Mi Meri Bilong Sem Tasol Bihain Mi Kamap Misineri

Mi bon long 1951 long Vienna long Ostria, na famili bilong mi i save go long lotu Katolik. Mi meri bilong sem, tasol mi bilip long God na mi save beten oltaim. Taim mi gat 9-pela krismas, Papa i kirap stadi long Baibel wantaim ol Witnes Bilong Jehova, na bihain liklik Mama tu i mekim olsem.

I no long taim, mipela i bung wantaim Döbling Kongrigesen long Vienna. Famili bilong mipela i save mekim ol samting wantaim. Mipela i ritim na stadi long Baibel wantaim, go long ol miting bilong kongrigesen, na volantia long ol kibung sekit. Taim mi liklik meri yet, Papa i skulim mi long laikim tru Jehova. Oltaim papa i save beten olsem mi na susa bilong mi i mas mekim wok painia. Tasol long dispela taim, mi no tingting long mekim olsem.

KIRAPIM FULTAIM SEVIS

Mi kisim baptais long 1965 taim mi gat 14 krismas. Tasol mi pilim hatwok long autim tok long ol manmeri em mi no save long ol. Na tu, mi pilim olsem ol narapela i winim mi na mi laik bai ol narapela yangpela i kamap pren bilong mi. So bihain liklik long mi kisim baptais, mi kisim ol pren em ol i no lotuim Jehova. Mi amamas long bung wantaim ol, tasol bel i kotim mi bikos mi lusim bikpela haptaim long bung wantaim ol lain i no Witnes. Maski i olsem, mi no gat laik long mekim senis. Wanem samting i bin helpim mi?

Long dispela taim, Dorothée em wanpela gel i gat 16 krismas i kam long kongrigesen bilong mipela. Mi kirap nogut olsem em i givim bel tru long autim tok long ol haus. Mi gat bikpela krismas moa long em, tasol mi save autim tok wan wan taim. Mi tingting olsem: ‘Papamama bilong mi ol i Witnes, tasol long famili bilong Dorothée, em wanpela i Witnes. Em i stap wantaim mama bilong em husat i sik, tasol oltaim em i save go autim tok!’ Eksampel bilong em i kirapim mi long mekim bikpela wok moa bilong Jehova. Bihain liklik, mi na Dorothée i kirap mekim wok painia wantaim, pastaim olsem ol painia haptaim, na bihain olsem ol painia oltaim. Dorothée i laikim tru wok autim tok, olsem na mi tu i kirap long laikim tru dispela wok. Em i helpim mi long kisim fes Baibel stadi bilong mi. I no longtaim, em isi moa long mi stori wantaim ol manmeri long ol haus, ol strit, na ol narapela ples tu.

Long fes yia mi mekim wok painia oltaim, wanpela brata bilong Ostria nem bilong em Heinz i kam long kongrigesen bilong mipela. Em i lainim tok i tru long Kanada taim em i visitim brata bilong em husat i wanpela Witnes. Ol i makim Heinz long kamap painia salim long kongrigesen bilong mipela long Vienna. Taim em i kam long kongrigesen, mi stat long laikim em. Tasol em i laik kamap misineri, na mi no laik mekim dispela wok. So pastaim mi haitim filings bilong mi long em. Tasol bihain mitupela Heinz i pren na mipela i marit, na mitupela wantaim i kirap mekim wok painia long Ostria.

PUTIM MAK LONG MEKIM WOK MISINERI

Planti taim Heinz i stori long mi long laik bilong em long kamap misineri. Em i no putim presa long mi, tasol em i save askim mi olsem, “Yumi no gat pikinini, so yu ting yumi inap mekim bikpela wok moa bilong Jehova?” Mi meri bilong sem so mi pret long kamap misineri. Tru, mi mekim wok painia, tasol mi pilim olsem wok misineri em i bikpela wok tru. Maski i olsem, Heinz i no les kwik na oltaim em i stori long dispela wok. Na tu, em i kirapim mi long tingting long helpim ol narapela na mi no ken tingim mi yet tasol. Edvais bilong em i helpim mi tru.

Isi isi, mi tu i gat laik long mekim wok misineri, so mipela aplai long Skul Gileat. Tasol brens sevan i tok olsem i gutpela sapos mi lainim tok Inglis pastaim. Inap 3-pela yia mi traim bes long lainim tok Inglis, na bihain mipela i kirap nogut olsem ol brata i salim mipela i go long wanpela kongrigesen long Salzburg long Ostria, we ol i mekim tokples Serbo-Kroesia. Mipela i stap long hap inap 7-pela yia, na inap wanpela yia mipela i mekim wok sekit. I hatwok tru long lainim tokples Serbo-Kroesia, tasol mipela i gat planti Baibel stadi.

Long 1979, ol brata i askim mipela long go stap long Balgeria inap liklik haptaim. Gavman i tambuim wok autim tok long hap, so mipela i priten olsem mipela i go bilong malolo. Mipela i no autim tok, tasol mipela i haitim ol liklik pablikesen na givim long faivpela sista long Sofia, em biktaun bilong Balgeria. Mi pret, tasol Jehova i helpim mi long mekim dispela asainmen. Ol dispela sista i strongim bel na amamas tru maski ol inap go long kalabus, na dispela i strongim mi long mekim gut olgeta wok em oganaisesen bilong Jehova i askim mi long mekim.

Mipela i aplai gen long Skul Gileat, na ol invaitim mipela long i go long dispela skul. Mipela i ting olsem mipela bai go skul long Amerika na skul bai kamap long tok Inglis. Tasol long Novemba 1981, Skul Gileat tu i bin kamap long brens long Wiesbaden, Jemani. So mipela i go long dispela skul i kamap long tokples Jemani, na mi inap kliagut long ol tok mi lainim. Ol bai salim mipela i go long wanem kantri?

MEKIM WOK LONG KANTRI I GAT WOA

Ol i salim mipela i go long Kenya! Tasol brens ofis long Kenya i askim mipela long i go helpim wok long Yuganda, em i stap klostu long Kenya. Long dispela taim moa long 10-pela yia i go pinis, Jeneral Idi Amin em wanpela ofisa bilong ami, em i kirap bosim gavman bilong Yuganda. Long ol yia bihain aninit long wok bos bilong em, ol i kilim i dai planti tausen manmeri na planti milion manmeri i karim planti pen na hevi. Tasol long 1979, sampela birua bilong Idi Amin i rausim em long gavman na nupela lida i senisim em. Mi tingting planti long go long dispela kantri i gat woa. Tasol Skul Gileat i redim mipela long trastim Jehova. So mipela i go long Yuganda.

Laip long Yuganda i hatwok tru na i no seif. Long 2010 Yearbook, Heinz i stori long dispela na em i tok: “Planti sevis i no stap, . . . olsem i no gat wara na fon sevis samting. . . . Pasin bilong stil na sutim man long gan i kamap bikpela tru, moa yet long nait. . . . Olgeta man i stap tasol long haus na ol i hop na beten olsem ol man nogut i no ken kam long haus bilong ol na stilim ol samting o kilim ol i dai.” Maski i gat ol hevi, ol bratasista long Yuganda i stap strong long bilip!

Long 1982, mitupela Heinz i go kamap long Kampala, em biktaun bilong Yuganda. Long fes faivpela mun, mipela i stap long haus bilong Sam na Kristina Waiswa wantaim faivpela pikinini bilong ol na fopela wanblut bilong ol. Planti taim, Brata na Sista Waiswa na ol pikinini bilong ol i save kaikai wanpela taim tasol long wanpela de, tasol ol i redi long serim kaikai samting wantaim mipela. Mitupela Heinz i lainim planti samting long ol we i helpim mipela long mekim gut wok misineri. Olsem, mipela i lain long hau mipela i ken seivim wara long rot bilong yusim sampela lita wara long waswas, na bihain mipela i yusim wara mipela i rinsim mipela yet long en long flasim toilet. Long 1983, mitupela Heinz i kisim haus bilong mipela yet long wanpela hap long Kampala we i seif.

Mipela i enjoim tru wok autim tok. Mi inap tingim, wanpela taim insait long wanpela mun tasol, mipela i tilim winim 4,000 magasin! Tasol mipela i amamas moa olsem ol manmeri i laikim tok i tru. Ol i rispektim God na ol i laik stori long tok bilong Baibel. Planti taim, Heinz i gat olsem 10 i go 15 Baibel stadi na wankain tu long mi. Na mipela i lainim planti samting long ol sumatin bilong mipela. Olsem, mipela i pilim tru gutpela pasin bilong ol long smail oltaim na ol i no komplein, maski ol i save wokabaut i go long ol miting long olgeta wan wan wik.

Long 1985 na 1986, tupela moa woa i kamap long Yuganda. Mipela i save lukim ol pikinini i holim ol gan na sanap long ol rot blok. Long dispela taim, mipela i beten long Jehova i ken givim mipela bel isi na pasin bilong skelim gut ol samting taim mipela i autim tok. Na Jehova i bekim ol beten bilong mipela. Taim mipela i bungim ol man em ol i laikim gutnius bilong Kingdom mipela i autim, mipela i amamas na mipela i no pilim pret moa.

Mipela i save amamas tu long autim tok long ol man bilong ol narapela kantri. Olsem, mipela i bungim Murat na Dilbar Ibatullin em tupela marit na ol i bilong Tatarstan (Sentral Rasia) na mipela stadi wantaim ol. Murat em i wanpela dokta. Tupela i kamap Witnes na ol i stap yet long tok i tru i kam inap long nau. Bihain, mi bungim Tatjana Vileyska, em wanpela meri Yukren husat i laik suasaid. Bihain long em i kisim baptais, em i go bek long Yukren na em i kamap wanpela trensleta bilong ol pablikesen bilong yumi.a

OL NUPELA HATWOK

Long 1991 taim mi na Heinz i go malolo long Ostria, brens ofis long hap i kontektim mipela na tokim mipela long nupela asainmen mipela i kisim long go long Balgeria. Bihain long gavman komiunis i lusim strong bilong en long Isten Yurop, gavman i rausim tambu long wok bilong ol Witnes Bilong Jehova long Balgeria. Olsem mi stori pinis, pastaim mitupela Heinz i haitim ol pablikesen taim mipela i go long Balgeria bikos i gat tambu long wok bilong yumi. Tasol nau brens i salim mipela i go long hap bilong autim tok.

Ol brata i tok mipela i no ken go bek long Yuganda. So mipela i no go bek long haus misineri na pekim ol kago o tok gutbai long ol pren bilong mipela. Mipela i go long Betel long Jemani, kisim wanpela kar na draiv i go long Balgeria. Ol i salim mipela i go long wanpela liklik grup i gat 20 pablisa tasol long Sofia.

Mipela i bungim ol nupela hatwok long Balgeria. Wanpela hatwok em olsem, mipela i no save long tokples bilong dispela hap. Na tu, ol tanim tupela pablikesen tasol long tokples Balgeria, em buk The Truth That Leads to Eternal Life na Baibel Stori Buk Bilong Mi. Na i hatwok long mipela i kirapim ol Baibel stadi. Maski i olsem, dispela liklik grup bilong mipela ol Witnes i givim bel tru long autim tok. Tasol Misin Otodoks i luksave long gutpela wok mipela i mekim na ol i birua long mipela.

Long 1994, gavman i no orait moa long ol Witnes Bilong Jehova i rejista wantaim gavman na ol i tingim yumi olsem wanpela lotu nogut. Ol i arestim sampela brata. Ol niuslain i spredim ol tok giaman olsem ol Witnes Bilong Jehova i save kilim ol pikinini i dai na ol i subim ol narapela Witnes long suasaid. So i hatwok tru long autim tok. Ol man i belhat nogut tru na bikmaus long mipela na ol i ringim polis long kam arestim mipela, na ol i tromoi ol samting long mipela. I hatwok tru long kisim ol litresa i kam insait long kantri na long rentim ol ples bung bilong mekim ol miting. Wanpela taim, mipela i mekim kibung na polis i kam na stopim bung bilong mipela. Em nupela samting long mi na Heinz long lukim ol narapela i heitim mipela. Long Yuganda, ol manmeri i welkamim mipela na ol i amamas long stadi long Baibel! Wanem samting i helpim mipela long redi long mekim senis?

Mipela i amamas long bung wantaim ol asples bratasista. Ol i amamas long painim tok i tru na ol i tenkyu long mipela i helpim ol. Mipela olgeta i pas gut wantaim na helpim narapela narapela. Mitupela i luksave olsem yumi ken stap amamas long asainmen bilong yumi sapos oltaim yumi fokas long helpim ol narapela.

Inap sampela haptaim bihain, ol samting i kamap orait gen. Long 1998, ol Witnes Bilong Jehova i rejista gen wantaim gavman, na yumi trensletim planti moa pablikesen long tokples Balgeria. Bihain, long 2004 ol i dediketim nupela brens ofis. Long nau, i gat 57 kongrigesen long Balgeria na 2,953 pablisa. Long las sevis yia, inap olsem 6,475 manmeri i kam long Memorial. Bipo i gat faivpela sista tasol long Sofia, tasol nau i gat 9-pela kongrigesen long dispela hap! Tru tumas, yumi lukim ‘lain i liklik tru i kamap planti tausen.’—Ais. 60:22.

KARIM HEVI LONG SAIT BILONG HELT

Long laip bilong mi, mi karim planti hevi long sait bilong helt. Long ol yia i go pinis, sampela tiuma i gro insait long bodi bilong mi na i gat tiuma long kru bilong mi. Mi kisim rediesen terapi, na tu, mi go long India na wanpela dokta i mekim operesen long mi inap 12-pela aua bilong rausim sampela hap bilong tiuma long kru bilong mi. Mipela i stap long India brens inap long mi kamap orait, na bihain mipela i go bek long Balgeria.

Long wankain taim, Heinz i kisim sik Hantington. I hatwok long em i wokabaut, toktok, na kontrolim han na lek bilong em. Sik bilong em i kamap bikpela, olsem na mi mas mekim planti samting bilong helpim em. Sampela taim, mi taiet tru na mi save wari olsem mi bai no gat strong moa long lukautim em. Tasol Bobi em wanpela yangpela brata, oltaim em i save kisim Heinz i go autim tok wantaim em. Bobi i no save sem taim Heinz i pilim hatwok long toktok o kontrolim han na lek bilong em. Oltaim mi save olsem Bobi i stap bilong helpim mi taim mi pilim olsem mi no gat strong long helpim Heinz. Mitupela Heinz i pasim tok long mipela bai no gat ol pikinini, tasol mipela i pilim olsem Bobi em pikinini Jehova i givim mipela!—Mak 10:​29, 30.

Heinz i karim tu hevi bilong sik kensa. Na sori tru olsem em i dai long 2015. Taim Heinz i dai, mi pilim wanpis tru na mi hatwok long bilip olsem em i no stap laip moa. Tasol em i stap laip yet long memori bilong mi! (Luk 20:38) Long olgeta de, mi save tingim ol gutpela tok na ol edvais em i givim mi. Mi tenkyu long mipela i bin mekim wok bilong Jehova wantaim inap planti yia.

TENKYU LONG JEHOVA I HELPIM MIPELA

Jehova i helpim mi long sanap strong na karim olgeta hevi i painim mi. Em i helpim mi tu long daunim pasin bilong sem na kamap misineri husat i laik tru long helpim ol narapela. (2 Tim. 1:7) Mi tenkyu olsem Jehova i helpim mi na liklik susa bilong mi long insait long fultaim sevis long nau. Em na man bilong em i mekim wok sekit long Yurop na ol i visitim ol kongrigesen i mekim tokples Serbia. Jehova i bekim ol beten em papa bilong mipela i bin mekim planti yia i go pinis!

Stadi bilong mi long Baibel i givim mi bel isi tru. Long taim bilong hevi, mi lain long “beten strong moa” olsem Jisas i bin mekim. (Luk 22:44) Wanpela rot Jehova i bekim ol beten bilong mi em long rot bilong pasin laikim na gutpela pasin bilong ol pren long kongrigesen bilong mi long Nadezhda long Sofia. Ol i save invaitim mi long bung wantaim ol na ol i save tokim mi olsem ol i laikim mi, na dispela i mekim mi amamas tru.

Oltaim mi save tingim tingim long bel bilip bilong kirap bek. Mi piksaim long tingting papamama bilong mi i sanap long fran bilong haus bilong mipela na ol i luk nais tru wankain olsem long taim tupela i marit. Mi lukim sista bilong mi i redim wanpela kaikai. Mi piksaim Heinz i sanap klostu long hos bilong em. Mi piksaim ol dispela samting na mi no bel hevi tumas, long bel olgeta mi tenkyu long Jehova.

Mi tingim ol samting i kamap long laip bilong mi na ol samting bai kamap bihain, na long bel olgeta mi wanbel long tok bilong Devit long Buk Song 27:​13, 14. Em i tok: “Sapos mi no gat bilip, bai i no gat gutpela samting mi inap wet long en. Na mi no inap lukim gutpela pasin bilong Jehova taim mi stap laip yet. Bilip na wetim Jehova i helpim yu; strongim bel na no ken pret. Yes, bilip na wetim Jehova i helpim yu.”