Narapela tok yu ken mekim, em olsem: ‘Mi bin toktok wantaim sampela moa ol i gat dispela bilip. Tasol yu ting i gat wanem as na yumi mas kamap gen long narapela narapela bodi?’ Na ating yu ken tok moa olsem: (1) ‘Yu inap tingim bek olgeta samting yu bin mekim long ol dispela taim yu ting yu bin stap bipo? . . . Tasol sapos yu no inap tingim bek ol samting yu bin mekim, olsem wanem bai yu inap abrusim ol pasin kranki yu bin mekim bipo na kamap gutpela?’ (2) Sapos man bilong haus i tok, i gutpela yumi no inap tingim bek ol samting, yu ken tok: ‘Tasol sapos long olgeta taim man i lusim tingting long ol samting, yu ting dispela inap helpim em? Sapos long olgeta 70 yia 70 yia yumi lusim tingting long olgeta samting yumi bin kisim save long en, yu ting dispela bai helpim yumi na bai i stap bilong yumi i wok long kamap gutpela moa?’ (3) Sapos man bilong haus i tok, ol gutpela man tasol i kamap gen long bodi bilong man, yu ken tok: ‘Sapos olsem, bilong wanem pasin bilong graun i wok yet long i go nogut? . . . Baibel i makim rot tru bilong ol samting bai kamap gutpela long taim bilong yumi. (Dan 2:44)’

Kamap Nupela Gen

Stori: Bilong “kamap nupela gen,” man i mas baptais long wara (“kamap nupela long wara”), na spirit bilong God i mas mekim em i kamap pikinini bilong God (“kamap nupela . . . long Holi Spirit”), na bai em inap insait long Kingdom bilong God. (Jo 3:​3-5) Dispela samting i painim Jisas, na ol 144,000 manmeri ol bai mekim wok king wantaim em long Kingdom bilong heven.

Bilong wanem sampela Kristen i mas “kamap nupela gen”?

God i laik bai i gat liklik lain gutpela man ol i ken wok wantaim Krais long Kingdom bilong heven

Lu 12:32: “Yupela liklik lain sipsip, yupela i no ken pret. [Papa] bai i . . . givim kingdom bilong en long yupela.”

KTH 14:​1-3: “Pikinini Sipsip [Krais Jisas] i sanap long maunten Saion, na 144,000 manmeri i sanap wantaim em. . . . God i bin baim bek ol namel long olgeta manmeri bilong graun.” (Lukim pes 164, 165, long het-tok “Heven.”)

Man i no inap i go long heven long skin bilong graun

1 Ko 15:50: “Ol brata, mi tok stret long yupela, man bilong dispela graun em i no inap i go insait long kingdom bilong God.”

Jo 3:6: “Samting bodi i kamapim, em i bodi. Na samting Holi Spirit i kamapim, em i spirit.”

Ol manmeri i “kamap nupela gen” na i kamap pikinini bilong God, ol tasol inap insait long Kingdom bilong heven

Jo 1:​12, 13: “Sampela manmeri i kisim [Krais Jisas], em ol lain i bilip long nem bilong em. Na em i givim namba long ol long ol i ken kamap pikinini bilong God. Ol i no kamap pikinini bilong God long blut bilong papamama, o long laik bilong bodi, o long laik bilong man. Nogat. God yet i mekim ol i kamap pikinini bilong em.” (“Sampela manmeri i kisim [Krais]” i no makim olgeta manmeri i bilip long Krais. Nogat. Sampela tasol bilong “lain bilong en” [ol Juda] i kisim em. [Lukim Joh 1 ves 11.] Sampela manmeri bilong ol narapela lain tu inap kamap pikinini bilong God, tasol dispela blesing em bilong “liklik lain” tasol.)

Ro 8:​16, 17: “Holi Spirit yet i save helpim spirit bilong yumi na yumi save tokaut ples klia olsem yumi stap pikinini bilong God. . . . Na bihain bai yumi kisim ol gutpela samting God Papa i bin promis long givim yumi, em ol samting Krais, brata bilong yumi, i kisim pinis. . . . Bai yumi kisim biknem . . . wantaim em.”

1 Pi 1:​3, 4: “[God] i kirapim Jisas Krais long matmat, na long dispela rot God i givim yumi nupela laip. . . . Em i makim yumi pinis bilong kisim gutpela laip bilong heven.”

Ol bai mekim wanem wok long heven?

KTH 20:6: “Ol bai i stap pris bilong God na bilong Krais. Na ol bai i stap king wantaim Krais long dispela 1,000 yia.”

1 Ko 6:2: “Yumi manmeri bilong God yumi bai i skelim pasin bilong olgeta manmeri bilong graun.”

Sapos man i no “kamap nupela gen,” God inap kisim bek em?

KTH 7:​9, 10, 17: “Orait bihain [taim aposel Jon i harim pinis namba bilong ol manmeri ol bai “kamap nupela gen,” em ol Israel bilong spirit ol i bilong i stap wantaim Krais long heven; skelim wantaim Rom 2:​28, 29 na Galesia 3:​26-29] mi lukluk gen, na mi lukim planti manmeri tru ol i bung i stap, na i no inap man i kaunim namba bilong ol. . . . Ol i bilong olgeta lain . . . Ol i sanap i stap long pes bilong sia king na long ai bilong Pikinini Sipsip [Krais Jisas]. . . . Ol i singaut strong olsem, ‘God bilong yumi em i save sindaun long sia king bilong en, na Pikinini Sipsip, tupela tasol i save kisim bek yumi’ . . . [Pikinini Sipsip] bai i bringim ol i go long ol hul i gat wara i kamap, em wara bilong givim laip.”

Hibru 11:​39, 40 i kolim nem bilong planti bilipman i bin stap paslain long Krais, na bihain i tok: “Dispela olgeta manmeri . . . taim ol i stap long graun ol i no kisim gutpela samting God i bin promis long givim ol, long wanem, . . . [God] i no laik bai ol dispela manmeri bilong bipo i kamap gutpela tru paslain long yumi. Nogat. Em i laik bai yumi mas kamap gutpela tru wantaim ol.” (Dispela tok “yumi” i makim husat? Hibru 3⁠:1 i kamapim klia olsem “God i stap long heven i bin singautim [ol].” Olsem na ol dispela narapela bilipman i bin stap paslain long Krais, ol bai kisim laip i gutpela tru, tasol i no long heven; ol bai kisim long graun.)

Sng 37:29: “Ol stretpela man bai i kisim graun . . . na bai ol i stap oltaim long en.”

KTH 21:​3, 4: “Harim. Nau haus bilong God i stap wantaim ol manmeri. . . . Em bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.”

Inap man i kisim spirit bilong God, tasol em i no “kamap nupela gen”?

Ensel bilong Jehova i stori long Jon Bilong Baptais na i tok: “Taim em i stap yet long bel bilong mama, Holi Spirit bai i pulap long em.” (Lu 1:15) Na bihain Jisas i tok: “Jon Bilong Baptais em i winim olgeta man i bin kamap long graun. Tasol man i stap liklik tru long kingdom bilong heven, em i winim Jon [long wanem, Jon bai i no i stap long heven, olsem na i no gat wok long em i “kamap nupela gen”]. Stat long taim Jon Bilong Baptais i autim tok na i kam inap nau, ol [man] i bin wok strong long kisim kingdom bilong heven.”​—⁠Mt 11:​11, 12.

Spirit bilong Jehova “i kam i stap strong” long Devit, na “i autim tok long maus” bilong em (1 Sml 16:13; 2 Sml 23:⁠2), tasol Baibel i no tok Devit i bin “kamap nupela gen.” No gat wok long em i “kamap nupela gen,” long wanem, olsem Aposel 2:34 i tok, “Devit i no bin i go long heven.”

Long nau wanem samting i makim olsem man i kisim spirit holi?

Lukim pes 410-412, long het-tok “Spirit.”

Sapos Man i Tok​—⁠

‘Mi bon-agen’ (o, ‘Mi kamap nupela gen’)

Yu ken tok: ‘Olsem na yu wet long i go i stap wantaim Krais long heven, a? . . . Ol man i go long heven, yu ting ol bai mekim wanem wok long heven?’ Na ating yu ken tok moa olsem: (1) ‘Bai ol i stap king na pris na wok wantaim Krais. (KTH 20:6; 5:​9, 10) Jisas i tok, ol i “liklik lain” tasol. (Lu 12:32)’ (2) ‘Sapos ol i stap king, i mas i gat sampela man ol i bosim, a? Ol bai bosim husat? . . . Mi kirap nogut taim wanpela man i soim tok bilong Baibel long mi, olsem: (Sng 37:​11, 29; Snd 2:​21, 22)’

‘Yu bon-agen?’ (o, ‘Yu kamap nupela gen?’)

Yu ken tok: ‘Ol man i gat kain kain tingting long dispela tok “bon-agen,” olsem “kamap nupela gen.” Mi laik askim yu, yu ting dispela tok i makim wanem samting?’

O yu ken tok: ‘Yu laik save, mi bilip olsem Jisas em i Man bilong kisim bek mi na mi kisim spirit holi, a? Tru tumas, mi mekim. Sapos nogat, bai mi no inap i kam toktok wantaim yu long Jisas.’ Na ating yu ken tok moa olsem: (1) ‘Mi lukim olsem planti man i tok ol i Kristen, tasol i no gat sampela samting i makim olsem ol i kisim spirit holi. (Ga 5:​22, 23)’ (2) ‘Sapos olgeta man i bihainim ol dispela gutpela pasin bilong God, bai yu amamas long i stap long graun, a? (Sng 37:​10, 11)’

O yu ken tok: ‘Ating yu laik save, mi bilip olsem Jisas em i Man bilong kisim bek mi, a? Mi bilip olsem. Olgeta Witnes Bilong Jehova i bilip olsem. Tasol mipela i ting, man i “kamap nupela gen” em i no ken bilip tasol, i gat sampela samting moa em i mas mekim.’ Na ating yu ken tok moa olsem: (1) ‘Jisas i tok, man i mas “kamap nupela gen” bambai em inap insait long Kingdom bilong God, olsem mekim wok insait long gavman bilong God long heven. (Jo 3:⁠5)’ (2) ‘Baibel i tok tu, planti man i bihainim laik bilong God bai ol i kisim laip long graun, na bai ol i stap amamas aninit long Kingdom bilong God. (Mt 6:10; Sng 37:29)’

Na sapos yu bilong lain bilong heven, yu ken tok: ‘Mi kamap nupela gen, tasol Baibel i tok yumi olgeta i mas was gut, nogut yumi hambak na ting olsem yumi no ken lus. Long olgeta taim yumi mas skelim pasin bilong yumi​—⁠yumi mekim tru ol samting God na Krais i laik bai yumi mekim? (1 Ko 10:12)’ Na ating yu ken tok moa olsem: ‘Jisas i givim wanem wok long ol disaipel tru bilong em? (Mt 28:​19, 20; 1 Ko 9:16)’

Kam Bek Bilong Krais

Stori: Taim Krais i no lusim yet graun, em i tok promis long em bai kam bek. Sampela bikpela samting bilong Kingdom bilong God i insait long dispela tok promis. Tasol yumi mas save, “i kam” i narapela long “i stap.” Olsem: Taim wanpela man i kam (em i kamap long wanpela ples o em i kam bek long en), em i kam long wanpela de na aua stret. Tasol bihain ating em bai i stap inap planti yia long dispela ples. Hap tok Grik (erʹkho·mai) yumi tanim olsem “i kam,” em Baibel i kolim bilong makim tu wanpela taim stret Krais bai lukluk i kam bilong kirapim wanpela bikpela wok bilong em long taim em i kam bek pinis na i stap. Em wok bilong givim strafe bilong Jehova long ol man nogut long bikpela de bilong God i Gat Olgeta Strong.