Tingting Gut—Pinis i Klostu
“Taim bilong olgeta samting i laik pinis em i klostu nau. Olsem na yupela i mas tingting gut, na bosim gut ol pasin bilong yupela, bai yupela i ken [beten] gut.”—1 PITA 4:7.
1. (a) Wanem bel hevi i bin painim wanpela bikman bilong lotu na lain bilong em? (b) Sampela samting i no bin kamap olsem sampela man i bin wet long en, olsem na i gat wanem ol askim i stap?
“NAU long nait mi bin kisim tok long God taim mi mekim laspela beten. Em i tok, inap 116,000 manmeri bai go antap long heven na matmat bilong 3.7 milion bilipman i dai pinis bai op olgeta.” Bikman bilong wanpela lotu (Mission for the Coming Days) i tok olsem long nait paslain long Oktoba 28, 1992; ol i tok, long dispela de stret kot bilong God bai painim ol man. Tasol Oktoba 29 i kamap na i no gat wanpela i go antap long heven, na i no gat wanpela matmat i op. Ol lain i bilip long dispela samting na ol i stap long Korea ol i lukim Oktoba 29 i kamap na em i wankain olsem ol narapela de. Planti lain ol i bin kolim wanpela de na ol i tok dispela graun bai bagarap long dispela de, na i no gat wanpela samting i kamap. Tasol ol i wok long kolim yet wanpela de em kot bilong God bai painim ol man. Orait, ol Kristen i mas mekim wanem? Ol i no ken bilip moa olsem pinis i kam klostu, o olsem wanem?
2. Husat i bin tokim ol aposel long wanpela de bilong kot bai kamap bihain? Wanem samting i bin kamap long dispela taim na ol i kisim dispela save?
2 Orait, yumi ken tingim taim Jisas i bin toktok wantaim ol disaipel. Ol i stap long distrik bilong Sisaria Filipai, long hap not-is bilong Raunwara Galili, na traipela Maunten Hermon i stap baksait long ol. Jisas i tokim ol, bai ol man i kilim em i dai. (Matyu 16:21) Na Jisas i tok, sapos man i laik i stap disaipel, em i mas wok long daunim sampela laik bilong em yet. Jisas i toksave long ol olsem: “Pikinini Bilong Man bai i stap long bikpela lait bilong Papa bilong en, na em bai i kam wantaim ol ensel bilong en. Long dispela taim em bai i givim pe long olgeta manmeri inap long pasin ol i bin mekim.” (Matyu 16:27) Jisas i tok long wanpela taim bihain bai em i kam bek, na long dispela taim em bai stap Jas na skelim ol man long kot, olsem husat i bihainim em tru o husat i no bihainim em. Jisas bai skelim ol long pasin ol i mekim; em i no ken skelim ol long save bilong ol o long mani kago bilong ol, nogat. Ol disaipel i mas putim gut dispela tok long tingting bilong ol. (Matyu 16:25, 26) Olsem na Krais Jisas yet i tokim ol disaipel long wetim em i kam bek na skelim ol man long kot.
3. Jisas i tok wanem na ol i ken save tru, bihain em bai kam bek?
3 Orait, nau Jisas i mekim wanpela tok i kamapim klia olsem em bai kam bek tru. Em i tok: “Mi tok tru long yupela, sampela man i sanap hia bai ol i no i dai yet, na bai ol i lukim Pikinini Bilong Man i kam olsem king.” (Matyu 16:28) Inap 6-pela de bihain, samting i kamap bilong truim dispela tok. Jisas i kamap narapela kain, na ol disaipel i stap wantaim em ol i kirap nogut. Ol i lukim pes bilong Jisas i lait olsem san, na klos bilong em i wait nogut tru. Dispela i olsem piksa bilong taim Jisas bai kamap King long Kingdom. Dispela i strongim tru ol tok profet bilong Kingdom! Em i strongpela samting tru bilong kirapim ol disaipel long tingting gut!—2 Pita 1:16-19.
I Gat As na Yumi Mas Tingting Gut
4. Bilong wanem ol Kristen i mas was i stap na wetim em i kam?
4 Klostu wanpela yia bihain, Jisas i sindaun long Maunten Oliv na em i toktok gen wantaim ol disaipel tasol. Ol i lukluk i go long Jerusalem na em i tokim ol long mak bilong kambek bilong em, na nau em i tok: “Yupela i mas was gut. Yupela i no save wanem de Bikpela bilong yupela bai i kam.” Ol i mas was gut oltaim, long wanem, ol i no save wanem de bai em i kam. Ol i mas redi i stap.—Matyu 24:42.
5. Jisas i mekim wanem tok piksa long yumi mas was i stap?
5 Bikpela bai i kam bek olsem wanpela stilman. Em i tok moa olsem: “Yupela tingim dispela samting. Sapos papa bilong haus i save pastaim long wanem taim long nait stilman bai i kam, orait em bai i was i stap na em bai i no inap larim stilman i brukim haus na i kam insait.” (Matyu 24:43) Stilman i no save tokim papa bilong haus wanem taim bai em i kam brukim haus—em bai kam nating. Olsem na papa bilong haus i mas was gut oltaim. Ol Kristen tu i mas was gut na redi i stap, tasol i no olsem ol i pret tasol na was i stap, nogat. Bel bilong ol i kirap tru na ol i wetim Krais i kam olsem king na em bai kirap bosim graun na kamapim gutaim inap wan tausen yia.
6. Bilong wanem yumi mas tingting gut?
6 Tasol maski ol i was gut i stap, i no gat wanpela inap save, wanem de tru em bai i kam. Jisas i tok: “Olsem na yupela tu i mas redi. Pikinini Bilong Man bai i kam long wanpela taim yupela i no ting em bai i kam.” (Matyu 24:44) Olsem na Kristen i mas tingting gut. Sapos em i tingim wanpela de na em i ting Krais bai i no ken i kam long dispela de, nogut Krais i kam long dispela taim! Tru, sampela Kristen long bipo i wok long makim wanpela taim ol i ting pinis bai kamap. Tasol pinis i no bin kamap, olsem na tok bilong Jisas i stret tru, em i tok: “I no gat wanpela man i save wanem de na wanem aua dispela ol samting bai i kamap. Ol ensel long heven i no save, na Pikinini tu em i no save. Papa wanpela tasol em i save.”—Matyu 24:36.
7. Bilong i stap disaipel bilong Krais, yumi mas mekim wanem?
7 Orait, yumi mas kisim wanem tingting long dispela? Bilong i stap disaipel bilong Krais, oltaim yumi mas bilip olsem pinis bilong dispela pasin nogut bilong graun i klostu.
8. Taim lotu Kristen i kamap nupela na i kam inap nau, ol Kristen i gat wanem tingting na i olsem wanpela mak bilong ol?
8 Olgeta Kristen bilong bipo tu ol i bin holim dispela tingting. Ol man i gat save long ol samting bilong bipo, na ol saveman bilong Baibel ol i save long dispela samting. Wanpela Baibel (The Translator’s New Testament) i gat wanpela tok daunbilo long pes i stori long dispela tok “De” na i tok: “Ol Kristen long taim bilong Nupela Testamen ol i redi i stap na wetim De (olsem taim) dispela pasin nogut bilong graun bai pinis na Jisas bai kam bek bilong skelim olgeta man long kot, na em bai kirapim nupela taim bilong bel isi, na em bai stap Bikpela na bosim olgeta hap graun.” Wanpela buk (Encyclopædia Britannica) i tok: “Lotu Kristen i go bikpela long olgeta hap, long wanem, ol Kristen i tingim las de bai kamap, olsem ol i wetim Krais i kam bek. Taim ol Kristen i tingim na wetim las de i kamap, ol i no tingting nating olsem ol i laik bai Kingdom bilong God i kamap na ol i stap nating tasol, nogat.”
Tingting Gut na Was i Stap
9. Tru, sampela tingting bilong Pita long wok bilong Mesaia i kranki, tasol bilong wanem em inap i stap strong?
9 Inap olsem 30 yia bihain long taim Jisas i bin givim ol dispela tok long sampela disaipel em i save laikim ol tumas, aposel Pita i no les long wetim pinis i kamap. Pastaim em wantaim ol narapela disaipel i gat sampela tingting kranki long ol wok samting bilong Mesaia na ol i no klia long en, tasol Pita i stap strong, long wanem, em i bilip tru olsem Jehova i gat pasin sori na bikpela strong, na em bai kamapim tru dispela samting ol i wet long en. (Luk 19:11; 24:21; Aposel 1:6; 2 Pita 3:9, 10) Pita i mekim wanpela tok na yumi inap lukim kain tok olsem long planti hap bilong Nupela Testamen. Em i tok: “Taim bilong olgeta samting i laik pinis em i klostu nau.” Orait nau em i tok strong long ol Kristen: “Olsem na yupela i mas tingting gut, na bosim gut ol pasin bilong yupela, bai yupela i ken [beten] gut.”—1 Pita 4:7.
10. (a) Stori long dispela tok “tingting gut.” (b) Olsem wanem yumi inap skelim gut ol samting yumi mas mekim na bai i stret wantaim laik bilong Jehova?
10 Dispela tok “tingting gut” i no olsem yumi gat bikpela save bilong graun, nogat. Jehova i tok: “Bai mi rausim save bilong ol man i gat gutpela tingting na bai mi pinisim save bilong ol saveman.” (1 Korin 1:19) Dispela tok bilong Pita i olsem yumi mas tingting gut na tingim ol samting bilong spirit na lotu bilong yumi. Olsem bai yumi inap tingting gut na skelim gut ol samting yumi mas mekim na bai i stret wantaim laik bilong Jehova; bai yumi inap save, wanem ol samting i bikpela samting tru na wanem ol samting i no bikpela olsem. (Matyu 6:33, 34) Yumi save, pinis i klostu, tasol yumi no longlong nabaut na mekim ol samting i narapela kain; tasol yumi no ting nau em i taim nating na yumi ken stap olsem tasol, nogat. (Lukim Matyu 24:37-39.) Yumi skelim gut ol samting yumi mekim na yumi tingting gut na was gut long pasin bilong yumi, na yumi tingim God (‘was gut, bai yumi beten gut’) na yumi tingim ol narapela (“laikim tru ol arapela manmeri bilong God”).—1 Pita 4:7, 8.
11. (a) Bilong wanem tingting bilong yumi i mas “kamap nupela”? (b) Taim tingting bilong yumi i kamap nupela, olsem wanem dispela i helpim yumi long skelim gut ol samting yumi mas mekim?
11 Bilong tingting gut, “tingting bilong [yumi] i mas kamap nupela.” (Efesas 4:23) Bilong wanem? Long wanem, yumi bin kisim sin long namba wan tumbuna, na yumi stap namel long ol man i save mekim sin. Olsem na ol samting bilong sin i laik bosim tingting bilong yumi na daunim tingting bilong ol samting bilong spirit. Dispela sin i wok long stiaim tingting bilong yumi i go long ol samting bilong skin na bilong graun. Olsem na taim man i kamap Kristen, em i mas kisim nupela tingting, na dispela bai stiaim tingting bilong em i go long ol samting bilong spirit na em i redi long daunim laik bilong em yet. Olsem na taim em i mas skelim ol samting em bai mekim, olsem kisim bikpela save long skul, o lain long mekim wanpela wok, o kisim wok mani, o mekim sampela amamas samting, o wanem kain klos bai em i putim, o wanem ol narapela samting em bai mekim, bai em i tingim ol samting bilong spirit na skelim ol dispela samting—bai em i no larim ol laik bilong skin i stiaim tingting bilong em. Dispela nupela tingting i helpim em long tingting gut taim em i skelim ol samting em bai mekim, na bai em i pilim tru olsem pinis i klostu.
12. Olsem wanem yumi inap i stap strong long bilip?
12 Taim yumi tingting gut, i olsem yumi stap strong long ol samting bilong spirit. Olsem wanem yumi ken i stap “strong” olsem? (Taitus 2:2) Yumi mas putim ol samting i stret tasol long tingting bilong yumi. (Jeremaia 3:15) Sapos oltaim yumi stadi long tok tru bilong God long Baibel na spirit holi i helpim yumi long kisim gut ol dispela tok, dispela bai helpim yumi long i stap strong long bilip. Olsem na oltaim yumi mas stadi, na autim tok, na beten, na bung wantaim ol Kristen; dispela em i bikpela samting tru.
Taim Yumi Tingting Gut Dispela i Lukautim Yumi
13. Taim yumi tingting gut, olsem wanem dispela i lukautim yumi na yumi no mekim sampela pasin kranki?
13 Taim yumi tingting gut, dispela inap lukautim yumi na yumi no mekim wanpela pasin kranki em inap pasim rot bilong yumi long kisim laip oltaim. Taim yumi tingting gut, dispela i lukautim yumi olsem wanem? Pol i toktok long “lo . . . i stap long tingting.” Sapos man i stap strong long bilip, samting em i laikim tumas, em “lo bilong God,” bai bosim lo i stap long tingting. Tru, “lo bilong sin” i pait wantaim lo bilong God i stap long tingting, tasol Jehova inap helpim Kristen long winim dispela pait.—Rom 7:21-25.
14, 15. (a) Wanem tupela samting i pait long bosim tingting bilong yumi? (b) Olsem wanem yumi inap winim dispela pait i stap long tingting?
14 Orait, nau Pol i skelim tingting em sin bilong yumi i bosim, na man i tingting tasol long inapim ol laik bilong em yet—na Pol i skelim narapela kain tingting, em spirit bilong God i bosim, na man i tingting tasol long daunim laik bilong em yet na mekim wok bilong Jehova. Long Rom 8:5-7 Pol i tok: “Ol man i save wokabaut long pasin bilong olpela bel, tingting bilong ol i save bihainim laik bilong olpela bel tasol. Tasol ol man i save wokabaut long pasin bilong Holi Spirit, tingting bilong ol i save bihainim laik bilong Holi Spirit. Sapos tingting bilong man i bihainim laik bilong olpela bel tasol, orait dispela man bai i dai. Tasol sapos tingting bilong man i bihainim laik bilong Holi Spirit, orait dispela man bai i kisim laip na i stap bel isi. Sapos tingting bilong man i bihainim laik bilong olpela bel, dispela man i save birua long God, long wanem, em i no save stap aninit long lo bilong God.”
15 Orait, long ves 11 Pol i tok, sapos tingting i wok gut wantaim spirit holi, yumi inap winim pait. Em i tok: “Sapos Spirit bilong God i stap insait long yupela, . . . God bai i givim laip long bodi bilong yupela tu, em dispela bodi bilong i dai.”
16. Taim yumi tingting gut, wanem ol samting i no inap pulim yumi?
16 Olsem na sapos yumi tingting gut, bai ol samting bilong graun, olsem ol kain kain amamas bilong skin, na ol mani kago, na pasin pamuk samting, i no inap pulim yumi. Gutpela tingting bai tokim yumi long “i stap longwe long pasin pamuk” na bai yumi inap abrusim bikpela hevi dispela pasin i save kamapim. (1 Korin 6:18) Taim yumi tingting gut, bai yumi putim ol wok bilong Kingdom i go pas long ol narapela samting, na sapos ol i laik givim wanpela bikpela wok long yumi na dispela inap mekim na yumi no stap gut moa long Jehova, dispela gutpela tingting bai lukautim yumi.
17. Taim wanpela sista painia i gat sampela hevi long mani, em i mekim wanem na yumi save em i tingting gut?
17 Long hap bilong Saut-is Esia i gat wanpela yangpela sista i save tingim gut ol samting bilong Kingdom. Em i laikim tumas wok bilong autim tok long olgeta de. Long dispela kantri, planti man i mas wok mani inap 6-pela o 7-pela de long olgeta wik. Papa bilong yangpela sista i no wanpela Witnes Bilong Jehova, na taim sista i winim pinis skul yunivesiti, papa i laik bai em i kisim wanpela wok i gat bikpela pe long en bilong helpim famili. Tasol sista i gat strongpela laik long mekim wok painia, olsem na em i kisim wok haptaim na em i kirap mekim wok painia. Papa i belhat stret na em i laik tromoi olgeta samting bilong sista i go ausait long rot. Papa i save pilai laki oltaim na em i gat bikpela dinau tru, na em i laik bai sista i bekim dispela dinau. Liklik brata i skul long yunivesiti, na papa i no gat mani bilong baim skul. Brata i tokim sista, sapos sista i baim skul bilong em, bihain bai em i kisim wok mani na lukautim famili. Em nau, sista bai mekim wanem? Em i laikim tumas brata bilong em na em i laikim tumas wok painia. Orait, em i tingim gut dispela samting na em i strong yet long mekim wok painia na painim narapela wok. Em i beten long God na em i kisim wanpela wok i gat gutpela pe, na em inap helpim papamama na brata long mani na em inap mekim yet wok painia, em dispela wok em i laikim tumas.
Askim Jehova Long Helpim Yu Long Tingting Gut
18. (a) Bilong wanem sampela man i bel hevi? (b) Wanem sampela tok bilong Baibel inap mekim gut bel bilong ol man i stap bel hevi?
18 Ating sampela disaipel bilong Krais i hatwok long tingting gut oltaim. Ating ol i pilim olsem pinis i no kamap hariap na pasin nogut bilong graun i stap yet, na ol i bel hevi long dispela na ol i les. Tasol pinis bai kamap tru. Jehova i tok promis pinis long en. (Taitus 1:2) Na Paradais tu bai kamap tru long graun olsem Jehova i tok promis pinis. (KTH 21:1-5) Taim nupela pasin i kamap pinis long graun, ol man i bin tingting gut oltaim, bai “laip bilong [ol] i gutpela tru.”—Sindaun 13:12.
19. Olsem wanem yumi inap holimpas pasin bilong tingting gut oltaim?
19 Orait, olsem wanem yu ken holimpas pasin bilong tingting gut? Askim Jehova long helpim yu. (Song 54:4) Stap klostu long em. Yumi amamas tru long Jehova i laik i stap pren bilong yumi! Disaipel Jems i tok: “Yupela i mas i go klostu tru long God, na em bai i kam klostu tru long yupela.” (Jems 4:8) Pol i tok: “Oltaim yupela i mas amamas long Bikpela. . . . Tingim. Klostu nau Bikpela bai i kam. Yupela i no ken wari long wanpela samting. Nogat. Oltaim yupela i mas tokim God long olgeta hevi bilong yupela. Yupela i mas [beten] long God na tok tenkyu long em, na askim em long helpim yupela. Bel isi God i save givim yumi, em i gutpela samting tru . . . God bai i mekim yupela i stap bel isi tru, . . . na bel na tingting bilong yupela bai i stap gut tru.” (Filipai 4:4-7) Na sapos dispela pasin nogut bilong graun i givim bikpela hevi long yu na yu ting yu no inap karim, orait yu mas putim dispela hevi long han bilong Jehova, na em yet bai karim na em bai strongim yu.—Song 55:22.
20. Yumi mas wok yet long mekim wanem, olsem 1 Timoti 4:10 i tok?
20 Tru tumas, pinis i klostu, olsem na yu mas tingting gut! Inap 1,900 yia bipo, dispela tok i bikpela samting long tingim; nau em i bikpela samting tru long tingim. Orait, oltaim yumi mas mekim wok long gutpela tingting bilong yumi long litimapim nem bilong Jehova taim em i wok long stiaim yumi i go insait long nupela taim em bai kamapim.—1 Timoti 4:10.
Bai Yu Bekim Olsem Wanem?
◻ Stori long dispela tok “tingting gut.”
◻ Bilong wanem yumi mas tingting gut nau long dispela taim?
◻ Yumi mas mekim wanem na bai tingting i ken kamap nupela?
◻ Yumi gat wanem pait long tingting bilong yumi?
◻ Olsem wanem yumi inap holimpas pasin bilong tingting gut?
[Piksa long pes 15]
Taim yumi go klostu long God long rot bilong beten, dispela i helpim yumi long tingting gut oltaim
[Piksa long pes 17]
Sapos yumi tingting gut, ol samting bilong dispela graun i no inap pulim yumi