Ol Evanselis i ‘Bungim Kaikai’ Long Olgeta Hap

“Klok i wok na han bilong en i laik kamap long taim bilong Amagedon, na ol Witnes Bilong Jehova i wok strong moa long helpim planti bilong yumi long tanim bel bambai yumi no ken lus long dispela bikpela bagarap.”−Edita Ian Boyne i bin tok olsem long wanpela nius (“The Sunday Gleaner”) bilong Mas 15, 1987, long Kingston, Jameka.

DISPELA edita i tok stret. Ol Witnes Bilong Jehova i bilip olsem klostu Amagedon bai kam na long Amagedon God bai pinisim ol man nogut, na nau ol man i stap long taim bilong God i skelim pasin bilong ol, olsem taim bilong kot. (Revelesen 14:6, 7) Olsem na i gutpela sapos ol man i ken harim tok bilong ol Witnes; ol i gat gutpela tok bilong givim long ol. Krais Jisas i nambawan evanselis long graun, na em i kirapim wanpela lain ol i bin mekim wok evanselis “inap long olgeta hap graun.” (Aposel 1:8; Kolosi 1:23) Na Jisas i tok, i gat bikpela wok evanselis bai kamap tu long taim bilong yumi. (Matyu 24:14) Long nau i gat wanpela lain, em ol Witnes Bilong Jehova, ol i wok strong long autim gutpela tok bilong Kingdom bilong God long 210 kantri.

Tasol ol Witnes Bilong Jehova i no autim tok tasol; ol i save mekim wok tisa na lainim ol man long tok bilong Baibel. Jisas i givim wok long lain bilong em long ‘mekim olgeta lain manmeri i kamap disaipel na lainim ol long bihainim olgeta tok em i bin givim long ol’ (Matyu 28:19, 20) Nau mipela laik bai yu save long sampela manmeri, em dispela wok bilong ol Witnes i bin helpim ol.

Meksiko

Vejinia (Virginia) em i lapun tru, em i winim 110 krismas, na em i tok, “Sapos man i no save long Jehova, maski em i lapun pinis, i gat taim yet bai em i ken lain na kisim save long Jehova.” Taim dispela meri i yangpela, em i strong long mekim wok bilong lotu giaman na inap 4-pela yia em i pasim ol klos bilong dispela lotu. Em i tok: “Mi bin mekim olsem, tasol mi pilim mi sot long sampela samting.” Em i laik save long planti samting bilong Baibel, tasol em i no painim sampela man inap lainim em long ol dispela samting. Em i askim ol tisa bilong misin bilong em, “Nem bilong God husat?” Ol i bekim na i tok, “Nem bilong God em God tasol.”

Tasol long 1983 bubu bilong em i kirap long lainim tok bilong Baibel wantaim ol Witnes Bilong Jehova. Dispela bubu i bekim dispela askim em Vejinia i laik save long en; bubu i tokim em, nem bilong God em Jehova. (Sam 83:18) Dispela i kirapim Vejinia na em i tokim ol Witnes long mekim Baibel-stadi long em yet. Tupela yia bihain, olsem long Jun 2, 1985, taim em i gat 108 krismas, em i kisim baptais.

Em i tok, “Jun 2, 1985, em i bikpela de bilong mi, long wanem, long dispela de i olsem mi kamap laip. Mi lapun, tasol long olgeta mun mi save autim tok inap 5-pela o 6-pela aua samting. Mi save holim stik na wokabaut. Mi no laik raun long ka; mi laik wokabaut long lek, long wanem dispela bai helpim skin bilong mi long i stap strong.”

India

Wanpela man, bipo em i bin mekim planti pasin nogut, em i tok: “Bipo mi wanpela dripman na man bilong kros pait. Mi bin mekim wok long ol drak, na pilai laki, na ol man i givim sigaret long mi na mi smok, na mi bin dring tu. Mi mekim ol dispela samting, tasol mi insait long ol wok bilong misin bilong mi tu.” Ol Witnes Bilong Jehova i bungim dispela man long haus bilong em, na ol i kirapim Baibel-stadi long em, na em i kirap long bihainim ol tok em i lainim, na em i lusim ol pasin nogut. (Provep 2:1-22; 2 Timoti 3:16) Nau em wantaim meri bilong em na 2-pela pikinini meri bilong em ol i wok long helpim sampela ol man long senisim pasin bilong ol na lusim ol pasin nogut.

Beljam

Tupela yangpela marit i kros long God. Bilong wanem? Namba wan pikinini bilong tupela, em pikinini meri, em i dai pinis taim em i gat 10-pela de. Na namba 2 pikinini bilong tupela em i lek nogut. Na tupela i kamapim namba 3 pikinini, na em i gat strongpela skin na em i no gat sik samting, tasol taim em i winim 5-pela mun, wantu em i dai pinis. Mama i ting, sapos God em i Man bilong sori em i no ken larim ol dispela samting nogut i kamap. Em i ting olsem: Ol manmeri nogut i save kamapim pikinini na ol i stap gutpela na olsem wanem ol pikinini bilong mi i bagarap?

Bihain wanpela Witnes Bilong Jehova i autim tok long ol haus long hap bilong dispela meri, na Witnes i kamap long haus bilong em. Witnes i tokim em long promis bilong God long kamapim gutpela taim na bai ol man i ken i stap amamas. Tasol meri i no bilipim dispela tok. Em i ting God i no olsem Papa i stap long heven na i gat pasin sori. (Sam 37:10, 11) Tasol em i kisim sampela buk i gat tok bilong Baibel long en. Witnes i go bek lukim em long sampela taim, na nau em i pilim ol gutpela tok bilong Baibel, na kros bilong em i wok long slek, na em i kirap long bilip long God. Nau em wantaim man bilong em i tingting strong long taim Paradais i kamap long graun na Jehova bai mekim gut skin bilong pikinini man bilong tupela, na Em bai kirapim bek dispela tupela narapela pikinini.−Jon 5:28, 29; Revelesen 21:1-4.

Potugal

Wanpela Sande long moningtaim wanpela meri i wokabaut karim bek em kaikai i pulap long en. Em i bungim tupela marit. Em namba wan taim ol i bung. Tupela hia em ol Witnes Bilong Jehova, na ol i raun mekim wok evanselis. Tupela i mekim gutpela tok long meri, tupela i tok, “Yu lukautim gut famili bilong yu long kaikai, em gutpela. Tasol husat bai helpim ol man bilong graun long ol samting ol i sot long en?” Na nau tupela yet i bekim na i tok, God tasol inap mekim. (Sam 107:8, 9; Aisaia 33:24) Meri i tingting na i tok: “Olsem wanem? God inap stretim hevi bilong mi?” Tupela Witnes i tok: “Em inap.” Meri i tokim tupela long kam long haus bilong em, na tupela i kirapim Baibel-stadi long em. Man bilong em i lukim pasin bilong meri i senis na i kamap gutpela, na nau em tu i kam insait long Baibel-stadi bilong ol, na bihain liklik pasin bilong em tu i senis na i kamap gutpela.

Bihain meri i tokim dispela tupela Witnes, paslain long taim em i bin bungim tupela long dispela Sande, em i bin traim kilim i dai skin bilong em inap tupela taim. Long dispela taim em i gat bikpela hevi, long wanem em wantaim man bilong em i pasim tok pinis long brukim marit bilong tupela. Tasol nau em wantaim man bilong em na ol pikinini tu ol i stap wanbel na ol i lain long gutpela tok na ol i kamap strong long bilip.

Tailan

Inap planti yia ol spirit nogut i bin mekim nogut long wanpela meri i stap long hap bilong not long Tailan. Em i bungim tupela Witnes taim tupela i mekim wok evanselis, na em i kisim sampela buk long tupela, na em i orait long tupela i ken mekim Baibel-stadi wantaim em. Ol i stadi inap tupela mun, na nau em i save, Baibel i tok em i mas rausim long haus bilong em ol samting bilong lotu giaman, olsem ol piksa na imis samting, na em i mas brukim haus spirit bilong em; dispela haus spirit em bikpela samting long em, long wanem ol i bin wokim bilong lukautim famili bilong em na bai ol spirit nogut i no ken mekim nogut long ol. (Aposel 19:19; 1 Korin 10:21; 1 Jon 5:21) Nau ol spirit nogut i lusim em, na em inap givim bel long helpim ol narapela man long kisim save long dispela wanpela God tru, em Jehova.

Kenya

Wanpela raskol i bosim wanpela lain raskol, na sampela man i tokim em, ol polis i painim em bilong sutim em long gan na kilim em i dai, long wanem ol polis i tok em i man nogut tru. Dispela man i harim dispela tok, tasol em i lap. Bihain em wantaim lain raskol bilong em ol i laik mekim wanpela samting nogut, tasol ol samting i popaia. Lain raskol i ranawe lusim em na em wanpela i stap na ol man i raunim em na ol i belhat na ol i laik bagarapim em. Polis i kam na kisim em i go kalabus na em i wetim kot.

Loya bilong em i tokim em long sampela tok em i ken mekim bilong haitim rong bilong em. Em i stap long rum gat na em i tingim wanpela Witnes Bilong Jehova i bin kam lukim em planti yia bipo. Nau em i hevi long ol pasin nogut em i bin mekim, na em i beten askim God long helpim em, na taim em i beten em i kolim nem Jehova. (Lukim Aposel 10:1, 2.) Taim em i sanap long kot em i tokaut olsem em i bin mekim ol dispela rong; em i no haitim; jas i kirap nogut long dispela samting. Man i kilim man i dai, dispela man yet i mas i dai; em lo bilong gavman bilong Kenya. Tasol dispela man i no haitim rong em i bin mekim, olsem na jas i no givim bikpela strafe tumas long em; jas i tok em i mas kalabus inap 10-pela yia long strongpela kalabus.

Em i stap kalabus na em i givim bel long kaunim ol buk na nius bilong Baibel, na planti taim em i beten askim God, sapos inap ol i mas sotim kalabustaim bilong em bambai em inap mekim wok bilong God. Em i kirap nogut, long wanem bihain ol i tok ol i sotim taim bilong em inap 5-pela yia na em i mas i stap 5-pela yia tasol long kalabus. Dispela taim i pinis na em i lusim kalabus na wantu em i kirap long stadi na lainim tok bilong Baibel wantaim ol Witnes Bilong Jehova. Liklik taim bihain em i kisim baptais na nau em i wok long stretim rot bambai em inap mekim wok evanselis long olgeta de.

Em sampela stori tasol bilong makim wok evanselis ol Witnes Bilong Jehova i save mekim, na ol inapim dispela wok bilong ol bilong autim tok “i go inap long olgeta hap graun.” I gat planti tausen stori moa yumi inap kolim na i stori long wok ol Witnes i save mekim. Orait, nau yumi ken tok, ol Witnes Bilong Jehova tasol ol i evanselis tru.