Lotu Bilong Yu i Bikpela Samting o Nogat?

LONG belo long wanpela liklik taun long Afrika i gat bikpela san. Long wanpela ples daun klostu, ol manmeri i paitim kundu na singsing na amamas na paitim han. Ol i no pati; ol i mekim lotu olsem ol tumbuna i mekim. Ol dispela pairap i pait wantaim nek bilong ol man long wanpela haus lotu klostu, em ol i singsing na amamas na mekim tok long kain kain tok ples na “oraitim sik.” Long narapela hap bilong taun, i gat narapela kain lotu gen. Pris bilong lotu Muslim i singautim lain bilong lotu Muslim i kam beten.

Tru tumas, i gat kain kain lotu long ol bikpela na liklik taun long Afrika. Longtaim pinis ol Afrika i amamas long bihainim lotu bilong ol tumbuna. Tasol bihain ol misineri bilong ol misin ol i kolim Kristen ol i kam​—⁠ol i kam bihain long ol ami bilong Yurop​—⁠na ol i laik subim ol Afrika long kamap “Kristen.” Ol i laik subim ol long senisim lotu bilong ol na senisim nem bilong ol tu na kisim ol nem Kristen.

Orait, wanem samting i kamap? Nupela kain lotu i kamap em i bungim bilip bilong ol tumbuna wantaim bilip bilong ol dispela misineri. Inap long nau, planti “Kristen” long Afrika ol i holim ol samting bilong sakim ol spirit nogut. Ol misineri i no kisim lotu Kristen tru i kam, na planti Afrika i bel nogut long pasin bilong ol. Asua bilong ol na nau sampela Afrika i no laik harim tok bilong Baibel.

Tasol planti Afrika i bihainim ol lotu ol i kolim “Kristen.” Long nau planti ol i laikim ol lotu i tok ol i gat ol presen bilong spirit holi na ol inap mekim tok long kain kain tok ples na oraitim sik bilong ol man. Ol dispela kain lotu i kamap planti. Wanpela meri i raitim tok long nius na em i tok, ol Afrika i laikim ol dispela kain lotu, long wanem, ‘ol i ting lotu i mas helpim ol long samting bilong skin, na ol i ting, olgeta samting em i wok bilong ol spirit.’ Tasol sori tru, planti misin olsem ol i mekim dispela wok bilong kisim mani tasol, olsem wok bisnis.

Long nau i gat 6,000 samting lotu long Afrika. Yu ting olgeta i rot bilong God i kisim bek ol man? Bikpela samting em olsem: God i ting olsem wanem long ol dispela lotu?

Yu Ting God i Laikim Olgeta Lotu?

Man bilong wokim yumi em i no ken lusim yumi i stap nating; em i mas soim rot long yumi long pasin bilong lotuim em. (Amos 3:7; Aposel 17:​26, 27) Em i mekim olsem long Baibel. Baibel em i no buk bilong ol waitskin, olsem sampela man i tok. Em i no bilong waitskin o blakskin; em i buk bilong God. Long 2 Timoti 3:​16 Baibel i tok: “Spirit bilong God yet i bin kamapim olgeta tok i stap long buk bilong God.” Olgeta tok bilong Baibel i stret, na em i olpela buk tru, na em i abrusim bagarap, na ol tok profet bilong en i kamap tru, na i gat planti Baibel moa, winim olgeta narapela buk​—⁠olgeta dispela samting i makim olsem God i As bilong en.

Baibel i lainim yumi long wanem samting? Baibel i tok, i gat wanpela God tasol em i “God tru.” (Jon 17:⁠3) Olsem na yu ting olgeta lotu i stret? Tok bilong narapela i pait long tok bilong narapela, a? Ol i no gat wanpela tingting tasol long God em i husat o wanem kain. Wanpela man bilong raitim tok long Baibel, em Jems, em i tok long ‘lotu i klin na i tru.’ (Jems 1:​27, Today’s English Version) Sapos yumi save long lotu i tru, orait yumi mas save, i gat ol lotu i no tru. Olsem na yumi no ken ting olgeta lotu i gutpela na i olsem narapela narapela rot bilong i go long God.

Pasin God i Makim Bilong Lotuim Em

Orait, wanem pasin bilong lotuim God em i stret? Baibel i tok, stretpela save em i as bilong lotu i tru. Bikpela profet Krais Jisas i bin tokim meri bilong Samaria: “Yupela Samaria i save lotu long samting yupela i no save long en.” (Jon 4:22) Olsem wanem long yu? Yu save God i gat nem, em Jehova? (Song 83:​18, NW) Yu save em i laik mekim wanem long ol man na dispela graun? (Matyu 6:​9, 10; Efesus 1:​9, 10; 3:11) Lotu bilong yu i lainim yu long gutpela samting yu ken wetim i kamap? Sapos yu tok yu Kristen, orait, yu inap kamapim ol tok bilong Baibel i as bilong bilip bilong yu, o yu bihainim nating lotu bilong papamama na yu no bin skelim?

Sapos yu sot long stretpela save, yu ken stadi long Baibel, em Tok bilong God. Ol man i lotu long God long pasin i stret, ol i mas save gut long ol tok bilong Baibel, na ol i mas bihainim​—⁠em laik bilong God. Yumi mas i gat tingting wankain olsem man bilong raitim Song, em i tok: “Tok bilong yu i olsem lam bilong helpim mi long wokabaut stret, na i olsem lait bilong soim rot long mi.” (Song 119:105) Olsem wanem long lotu bilong yu? Em i lainim yu long ol tok bilong Baibel na yu save long as bilong en?

Na bilong lotu long God long pasin i stret, yumi mas bilip long Krais Jisas. Em i bikpela profet, tasol yumi mas bilip tu olsem em i Pikinini bilong God. Baibel i tokaut klia olsem Jisas em i “namba wan man bilong bringim yumi long rot bilong laip.” (Aposel 3:15; 4:12) Planti man i tok ol i bilip long Jisas, tasol ol i bilip tru long em? Sapos ol i bilip tru bai ol i bihainim tok bilong em. God yet i tok yumi mas mekim olsem, em i tok: “Dispela em i Pikinini bilong mi . . . Yupela harim tok bilong em.” (Mak 9:⁠7) Olsem na ol man i lotuim God long pasin i stret, ol i save wok strong long bihainim gut lek bilong Jisas. (1 Pita 2:21) Ol i save autim tok olsem em i bin mekim. (Matyu 4:17; 10:​5-7) Lotu bilong yu i save kirapim yu long mekim olsem?

Na bilong lotuim God long pasin i stret, yumi mas laikim tru ol narapela. God Jehova yet i as bilong dispela pasin, na Jisas i tok, dispela pasin em i wanpela mak bilong ol disaipel tru bilong em. (Jon 13:​34, 35; 1 Jon 4:⁠8) I gat planti milion manmeri long nau ol i tok ol i Kristen, olsem na dispela gutpela pasin bilong laikim tru ol narapela em i mas pulap long graun, a? Tasol nogat. Ol bikpela pait i bin kilim i dai planti milion manmeri. Pasin raskol na pasin bilong bagarapim man i kamap bikpela. Olsem na askim yu yet: ‘Sapos olgeta man i bihainim lotu bilong mi, bai gutpela pasin sori i kamap long graun?’

Na Baibel i tok, ol man i lotu long God long pasin i stret ol i mas klia long ol lain bilong dispela graun i no save long God. God i givim lotu i tru long ol Israel, na bilong lukautim gut ol em i tok ol i mas klia long ol lain i stap klostu, em ol i save mekim kain kain pasin i no stret. (Lo 7:​1-6) Long Jon 17:​16, Krais Jisas i tok long lain bilong em, olsem: “Ol i no bilong dispela graun, olsem mi yet mi no bilong dispela graun.” Ol man i lotu long God long pasin i stret, ol i no save insait long ol wok politik, o pasin pamuk, o pasin mangal bilong bikpela bisnis, na ol i no save bihainim olkain tingting i save bagarapim nem bilong God. (Jon 18:36; 1 Jon 2:​15-17) Ol i bihainim tok bilong Rom 12:2: “Yupela i no ken wokabaut wankain olsem ol man bilong dispela graun.” Olsem wanem? Lotu bilong yu i kirapim yu long bihainim dispela tok?

Samting Bilong Helpim Yu

Tru tumas, lotu bilong yu em i bikpela samting long ai bilong God. I gat wanpela pasin tasol i stret bilong lotuim em. (Efesus 4:​4-6) Yumi bin stori long ol wan wan bikpela tok bilong Baibel, tasol gutpela sapos yu kisim save long sampela moa, a?

Maski yu go bikpela long wanem lotu, ol Witnes Bilong Jehova inap helpim yu long kisim dispela save. Long olgeta hap bilong graun ol i wok strong long lainim ol man long ol tok bilong Baibel. Ol i pilim olsem ol i gat wok long helpim ol man bilong olkain lain na lotu long kisim gutpela save moa long Baibel. (Sindaun 2:​1-6) Ol i skelim gut ol tok na wokim ol buk na nius bilong Baibel.a Ol i amamas long kam long haus bilong yu na lainim yu long Baibel, no gat pe. Long nau planti milion manmeri i skul olsem. Gutpela sapos yu tu yu mekim. Yu mas mekim olsem, long wanem, lotu bilong yu i bikpela samting.

[Ol Futnot]

[Piksa long pes 5]

Ol misineri bilong ol misin ol i kolim Kristen ol i no bin lainim ol man long lotu Kristen tru

[Piksa long pes 5]

Ol misin i tok long oraitim sik samting, planti ol i mekim dispela wok olsem bisnis

[Piksa long pes 6]

Yumi mas bilip long Jisas, em bikpela samting bilong lotu i tru

[Piksa long pes 7]

Ol Witnes Bilong Jehova i lainim planti milion manmeri long Baibel, no gat pe, na helpim ol long kisim stretpela save