Kisim Bek

Stori: Long rot bilong Krais, Jehova bai kisim bek olgeta Kristen tru long pasin nogut nau i stap long graun, na long kalabus bilong sin na i dai. Bikpela lain gutpela wokman bilong Jehova ol i stap long “taim bilong las de,” em Jehova bai lukautim ol na bai ol i abrusim bagarap long taim bilong bikpela hevi tru.

God i gat bikpela pasin marimari, olsem na yu ting em bai kisim bek olgeta man?

Ating 2 Pita 3:9 i makim olsem? Dispela ves i tok: “[God] i no laik bai wanpela man i lus. Em i laik bai olgeta man i mas tanim bel, olsem na em i isi isi long yupela na em i wet i stap yet.” God i mekim pasin marimari na em i laik bai olgeta man bilong lain bilong Adam i mas tanim bel. Em i wokim rot bambai sin bilong ol man i tanim bel i ken tekewe. Tasol em i no subim ol man long bihainim dispela rot. (Skelim wantaim Lo 30:​15-20.) Planti ol i sakim. Ol i olsem man i pundaun long wara na i laik bagarap, na taim wanpela man i laik helpim em na em i tromoi gumi bilong taia long em, em i sakim. Tasol ol man i no tanim bel, bai ol i no i go long bikpaia na i stap oltaim long en. Bai ol i “lus,” olsem 2 Pita 3:9 i tok; ol man i givim baksait long God bai ol i “bagarap olgeta” olsem 2Pe 3 ves 7 i tok. Dispela i no givim tingting long yumi olsem God bai kisim bek olgeta man.​—⁠Lukim tu bikpela het-tok “Hel.”

Ating 1 Korin 15:22 i makim olsem God bai kisim bek olgeta man? Em i tok: “Olgeta man bilong lain bilong Adam ol i save dai. Na olsem tasol olgeta man bilong lain bilong Krais bai ol i kisim laip.” Ol ves klostu i makim olsem dispela ves i toktok long kirap bek. Husat ol bai kirap bek? Olgeta man em sin bilong Adam i mekim na ol i dai (lukim 1Co 15 ves 21), na ol yet i no bin mekim kain sin olsem Hibru 10:​26-29 i kolim. Jisas i kirap bek long matmat (Hades) (Ap 2:31) na olsem tasol olgeta narapela man i stap long matmat bai ol i kirap bek na “kisim laip.” (KTH 1:18; 20:13) Olsem wanem? Olgeta bai ol i kisim laip i stap oltaim? Rot i op long ol bilong kisim, tasol sampela bai i no laik bihainim dispela rot. Sampela bai kirap bek na kamap long kot na bai ol i bagarap, olsem Jon 5:​28, 29 i tok.

Olsem wanem long kain tok olsem i stap long Taitus 2:​11, i tok long “kisim bek olgeta manmeri”? Kain tok olsem i stap tu long Jon 12:​32, na Rom 5:​18, na 1 Timoti 2:​3, 4. Hap tok Grik (pas) ol i tanim olsem “olgeta manmeri” inap makim tu “olgeta kain manmeri.” (Buk Expository Dictionary of New Testament Words, bilong Vine, Vol. 1, p. 46) Orait, ol i mas raitim olsem wanem na bai i stret wantaim ol narapela tok bilong Baibel? Ol i mas raitim olsem “olgeta kain manmeri” (NW). Tingim tok bilong Aposel 10:​34, 35; Kamapim Tok Hait 7:​9, 10; 2 Tesalonaika 1:⁠9.

I gat sampela tok long Baibel i makim tru olsem sampela man bai lus?

2 Te 1:9: “Ol dispela man bai i kisim pe nogut olsem. Ol bai i stap longwe long Bikpela na . . . bagarap i stap oltaim oltaim.”

KTH 21:8: “Tasol ol man i save pret na surik bek na ol man i no bilip na ol man i mekim ol kain kain pasin nogut tru na ol man i kilim ol man i dai na ol man i mekim pasin pamuk na ol man i wokim posin . . . na ol man i lotu long ol giaman god na olgeta man i mekim tok giaman, ol bai i go [long] ples bilong ol, em dispela bikpela hul i gat hatpela paia . . . em i namba 2 dai.”

Mt 7:​13, 14: “Yupela i mas i go insait long liklik dua. Dua i go long ples bilong lus, em i bikpela, na . . . planti manmeri i save bihainim dispela rot. Tasol dua i go long ples bilong kisim laip, em i liklik tru, na . . . wanpela wanpela manmeri tasol i save lukim na bihainim dispela rot.”

Sapos God i kisim bek pinis wanpela man, yu ting dispela man i no inap lus?

Ju 5: “Yupela i save pinis . . . bipo [God] i kisim bek ol Israel na bringim ol i lusim Isip na i go. Na bihain em i bagarapim ol manmeri i no bilip long em.”

Mt 24:13: “Ol manmeri i stap strong inap long las de, God bai i kisim bek ol.” (Olsem na taim man i kirap long bilip long Jisas, i no long dispela taim stret God i tingting pinis long kisim em bek long bihain, nogat.)

Fl 2:12: “God i kisim bek yupela pinis, na nau yupela i mas pret na guria na wok strong long kisim tru dispela presen em i makim bilong yupela.” (Dispela tok em bilong “olgeta manmeri bilong Krais” i stap long Filipai, olsem Filipai 1:1 i tok. Pol i tok, ol i no ken ting ol i kisim pinis prais bilong laip; ol i mas wok strong yet long kisim.)

Hi 10:​26, 27: “Sapos yumi kisim save pinis long tok tru bilong Krais, na bihain, long laik bilong yumi yet yumi wokabaut long pasin bilong sin, orait i no gat narapela ofa moa i stap bilong tekewe dispela sin. Nogat. Bai yumi pret nogut tru na wetim de bilong bikpela kot.” (Olsem na Baibel i no tok, taim man i bilip pinis, maski wanem wanem sin em i mekim bihain, em i no inap lus. Baibel i tok, yumi mas i stap gut long God na bai God i kisim bek yumi. Lukim tu Hibru 6:​4-6 i tok, maski God i makim man pinis long spirit holi, dispela man tu inap lus.)

Yu ting yumi mas bilip tasol na bai God i kisim bek yumi?

Ef 2:​8, 9: “Yupela i bilip long Krais, na long marimari bilong God tasol, God i kisim bek yupela. Dispela em i no samting yupela yet i mekim. Nogat. God i givim nating long yupela. Em i no olsem pe bilong wok yupela i mekim. Olsem na i no gat wanpela man em inap litimapim nem bilong em yet.” (Olgeta samting God i mekim bilong kisim bek yumi i kamap long marimari bilong em tasol. I no gat rot na bai wanpela man long lain bilong Adam inap kisim laip oltaim long wok em yet i mekim, maski em i mekim ol gutpela gutpela wok. Laip oltaim em i presen God i givim long ol man i bilip long ofa bilong Pikinini em inap tekewe sin.)

Hi 5:9: “[Jisas] i kamap Man bilong helpim na kisim bek olgeta manmeri i bihainim tok bilong em, bai ol i stap gut oltaim oltaim.” (Yu ting dispela tok i pait wantaim tok olsem ‘yupela i bilip long Krais na God i kisim bek yupela’? Nogat. Ol i mas bihainim tok bilong kamapim klia olsem ol i bilip tru.)

Je 2:​14, 26: “Ol brata bilong mi, sapos wanpela man i tok, ‘Mi save bilip long Krais,’ tasol em i no save mekim gutpela pasin tu, orait bilip bilong dispela man em i samting nating. Ating kain bilip olsem em inap kisim bek em? Nogat tru. . . . Sapos man i bilip nating na bilip bilong en i no kamapim gutpela pasin tu, orait bilip bilong dispela man i olsem em i dai pinis.” (Laip oltaim i no olsem pe man i kisim long wok em i mekim. Tasol man i bilip tru, em bai mekim ol gutpela wok tu, em ol wok i makim olsem em i bihainim tok bilong God na Krais, na em i bilip tru na laikim tumas God. Sapos em i no mekim ol kain wok olsem, bilip bilong em i olsem i dai pinis.)

Ap 16:​30, 31: “ ‘Mi mas mekim wanem samting na bai God i kisim bek mi?’ Na tupela [Pol na Sailas] i tok olsem, ‘Yu mas bilip long Bikpela Jisas, na bai God i kisim bek yu wantaim lain bilong yu.’ ” (Sapos dispela man wantaim lain bilong em i bilip tru, bai ol i mekim pasin i stret wantaim dispela bilip, a? Tru tumas.)

Sapos Man i Tok​—⁠

‘God i kisim mi bek pinis’

Yu ken tok: ‘Mi amamas long harim yu tok olsem, long wanem, nau mi save yu bilip long Krais Jisas. Dispela wok mi mekim em wanpela wok Jisas i bin tokim ol disaipel bilong em long mekim, em wok bilong tokim ol narapela olsem Kingdom bilong em i kamap pinis long heven. (Mt 24:14)’ Na ating yu ken tok moa olsem: (1) ‘Wanem dispela Kingdom? Taim Kingdom i kam, dispela bai mekim wanem long graun? (Dan 2:44)’ (2) ‘Taim dispela gavman bilong heven i bosim graun, wanem kain taim bai kamap long graun? (Sng 37:11; KTH 21:​3, 4)’

O yu ken tok: ‘Olsem na yu save tingim tok bilong Pita hia long Aposel 4:​12, a? . . .  Ating yu save tingting, husat i bin makim Jisas bilong kisim bek yumi? Dispela ves i tok, God i makim em, a?’ Na ating yu ken tok moa olsem: ‘Jisas i bin kamapim nem bilong Papa bilong em. (Jo 17:⁠6) Yu save long nem bilong God? Taim yu tingim dispela nem, yu tingim wanem ol pasin bilong God? (Kis 3:15; 34:​5-7)’

‘God i kisim yu bek pinis?’

Yu ken tok: ‘Mi bilip olsem. Tasol mi save was gut, nogut mi pundaun na bai mi lus. Ating yu save long dispela tok bilong Baibel, a? (1 Ko 10:12)’ Na ating yu ken tok moa olsem: ‘Wanem as bilong dispela tok? Aposel Pol i raitim tok long ol manmeri i bin kamap nupela gen na God i singautim ol bilong kisim laip long heven (Hi 3:⁠1), na Pol i tok: . . . (Hi 3:​12-14) Olsem na oltaim yumi mas wok long kisim sampela save moa long ol tok bilong God bilong strongim bilip bilong yumi.’

O yu ken tok: ‘Mi inap tok yes, tasol mi laik askim yu: Yu save Baibel i tok God bai kisim bek sampela man ol i no bilong kisim laip long heven? Yu bin lukim tok bilong Kamapim Tok Hait 7:​9, 10, 14? . . . Olsem na God bai kisim bek sampela manmeri long taim bilong bikpela hevi tru i laik kamap, na bai ol i kisim laip hia long graun. (Mt 5:⁠5)’

‘Yu bilip olsem Jisas em i Man bilong kisim bek yu?’

Lukim het-tok “Krais Jisas,” pes 220.

‘Yupela i tok, God bai kisim bek 144,000 tasol’

Yu ken tok: ‘Gutpela yu kamapim dispela tok, long wanem, nau mi ken tokim yu long bilip tru bilong mipela. God bai kisim bek olgeta man i bilip tru long wok em i bin mekim long rot bilong Jisas. Tasol Baibel i tok, 144,000 tasol bai go long heven bilong i stap wantaim Krais. Yu bin lukim dispela tok long Baibel? . . . Em i stap long Kamapim Tok Hait 14:​1, 3.’ Na ating yu ken tok moa olsem: (1) ‘Ol bai mekim wanem long heven? (KTH 20:⁠6)’ (2) ‘Sapos ol i stap king, ol i mas bosim sampela lain, a? Bai ol i bosim husat? . . . (Mt 5:5; 6:10)’

Klinpaia

Stori: “Misin [Katolik] i lainim ol man olsem [klinpaia] em . . . ples tewel bilong ol man i dai pinis i stap long en, em God i orait long ol, tasol ol i no gutpela olgeta; ol i go long dispela ples bilong stretim ol liklik rong i no tekewe yet, o bilong kisim strafe inap liklik taim bilong ol liklik na bikpela rong em God i lusim pinis, na long dispela rot bai ol i kamap klin paslain long ol i go long heven.” (Buk New Catholic Encyclopedia, 1967, Vol. 11, p. 1034) Em i no wanpela tok bilong Baibel.