Ol i Laik Painim Save Tru
LAURA FERMI, meri bilong saveman Enrico Fermi, em i tok: “Olgeta taim, man i gat save i winim man i no gat save.” Ating sampela i no wanbel long dispela. Ol i tok, samting yu no gat save long en, em i no inap nogutim yu. Tasol planti man i ting tok bilong Fermi i stret long ol wok painimaut bilong saiens na ol narapela samting tu. Inap planti handet yia pinis, planti man i no gat save long ol tok i tru, olsem na ol i paul nabaut na i stap tudak long olkain save, na long ol pasin i stret, na long ol samting bilong God.—Efesus 4:18.
Olsem na ol man i gat tingting ol i wok strong long painim save tru. Ol i laik save, i gat wanem as na yumi stap, na wanem samting bai painim yumi long bihain. Ol i bin traim kain kain rot bilong painim dispela save. Orait nau yumi ken stori long sampela.
Long Rot Bilong Lotu
Long stori tumbuna bilong ol Buda, Siddhārtha Gautama, em man bilong kamapim lotu Buda, em i bin tingting planti long ol hevi na pen na dai i painim ol man. Em i askim ol tisa bilong lotu Hindu long helpim em long painim “rot bilong tok i tru.” Sampela i tokim em long mekim eksasais ol i kolim yoga, na strong tru long sakim ol laik bilong skin bilong em. Bihain Gautama i mekim pasin olsem wok strong long tingim tingim ol samting long bel, olsem rot bilong kisim trupela save.
Bilong kisim save tru sampela i bin kisim ol drak i save paulim tingting. Olsem: Long nau wanpela lain bilong lotu (Native American Church), ol i stori long wanpela kain lip (peyote) i gat marasin i paulim tingting na i olsem man i lukim ol narakain samting, na ol i tok dispela i save “kamapim klia ol save i stap hait.”
Wanpela saveman bilong Frans bilong bipo, em Jean-Jacques Rousseau, em i bilip olsem sapos man i gat strongpela laik long kisim save tru na em i no giaman, em inap kisim wanpela tok hait i kam long God. Em bai kisim olsem wanem? Rousseau i tok em i mas “harim ol tok God i givim long bel bilong em.” Orait yu gat wanem tingting long ol samting—olsem tingting na maus bilong bel i givim wanem tok long yu—dispela bai kamap olsem “samting bilong stiaim yu gut long dispela taim ol man bilong graun i kamapim ol kain kain tingting.”—Buk History of Western Philosophy.
Long Rot Bilong Stretpela Tingting
Planti man long taim bilong Rousseau i no wanbel liklik long tingting bilong em long painim save tru long rot bilong lotu. Voltaire, em tu i bilong Frans, em i ting lotu i no inap givim save tru long ol man, nogat tru; lotu i as na inap sampela handet yia Yurop i bin stap tudak, olsem i no gat save, na i gat planti ol bilip kranki bilong ol tumbuna, na i no orait liklik long ol lain i gat ol narapela tingting—em sampela i kolim dispela taim olsem Taim Bilong Tudak.
Voltaire i bilong wanpela lain bilong Yurop ol i kolim Lain Bilong Save Tru. Dispela lain i kisim tingting bilong ol Grik bilong bipo, olsem stretpela tingting bilong ol man yet, na skelim gut ol samting bilong saiens, em ol rot bilong kisim trupela save. Narapela man bilong Lain Bilong Save Tru, em Bernard de Fontenelle, i ting savetingting bilong ol man tasol bai bringim ol man long “wanpela taim we ol i gat bikpela save moa, olsem bikpela lait, na ol narapela taim paslain long en bai i olsem taim bilong tudak.”—Buk Encyclopædia Britannica.
Ol dispela tingting em sampela kain tingting long rot bilong kisim save tru. Tasol yu ting i gat wanpela samting inap ‘stiaim yumi gut’ long painim tok i tru? Skelim stori i kamap bihain long dispela i toktok long as bilong save tru em yumi inap bilip long en.
[Ol Piksa long pes 3]
Gautama (Buda), Rousseau, na Voltaire ol i bihainim narapela narapela rot bilong painim save tru