O yu ken tok: ‘Tru, tasol sampela man i bin winim bikpela skul ol i no bilip long evolusen.’ Na ating yu ken tok moa olsem: (1) ‘Bilong wanem ol dispela man i gat narapela narapela kain tingting? Olgeta inap lukim wankain samting bilong givim save long ol. Tasol ating ol i gat narapela narapela laik bilong bel.’ (2) ‘Orait, olsem wanem yumi ken save, husat i tok stret? Sapos yumi skelim olgeta wantaim (no ken sutim tok long sampela man), yu ting husat ol i tok stret​—⁠ol man i bilip olsem God i bin wokim ol na ol i gat wok long bihainim laik bilong Em, o ol man i tok ol i bin kamap nating na ol i ken bihainim laik bilong ol yet?’ (3) ‘Olsem na yumi yet i mas skelim ol samting i stap ples klia bambai yumi ken save, yumi bin kamap olsem wanem​—⁠long rot bilong evolusen, o God i bin wokim yumi.’

Gavman

Stori: Wok bilong gavman em bilong putim ol lo na bosim ol man long rot bilong ol dispela lo. Ol kain kain gavman i gat narapela narapela as na namba bilong en. God Jehova em i Nambawan Bikpela bilong heven na graun na em i givim namba long ol narapela long laik bilong em. Tasol Satan i paslain long bikhet long wok king bilong Jehova, na em i stap “hetman i save bosim dispela graun.” God i larim dispela pasin i stap inap liklik taim. Baibel i tok, olgeta gavman bilong graun i olsem wanpela wel animal em ‘snek [Satan] i givim strong long em na putim em i stap king.’​—⁠Jo 14:30; KTH 13:2; 1 Jo 5:⁠19.

Yu ting ol man inap kamapim wanpela gavman em bai helpim ol man long i stap amamas oltaim?

Olsem wanem long ol gavman ol i kamapim bipo?

Sav 8:9: “Sampela bikman i wok long daunim ol arapela manmeri na mekim nogut long ol.” (Sampela gavman na bikman i bin mekim olsem, maski pastaim ol i ting long helpim ol man.)

Wanpela man i gat bikpela save long wok bilong gavman em i tok: “Olgeta lain i bin putim gavman bilong bosim ol, bihain dispela wok bilong ol i bin bagarap. Stori bilong bipo em i stori bilong wok i lus nating na ol samting ol i tingting long mekim i no bin kamap.”​—⁠Em tok bilong Henry Kissinger i kamap long nius The New York Times, Oktoba 13, 1974, p. 30B.

Wanem samting i pasim rot na ol man i no inap kamapim gutpela gavman?

Jer 10:23: “Bikpela, mi save, mipela man i no inap bosim wokabaut bilong mipela yet na bihainim ol rot mipela i laikim.” (God i no wokim ol man bilong sakim em na bihainim rot ol yet i laikim.)

Stt 8:21: “Stat long taim ol manmeri i yangpela yet ol i save tingting long mekim ol pasin nogut.” (Ol hetman na lain ol i bosim, taim mama i karim ol, sin na laik nogut i pas long skin bilong ol.)

2 Ti 3:​1-4: “Long taim bilong las de planti hevi nogut tru bai i kamap. Ol man bai i laikim ol yet tasol, na ol bai i laikim tumas long kisim mani . . . na hambak nabaut . . . na taim ol i kros, bai i no gat rot bilong pinisim kros bilong ol.” (Ol hevi bilong nau i bikpela tumas long wanpela gavman tasol i stretim; olgeta gavman i mas wok gut wantaim long stretim. Tasol ol i tingting long helpim ol yet tasol na dispela i pasim rot bilong ol, na i pasim tu wok bilong ol oganaisesen ol i kamapim.)

Na Baibel i makim olsem ol strongpela spirit i stiaim ol samting ol man i mekim. “Dispela graun olgeta em i stap aninit long strong bilong Satan.” (1 Jo 5:19) “Yumi no save pait long ol manmeri. Nogat. Yumi pait long ol strongpela spirit . . . i save bosim graun long dispela taim bilong tudak. Yumi pait long olgeta spirit nogut i stap antap.” (Ef 6:12) “Ol dispela spirit nogut tru . . . i go nabaut long ol king bilong olgeta kantri bilong graun. Ol i laik mekim ol king i bringim ol ami bilong ol i kam bung, bai ol i ken kirapim pait long dispela bikpela de bilong God I Gat Olgeta Strong.”​—⁠KTH 16:⁠14.

Ol man i ken mekim wanem na bai gavman i no ken paulim moa ol mani samting na daunim ol man?

Sapos ol i senisim gavman, yu ting dispela bai helpim ol?

Long ol kantri i save eleksen, ol i save vot na senisim gavman klostu klostu, long wanem, gavman i no helpim ol.

Sng 146:​3, 4: “Ol king na ol man bilong graun i no inap kisim bek yu. Olsem na nogut yu bilip long ol. Taim ol i dai ol i tanim i kamap graun gen. Na . . . ol i no inap mekim olgeta samting ol i bin tok long mekim.” (Planti wok ol hetman i kirapim bilong helpim ol man, taim hetman i dai, dispela wok i go lus nating.)

Maski hetman i husat, em i bilong dispela graun i stap aninit long strong bilong Satan.​—⁠1 Jo 5:19.

Sapos ol i mekim pait, yu ting dispela bai helpim ol?

Maski ol i rausim ol hetman i mekim pasin nogut na ol i pinisim ol lo i no stret, ol hetman long nupela gavman tu ol i gat sin, na ol i bilong ol gavman em Baibel i tok ol i stap aninit long strong bilong Satan.

Mt 26:52: “Putim bainat bilong yu i go bek long paus bilong en. Olgeta man i pait long bainat, bainat bai i bagarapim ol.” (Jisas i mekim dispela tok long wanpela aposel bilong em long taim gavman i mekim wok nogut long namba bilong en na i laik daunim Pikinini bilong God yet. Sapos i stret ol i mekim pait bilong helpim Pikinini bilong God, em taim tru bilong mekim, a? Tasol Jisas i tok, ol i no ken mekim pait.)

Snd 24:​21, 22: “Pikinini bilong mi, yu mas aninit long Bikpela na yu mas aninit long king. Yu mas i stap longwe long ol manmeri i save bikhet long Bikpela na long king. . . . Ol inap long painim bagarap wantu.”

Orait, i gat wanem rot bilong pinisim pasin bilong gavman long paulim mani samting na daunim ol man?

Dan 2:44: “God bai i kirapim wanpela kingdom [gavman] na dispela kingdom bai i . . . bagarapim ol arapela king na kingdom bilong en bai i stap oltaim.”

Sng 72:​12-14: “Em [King Krais Jisas] i save helpim ol rabisman i singaut long em. Na ol manmeri i sot long ol samting na i no gat helpim, orait em yet bai i helpim ol. Em i save sori long ol manmeri i no gat strong na i stap rabis. . . . Sapos ol man nogut i laik daunim ol na bagarapim ol, em i save kisim bek ol.” (Taim em i stap long graun em i sori long ol kain man olsem​—⁠em i oraitim sik bilong ol, na givim kaikai long ol bikpela lain, na em i dai bilong helpim ol. Dispela i kamapim klia olsem em bai stap kain king olsem dispela tok profet i makim.)

Lukim tu het-tok “Kingdom,” pes 188-193.

Bilong wanem yumi mas tingim gut tok bilong Baibel long ol samting bai painim ol gavman?

Ol gavman bilong graun i no helpim tru ol man

Tingim ol dispela samting ol man long olgeta hap i sot long en na ol gavman i no givim long ol, tasol God i tok promis long givim: (1) Gutpela sindaun, no gat pait moa.​—⁠Ais 2:4; Sng 46:​9, 10. (2) Kaikai inap long olgeta.​—⁠Sng 72:16. (3) Gutpela haus bilong olgeta wan wan.​—⁠Ais 65:21. (4) Gutpela wok bilong olgeta man i sot long en, bambai ol inap lukautim ol yet wantaim famili.​—⁠Ais 65:22. (5) I stap gutpela, no gat sik.​—⁠KTH 21:​3, 4. (6) Stretpela kot, i no ken tingim lotu o skin o sindaun o lain bilong man.​—⁠Ais 9:7; 11:​3-5. (7) Bel isi, no ken pret long raskol bai bagarapim yu yet o ol samting bilong yu.​—⁠Mai 4:4; Snd 2:22. (8) Gutpela taim tru i gat ol gutpela pasin tasol i stap long en, olsem pasin bilong sori, na mekim gut long ol narapela, na tingim ol, na mekim tok i tru tasol.​—⁠Sng 85:​10, 11; Ga 5:​22, 23.

Inap planti tausen yia pinis ol gavman i bin tok promis long helpim lain bilong ol long i stap gutpela. Tasol wanem samting i bin kamap? Tru, long nau ol manmeri long planti kantri i gat planti samting moa bilong skin, tasol ol i no i stap amamas moa, winim bilong bipo, na ol hevi bilong ol i go nogut moa yet.

Ol tok profet bilong Baibel i kamap tru olgeta

Wan handet yia paslain long taim Babilon i kamap strongpela gavman, Baibel i tok profet long dispela, na olsem wanem strong bilong en bai pinis, na em bai bagarap, na bai i no gat wanpela man i stap long dispela ples gen. (Ais 13:​17-22) Klostu tu handet yia paslain, taim Sairus i no kamap yet, Baibel i kolim nem bilong em na i stori long em na ol wok em bai mekim long ol narapela kantri. (Ais 44:28; 45:​1, 2) Taim gavman bilong Midia wantaim Persia i