HILTON i amamas tru long insait long pait boksen. Taim em i gat 7-pela krismas, em i save insait long ol pait bilong boksen. Na tu, em i save pait long ol arapela mangi! Taim em i go long haiskul, em na ol poroman bilong en i save paitim ol arapela yangpela. Em i tok: “Mi save stil, pilai laki, lukim ponografi, paitim ol meri, na swea long papamama bilong mi. Dispela i mekim na papamama i ting mi no inap long senisim pasin bilong mi. Bihain long mi pinisim haiskul, mi lusim haus.”

Tasol 12-pela yia bihain, Hilton i kam bek long papamama bilong em, na ol i luksave olsem em i mekim ol bikpela senis! Em i gat pasin isi, pasin bilong bosim bel, na em i save rispektim ol arapela. Wanem samting i helpim em long mekim ol dispela senis? Bihain long em i lusim papamama, em i skelim pasin na sindaun bilong em. Na tu, em i skelim ol tok bilong Baibel na dispela i helpim em long senisim pasin bilong em. Hilton i tok: “Mi bihainim tok bilong Baibel, olsem na mi senisim ol pasin bilong mi. Na mi luksave olsem mi mas daun long papamama olsem lo i stap long Baibel long Efesus 6:2, 3 i kamapim. Ol tok bilong Baibel i helpim mi long painim amamas tru, na tu, papamama i amamas long mi!”

Stori bilong Hilton i kamapim klia olsem ol tok bilong Baibel i gat strong long helpim ol man long senisim pasin bilong ol. (Hibru 4:12) Yumi ken stori long ol gutpela pasin olsem onest pasin, bosim bel, stap gut long poroman marit, na pasin laikim. Bai yumi stori tu long hau ol dispela pasin i helpim i stap bilong ol man.

STIATOK BILONG BAIBEL: “Bikpela, husat inap i stap long haus bilong yu? . . . Man i bihainim laik bilong God long olgeta samting, na i mekim stretpela pasin oltaim, na i save tok tru oltaim, em bai i stap long haus bilong yu.”—Song 15:1, 2.

GUTPELA SAMTING I KAMAP: Planti man i ting em i bikpela samting long bihainim onest pasin. Tasol olsem wanem sapos rot i op long yumi kisim winmani long pasin giaman, na i nogat man bai save long dispela samting? Long kain taim olsem tingting i stap long bel bilong yumi bai helpim yumi long bihainim onest pasin.

Raquel i save baim ol saplai bilong kampani em i wok long en. Em i tok: “Sampela selsman i tok ol bai givim diskaun sapos mi baim ol saplai long ol. Dispela bai helpim mi long seivim sampela mani, tasol dispela i olsem mi stilim mani bilong kampani. Mi tingim tok bilong Baibel long onest pasin, olsem na mi no mekim olsem. Taim bos i harim dispela stori, em i trastim mi na mi mekim sampela wok moa.”

Sapos Raquel i kisim grismani, em inap long gat winmani insait long sotpela haptaim. Tasol wanem samting bai kamap sapos bos i save long dispela? Yu ting Raquel bai holim yet wok bilong em? Na olsem wanem sapos em i laik painim ol narapela wok? Bikpela samting em Raquel i laik bai maus bilong bel bilong em i stap klin na em i stap amamas. Sindaun 22:1 i tok: “Sapos ol man i ting yu gutpela man na ol i givim biknem long yu, orait dispela i winim tru olgeta mani samting bilong ol maniman.”

Jessie i gat onest pasin na ol man i save trastim em, olsem na em i gat gutnem long kampani em i wok long en. Wanem ol gutpela samting i kamap long dispela? Kampani i makim em olsem maneja, na tu, ol i bilip olsem em inap mekim ol wok insait long taim ol i makim. Dispela i opim rot long em i ken lusim bikpela haptaim long mekim ol wok lotu wantaim meri na ol pikinini bilong em.

Sampela kampani i save go long ol oganaisesen i gat gutnem long mekim onest pasin bilong kisim sampela wokman. Olsem, maneja bilong wanpela kampani long Filipins i raitim pas long ol Witnes Bilong Jehova na bai ol inap kisim sampela wokman. Em i tok: “Ol i save bihainim onest pasin na givim bel long mekim ol wok.” Bikpela samting em God Jehova i kisim biknem, long wanem, em i skulim yumi long “lusim pasin nogut, na bihainim gutpela pasin tasol.”—Amos 5:15.

STIATOK BILONG BAIBEL: “Man i no gat gutpela tingting i save larim belhat bilong en i kamap ples klia. Tasol man i gat gutpela tingting i save pasim belhat bilong em yet.”—Sindaun 29:11.

GUTPELA SAMTING I KAMAP: Sapos yu bosim gut bel, planti gutpela samting inap kamap long dispela! Olsem, pasin bilong bosim bel inap helpim helt bilong man. Baibel i tok: “Sapos man i stap bel isi, orait bodi bilong en bai i stap gut.” Na tu, “pasin bilong belgut i olsem marasin bilong mekim man i stap gut.” (Sindaun 14:30; 17:22) Ol wok painimaut i soim olsem ol man husat i gat pasin bilong belhat na kros, ol i save kisim kain kain sik olsem sik bilong klok samting. Na pasin bilong bosim bel i helpim yumi long planti arapela samting tu.

Cassius i gat 30 krismas samting i tok: “Mi save kros hariap na planti taim mi pait long ol narapela, na mi no save rispektim mi yet. Tasol mi senisim pasin bilong mi taim mi bihainim ol stiatok bilong Baibel. Mi kisim pasin daun, mi fogivim ol narapela na mi daunim belhat bilong mi. Sapos mi no bin mekim olsem, ating nau bai mi stap long kalabus. Mi pilim olsem mi kamap nupela man!”

STIATOK BILONG BAIBEL: “Olgeta manmeri i mas tingim marit olsem samting i dia tumas. Marit i mas i stap klin.”—Hibru 13:4.

GUTPELA SAMTING I KAMAP: Sampela man i tok dispela em tingting bilong ol man long bipo. Tasol dispela tingting i no stret! Sapos man o meri i no stap gut long poroman marit bilong em, dispela inap bagarapim tru bel bilong em.—Sindaun 6:34, 35.

Jessie em wanpela man marit na papa i tok: “Mi stap gut long meri bilong mi, olsem na mipela i pas gut wantaim na stap amamas. Tru tumas, onest pasin em bikpela samting insait long marit. Sapos man o meri i no stap gut long poroman marit, dispela bai bagarapim pasin bilong trastim narapela.” Na tu, ol pikinini bai bel hevi taim dispela kain hevi i kamap!

Ligayaa em wanpela meri marit i gat hevi long marit bilong em i tok: “Mi bung wantaim ol man i no save bihainim tok bilong Baibel. Olsem na mi kirap bihainim ol long ol pati, na tu, mi prenim ol narapela man.” Yu ting ol dispela samting i mekim em i stap amamas? Nogat tru. Oltaim Ligaya na man bilong em i save kros, na dispela i mekim em i bel hevi tru. Em i tok moa: “Mi tingim bek ol samting mi bin mekim, na mi luksave olsem tok bilong papamama i stret. Ol i save tok, ‘Ol poroman nogut i save bagarapim ol gutpela pasin bilong man.’”—1 Korin 15:33.

Ligaya i tok: “Mi bungim ol hevi, olsem na mi wokim disisen long stadi long Baibel na mi senisim ol pasin bilong mi.” Wanem gutpela samting i kamap long dispela? Em i stap gut long poroman marit bilong em, na man bilong em i tingim na rispektim em. Em i tok: “Tok bilong Baibel i senisim i stap bilong mi. Mi amamas olsem mi senisim ol pasin bilong mi, na tu, mi lusim ol poroman nogut.”

STIATOK BILONG BAIBEL: “Yupela i mas werim pasin laikim olsem yupela i werim klos, long wanem, pasin laikim em i nambawan gutpela rot bilong mekim ol man i kamap wanbel.”—Kolosi 3:14.

GUTPELA SAMTING I KAMAP: Planti taim Baibel i stori long pasin laikim, tasol dispela pasin laikim i no makim pasin laikim namel long man na meri, nogat. Dispela pasin laikim i as bilong ol arapela pasin olsem, pasin sori, pasin daun, pasin helpim, pasin isi, fogivim narapela, stap gut long narapela, na pasin bilong i no les kwik. (Maika 6:8; Kolosi 3:12, 13) Pasin laikim namel long man na meri i save pinis, tasol pasin laikim em Baibel i stori long en i save stap oltaim.

Brenda i marit klostu 30 yia pinis i tok: “Pasin laikim em man na meri i gat long taim ol i marit nupela i no wankain long pasin laikim em man na meri i gat bihain long ol i marit inap planti yia pinis.”

Sam i marit winim 12-pela yia i tok: “Oltaim mi na meri bilong mi i amamas long ol stiatok bilong Baibel, long wanem, ol tok bilong en i helpim tru mipela! Sapos yumi bihainim ol dispela tok, bai yumi stap amamas. Tasol sampela taim mi no bihainim ol samting mi kisim save long en. Mi save mekim olsem taim mi taiet, belhat, o mi laik mekim wanpela wok. Long kain taim olsem mi save beten askim Jehova long helpim mi long lusim ol kranki pasin. Bihain mi save hagim meri bilong mi na mipela i lusim tingting long ol hevi i kamap!”

Jisas Krais i tok: “Stretpela pasin man i mekim i kamapim ples klia olsem em i gat savetingting.” (Matyu 11:19) Tok bilong Baibel i kamapim planti gutpela savetingting. Ol tok bilong en i save helpim tru olgeta kain man long kain kain taim na ples. Na tu, Krieta bilong yumi em God Jehova i as bilong ol tok bilong Baibel na ol dispela tok inap helpim tru ol man. Sapos yumi bihainim ol tok bilong Baibel dispela inap helpim yumi. Olsem na Baibel i tok: “Yupela yet i mas traim na lukim na bai yupela i save olsem Bikpela i gutpela tru.” (Song 34:8) Olsem wanem? Yu amamas long i stap pren bilong God?