long ol manmeri i bin kamap nupela gen na God i singautim ol bilong kisim laip long heven (Hi 3:⁠1), na Pol i tok: . . . (Hi 3:​12-14) Olsem na oltaim yumi mas wok long kisim sampela save moa long ol tok bilong God bilong strongim bilip bilong yumi.’

O yu ken tok: ‘Mi inap tok yes, tasol mi laik askim yu: Yu save Baibel i tok God bai kisim bek sampela man ol i no bilong kisim laip long heven? Yu bin lukim tok bilong Kamapim Tok Hait 7:​9, 10, 14? . . . Olsem na God bai kisim bek sampela manmeri long taim bilong bikpela hevi tru i laik kamap, na bai ol i kisim laip hia long graun. (Mt 5:⁠5)’

‘Yu bilip olsem Jisas em i Man bilong kisim bek yu?’

Lukim het-tok “Krais Jisas,” pes 220.

‘Yupela i tok, God bai kisim bek 144,000 tasol’

Yu ken tok: ‘Gutpela yu kamapim dispela tok, long wanem, nau mi ken tokim yu long bilip tru bilong mipela. God bai kisim bek olgeta man i bilip tru long wok em i bin mekim long rot bilong Jisas. Tasol Baibel i tok, 144,000 tasol bai go long heven bilong i stap wantaim Krais. Yu bin lukim dispela tok long Baibel? . . . Em i stap long Kamapim Tok Hait 14:​1, 3.’ Na ating yu ken tok moa olsem: (1) ‘Ol bai mekim wanem long heven? (KTH 20:⁠6)’ (2) ‘Sapos ol i stap king, ol i mas bosim sampela lain, a? Bai ol i bosim husat? . . . (Mt 5:5; 6:10)’

Klinpaia

Stori: “Misin [Katolik] i lainim ol man olsem [klinpaia] em . . . ples tewel bilong ol man i dai pinis i stap long en, em God i orait long ol, tasol ol i no gutpela olgeta; ol i go long dispela ples bilong stretim ol liklik rong i no tekewe yet, o bilong kisim strafe inap liklik taim bilong ol liklik na bikpela rong em God i lusim pinis, na long dispela rot bai ol i kamap klin paslain long ol i go long heven.” (Buk New Catholic Encyclopedia, 1967, Vol. 11, p. 1034) Em i no wanpela tok bilong Baibel.

Wanem as bilong tok bilong klinpaia?

Wanpela buk Katolik i skelim tok sampela Katolik i raitim long ol kain tok olsem i stap long 2 Makabi 12:​39-45, na Matyu 12:​32, na 1 Korin 3:​10-15, na buk i tok: “Tok bilong ol tumbuna i as bilong tok bilong misin Katolik long klinpaia; Baibel i no as bilong en.”​—⁠New Catholic Encyclopedia, 1967, Vol. 11, p. 1034.

“Misin i bihainim tok bilong ol tumbuna bilong helpim dispela bilip olsem i gat wanpela ples namel long heven na bikpaia.”​—⁠Nius U.S. Catholic, Mas 1981, p. 7.

Ol mausman bilong lotu Katolik i tok klinpaia i wanem kain ples?

“Planti ol i ting pen bilong klinpaia em olsem: Man i save em i no inap i go stret long heven. Tasol planti moa i ting i gat pen tru long dispela ples . . . Misin Katolik bilong Rom i tok, paia tru i as bilong dispela pen. Man i bilip long klinpaia i no olsem em i mas bilip long paia tru. Ol i no save tru, i gat paia long en o nogat. . . . Tasol sapos man i laik bihainim tingting bilong ol saveman bilong [lotu Katolik long] Is, em ol i sakim dispela tingting olsem paia i givim pen long ol man long klinpaia, dispela man i no ken ting i no gat pen liklik long dispela ples. I gat pen na hevi tru, na bel hevi, na sem, na bel i pilim asua, na ol narapela hevi bilong spirit em inap bagarapim tru bel bilong man. . . . Tasol maski pen i painim ol dispela man, ol i pilim bikpela amamas, long wanem, ol i save God bai kisim bek ol.”​—⁠Buk New Catholic Encyclopedia (1967), Vol. 11, p. 1036, 1037.

“Wanem samting i painim ol man long klinpaia, em yumi no save.”​—⁠Nius U.S. Catholic, Mas 1981, p. 9.

Olsem wanem? Yumi gat tewel na taim skin i dai, tewel i stap yet?

Jop 14:10: “Taim mipela i dai, mipela i save pinis olgeta.”

Ais 26:14: “Ol dispela bikman i dai pinis. Ol i no i stap moa.” (Olsem na taim man i dai, em i dai tru na i no stap moa.)

Bilong kisim sampela save moa, lukim het-tok “Dai” na “Tewel.”

Taim man i dai pinis, yu ting bihain bai em i kisim sampela strafe moa long sin bilong em?

Ro 6:7: “Man i dai pinis, em i no pas moa long sin.”

Yu ting ol man i dai pinis inap pilim amamas long wetim God i kisim bek ol?

Sav 9:5: “Ol man i dai pinis, ol i no inap save long wanpela samting.”

Ais 38:18: “Ol lain i stap long ples bilong ol man i dai pinis, ol i no inap litimapim nem bilong yu [Jehova]. Na bai ol i no inap lukim ol gutpela samting yu save mekim bilong helpim ol manmeri bilong yu.” (Orait, olsem wanem ol inap “pilim bikpela amamas, long wanem, ol i save God bai kisim bek ol”? Ol i no inap, a?)

I gat wanem rot bilong tekewe sin na mekim yumi kamap klin, olsem Baibel i tok?

1 Jo 1:​7, 9: “Blut bilong Jisas, Pikinini Bilong God, em i save rausim olgeta sin bilong yumi na yumi kamap klin. . . . Sapos yumi autim sin bilong yumi, orait God bai i mekim olsem em i bin tok. Em bai i mekim stretpela pasin na lusim sin bilong yumi. Na em bai i rausim olgeta pasin nogut i stap long yumi na mekim yumi i kamap klin.”

KTH 1:5: “Jisas Krais . . . i save laikim yumi tru, na long blut bilong em yet em i bin tekewe olgeta sin bilong yumi.”

Krais Jisas

Stori: Em dispela wanpela Pikinini tasol God Jehova yet i kamapim. God i wokim em paslain long olgeta narapela samting. Long rot bilong em, olgeta narapela samting long heven na long graun i bin kamap. Em i gat bikpela namba tru​—⁠em i namba tu long Jehova. Jehova i salim em i kam long graun bilong i dai na baim bek ol man, na long dispela rot bai ol lain bilong Adam i bilip ol inap kisim laip i stap oltaim. Dispela Pikinini i kisim bek biknem long heven na nau em i stap King, na em i gat strong bilong bagarapim olgeta lain nogut na kamapim laik bilong God