O yu ken tok: ‘Kain strongpela tok olsem, i no stret sapos man i mekim nating, a? Olsem wanem? Pasto i kolim sampela tok o pasin bilong mipela i makim olsem mipela i profet giaman? (Sapos man bilong haus i kolim wanpela “tok profet” ol i tok yumi bin mekim na i no kamap tru, orait kamapim sampela tok bilong pes 376, 377, na laspela hap bilong pes 377 i go inap pes 379.)’

O yu ken tok: ‘Mi save, sapos wanpela man i sutim kain tok olsem long yu, bai yu amamas sapos em i larim yu i bekim tok, a? . . . Olsem na mi laik soim sampela tok bilong Baibel long yu bilong bekim dispela tok.’

Rausim Bel

Stori: Rausim bel, em pasin bilong rausim pikinini i no redi yet long lusim bel bilong mama na kam ausait, na em i no inap i stap laip ausait long bel bilong mama. Taim meri i gat bel, sampela taim pikinini yet i lus long bel, long wanem, skin bilong meri i gat sik samting, o samting i paitim bel bilong em, o em i pundaun. Tasol sapos meri i no laik karim pikinini na em i mekim wanpela samting na rausim bel, dispela em pasin bilong kilim man i dai.

God em i As bilong laip, olsem na yumi mas ting olsem wanem long rausim bel?

Ap 17:28: “Yumi save kisim laip long [God] na em wanpela tasol i givim strong long yumi na yumi save wokabaut.”

Sng 36:9: “Yu [God Jehova] as tru bilong laip bilong olgeta samting.”

Ro 14:12: “Yumi olgeta wan wan bai yumi mas tokim God long as bilong olgeta pasin yumi bin mekim.”

Taim pikinini i stap blut yet long bel bilong mama, Jehova i ting laip bilong en i bikpela samting o nogat?

Sng 139:​13-16, NW: “Yu [Jehova] bin haitim mi gut insait long bel bilong mama. . . . Ai bilong yu i lukim mi taim mi stap blut yet insait long bel bilong mama, na taim i no gat wanpela hap skin bilong mi i kamap yet, yu raitim pinis olgeta hap skin bilong mi long buk bilong yu.”

God i gat tok long man i bagarapim pikinini i stap long bel?

Kis 21:​22, 23: “Sapos sampela man i pait na wanpela man i paitim meri i gat bel na . . . meri [o pikinini] i kisim bagarap, orait yupela i mas bekim wankain pasin long man i paitim [meri]. Sapos meri [o pikinini] i dai pinis, orait yupela i mas kilim dispela man i dai.” (Taim ol i tanim Baibel long sampela tok ples, olsem tok Pisin, ol i no kamapim gut dispela hap tok; ol i raitim olsem dispela lo i tok, samting i painim mama tasol i bikpela samting, na samting i painim pikinini i stap long bel i no bikpela samting. Tasol Baibel Hibru bilong pastaim tru i toktok long bagarap i painim mama o pikinini i stap long bel bilong em.)

Sapos God i no orait na man i kilim i dai man long laik bilong em yet, em bikpela rong, o nogat?

Stt 9:6: “Man i kilim i dai narapela man, em yet i mas dai long han bilong ol man, long wanem, God i bin wokim ol manmeri i kamap olsem em yet.”

1 Jo 3:15: “Man i kilim narapela man i dai, em i no kisim laip bilong i stap gut oltaim oltaim.”

Kis 20:13: “Yupela i no ken kilim i dai ol arapela manmeri.”

Sapos dokta i tok, meri i mas rausim bel na bai meri i no ken sik o bagarap, yu ting i orait meri i mekim?

Sampela taim tok bilong ol dokta i no stret. Yu ting i stret sapos yumi kilim i dai wanpela man, long wanem, yumi ting em bai mekim nogut long narapela man? Sapos long taim meri i laik karim pikinini ol i save meri o pikinini bai dai, orait ol lain i karim dispela hevi ol i ken tingting long ol bai helpim meri o helpim pikinini. Tasol long nau ol dokta i save long rot bilong stretim dispela kain hevi, na i no planti meri o pikinini i save dai.

Sapos Meri i Tok​—⁠

‘Wanem samting mi laik bai ol i mekim long skin bilong mi, em samting bilong mi.’

Yu ken tok: ‘Em i stret. Long nau, planti taim ol narapela i daunim laik bilong yumi; planti man i no tingim ol narapela man. Baibel i gat ol tok i ken helpim yumi; tasol yumi mas bihainim ol dispela tok bambai em i ken helpim yumi.’ Na ating yu ken tok moa olsem: (1) ‘Planti man i mekim meri i gat bel na nau ol i lusim meri. Tasol sapos man wantaim meri i bihainim tok bilong Baibel, man bai laikim meri na pikinini bilong em na em bai stap wantaim ol na lukautim ol. (1 Ti 5:8; Ef 5:​28-31)’ (2) ‘Sapos yumi laik bai narapela i ken mekim pasin sori olsem long yumi, orait yumi mas bihainim stretpela pasin long famili bilong yumi olsem Baibel i makim. Baibel i tok, yumi mas ting olsem wanem long ol pikinini yumi kamapim? (Sng 127:3; skelim wantaim Aisaia 49:15.)’

Sabat

Stori: Ol i kisim dispela tok “sabat” long wanpela hap tok Hibru (sha·vathʹ), insait bilong en i olsem “malolo o pinis long mekim o lusim.” Lo Bilong Moses i makim wanpela de Sabat long wik, na sampela de moa long yia ol i de Sabat, na namba 7 yia na namba 50 yia tu i olsem Sabat. De Sabat long wik bilong ol Juda em i namba 7 de; em i kirap long taim san i go daun long Fraide na i pinis long taim san i go daun long Sarere. Ol man i tok ol i Kristen, planti ol i save makim Sande i olsem de malolo bilong ol na de bilong lotu; sampela i bihainim de em kalenda bilong ol Juda i makim.

Yu ting ol Kristen i mas bihainim lo bilong de Sabat?

Kis 31:​16, 17: “Yupela Israel i mas malolo long dispela de, long wanem, em i . . . olsem mak bilong kontrak namel long mi na yupela Israel na bai em i stap oltaim oltaim.” (De Sabat em i mak bilong kontrak i stap namel long Jehova na ol Israel, olsem na i no bilong olgeta lain, a? Hap tok Hibru