Comstock Images/Stockbyte via Getty Images
WAS I STAP!
Yu Bai Makim Wanem Lida?—Baibel i Tok Wanem?
Long ol wik i kam, bai i gat ol ileksen long narapela narapela kantri long olgeta hap bilong graun. Ol man i wok long mekim ol bikpela disisen long ol bai makim wanem ol lida.
Baibel i tok wanem?
I gat sampela samting ol lida bilong graun i no inap long mekim
Baibel i stori long wanpela samting ol lida bilong graun i no inap long mekim.
“Yupela i no ken bilip long ol man i gat namba na long ol man, long wanem, ol i no inap kisim bek yupela. Taim strong bilong laip bilong man i lusim em, em i go bek long graun; long dispela taim tingting bilong em i pinis olgeta.”—Buk Song 146:3, 4.
Maski i gat ol gutpela lida i stap, taim bai kamap we ol bai lusim laip bilong ol. Na tu, maski ol i mekim ol gutpela wok, ol i no inap save sapos ol man i kam bihain long ol bai mekim yet ol gutpela wok o nogat.—Eklisiastis 2:18, 19.
Tru tru, Baibel i tokaut olsem ol man i no gat rait long bosim ol yet.
“Man i no gat rait long stiaim wokabaut bilong em yet.”—Jeremaia 10:23.
Husat i ken stap gutpela lida long taim bilong yumi?
Wanpela lida em God i makim
Baibel i stori olsem God i bin makim wanpela gutpela lida em ol man i ken trastim: Jisas Krais. (Buk Song 2:6) Jisas em i King bilong Kingdom Bilong God, em wanpela gavman i mekim wok bos long heven.—Matyu 6:10.
Yu bai redi long daun long wok bos bilong Jisas? Baibel i stori long risen na dispela askim em i bikpela samting:
“Yupela i mas givim ona long pikinini man [Jisas Krais]. Nogut God i kros long yupela na yupela bai pinis olgeta, long wanem belhat bilong Em bai kamap wantu tasol. Ol man i save go long Em, bai em i ken i stap ples hait bilong ol, ol i ken amamas.”—Buk Song 2:12.
Nau em taim bilong mekim disisen bilong yu. Tok profet bilong Baibel i kamapim klia olsem Jisas i stat long mekim wok king long yia 1914 na klostu nau Kingdom Bilong God bai senisim olgeta gavman long graun.—Daniel 2:44.
Bilong kisim sampela save moa long hau yu ken sapotim wok bos bilong Jisas, ritim dispela atikol “Mekim Disisen Long Sapotim Kingdom Bilong God Nau!”