Wok Yet Long “Mekim Gutpela Pasin”
1 Yu mekim wanpela gutpela samting tru taim yu kamap wanpela wokboi bilong God Jehova. Tasol wanpela hatwok bilong nau long taim bilong las de, em yumi mas wok yet long “mekim gutpela pasin.” (Ga. 6:9) Maski yu mas taitim bun tru bilong mekim olsem, yu inap mekim. Olsem wanem yu inap mekim?
2 Kisim Tingting Bilong Krais: Olsem Jisas i bin mekim, yu ken winim ol traim sapos yu tingting strong long ol samting Kingdom bai kamapim. (Hi. 12:2, 3) Yu mas save olsem Jehova i laikim yu tru na em i laik bai yu winim ol traim. (2 Pi. 3:9) Bilip tru long em, yu mas bilip olsem em bai helpim yu. (1 Ko. 10:13) Beten oltaim, askim Jehova long helpim yu long karim ol hevi na sanap strong. (Ro. 12:12) Yu mas amamas long pasin bilong yu long sanap strong, long wanem, em bai mekim na God i orait long yu. (Ro. 5:3-5) Taim yu wok strong long “bihainim tru pasin bilong Krais Jisas na holim dispela wanpela tingting tasol,” dispela bai givim amamas long yu na em bai mekim bel bilong Jehova i amamas.—Ro. 15:5; Snd. 27:11.
3 Mekim Yet Ol Gutpela Wok: Mekim gut wok long ol samting Jehova i givim long lain bilong em bilong helpim ol long mekim ol gutpela wok. Yu mas kisim pasin bilong ritim Baibel na stadi long ol buk samting em Baibel i as bilong en, em ol lain wokboi i gat gutpela tingting i kamapim. Redim gut ol miting, go long olgeta miting, na bekim sampela tok long ol miting bilong kongrigesen. Paslain na bihain long ol miting Kristen, toktok wantaim ol brata sista bilong yu long spirit. Putim ol mak i stret long yu bilong mekim wok autim tok na bai yu insait tru long dispela wok, na pasin bilong yu long autim gutnius long ol narapela bai i kamap gutpela moa.
4 Long dispela rot bai yu wok yet long mekim gutpela pasin na bai yu kisim bikpela amamas. Wanpela brata long Itali i stori long dispela samting na i tok: “Taim mi mekim wok bilong Jehova long de olgeta na long apinun mi go bek long haus, skin bilong mi i les. Tasol mi amamas, na mi tenkyu long Jehova long em i bin givim dispela amamas long mi em no gat wanpela man inap rausim long mi.” Olsem na yu mas wok yet long mekim gutpela pasin, na yu tu bai kisim bikpela amamas.