Ol Pasin Bilong Lotu​—⁠Ol i Lotuim God Long Pasin i Tru?

KRAI i kamap long tudak long wanpela ples matmat long ailan Janisio long Raunwara Patskwaro long Meksiko. Wanpela man bilong lain Taraskan em i givim bel long lotu na em i singaut long wanblut i dai pinis na em i tok: “Salga, salga, salga” (“Kam ausait, kam ausait, kam ausait”). Em i kolim wanpela beten ol i raitim pinis na em i tok, “Korona Holi i mas helpim yu na brukim sen i kalabusim yu.”

Em i mekim dispela samting long De Bilong Ol Man i Dai Pinis. Long dispela de, kirap long moningtaim tru, ol meri pikinini i go bilasim matmat bilong ol tumbuna long ol plaua samting. Na ol i putim sampela pikinini bilong diwai na ol kek samting olsem ofa klostu long ol matmat. Nau long tudak, maski em i taim bilong kol, ol i go long ples matmat na kolim kolim ol beten o ol i was i stap long lait bilong ol planti tausen kandel em ol man i bin putim bilong ol man i dai pinis.

Ating ol dispela pasin bilong lotu i narapela kain tru long ai bilong ol man bilong ol narapela hap, tasol long ol dispela manmeri em pasin bilong lotu ol i bin bihainim inap planti handet yia em wanpela de holi bilong ol Katolik, ol i kolim De Bilong Tingim Tewel Bilong Ol Man i Dai Pinis. Long planti kantri long Latin Amerika, ol i save bihainim pasin bilong ol tumbuna na long dispela de planti tausen tausen Katolik ol i go long ol ples matmat, na kolim ol beten ol man i raitim pinis, na ol i putim sampela samting olsem ofa bilong ol man i dai pinis.

Long hap bilong Latin Amerika ol i save mekim kain kain pasin bilong lotuim ol piksa. Planti planti piksa bilong Krais na bilong Maria i pulap long olgeta hap; long haus bilong planti man na long ol stua yu inap lukim piksa bilong Krais na piksa bilong Maria. Sapos yu kalap long bas, ating bai yu lukim piksa bilong Maria i stap long hap bilong draiva. Na long ples bilong wokabaut namel long ol sia bilong bas, ating sampela piksa bilong Maria i stap, em ol i no putim kandel long en, tasol i gat kala kala lait long en i kirap i dai, kirap i dai.

Long kantri Kolombia ol i sanapim draipela piksa bilong Krais o bilong Maria long het bilong bikpela maunten klostu long sampela biktaun. Long het bilong maunten Monserate i gat wanpela haus lotu i stap em planti planti piksa i pulap long en na ol man i save bilip tru long ol dispela piksa. Ol i save makim sampela wik long olgeta yia olsem wik holi, na long dispela kain taim planti tausen manmeri long Bogota ol i save go antap long dispela maunten; sampela i save wokabaut long skru i go antap na ol ston bilong maunten i katim skin bilong ol long skru bilong lek na blut i kapsait.

Pasin bilong putim ol piksa bilong lotu long en, na kruse, na makim ol de holi o pestode−ol manmeri long olgeta hap ol i save bihainim ol dispela pasin. Ol i bin kisim ol dispela pasin long ol tumbuna na ol i bihainim inap planti handet yia pinis, olsem na ol i ting ol dispela pasin i pasin holi.

Tasol Ol i Lotuim God long Pasin i Tru?

Bikpela lain manmeri ol i no tingim tumas ol dispela pasin bilong lotu ol i bin kisim long ol tumbuna; ol i bihainim tasol. Tasol planti man, em ol i tok ol i Kristen, ol i gat tupela tingting long ol dispela pasin. Long wanem Krais Jisas yet em i bin tok: “Olgeta man i laik lotu tru bai ol i lotu long Papa long spirit na long pasin i tru.” (Jon 4:23) Planti pasin bilong lotu ol man i bihainim, em lotu bilong ol haiden i as bilong en, o ol i wankain tru olsem sampela pasin bilong ol lotu haiden. Olsem: Dispela De Bilong Tingim Tewel Bilong Ol Man i Dai Pinis em i wankain olsem pestode bilong lotu Budis ol i kolim “Ullambana.” Ol Budis i makim dispela de bilong “tingim ol tumbuna i dai pinis na bilong helpim ol spirit bai ol i lusim kalabus long dispela graun.” (Buk The New Encyclæpedia Britannica, 1976, Micropædia, Volyum 1, pes 260) Ol manmeri i bihainim ol dispela pasin bilong lotu, yu ting ol i lotuim God long pasin i tru?

Sampela man i tok, sapos misin i orait long ol dispela pasin bilong lotu, yumi ken bihainim na i no gat rong. Long yia 1965 ol hetman bilong Misin Katolik i bung (Second Vatican Council) na ol i tokaut olsem: ‘Misin i no bilip tasol long Baibel Holi. Nogat. Misin i bilip long ol pasin holi i kam long ol tumbuna na long Baibel Holi tu wantaim.’

Tasol olsem wanem sapos pasin bilong lotu ol man i bin kamapim i no stret wantaim ol tok bilong Baibel em spirit bilong God i as bilong en? Orait, nau yumi ken skelim sampela pasin olsem wantaim tok bilong Baibel.