Adam na Iv

Stori: Adam em i namba wan man. Hap tok Hibru ’a·dhamʹ i olsem “man,” o “man bilong graun,” o “ol man.” Iv em i namba wan meri na em i meri bilong Adam.

Tru Adam tupela Iv i bin stap o nogat?

Yu ting yumi kranki sapos yumi bilip olsem wanpela man wantaim meri bilong em i tumbuna bilong yumi olgeta?

Wanpela buk i tok: ‘Nau ol man bilong saiens i gat wankain tingting olsem bilong ol bikpela lotu, olsem: Wanpela man tasol i tumbuna bilong olgeta man.’​—⁠Heredity in Humans, p. 238.

Narapela buk i tok: “Baibel i stori long Adam tupela Iv i tumbuna bilong olgeta man, na dispela tok tru bilong planti handet yia bipo i wankain olsem bilong ol saveman bilong saiens long nau, em ol i tok, olgeta man i bilong wanpela lain famili tasol na ol i gat wanpela tumbuna tasol.”​—⁠The Races of Mankind, p. 3.

Ap 17:26: “Long wanpela tumbuna tasol [God] i bin mekim olgeta lain manmeri i kamap. Na em i putim ol i stap long olgeta hap bilong graun.”

Yu ting Baibel i stori nating tasol long Adam bilong makim olgeta man bilong pastaim?

Ju 14: “Enok em i namba 7 man i kamap long ol lain tumbuna pikinini bilong Adam.” (Enok i no namba 7 bilong olgeta man i bin kamap long pastaim. Nogat.)

Lu 3:​23-38: “Taim Jisas i kirapim wok bilong en, em i gat samting olsem 30 krismas. . . . Em i pikinini bilong Devit . . . pikinini bilong Abraham . . . pikinini bilong Adam.” (Ol man i save long Devit na Abraham i bin stap, na olsem tasol yumi ken save Adam tu i bin stap, a?)

Stt 5:3: “Adam i gat 130 krismas na em i kamap papa bilong wanpela pikinini man i wankain olsem em yet. Na Adam i kolim nem bilong en Set.” (Olgeta man bilong pastaim i no kamapim Set, nogat; Adam tasol i kamapim em. Na i no olgeta man bilong pastaim i kamapim pikinini taim ol i gat 130 krismas; nogat.)

Baibel i tok, snek i bin toktok long Iv, tasol yu ting dispela i makim olsem dispela stori i stori nating tasol?

Stt 3:​1-4: “God, Bikpela i bin wokim olgeta animal, tasol i no gat wanpela bilong ol inap winim snek long tok gris. Na snek i askim meri olsem, ‘Ating God i tambuim yutupela long kaikai pikinini bilong olgeta diwai bilong gaden, a?’ Na meri i bekim tok olsem, ‘ . . . God i bin tokim mitupela olsem, “Yutupela i no ken kaikai pikinini bilong dispela diwai, na tu yutupela i no ken holim, nogut yutupela i dai.” ’ Orait na snek i tokim meri olsem, ‘Nogat. Yutupela i no inap i dai.’ ”

Jo 8:44: “[Jisas i tok:] Satan . . . i man bilong tok giaman, na em i papa tru bilong pasin bilong tok giaman.” (Olsem na Satan i as bilong namba wan tok giaman long Iden. Em i mekim wok long snek olsem maus bilong em. Stat i no stori long ol man samting i no stap tru bambai em i ken skulim yumi. Nogat. Lukim tu Kamapim Tok Hait 12:⁠9.)

Tok Piksa: Sampela man i save wokim trik na mekim toktok bilong ol i olsem i kamap long maus bilong narapela man samting. Lukim Namba 22:​26-31 i stori long Jehova i mekim na donki bilong Balam i toktok.

Sapos stori bilong “namba wan Adam” em stori nating, olsem wanem long “namba tu Adam,” em Krais Jisas?

1 Ko 15:​45, 47: “Buk bilong God i tok olsem, ‘Namba wan man, Adam, i bin kisim laip.’ Tasol narapela Adam i kamap bihain tru, em i bin kamap spirit bilong givim laip long man. Namba wan Adam em i bilong graun. God i bin wokim em long graun tasol. Namba tu Adam em i bilong heven.” (Olsem na sapos yumi tok, bipo i no gat wanpela man Adam i bin stap na em i brukim lo bilong God, orait olsem wanem long Krais Jisas? Bai i olsem i no gat as na em i dai bilong baim bek ol man. Na i olsem yumi sakim bilip Kristen.)

Jisas yet i ting olsem wanem long stori bilong Adam long Buk Stat?

Mt 19:​4, 5: “Jisas i bekim tok olsem, ‘Ating yupela i no bin ritim tok i stap long buk bilong God [long Stat 1:27; 2:24]? Dispela tok i tok olsem, “Bipo tru taim God i wokim olgeta samting, em i wokim ol manmeri [Adam tupela Iv], na em i mekim ol i kamap man na meri. Na God i tok, ‘Olsem na man i save lusim papamama na i pas wantaim meri bilong en, na tupela i kamap wanpela bodi tasol.’ ” ’ ” (Jisas i bilip olsem dispela stori bilong Buk Stat i tru, olsem na yumi tu i mas bilipim, a?)

Sapos Man i Tok​—⁠

‘Em laik bilong God yet na bai Adam i mas mekim sin’

Yu ken tok: ‘Planti man i tok olsem. Tasol sapos yu laik bai mi mekim wanpela samting, na mi kirap bihainim laik bilong yu na mi mekim, bai yu kros na mekim save long mi? . . . Orait, sapos sin bilong Adam em i wanpela samting God i laik bai Adam i mekim, olsem wanem na God i rausim Adam long Iden taim Adam i mekim dispela sin? (Stt 3:​17-19, 23, 24)’

O yu ken tok: ‘Sapos olsem, bai yumi tingim God em i wanem kain God? Sapos yu krosim na strafim man i bihainim laik bilong yu, yu ting dispela i stret na em i pasin sori?’ Na ating yu ken tok moa olsem: (1) ‘Jehova em i God bilong mekim pasin sori. (1 Jo 4:⁠8) Olgeta pasin bilong em i stret. (Sng 37:28; Lo 32:⁠4) God i no laik bai Adam i mekim sin; God i bin tambuim Adam long mekim. (Stt 2:17)’ (2) ‘God i larim Adam yet i tingim ol samting em i laik mekim, olsem God i larim yumi tu i mekim. Sapos Adam i laik, em i ken bikhet long God, maski skin bilong em i gutpela olgeta. God i toksave pinis, sapos Adam i mekim sin, em bai dai, tasol long laik bilong Adam yet em i sakim tok bilong God.’ (Lukim tu pes 320.)

Armagedon

Stori: Hap tok Grik (Har Ma·ge·donʹ) yumi tanim olsem “Armagedon,” em i kam long tok Hibru na insait bilong en i olsem “Maunten Bilong Megido,” o “Maunten Bilong Ol Ami i Bung.” Long Baibel, dispela tok i no makim wanpela pait nogut bilong graun; em i makim pait bilong “bikpela de bilong God I Gat Olgeta Strong.” (KTH 16:​14, 16) Dispela tok i makim “ples” (tok Grik, toʹpon) olsem wanpela samting i kamap na nau ol hetman politik bilong graun i bung na birua long Jehova na Kingdom