Ol Witnes Bilong Jehova na Pasin Birua Bilong Ol Natsi—Baibel i Tok Wanem?

Long Janueri 27, 2023, planti manmeri bai tingim International Holocaust Remembrance Day. Ol samting nogut tru i bin kamap winim 75 yia i go pinis inap kirapim yu long tingim olsem wai na God i larim ol Natsi i kilim i dai planti milion manmeri.

• Bilong kisim save long tok Baibel i mekim, ritim atikol “Wai na Ol Natsi i Laik Pinisim Wanpela Lain Olgeta? Wai na God i No Stopim Dispela Samting?”

Lain Juda i karim bikpela hevi tru taim ol Natsi i birua long ol. Ol Natsi i wokim plen na kilim i dai planti milion manmeri. Ol i mekim nogut tru long ol manmeri bilong ol narapela grup na kilim ol i dai. Namel long ol dispela grup, ol i mekim nogut tu long ol Witnes Bilong Jehova bikos long bilip bilong ol em Baibel i as bilong en.

• Bilong kisim sampela save moa, ritim atikol “What Happened to Jehovah’s Witnesses During the Time of the Holocaust?”

“Gutpela sindaun . . . em yupela i ken bilip na wet long en”

Planti manmeri i pret olsem kain pasin birua i bin kamap long taim bilong ol Natsi bai kamap gen. Yumi amamas tru olsem Baibel i stori olsem long bihain kain ol hevi i no inap kamap moa.

• “‘Mi tingim pinis ol samting mi laik mekim long yupela,’ Jehova i tokaut olsem, ‘mi laik mekim gut long yupela na mi no laik mekim nogut long yupela. Mi laik givim gutpela sindaun long yupela em yupela i ken bilip na wet long en.’”​—Jeremaia 29:11.a

God Jehova bai inapim dispela tok promis bilong em taim em i pinisim ol man nogut na stretim ol hevi ol i kamapim. Klostu nau em bai:

• Pinisim ol man nogut em ol i save bagarapim ol narapela.​—Provep 2:22.

• Oraitim olgeta man i karim pen na hevi.​—Revelesen 21:4.

• Kirapim bek ol man i dai pinis na bai ol i stap laip gen long graun.​—Jon 5:28, 29.

Yu ken trastim gutpela tok bilong mekim isi bel em Baibel i kamapim. Bilong kisim save long risen na yu ken mekim olsem, mipela i kirapim yu long traim fri Baibel stadi kos bilong mipela.