‘God, Bilong Wanem Yu Larim Dispela Hevi i Kamap?’

RICARDO inap tingim yet dispela taim em i bin sindaun wantaim meri bilong em, Maria, long rum bilong wetim dokta.a Tupela wantaim i pret long ritim ol tok dokta i bin raitim bilong stori long sik bilong Maria. Orait nau, Ricardo i opim envelop na ol i tromoi ai hariap hariap long ol tok. Ol i lukim dispela tok “kensa,” na tupela wantaim i krai, long wanem, ol i save long ol samting em dispela tok i makim.

Ricardo i tok: “Dokta i mekim gut tru long mipela, tasol em i save long bikpela hevi i laik kamap, long wanem, em i wok long tokim mipela long mipela i mas bilip long God.”

Paslain long ol i kukim kensa long skin, dokta bilong Maria i lukim olsem lek bilong Maria long han sut i wok long guria guria. Ol i glasim em gen na ol i painimaut olsem kensa i go kamap pinis long kru. Ol i givim em rediesen inap wanpela wik tasol na ol i stopim. Maria i hap indai na tupela mun bihain em i dai. Ricardo i tok: “Mi amamas olsem pen na hevi bilong em i pinis, tasol mi sori tru long em i lusim mi na mi tingting long mi tu i mas i dai. Planti taim mi krai long God: ‘Bilong wanem yu larim dispela hevi i kamap?’ ”

Taim Bagarap i Kamap, Planti Askim i Kamap

Olsem Ricardo, planti man long olgeta hap bilong graun i save karim pen na hevi. Planti taim, ol man i no gat asua ol i save kisim hevi. Tingim bikpela bel hevi i kamap long rot bilong ol pait. O tingim bel hevi bilong ol lain em wanpela i bin reipim ol, o mekim nogut long ol taim ol i liklik, o paitim ol insait long marit, o mekim sampela narapela kain pasin nogut long ol. Kirap long bipo yet i kam inap long nau, i olsem i no gat mak long pen na hevi ol man na meri i redi long givim long narapela narapela. (Saveman 4:​1-3) Na tu, ol man i save karim hevi long ol bagarap, olsem guria samting, o long ol sik bilong bel na tingting na skin. Olsem na i gat as na planti man i laik save, “Bilong wanem God i larim ol kain hevi olsem i kamap?”

Maski ol man i gat bilip bilong lotu, pen na hevi i hatwok tru long karim. Ating yu tu i tingting planti olsem i gat wanem as na God i gat sori na olgeta strong i larim pen na hevi i painim ol man. Yumi mas painim wanpela gutpela bekim bilong dispela askim, na dispela bekim i mas stretpela. Dispela i bikpela samting, long wanem, em bai helpim yumi long i stap bel isi na pas gut wantaim God. Baibel i kamapim kain bekim olsem. Plis skelim ol tok Baibel i mekim em stori i kamap bihain long dispela i stori long en.

[Futnot]

[Ol Piksa long pes 3]

Dokta i wok long tokim mipela long mipela i mas bilip long God