Sapta 24
Las De i Klostu Pinis!
BIPO, long yia 1947, ol saveman bilong saiens i wokim wanpela kain klok bilong makim las de i klostu. Ol i putim piksa bilong en long wanpela nius bilong ol (The Bulletin of the Atomic Scientists). Ol i mekim wok long dispela klok bilong makim olsem ol i ting liklik taim tasol na bai pait nuklia i kamap na bagarapim dispela graun olgeta. Taim ol i lukim olsem pait nuklia klostu i laik kamap, ol i save surikim han bilong klok i go klostu long 12 klok biknait. Na taim ol i lukim olsem pait i no ken kamap kwik, ol i surikim han bilong klok i go bek liklik. Long yia 1984 ol i surikim han bilong klok i go na i gat 3-pela minit tasol paslain long 12 klok biknait. Sapos ol i surikim han i go olgeta long 12 klok biknait, em nau dispela bai makim olsem pait nuklia i kirap pinis.
2 Tasol inap olsem 6,000 yia bipo God Jehova yet i kirap makim taim bilong las de. Dispela taim i wok long i kam klostu klostu na Jehova i no save surikim taim bilong en i go bek liklik. Dispela de God i bin makim em i taim bilong stretim bek nem bilong em na bai olgeta man i mas save em i King, na bai olgeta long heven na graun i ken i stap gutpela na i stap bel isi. Em i tokaut klia long dispela samting em i laik mekim na em i putim sampela mak bambai yumi ken save dispela de i wok long i kam klostu. Taim pasin bikhet i kamap long Iden, orait kwiktaim Jehova i tok promis olsem “meri” o oganaisesen bilong em long heven bai kamapim wanpela “pikinini,” na dispela pikinini bai krungutim het bilong Seten, em “dispela snek bilong bipo yet,” na bihain bai em i pinisim Seten olgeta. (Jenesis 3:15; Revelesen 12:9; Rom 16:20) Ol manmeri i laikim tumas stretpela pasin ol i wetim tru dispela taim!
3 Long dispela de God i makim pinis longtaim bipo, bai dispela “pikinini” God i tok promis long em, em Krais, em i kamap long graun. Seten i bin tok, ol man i no ken i stap gut long God. Tasol Jisas i daunim tru dispela tok, long wanem em i givim bel tru long God na i stap gut long Em i go inap long taim em i dai. Na dispela dai bilong em inap baim bek ol lain bilong Adam ol i stap kalabus long sin na i dai, long wanem em yet em i no gat sin. Nau i gat rot bilong em i ken “bagarapim na rausim wok bilong Seten” long bihain.—1 Jon 3:8; Danyel 9:25; Galesia 4:4, 5.
4 Taim Jisas i stap yet long graun em i kirap long bungim ol man na meri ol bai kamap king wantaim em long Kingdom bilong em long heven. Em i laik makim 144,000 tasol, em ol i winim pinis traim na i stap gut long God. Taim i kamap bilong em i mas bungim ol laspela manmeri bilong dispela lain na God i givim “wok king na biknem na kingdom” long Jisas yet long heven. (Danyel 7:13, 14, NW) Stret long taim God i makim pinis, olsem long yia 1914, Jisas i kirap mekim wok king. Em i rausim Seten wantaim ol spirit nogut long heven na tromoi ol i kam daun long graun. Em i rausim ol samting nogut long heven, em ples gavman bilong em i stap long en. (Revelesen 12:7-12) Las taim bilong pasin bilong dispela graun i kirap.
5 Dispela de God i makim inap olsem 6,000 yia bipo, nau dispela de i klostu pinis. I olsem han bilong klok i laik kisim 12 klok biknait. Yumi save dispela de i klostu pinis, long wanem ol manmeri i stap laip long yia 1914 nau ol i lapun pinis, tasol taim dispela lain i no pinis yet, olgeta samting i mas kamap bilong stretim bek nem bilong Jehova na bai olgeta man i save, Jehova em i King tru bilong heven na graun.—Mak 13:30.
6 Ol narapela gutpela wokboi bilong God tu bai ol i stap na lukim ol samting i kamap long dispela bikpela de. Kirap long yia 1935 lain bilong God i kisim save long dispela ‘bikpela lain’ i mas i kam, na long dispela taim ol dispela “planti tumas manmeri” i wok long kamap ples klia. Pastaim ol inap olsem sampela handet tasol, na bihain lain bilong ol i go bikpela inap sampela tausen, na bihain ol i kamap planti handet tausen, na nau i gat milion milion ol i stap long olgeta hap bilong graun. Baibel i stori long dispela lain i ‘winim bikpela hevi,’ olsem ol i abrusim bagarap long taim bilong bikpela hevi tru. Ol i stap laip yet na ol i go insait long Nupela Taim na ol i no i dai. (Revelesen 7:9, 10, 14; Jon 11:26) Ol manmeri bilong dispela lain ol i kam bung long pastaim, nau ol i lapun liklik; ol i gat olsem 60 o 70 krismas samting. Wok bilong bungim dispela lain, Jehova i no larim dispela wok i kirap hariap, long wanem dispela ‘bikpela lain’ wantaim planti manmeri ol i bin kam insait long pastaim, ol i mas i stap yet na abrusim bagarap na i stap long “nupela graun.”
7 Dispela gutpela samting ‘bikpela lain’ i wet long en i no ken lus nating; God i no ken larim wanpela pait nuklia i bagarapim olgeta manmeri. Olsem na ol i no pret o tingting planti. Taim ol i lukim ol samting bilong “las taim” i wok long kamap, ol i bilip strong na wet i stap. Ol i bihainim tok bilong Jisas, em i tok: “Yupela i mas sanap na litimapim het bilong yupela. Taim bilong God i kisim bek yupela em i kam klostu nau.” (Luk 21:28) Tasol long dispela liklik hap taim i stap yet i gat sampela samting moa i mas kamap, em ol i bikpela samting tru.
OL SAMTING KLOSTU BAI KAMAP
8 Pol i stori long wanpela bilong ol dispela bikpela samting i mas kamap, em i tok: “Bai ol i tok, ‘Em i gutaim nau, yumi stap gut.’ Long dispela taim tasol samting bilong bagarapim ol bai i kamap kwiktaim long ol, olsem pen i save kamap long meri i laik karim pikinini. Na ol i no inap abrusim dispela samting.” (1 Tesalonaika 5:3) Dispela tok bai kamap olsem wanem, em bihain bai yumi save. Tasol long kirap bilong “las taim,” sampela samting ol man i mekim i redim rot bilong dispela tok i ken kamap. Long yia 1919 ol i tokaut olsem wok bilong Lig ov Nesen em bilong kamapim gutaim, olsem “bel isi na gutpela sindaun.” Namba Tu Pait Bilong Olgeta Hap i pinis na Lo bilong Yunaitet Nesen i kolim nambawan wok bilong dispela oganaisesen em bilong kamapim gutaim. Tasol em i no kamapim gutaim. Nau long dispela taim, long planti hap, planti manmeri i gat kain kain sindaun ol i bin bung wantaim na mats i go na tok strong long ol gavman ol i no ken wokim moa sampela bom nuklia o tromoi bilong traim o redim i stap. Ol i laik bai ol gavman i mas tok gutaim bai kamap tru; ol i pret, long wanem ol i save, sapos gutaim i no kamap bai olgeta i bagarap.
9 Ating long dispela rot o long narapela rot liklik taim bai ol gavman i kirap na tokaut olsem: “Em i gutaim nau, yumi stap gut”! Bai i olsem ol i kamapim gutaim, tasol i no gutaim tru. Ol man i mekim dispela tok bai ol i tokaut olsem ol i bin kamapim gutaim long strong bilong ol yet, no gat wok long Kingdom bilong God i mas mekim. Ol i sakim wok king bilong Jehova, olsem na “samting bilong bagarapim ol bai i kamap kwiktaim long ol.”
10 Ol samting bai kamap hariap hariap. Bai Bikpela Babilon, em olgeta lotu giaman, i kisim bagarap long han bilong ol lain politik bipo ol i bin prenim em. Nau ol gavman i pilim pinis olsem ol lotu i wok long skrapim bel bilong ol lain man na kirapim ol long biruaim ol narapela lain na mekim pait na kilim man i dai. Ol gavman i les pinis long ol pris pasto i wok long subim ol long bihainim laik bilong ol. Long planti kantri, planti man i lusim lotu. Nau planti man i no bilip moa long God na dispela i stiaim tingting bilong ol. Na tu, planti lain insait long Yunaitet Nesen ol i strong long sakim lotu. Taim de bilong Jehova i kamap bilong givim strafe long ol man nogut, bai em i larim ol gavman i kirap biruaim Bikpela Babilon na bagarapim em olgeta.—Revelesen 17:15, 16; 19:1, 2.
11 Taim ol gavman bilong graun i bagarapim pinis Bikpela Babilon, bai ol i hambak tru, na bos bilong ol, em Seten, em bai kirapim ol long biruaim ol gutpela witnes bilong Jehova long olgeta hap bilong graun. (Esikiel 38:14-16) Maski ol dispela witnes i man bilong i stap isi na bihainim lo na ol i no save insait long ol wok politik o ol pait bilong graun, tasol ol gavman i no ken tingim dispela samting. Bai ol i strong long ol witnes bilong Jehova i mas givim bel long ol gavman, olsem lotuim ol, na helpim wok bilong ol. Tasol taim ol i redi long bagarapim oganaisesen bilong Jehova long graun, em nau, God bai kirap lukautim ol gutpela wokboi bilong em na bai ol i no ken bagarap. Ol ami bilong heven bai pinisim olgeta liklik liklik hap bilong oganaisesen bilong Seten long graun na bagarapim olgeta man i insait long en. Orait, bihain nambawan birua, em Seten, bai kalabus inap 1,000 yia. Long dispela taim olgeta hevi em i bin kamapim long graun bai ol i pinis olgeta, na bai graun i kamap gutpela ples tru olsem Paradais. Taim dispela 1,000 yia i pinis, Seten bai lusim kalabus inap liklik taim tasol bilong traim ol manmeri i bin kamap gutpela gen. Olgeta manmeri i laik bihainim em bai ol i bagarap wantaim Seten na ol spirit nogut bilong em. Bai ol i pinis olgeta.—Revelesen 19:19-21; 20:1-3, 7-10.
GO INSAIT LONG GUTPELA “NUPELA GRAUN”
12 Taim ol bikpela samting bilong las de i kamap i go pinis na taim bilong 1,000 yia i kirap, orait nau ‘bikpela lain’ i bin abrusim bagarap bai ol i pilim tru gutpela samting God i bin mekim long ol na bai ol i litimapim nem bilong em na tok tenkyu long em. Bel bilong ol bai kirapim ol long singaut strong olsem: “God bilong yumi [Jehova] em i sindaun long sia king, na Pikinini Sipsip [Krais Jisas], tupela i kisim bek yumi, na nau yumi stap gut!” Na olgeta long oganaisesen bilong Jehova long heven, ol bai pilim ol dispela bikpela samting i bin kamap na ol tu bai litimapim nem bilong God na i tok: “Tru tumas! Yumi amamas moa yet long God bilong yumi, na yumi tokaut long biknem bilong em! Em i gat olgeta gutpela tingting, na yumi givim tenkyu long em, na litimapim nem bilong em! Em i gat strong tru! Yes, olgeta bikpela strong i stap long em! Dispela olgeta em i bilong em tasol, oltaim oltaim! Tru!”—Revelesen 7:10-12.
13 Em nau, olgeta manmeri bai kamap wanpela lain tasol na ol i wanbel na ol i litimapim nem bilong trupela God, ol i olsem “nupela graun” i stap aninit long “nupela skai,” em dispela gavman Jehova i mekim wok long en bilong bosim ol man. Hap bilong Revelesen long Baibel i mekim gutpela tok piksa tru na i tok, ol gutpela samting bai painim ol man long dispela taim bihain i olsem “wanpela bikpela wara, em i wara bilong laip, na em i lait tumas olsem glas. Dispela wara i kamap long sia king bilong God wantaim Pikinini Sipsip, na i ran i go namel tru long rot bilong taun” Nupela Jerusalem i stap long heven. Long arere bilong dispela wara, long hap i kam na long hap i go, ol “diwai bilong laip” i stap, em ol i karim kaikai bilong helpim ol man long i stap laip, na lip bilong ol dispela diwai i bilong mekim orait ol lain manmeri. Dispela i makim olgeta samting God i mekim bilong helpim na oraitim ol man i bilip na bihainim tok, na bai ol inap kisim laip i stap oltaim long rot bilong Krais Jisas.—Revelesen 21:1, 2; 22:1, 2.
14 Long dispela taim bihain bai ol gutpela samting tru i kamap long graun, i narapela kain tru long ol samting bilong olpela graun. Ol manmeri i bihainim tok na ol manmeri i kirap bek long matmat, ofa bilong Krais bai helpim ol na ol bai lain long bihainim laik bilong God, na bai sin i tekewe olgeta long ol na ol i wok long kamap gutpela long skin na long tingting na long bel na long spirit i go inap long taim ol i kamap gutpela olgeta. Ol i no ken bihainim “pasin bilong olpela bel” i save kamapim pasin birua namel long ol lain. Nogat. Bai ol i lain long bihainim ol gutpela pasin bilong God, olsem pasin sori, na amamas, na bel isi, na no ken les kwik long narapela man, na helpim ol man, na mekim gut long ol, na bilip, na pasin isi, na bosim gut skin. (Galesia 5:19-23) Ol man bai bihainim ol dispela gutpela pasin, olsem na bai ol i mekim gutpela wok long ol kaikai samting bilong graun, na bai olgeta manmeri i kisim ol samting inap tru long ol. Olgeta manmeri bai wok gut wantaim long kamapim laik bilong God long graun, na bai ol i stap gutpela tru na i stap amamas tru.
15 Ol dispela gutpela samting bai kamap, olsem na spirit bilong God na meri bilong Krais i amamas tru na i singautim ol man bilong olgeta hap na i tok: “ ‘Yu kam!’ Na man i harim dispela tok, em i mas tok, ‘Yu kam!’ Na man i dai long wara, em i mas kam. Man i laik dring, em i mas kam na kisim wara bilong laip, em i olsem presen bilong God.” (Revelesen 22:17) Nau han bilong klok i laik kisim biknait! Olsem na nau em i no taim bilong wet nating long dispela bikpela de bilong Jehova i kamap, em dispela taim bilong bikpela hevi tru. Yu harim pinis dispela singaut na yu kam pinis bilong kisim dispela “wara bilong laip,” olsem na nau yu gat gutpela wok yu ken mekim—yu tu yu ken singautim ol narapela man i kam kisim dispela wara. Nau em i taim bilong wok strong. Olgeta manmeri i laik tru long abrusim bagarap na i stap long gutpela “nupela graun” God bai kamapim, ol i mas wok strong.
[Askim Bilong Stadi]
1. Ol saveman bilong saiens i ting las de i klostu o nogat?
2. Wanem taim Jehova i kirap makim taim bilong las de? Wanem samting bai kamap long dispela de?
3. (a) Olsem wanem yumi save God i bin makim taim bilong Krais i mas i kam? (b) Nau i gat rot bilong Krais i ken mekim wanem long bihain?
4. (a) Taim Jisas i stap long graun, em i kirap long bungim wanem lain? (b) Wanem taim Krais i kirap mekim wok king stret long taim God i bin makim? (c) Wanem namba wan wok em i mekim?
5. Husat bai ol i stap laip yet na lukim olgeta samting i kamap bilong stretim bek nem bilong Jehova, em i King tru bilong heven na graun?
6, 7. (a) I gat wanem samting bilong ‘bikpela lain’ na yumi save taim bilong bikpela hevi tru i klostu pinis? (b) Bilong wanem ol i no tingting planti long ol samting i laik kamap bihain?
8. (a) Olsem 1 Tesalonaika 5:3 i tok, wanem bikpela samting klostu bai kamap? (b) Planti yia bipo ol gavman i mekim wanem na ol i redim rot bilong dispela tok i ken kamap? (c) Nau long dispela taim planti man i mekim wanem bilong subim ol gavman long kamapim gutaim?
9. Ol man i mekim dispela tok olsem “Em i gutaim nau, yumi stap gut,” bilong wanem bagarap bai painim ol kwiktaim?
10. Wanem samting i kamap long nau na i olsem bagarap i redi long painim Bikpela Babilon?
11. (a) Bihain long dispela samting, ol gavman bai kirap biruaim husat? (b) Taim ol i mekim olsem, orait wanem samting bai kamap?
12. (a) ‘Bikpela lain’ bai tokaut long husat i bin kisim bek ol? (b) Husat tu bai litimapim nem bilong God?
13. Baibel i mekim wanem tok piksa bilong makim ol samting God i mekim bilong oraitim ol lain manmeri na helpim ol long i stap laip?
14. Olsem wanem ol samting i kamap long “nupela graun” bai narapela kain long ol samting bilong olpela graun?
15. (a) Wanem gutpela singaut nau i go long ol lain man? (b) Olsem na yumi olgeta wan wan i mas mekim wanem?