Sapta 10

Gutpela Skin Em Bikpela Samting?

OLSEM WANEM? Yu ting yu no gat gutpela skin? Planti manmeri i ting ol i no gat gutpela skin. Olsem na taim ol i lukim pes bilong ol long glas, ol i save bel hevi. Dispela bel hevi i save painim yumi sampela, a?

Yangpela meri Maria em i gat 16 krismas, em i tok, ‘Mi no laikim skin bilong mi. Mi no gat gutpela skin.’ Wanpela manki i gat 13 krismas, nem bilong em Bob, em tu i no amamas long skin bilong em. Em i tok, ‘Mi no laikim gras bilong mi; em i no sindaun gut.’ Wanpela dokta i tok, taim ol yangpela i wok long i go bikpela, i gat sampela senis i kamap long skin bilong ol na dispela i mekim ol i bel hevi na ol i no amamas long skin bilong ol. Em nau, dispela samting i mekim na planti yangpela i tingting planti long skin bilong ol na ol i laik bai ol i gat gutpela pes na gras na skin.

Tru, God yet em i laikim samting i gutpela long ai. God i wokim olgeta samting ‘i kamap gutpela long taim bilong en.’ (Saveman 3:11) Na sapos yu mekim gut skin bilong yu na ‘i kamap gutpela,’ dispela inap kirapim ol narapela long laikim yu. Olsem dispela dokta (James P. Comer) i tok, sapos man o meri i amamas long skin bilong em, bai em i stap belgut, na bai em i pilim olsem em inap mekim gut ol wok samting bilong em. Tasol sapos em i no amamas long skin bilong em, dispela inap daunim em na bai em i bel hevi na i ting em i no gutpela man na em i lus long ol gutpela samting. Olsem na sapos yu tingim gut skin bilong yu na yu mekim gut skin, orait yu bihainim gutpela tingting. Tasol yu mas was gut, nogut yu tingting tumas long skin bilong yu na yu ting yu no gat gutpela skin na yu sem na yu surik long ol narapela man na yu laik i stap wanpis tasol. Dispela kain tingting em i kranki.

I Gat Wanem As na Yu Ting Yu No Gat Gutpela Skin?

Sampela yangpela i no amamas long skin bilong ol, tasol i no olsem skin bilong ol i no gutpela. Sapos yangpela meri i bun nating, ating em i laik bai skin bilong em i pat liklik. Tasol yangpela meri i pat liklik, ating em i laik bai em i bun nating liklik. Sapos yangpela man o meri i gat gutpela skin, orait bilong wanem em i ting em i no gat gutpela skin?

Wanpela dokta (em Richard M. Sarles) i tok: ‘Planti senis i save kamap long skin bilong ol yangpela na ol i tingting tumas long ol narapela yangpela i orait long ol o nogat.’ Olsem na sapos ol wanlain bilong yu i tok, yu longpela bun tumas o yu sotpela tumas o yu pat tumas o nus bilong yu i bikpela, orait dispela inap mekim na bai yu tingting planti. Sapos ol i mekim ol kain tok olsem long yu, o yu ting ol i laikim ol narapela, winim yu, em nau, dispela inap mekim na bai yu ting yu no gat gutpela skin.

Na narapela strongpela samting i save bosim tingting bilong ol man, em ol samting ol i lukim long televisen na long ol nius na piksa wokabaut samting. Long televisen na long ol nius yumi save lukim piksa bilong ol man na meri i gat gutpela skin, em ol i laik grisim yumi long baim kain kain samting. Dispela inap mekim na bai yumi ting olsem sapos yumi no gat gutpela skin tru o yumi no wanpela masolman, yumi lus tru​—yumi no inap i stap amamas, na ol narapela man i no inap laikim yumi.

No Ken Larim Ol i Bosim Tingting Bilong Yu

Yu no ken kirap kwik na ting olsem skin bilong yu i no gutpela. Olsem wanem? Yu ting nus bilong yu i nogut, o gras bilong yu i nogut? (O yu ting ol narapela i ting olsem?) Ating sampela i tok pilai long nus o long narapela samting long skin bilong yu na yu bel hevi long dispela. Tasol tru nus o gras bilong yu i nogut? O ol narapela i kirapim yu long ting olsem? Olsem Baibel i tok, yu no ken larim ol man bilong dispela graun i subim yu long bihainim tingting bilong ol.​—Rom 12:2.

Yu mas tingting: Wanem ol lain i save kirapim ol man long ting sapos ol i no gat gutpela pes o skin, orait ol narapela i no inap laikim ol na ol i no inap kisim gutpela wok o i stap amamas? Em ol bikpela kampani tasol, em ol i save putim ol piksa na toksave bilong grisim ol man long baim ol samting ol i save wokim. Sapos yu baim ol samting ol i tok em bilong helpim yu long lusim skin liklik o mekim pes o gras bilong yu i kamap gutpela, orait yu ting dispela bai helpim tru husat? Em bai helpim ol dispela kampani yet, a? Long wanem ol i kisim bikpela mani long dispela rot. Olsem na yu no ken larim ol i bosim tingting bilong yu. Na sapos ol wanlain bilong yu i tok, skin o pes bilong yu i no gutpela, yu ting ol i tok olsem bilong helpim yu, o ol i laik daunim yu tasol? Sapos ol i mekim bilong daunim yu, maski long ol​—ol dispela kain “pren” i no gutpela na yumi no laikim kain pren olsem, a?

Baibel i tok moa olsem: “Yu mas putim yau gut long olgeta tok i save givim yu gutpela tingting.” (Sindaun 2:2) Gutpela tingting bai helpim yu bai yu no tingting tumas long skin bilong yu, em i gutpela o nogat, na bai yu no larim televisen samting i bosim tingting bilong yu. Wan wan man na meri tasol i gat gutpela skin tru. Na Baibel i tok, “Maski meri i luk nais tru, em i no inap i stap olsem oltaim.” (Sindaun 31:30) Sapos wanpela man o meri i gat gutpela skin na ol i baim em bilong wok long televisen samting, ol man i save litimapim nem bilong em inap liklik taim tasol na bihain ol i les long em na ol i laik lukim nupela pes long televisen. Na planti man na meri olsem ol i no gat gutpela skin tru. I gat sampela lain ol i save penim pes bilong ol dispela manmeri na mekim gut skin bilong ol, olsem na long televisen yu lukim skin bilong ol i gutpela. (Tasol sapos yumi lukim ol long taim i no gat pen samting long pes bilong ol, bai yumi kirap nogut!)

Olsem na sapos yu no gat gutpela skin olsem ol lain long televisen samting, yu no ken bel hevi long dispela na yu ting skin bilong yu i nogut. Na maski ol wanlain bilong yu i tok yu longpela tumas o sotpela tumas o patpela tumas, yu no ken larim ol i bosim tingting bilong yu long wanem kain skin i gutpela. Yu no ken tingim tok bilong ol. Maski yu ting pes o gras samting bilong yu i no gutpela, ating narapela bai amamas tru sapos em i gat kain pes o gras olsem.

Mekim Gut Skin Bilong Yu

Tru, i gat as na sampela yangpela i bel hevi long skin bilong ol​—ating i gat ol liklik buk i kamap long pes bilong ol, o ol i patpela tumas, o nus bilong ol i bikpela, o ol i sotpela tru. Tasol yu yangpela yet na yu mas save, skin bilong yu i wok yet long senis. Sampela taim ol dispela liklik buk i save kamap long pes bilong yangpela, o skin bilong em i go patpela o i lus liklik, o bun bilong em i go longpela hariap hariap​—em wanpela hevi bilong ol yangpela. Tasol taim yu bikpela pinis, ating ol dispela kain hevi bai pinis na skin bilong yu bai kamap gutpela na bai yu no bel hevi moa long en.

Na taim yu bikpela pinis, sapos yu stap olsem yet, orait yu mas karim tasol dispela hevi. Wanpela man bilong raitim buk (em John Killinger) em i tok, planti manmeri i no gat gutpela skin na ol i no inap senisim na ol i bel hevi. Tasol maski yu ting skin bilong yu i no gutpela, yu inap mekim gut skin bilong yu.

Tru, ol dokta i save mekim sampela samting bilong stretim pes o nus samting, tasol dispela samting i gat bikpela pe bilong en, na em inap bagarapim skin tu.a Tasol sapos yu waswas gut oltaim bai skin i kamap gutpela, na sop wantaim wara i no gat bikpela pe bilong en. Ating gras bilong yu i no lait olsem gras bilong ol lain long televisen, tasol sapos yu wasim oltaim em bai klinpela na gutpela; na yu ken wasim gut pes na han, na klinim kapa bilong pinga. Na sapos tit bilong yu i wait tru na maus bilong yu i klinpela, orait taim yu lap bai pes bilong yu i gutpela. Na olsem wanem? Skin bilong yu i pat tumas? Orait, yu ken lusim kaikai liklik, olsem kaikai i gat bikpela gris, na yu ken eksasais. Sapos yu mekim olsem, orait ating bai skin bilong yu i lus liklik na nau i no pat tumas.

Na yu ken askim papamama pastaim na wok long painim ol kain klos i stret long skin bilong yu, na wokim gras long pasin i mekim pes i kamap gutpela. Wanpela meri bilong raitim buk (em Sharon Faelten) em i tok, sapos meri i gat bikpela nus na em i komim gras i go bikpela o i go antap, dispela inap mekim na i olsem nus bilong em i liklik. Maski yu yangpela man o yangpela meri, sapos yu skelim gut ol klos yu pasim, na ol dispela klos i gat kala samting i stret long skin bilong yu yet, orait dispela inap mekim skin bilong yu i kamap gutpela. Sampela kain makmak long klos inap mekim na i olsem skin i bikpela o skin i liklik.

Tru tumas, sapos yu wokim tingting na wok strong, orait maski skin bilong yu i no gutpela tumas, em inap kamap gutpela.

Yu Mas Tingting Stret

Tru yu mas mekim gut skin, tasol nogut yu tingting tumas long skin bilong yu na yu ting em i bikpela samting tru. Taim Baibel i stori long ol man na meri, em i no stori tumas long klos o skin samting bilong ol, a? Na Baibel i no stori long Abraham o Maria o Jisas i gat wanem kain pes o skin. Olsem na yumi save God i no tingim skin o pes bilong man i bikpela samting.

Wanpela taim God i laik makim wanpela king, tasol em i sakim yangpela man Eliap maski skin bilong em i gutpela tru! God Jehova i tokim profet Samuel: “Yu no ken ting long em i longpela bun o long em i luk naispela na bai mi makim em. Nogat. . . . Long wanem, mi no save skelim ol man olsem ol man i save skelim. Nogat. Ol man i save lukluk long bodi. Tasol mi save lukim tingting na laik bilong man na mi skelim ol.” (1 Samuel 16:​6, 7) Em nau, yumi save skin bilong yumi i no bikpela samting long God. Em i save lukim bel bilong man. Em gutpela, a? Long wanem, yumi laik bai God yet i amamas long yumi.

Na i gat narapela samting tu yu ken tingim: Ating planti poroman bilong yu na papamama tu i no gat gutpela skin tumas, a? Tasol yu no tingim skin bilong ol i gutpela o nogat, a? Yu tingim gutpela pasin bilong ol! Yu tu yu gat sampela gutpela pasin na dispela i winim tru gutpela skin.

Tasol ol narapela yangpela i ting gutpela skin em i bikpela samting, na ating bai yu pilim olsem yu mas bihainim pasin bilong ol long bilasim skin. Tasol olsem wanem? Yu mas bihainim o nogat? Orait, lukim Sapta 11.

[Ol Futnot]

Toktok Wantaim long Ol Dispela Askim

◻ Bilong wanem ol yangpela i save tingting tumas long skin bilong ol? Yu ting olsem wanem long skin bilong yu yet?

◻ Televisen na ol narapela yangpela i laik kirapim yu long ting olsem wanem long skin bilong yu? Orait, yu mas mekim wanem?

◻ Sapos i gat ol liklik buk i kamap long pes bilong yu, orait yu ken mekim wanem?

◻ Yu ken mekim wanem bilong mekim skin i kamap gutpela? Tasol bilong wanem yu mas bihainim stretpela tingting long dispela samting?

[Rait long pes 82]

‘Mi no laikim skin bilong mi. Mi no gat gutpela skin’

[Rait long pes 88]

Yu gat sampela gutpela pasin na dispela i winim tru gutpela skin

[Blok/Piksa long pes 84, 85]

‘Mi Inap Pinisim Ol Liklik Buk long Pes?’

I gat wanpela sik i save mekim na ol liklik buk i kamap long pes na nek na baksait samting. Long skin bilong planti yangpela, dispela sik i no save pinis hariap. Dispela sik inap painim ol manmeri i bikpela pinis, tasol sampela man i gat save long dispela kain sik ol i tok, em i save painim planti yangpela, na em i save bagarapim tru sampela.

Olsem na taim ol i askim 2,000 yangpela ol i bel hevi long wanem samting long skin bilong ol, planti tru ol i tok, ol i bel hevi long ol dispela liklik buk i save kamap long skin. Yangpela meri Sandra i gat dispela kain sik taim em i stap long haiskul na em i tok, ‘I gat planti liklik buk i kamap long pes bilong mi na mi sem tru long en. Olsem na oltaim mi save haitim pes bilong mi bambai ol narapela i no ken lukim ol dispela liklik buk. Pes bilong mi i nogut tru.’​—Nius Co-Ed.

Bilong wanem dispela sik i kamap taim yu yangpela na yu laik bai skin bilong yu i gutpela? Em i kamap, long wanem yu wok long i go bikpela na planti senis i kamap long skin bilong yu. I gat ol liklik samting long skin i save kamapim gris, na taim yu yangpela dispela i wok long kamapim bikpela gris.

Ol dispela liklik buk i kamap olsem wanem long skin? Wanpela buk (The World Book Encyclopedia) i stori olsem: As bilong olgeta wan wan liklik gras long pes na nek samting i solap na gris i pulap long en na i go long ol liklik liklik hul long skin na i go ausait. Tasol sampela taim hul i pas na gris i no inap i go ausait. Orait nau dispela gris i save drai na i kamap blakpela, na bihain susu i kamap aninit long en. Em nau, liklik buk i save kamap long dispela hap. Sampela taim ol liklik binatang bilong kamapim sik ol i save kamap long dispela gris i pas insait long hul, na nau wanpela kain bikpela buk i kamap. Taim dispela buk i pinis, mak bilong en bai stap oltaim long skin. Tasol ol liklik buk tu, sapos yu wok long bengim o brukim, orait bai i go nogut na mak bilong en bai stap long skin. Olsem na yu no ken bengim o brukim ol dispela liklik buk!

Sapos yu tingting planti long wanpela samting, o wanpela hevi i mekim na bel bilong yu i bagarap, dispela inap mekim na bai bikpela gris i kamap long ol hul bilong skin. Buk i save kamap long pes bilong sampela yangpela taim ol i mas mekim wanpela bikpela samting long skul, olsem tes samting. Olsem na tok bilong Jisas inap helpim yu, em i tok: “Yupela i no ken tingting tumas long tumora. De tumora em i ken tingting long samting bilong em yet.”​—Matyu 6:34.

Tasol sori tumas, i no gat wanpela marasin em inap oraitim dispela sik wantu tasol. Tasol i gat sampela marasin yu ken baim long haus marasin na em inap daunim dispela sik. O sapos ol dispela liklik buk i kamap planti tumas, orait yu ken i go lukim dokta. Sampela yangpela i save wasim pes bilong ol long wanpela kain sop i gat marasin bilong dispela sik long en (benzoyl peroxide). Tasol yu no ken wasim pes long ol sop i gat bikpela gris o wel long en, na no ken welim pes.

Sampela yangpela i save eksasais, na raun ausait na kisim gutpela win, na kisim gutpela slip, na dispela samting i helpim skin bilong ol long kamap gutpela. Sapos yu lusim ol kaikai i gat bikpela gris o bikpela suga na yu kisim ol gutpela kaikai, dispela inap helpim yu.

Sapos yu traim kain kain samting bilong stretim dispela sik na ol dispela liklik buk i stap yet, orait yu no ken les long mekim. Yu mas tingim: Isi isi dispela sik i bin kamap, olsem na yu no inap pinisim wantu tasol. Dispela yangpela meri Sandra, em yumi bin stori long em, em i tok: ‘Mi wok strong long mekim ol samting bilong pinisim ol liklik buk long pes bilong mi, na insait long 6-pela wik skin i kamap gutpela liklik, tasol mi mas wok i go inap wanpela yia olgeta na nau ol dispela liklik buk i pinis tru.’ Sapos yu wok strong olsem inap longtaim liklik, ating skin bilong yu tu bai kamap gutpela.

Tasol sapos yu gat sampela liklik buk long pes bilong yu, yu no ken bel hevi long dispela na yu sem long toktok wantaim ol narapela. Nogat. Tru ating yu pilim olsem ol dispela liklik buk i stap ples klia tru na ol man i wok long lukim, tasol ating nogat. Olsem na bel bilong yu i mas i stap gutpela, na yu mas wok strong long mekim ol samting bilong pinisim ol liklik buk long skin bilong yu.

[Piksa long pes 83]

Maski yu ting pes o gras samting bilong yu i no gutpela, ating narapela bai amamas tru sapos em i gat kain pes o gras olsem

[Ol Piksa long pes 86]

Ol yangpela i no save ol manmeri ol i lukim long piksa i gat lain bilong wokim gras na penim pes bilong ol na i olsem ol i gat gutpela skin