong ol, na nau ol sista i save go mekim ol dispela wok. Ol man bilong dispela hap ol i lukim dispela sori Kristen bilong ol sista na ol i kirap nogut long pasin bilong ol Witnes, na dispela i helpim wok bilong autim tok. Dispela lapun sista i gat 103 krismas, tingting bilong em i klia yet, na taim ol dispela lain meri i kam bilong wasim em, em i save autim tok long ol na em i givim buk na nius samting long ol. Tru tumas, “ol man i lukim waitpela gras bilong ol lapun, na ol i save, ol lapun i bin bihainim stretpela pasin na ol i stap longpela taim long graun.”—Provep 16:31.
Tasol singaut i go long olgeta manmeri ol i ken litimapim nem bilong Jehova—“ ol yangpela man na ol yangpela meri, na ol lapun na ol pikinini.” Planti yangpela ol i save ‘tingim Bikpela Man i bin wokim ol.’ (Sam 148:12; Eklisiastis 12:1) Long Brasil, lain bilong autim tok i go bikpela tru, inap 196,948; em namba wan taim ol i kisim dispela bikpela namba long Brasil. Brens-ofis bilong Sosaiti Wastaua long dispela hap ol i kisim pas i kam long wanpela taun i stap longwe, em tupela yangpela brata i bin autim tok long em inap sampela mun. Dispela pas i tok, “Mi laik tokim yupela olsem mi amamas long tupela yangpela man bilong lotu bilong yupela. Mi wanpela tisa, olsem na planti taim mi mas mekim wok long helpim ol yangpela, na mi save ol yangpela long nau ol i no save stap stret olsem ol yangpela long bipo. Tasol dispela tupela yangpela bilong yupela ol i stap olsem gutpela piksa ol narapela yangpela i ken bihainim. Tupela i save daun long ol man i bikpela pinis na klos bilong ol i stret. Na tupela i save gut tru long Baibel! Em pasin tru bilong lotu! Tasol sori tumas, bai ol i lusim dispela taun.” Sampela famili Witnes nau bai ol i go sindaun olgeta long ol dispela longwe ples bambai ol i ken helpim ol dispela manmeri ol i laik harim tok bilong Baibel.
Na olsem wanem long ol kantri ol i no gat lotu ol i kolim Kristen? Ol i laik harim tok i tru bilong Baibel? Wanpela nius bilong Julai 9, 1986 (The Wall Street Journal) i mekim bikpela stori long dispela samting, em het-tok bilong en i tok: “Graun Nogut—Ol Misineri i Planim Pikinini Bilong Kaikai long Japan, Tasol Kaikai i No Save Kamap Gut.” Wanpela misineri bilong Yunaitet Sios Bilong Krais i tok, ‘I no gat rot tru bilong lotu Kristen i ken kamap strong long Japan.’ Na nius i kamapim tok bilong wanpela pris bilong lain Fransisken em i tok, ‘Taim bilong ol misineri long Japan i pinis.’ Tupela misineri wantaim i wok inap 30 yia samting long Japan, na wok bilong tupela i lus nating. Na dispela nius i tok, ‘Aninit long 1 pesen bilong ol manmeri bilong Japan ol i kamap Kristen, na maski ol misineri i hatwok tru na ol i mekim bikpela wok, tasol dispela namba i wok long i go liklik.’ Em stori bilong ol lotu bilong graun ol i kolim Kristen. Tasol olsem wanem long wok bilong ol Witnes Bilong Jehova, em ol i skulim ol Japan long tok bilong lotu Kristen tru? Long olgeta mun inap long 92 mun, lain bilong ol manmeri i autim tok bilong Baibel i go bikpela bikpela, na nau ol inap olsem 113,062 (insait long dispela lain i gat 46,390 ol i mekim wok oltaim olsem painia long olgeta mun). Long Japan ol i mekim 146,316 Baibel-stadi long ol nupela manmeri ol i laikim tok bilong Baibel. Yumi tingim dispela nupela lain ol i stadi na yumi save, ol Witnes Bilong Jehova long Japan ol i ken tingim lain bilong ol bai go bikpela bikpela long bihain! Long Japan yumi lukim tok bilong Aisaia 65:13, 14 i kamap tru.
Wok Painia
Tasol olsem wanem long ples i gat bikpela wok tru bilong ol Witnes—em Amerika? Long dispela hap i gat 744,919 manmeri ol i autim tok bilong Kingdom. Tasol olsem wanem? Ating i gat planti tumas ol i autim tok long Amerika na i no gat wok bilong bikpela lain olsem? Nogat. Ol i gat bikpela wok tru, long wanem, pasin nogut bilong stil, na kisim drak, na pasin pamuk, na sik, na pasin bilong giaman, ol dispela pasin na hevi i go bikpela tru long dispela hap, winim sampela kantri ol i kolim haiden. Ol man i pilim tru ol hevi bilong nau na ol i laik bai i stap bilong ol i gutpela long bihain, ol i laik harim sampela tok i mekim gut bel bilong ol na i givim gutpela tingting long ol long gutpela samting ol inap wetim i kamap bihain. Ol Witnes Bilong Jehova, ol i gat dispela kain tok bilong givim long ol dispela man. (Aisaia 61:1, 2; Matyu 24:14) Long Amerika long yia 1986, ol dispela manmeri bilong autim tok ol i lusim 146,673,490 aua long autim gutpela tok bilong Kingdom. Yumi skelim ol dispela aua wantaim aua bilong yia 1985 na yumi save ol i winim 16,449,229 aua moa long 1986 (em olsem 12.6 pesen moa). Na ol i tilim 6,138,938 buk, na dispela namba tu i winim bilong bipo (inap olsem 23.2 pesen ). Long mun Epril tasol ol i bin tilim 1,000,000 buk i stori long bel isi na gutpela sindaun bai kamap tru bihain na yumi inap bilip na wetim dispela samting i kamap.
Na bikpela samting tru yumi lukim long ripot bilong Amerika, em planti manmeri moa ol i kirap mekim wok painia oltaim na nau i gat 45,786 painia oltaim. Dispela lain i go bikpela inap 23 pesen. Sapos yumi bungim dispela lain wantaim 43,369 ol i mekim wok painia haptaim na 279 painia salim, em nau, long olgeta mun i gat klostu 90,000 painia ol i autim tok bilong Kingdom bilong God. Insait long dispela lain i gat ol yangpela na ol lapun tu, em ol i skelim gut taim bilong ol na ol i laik mekim wok long en bilong litimapim nem bilong Jehova.
Mekim Gut Wok Bilong Autim Tok
Taim aposel Pol i go long haus bilong ol man na long ol narapela hap bilong skulim ol, em ‘i no surik long telimautim olgeta tok i save helpim ol.’ (Aposel 20:20, 21) Na ol Witnes long nau tu ol i no surik long autim gutpela tok long ol man; ol i givim bel long mekim dispela wok long planti hap bilong graun. Olsem ripot bilong Gwadelup i tok: “Long pinis bilong yia bilong wok, sapos yumi brukim olgeta man bilong dispela hap i go 72 man 72 man, yumi gat wanpela man namel long dispela 72 i autim tok bilong Kingdom. Olsem na olgeta man bilong dispela kantri ol i save gut long mipela! Long planti hap, mipela i mas i go long wanpela hap tasol long olgeta wik bilong autim tok. Tru ating sampela bai tok, ol dispela man bai les long lukim mipela, na mipela bai bel hevi long i go long wanpela hap oltaim long autim tok. Tasol nogat. Long olgeta taim mipela i save painim ol nupela man i laik harim tok. Orait i gat sampela samting i kamap na yupela inap save mipela i tok tru? I gat. Long mun Epril 4,558 manmeri bilong autim tok ol i mekim 7,136 Baibel-stadi! Wanpela nius bilong dispela hap i raitim wanpela het-tok long en, olsem: ‘Ol Witnes Bilong Jehova—Ol i Win Tru long Pasin Bilong i Go long Ol Haus’! Mipela i amamas tru long dispela tok. Long dispela yia bilong wok, i gat 458 nupela brata sista ol i kisim baptais.” Sapos yumi wok strong na yumi amamas long autim tok long hap bilong yumi inap planti taim, na yumi save long ol manmeri bilong dispela hap na yumi mekim gut long ol olsem pren bilong ol, na long pasin sori na pasin isi yumi givim gutpela tok long ol na bai ol i no ken tingting kranki moa long yumi—dispela pasin bai helpim yumi long painim planti manmeri ol i gat pasin olsem sipsip, na ol inap harim tok bilong yumi.
Jehova i blesim tru wok bilong ol wokman bilong em long wanpela hap bilong Afrika em gavman i tambuim wok bilong yumi na i gat bikpela pait i stap. Long dispela hap planti brata bilong yumi ol i karim bikpela hevi na ol i kalabus, na ol man i kilim i dai sampela yangpela brata. Tasol long mun Epril wok bilong ol Witnes long dispela kantri i kamap gutpela moa. Planti manmeri moa ol i kirap long autim tok, i winim bilong yia i go pinis inap 29 pesen. Ol dispela gutpela brata bilong yumi ol i givim bel tru long mekim dispela wok! Olgeta wan wan i autim tok inap 18 aua (olsem averes) long mun Epril, na olgeta wan wan i mekim 2.6 Baibel-stadi (olsem averes ).
Brens-ofis i lukautim wok bilong dispela hap i kisim pas em ol brata i raitim long tok hait na ol i stori long ol hevi i painim ol long dispela hap. Dispela pas i tok: Bikpela san i wok yet long kukim mipela. Dispela san i strong tumas na mipela i hatwok long wokabaut long dispela san na lukim sampela man. Tasol mipela save, skin bilong mipela inap lain long wokabaut long taim bilong kol o taim bilong strongpela san na long ol ples nogut tu. Tasol maski ol dispela hevi i stap, mipela i karim ol dispela hevi na ating mipela bai abrusim bagarap na i stap laip yet.’ Em nau, yumi inap pilim tru hatwok bilong ol dispela brata, na yumi kirap nogut long pasin bilong ol long sanap strong na stap gut long wok bilong Jehova.
Taim olgeta wan wan i stap gut long Jehova, orait oganaisesen olgeta i stap gut long Jehova. Em nau, dispela kain oganaisesen i bilong ol Witnes Bilong Jehova, i gat 3,229,022 ol i stap long olgeta hap bilong graun! Ol i gat tingting long abrusim bagarap long taim bilong “bikpela hevi” na ol i ken i stap aninit long Kingdom bilong Krais na mekim wok bilong kamapim paradais long olgeta hap bilong graun. (Revelesen 7:14; 21:3, 4; Aisaia 65:17, 21-23, 25) Ol i amamas, long wanem ol i lukim olsem Jehova i blesim wok bilong ol long nau tu, maski ol man “i redi long harim tok” o “ol i no redi.” (2 Timoti 4:2) Ol narapela pes i kam bihain long dispela i kamapim long ples klia olsem ol i bihainim gut as tok bilong teks bilong yia 1986: i tok: “Go telimautim tok bilong kingdom bilong God.”—Luk 9:60.
[Blok/Piksa long pes 8, 9]
Some Features of the Global Report of Jehovah’s Witnesses
(See Watchtower Volume)
Increase:
Peak of publishers: 3,229,022 6.8%
Monthly average of pioneers: 391,294 21.2%
Total hours of preaching: 680,837,042 15.3%
Average monthly home Bible studies: 2,726,252 14.6%
Total number baptized 1986: 225,868 19 %
[Sat long pes 10-13]
RIPOT BILONG WOK BILONG OL WITNES BILONG JEHOVA LONG 1986
(Lukim buk o magasin)
[Ol Piksa long pes 8, 9]
AUTIM TOK “LONG BUNG NA LONG OLGETA HAUS” “I GO INAP LONG OLGETA HAP GRAUN”
Davao Filapin
Venis Itali
Kasel Kum Englan
Gala Nowe
Kaulun Hong Kong
Taipei Taiwan
Kwinstaun Nu Silan
Bolgatanga Gana
Paris Frans
Ketsaltenango Gwatemala
Kerala India
Banf Kanada