Yu Ting Ol Man Inap Mekim Wankain Pasin Long Ol Man Bilong Narapela Lain—Baibel i Tok Wanem?

Planti manmeri i pilim olsem i no gat wanpela taim bai kamap we ol man i mekim wankain pasin long ol man bilong narapela lain.

“Long olgeta hap bilong graun, pasin bilong bel nogut long ol man bilong narapela lain i olsem posin i kamapim hevi insait long ol oganaisesen na ol sosel grup, na em i kamapim hevi tu long laip bilong ol man nating. Dispela pasin i mekim na ol man i no mekim pasin fea long narapela narapela.”—António Guterres, UN Secretary-General.

Yu ting wanpela taim bai kamap we ol man i mekim wankain pasin long ol man bilong narapela lain? Baibel i tok wanem?

Tingting God i gat long ol man bilong narapela narapela lain

Baibel i skulim yumi long tingting God i gat long ol man bilong narapela narapela lain.

“Long rot bilong wanpela man [God] i kamapim olgeta lain man bai ol i ken i stap long olgeta hap bilong graun.”—Aposel 17:26.
“God i save mekim wankain pasin long olgeta man. Na em i save laikim man husat i save pret long em na bihainim stretpela pasin maski em i bilong wanem lain.”—Aposel 10:34, 35.

Baibel i kamapim klia olsem olgeta manmeri i bilong wanpela famili na God i save orait long ol manmeri bilong narapela narapela lain.

Pasin bilong bel nogut long ol man bilong narapela lain bai pinis

Kingdom Bilong God em wanpela gavman long heven, na em bai pinisim pasin bilong bel nogut long ol man bilong narapela lain. Dispela gavman bai skulim ol manmeri long pasin ol i mas mekim long ol narapela. Ol manmeri bai lain long daunim ol liklik liklik pasin bilong bel nogut long ol man bilong narapela lain em ol i holim yet.

“Ol manmeri bilong graun bai kisim save long stretpela pasin.”—Aisaia 26:9.
“Na stretpela pasin bai kamapim bel isi, na samting em stretpela pasin bai kamapim em gutpela sindaun inap oltaim oltaim.”—Aisaia 32:17.

Long nau, long rot bilong Baibel planti milion manmeri i kisim skul long hau long mekim pasin rispek na givim ona long ol narapela.

Bilong kisim sampela save moa, ritim long nius Kirap! dispela atikol, nem bilong en “Pinisim Pasin Bilong Bel Nogut Long Narapela Lain.”
Ritim atikol “Talking to Children About Racism” bilong kisim save long hau ol papamama i ken stori wantaim ol pikinini long dispela topik taim ol i stap long haus.