Nupela Taim−i Klostu Pinis!
PASIN bilong dispela graun i laik pinis! Tru dispela samting bai kamap, o . . . ? Orait, skelim gut ol samting i kamap long graun long nau.
Ol man i hipim pinis planti planti bom nogut bilong nuklia inap long bagarapim olgeta man meri pikinini planti taim. Long planti kantri ol lain bilong kantri yet ol i pait, olsem long Angola na Mosambik. Na long hap bilong Saut Afrika na Sri Lanka na sampela kantri moa, narapela lain bilong kantri yet i birua long narapela lain. Ol paitman i biruaim gavman na bikpela hangre i kilim i dai planti man.
Na olsem wanem long sik nogut AIDS? Wanpela nius bilong Saut Afrika (Sunday Times bilong Oktoba 25, 1987) i tok, dispela nupela sik i kain olsem wanpela sik nogut i bin kamap inap olsem 600 yia bipo na i kilim i dai planti planti man long Yurop. Na nius i tok, ‘Nau yumi save, sik AIDS i kisim pinis planti man long Afrika na bai ol i dai: Long sampela kantri long Afrika inap olsem 6-pela man long olgeta 10-pela 10-pela bai ol i dai paslain long yia 1994.’
Planti man i tingim ol dispela samting nogut i kamap long graun na ol i pret. Sampela yia bipo, wanpela saveman (em Harold C. Urey i winim prais Nobel), em i tok: “Nau bai yumi pret na yumi kaikai, yumi pret na yumi slip, yumi pret na yumi wokabaut, yumi pret na yumi dai.” Krais Jisas, em i nambawan bikpela profet i bin i stap long graun, em i kolim ol samting i mas kamap long taim bilong pinis bilong pasin bilong dispela graun na em i tok, ol man bai “tingting long ol samting i laik kamap long graun, na bai bel bilong ol i pret tru.”−Luk 21:26.
Tasol planti man i no pret. Ol i amamas. Bilong wanem ol i amamas? Long wanem ol i save, pasin bilong dispela graun (i no graun tru) i laik pinis nau. Ol i bilip tru olsem nupela taim i klostu pinis. I gat wanem as na ol i bilip tru olsem? Long wanem ol i lukim planti samting i kamap tru olsem Baibel i tok profet pinis long en.
Olsem: Ol disaipel i tokim Krais Jisas long kolim ol samting bai kamap olsem mak na ol i ken save, em i kam bek pinis na pasin bilong dispela graun i laik pinis. Jisas i tokim ol: “Wanpela lain man bai i kirapim pait long narapela lain man. Na lain bilong wanpela king bai ol i kirapim pait long lain bilong narapela king.” Long yia 1914, wantu Namba Wan Pait Bilong Olgeta Hap i kirap. Planti planti man i dai long dispela pait, winim olgeta pait bilong bipo. Hamas soldia ol i dai? Inap olsem 9,000,000, na planti milion man i no insait long ami ol tu i dai! Tasol Namba Tu Pait Bilong Olgeta Hap i bagarapim planti milion man moa. Inap olsem 55,000,000 ol i dai! Jisas i tok bai i gat ol bikpela bikpela pait olsem, na bai i gat bikpela hangre na guria na sik tu, na pasin bilong sakim lo bai i go bikpela.−Matyu 24:7-13; Luk 21:10, 11.
Aposel Kristen Pol tu i bin kolim stret ol samting i kamap long graun long nau, em i tok: “Long las taim bai planti hevi nogut tru i kamap. Bai ol man i laikim ol yet tasol, na bai ol i laikim tumas mani. Bai ol i litimapim nem bilong ol yet, na hambak nabaut, na tok bilas long God. Bai ol i sakim tok bilong papamama. Bai ol i no save tenkyu. Bai ol i sakim olgeta pasin holi. Bai ol i no save pren long ol wanblut bilong ol yet. Bai ol i no lusim kros. Bai ol i tok baksait nabaut. Bai ol i no save bosim laik bilong bodi bilong ol. Bai ol i bagarapim ol man nabaut. Bai ol i birua long olgeta gutpela pasin. Bai ol i putim ol pren bilong ol long han bilong ol birua. Bai ol i bihainim kwik olgeta tingting kranki bilong ol yet. Bai ol i tingim ol yet i bikpela man. Bai ol i laikim tumas kain kain amamas bilong bodi, na ol i no laikim God. Bai ol i bihainim pasin bilong God long skin tasol na bai ol i givim baksait long strong bilong pasin bilong God. Yu mas surik long ol dispela man.” (2 Timoti 3:1-5) Spirit holi bilong God i givim tingting long Pol na em i raitim ol dispela tok, olsem na Pol inap kolim stret ol dispela samting i kamap long nau.
Na Jisas yet i stori long taim bilong pinis na bihain em i tok: “Sapos yupela i lukim ol dispela samting i kamap, orait yupela i ken save, kingdom bilong God i kam klostu pinis.” (Luk 21:31) Planti milion manmeri i save kolim beten bilong Jisas na ol i beten na tok Kingdom bilong God i mas i kam. (Matyu 6:9, 10) Tasol sapos yu tokim ol: “Dispela Kingdom bai mekim wanem wok tru?” ol i no inap bekim tok, long wanem ol i no save. Tasol ol milion milion manmeri i save wok strong long lainim tok bilong Baibel ol i save, dispela Kingdom bai pinisim pasin nogut nau i stap long graun, na em bai kamapim nupela taim na bai ol man i kisim planti blesing. Tasol olsem wanem Kingdom bai mekim dispela wok? Na long wanem taim?