Yu Save Bihainim Tok?
PAPA i laikim tru ol pikinini bilong em, em bai skulim gut ol, long wanem, em i laik bai olgeta samting ol i mekim taim ol i bikpela pinis i ken kamap gutpela na ol i ken i stap amamas. Na ol pikinini i laikim tumas papamama na daun long ol bai bihainim olgeta tok bilong papamama, long wanem, ol i save dispela bai helpim ol. Olsem tasol, Papa bilong yumi long heven, em Jehova, em i laikim tumas yumi na em i save givim gutpela tok long ol wokboi bilong em bambai olgeta samting ol i mekim i ken kamap gutpela na ol i ken i stap amamas. Olsem na i bikpela samting yumi mas bihainim ol lo God i givim long yumi long rot bilong Baibel na oganaisesen bilong em long graun.
Insait long Famili
Em i givim lo long yumi long planti samting. Wanpela samting em olsem: Em i givim lo long yumi long famili. God em i as bilong marit na famili. Baibel i tok, God i bin givim meri long namba wan man na em i tokim tupela long kamapim pikinini. (Stat 1:27, 28; 2:22-24) Dispela Man bilong wokim yumi em i givim lo long olgeta insait long famili long wok ol i mas mekim. Olsem: Man em i papa, em i het bilong famili, olsem na em i gat wok bilong skulim famili na givim kaikai na klos, na haus long ol, na em i lukautim famili na stretim ol. Papa i mas skelim ol bikpela samting famili i laik mekim na stretim tok long dispela. Man i mas tingim gut meri bilong em na sindaun gut wantaim em, long wanem, bodi bilong meri i no strong tumas. (Efesus 5:22, 23; 1 Timoti 5:8; 1 Pita 3:7) Meri i mas aninit long man bilong em na daun long em, na em i poroman na helpim bilong man bilong em. Na Baibel i tok, ol pikinini i mas bihainim tok bilong papamama.—Stat 2:18; Efesus 6:1-3; 1 Pita 3:1, 2.
Wanem samting bai kamap sapos ol i no bihainim ol dispela lo? Sapos man i no tingim gut meri bilong em, na meri i no daun long wok bos bilong man bilong em, tok pait na kros bai kamap, na dispela inap bagarapim marit bilong tupela na ating bai tupela i bruk. Planti pikinini i no bihainim tok bilong papamama na ol i bikhet, na dispela i givim bikpela bel hevi tru long papamama bilong ol. Planti taim papamama i gat asua long dispela, long wanem, ol i no bin stretim gut ol pikinini na dispela i bagarapim tingting bilong ol pikinini na ol i bikhet.—Efesus 6:4.
Ol man bilong helpim famili long stretim hevi na ol dokta bilong stretim sik bilong tingting na ol narapela man tu i givim planti kain kain tok long ol famili long rot bilong stretim hevi bilong ol, tasol ol lo i stap long Baibel i gutpela tru bilong helpim famili, long wanem God em i As bilong ol tok bilong Baibel na em i As bilong famili. Sapos yumi bihainim ol tok bilong Baibel, bai yumi stap amamas tru na stap belgut.—Buk Song 19:7-9.
Insait long Kongrigesen
Yumi mas bihainim olgeta tok Krais Jisas, em Het bilong kongrigesen Kristen, i givim long yumi long rot bilong “wokboi i gat gutpela tingting,” em i olsem maus bilong oganaisesen bilong God long graun. (Matyu 24:45-47; Efesus 5:23) Olgeta insait long kongrigesen i mas bihainim tok, bilong helpim kongrigesen long i stap bel isi na i stap wanbel. Olsem: Ol man i go pas long lainim kongrigesen na long helpim ol narapela, olsem ol elda, ol yet i mas bihainim ol tok ol i kisim long oganaisesen bilong Jehova. Dispela bai helpim wok bilong ol i kamap gutpela. Oganaisesen i save givim tok long ol bilong helpim ol long pasin bilong autim tok, na long rot bilong stretim ol hevi insait long kongrigesen, na long rot bilong stretim na strongim ol brata na helpim ol man i gat hevi, na ol kain samting olsem. Na tu oganaisesen i givim tok long ol bilong soim rot long ol bilong redim gut ol miting, na bai ol tok bilong ol miting i skulim na strongim olgeta manmeri i save bung wantaim long kongrigesen Kristen.—Aposel 20:20; Rom 12:6-8; Galesia 6:1; 1 Tesalonaika 3:1-3.
Ol elda o ol wasman i mas i stap olsem gutpela piksa. Lain Bilong Bosim Ol Witnes Bilong Jehova i salim tok long ol elda long ol samting ol i mas mekim na ol elda i mas bihainim gut ol dispela tok. Na ol i mas tingim rot bilong helpim ol brata sista long hap bilong ol long bihainim ol dispela tok. Yumi mas save, Het bilong ol kongrigesen Kristen, em Krais Jisas. Em i save tingim olgeta insait long ol kongrigesen long olgeta hap bilong graun, na em i kamapim ol samting bilong strongim ol na helpim ol. Olsem na ol elda i mas bihainim ol tok i kam long oganaisesen bilong God. Sapos ol i mekim olsem ol bai stap olsem gutpela piksa bilong olgeta brata sista long olgeta kongrigesen, na dispela bai helpim kongrigesen na lain Kristen olgeta long i stap wanbel.—Aposel 15:1-31; Hibru 13:7; Kamapim Tok Hait 5:6.
Ol Gutpela Samting Bai Kamap
Taim wanpela man i laik wokim wanpela bikpela haus, em i skelim gut ol piksa bilong haus ol man i bin wokim bambai em i ken wokim gut haus na haus i no ken bagarap kwik. Paslain long Bikpela Tait Wara, pasin pait i pulap long graun. God i tokim Noa long wokim wanpela sip. God i tokim em long rot bilong wokim sip na wanem kain man na meri na ol animal i ken go insait long sip bambai ol i ken abrusim bagarap long taim bilong Tait. Noa i mekim wanem? Baibel i tok: “Noa i mekim olgeta samting olsem God i tokim em.” Noa wantaim lain bilong em i no bagarap long Tait Wara. (Stat 6:5, 13-22; 7:23) Taim bilong yumi i wankain olsem taim bilong Noa—pasin nogut i pulap long graun. Long dispela as God bai pinisim olgeta man nogut. Baibel i tokim yumi long ol samting yumi mas mekim bilong abrusim bagarap.—Matyu 24:37-39; 2 Pita 3:5-7, 11.
Olsem na yumi mas amamas long ol tok Jehova i givim long yumi long rot bilong Baibel na oganaisesen bilong em long graun, na yumi mas bihainim ol dispela tok. Sapos yumi mekim olsem, bai olgeta samting yumi mekim i kamap gutpela, na bai yumi stap amamas, na bai yumi abrusim bagarap.