Woa Long Midel Is​—Baibel i Tok Wanem?

Ol manmeri long olgeta hap bilong graun i tingting planti long woa i kamap long Amerika, Israel, na Iran. Ol dispela woa bai go bikpela na kamap long planti kantri? Olsem wanem? Gavman inap long kamapim bel isi we bai stap oltaim?

Ol lain husat i save gut long ol tok profet bilong Baibel bai tingting, ating dispela woa long Midel Is em kirap bilong pait bilong Armagedon we buk Revelesen i stori long en.

Baibel i tok wanem?

Olsem wanem? Ol gavman inap pinisim woa long Midel Is?

Baibel i tok: “Yupela i no ken bilip long ol man i gat namba na long ol man, long wanem, ol i no inap kisim bek yupela.”​—Buk Song 146:3.

Insait long ol yia i wok long kam, yumi bai lukim sapos ol gavman bai kamapim bel isi long Midel Is. Tasol Baibel i kamapim klia olsem i nogat wanpela bikman bilong politik, gavman bilong ol man, na wanpela grup bilong ol manmeri bai pinisim woa na kamapim bel isi we bai stap oltaim. God wanpela tasol bai “mekim i dai ol pait i kamap long olgeta hap bilong graun.”​—Buk Song 46:9.

• Bilong kisim sampela save moa, ritim dispela nius Wastaua nem bilong en “Pinisim Ol Woa​—Hau?”

Olsem wanem? Woa long Midel Is i truim tok profet?

Baibel i Tok: “Yupela bai harim tok long ol woa i kamap klostu na ol woa i kamap longwe. . . . Wanpela kantri bai pait long narapela kantri na wanpela kingdom bai pait long narapela kingdom.”​—Matyu 24:6, 7.

Dispela woa i kamap nau long Midel Is em narapela sain i soim olsem “pinis bilong dispela taim i kamap pinis” na em i wanpela bilong ol evidens i soim olsem yumi stap long taim bilong “las de.” (Matyu 24:3; 2 Timoti 3:1) Ol woa yumi lukim long nau i kamapim klia olsem klostu nau God bai mekim samting bilong pinisim woa na ol narapela hevi we i givim hevi long ol manmeri.

• Bilong kisim sampela save moa, ritim atikol “Wanem Sain Bilong ‘Las De’?”

Olsem wanem? Armagedon bai kirap long Midel Is?

Baibel i tok: “Ol dispela tok i bringim ol king i kam bung long dispela ples, long tok Hibru ol i kolim Armagedon.”​—Revelesen 16:16.

Pait bilong Armagedon em i no pait namel long ol gavman bilong ol man we i kirap long Midel Is, nogat. Em pait namel long olgeta gavman bilong ol man na God we bai kamap long olgeta hap.

• Bilong kisim sampela save moa, ritim atikol “Pait Bilong Armagedon Em Wanem Samting?”

Wanem samting bai helpim yumi long dispela taim we i gat planti hevi?

Baibel i tok: “Yupela i no ken tingting planti long wanpela samting, nogat. Long olgeta samting, kamapim ol askim bilong yupela long God, mekim long rot bilong ol beten, na long ol prea we yupela i beten strong, na long ol beten bilong tok tenkyu long God.”​—Filipai 4:6.

Jehovaa God i laik bai yumi mas beten long em. Bikos God i save wari long yumi, em bai harim ol beten bilong yumi na helpim yumi long karim ol hevi. (1 Pita 5:7) Wanpela rot em i mekim olsem em long helpim yumi long save long wai na ol woa i kamap, olsem wanem ol woa bai pinis, na samting em bai mekim bilong pinisim pen na hevi.​—Revelesen 21:3, 4.

• Bilong kisim sampela save moa long hau na God i givim helpim, ritim atikol “Mi Inap Painim Ol Tok Long Baibel We Inap Mekim Isi Bel?.”