Ol Manmeri i No Trastim Moa Ol Politisen—Baibel i Tok Wanem?

Long yia 2024 bai i gat planti ileksen winim long bipo, na dispela bai kamap long olgeta hap bilong graun. Tasol planti man i no trastim moa ol politisen.

• Planti wok painimaut bilong Amerika i tok olsem, “planti politisen i laik helpim ol yet” na ol i no gat laik long helpim ol manmeri.a—Pew Research Center, Septemba 19, 2023.

Planti yangpela tu i no trastim ol politisen.

• “Ol tineja i gat laik long painim rot bilong stretim ol hevi, tasol long wok painimaut ol i kamapim olsem ol politisen i no inap stretim ol dispela kain hevi.”​—The New York Times, Janueri 29, 2024.

• “Wok painimaut i soim olsem, ol yangpela i trastim moa lain bilong wokim vidio long YouTube winim lain politik.”​—The Korea Times, Janueri 22, 2024.

Olsem wanem? Yumi inap trastim ol politisen olsem ol bai kamapim gutpela samting long bihain? Yumi inap trastim husat?

Was gut long lain yu trastim

Em gutpela samting long ol manmeri long was gut long husat ol i trastim. Baibel i tok: “Man i no gat gutpela tingting, em i save bilipim olgeta tok, tasol man i gat pasin bilong tingting gut na mekim samting, em i save skelim gut olgeta wokabaut bilong em.”​—Provep 14:15.

• Bilong helpim yu long skelim gut ol infomesen yu kisim, ritim atikol “Protect Yourself From Misinformation.”

Na tu, sampela politisen i bihainim onest pasin na i laik mekim gut wok, tasol ol i no inap mekim olgeta samting ol i tingting long mekim. Em risen na Baibel i tok:

• “Yu no ken putim bilip bilong yu long ol hetman o long pikinini man bilong man. Ol i no inap helpim.”​—Sam 146:3, King Jems Pisin Baibel.

Wanpela lida yu ken trastim

Baibel i stori olsem God i makim wanpela gutpela lida em yumi ken trastim na em inap long mekim gut wok: Jisas Krais. (Luk 1:32, 33) Jisas em King Bilong Kingdom Bilong God, em wanpela gavman i stap long heven na em bai mekim wok bos.​—Matyu 6:10.

• Kisim save long wai na yu ken trastim Jisas na samting em bai mekim bilong stretim ol hevi bilong yumi. Ritim ol dispela atikol “Husat Em i King Bilong Kingdom Bilong God?” na “Kingdom Bilong God Bai Mekim Wanem?”