TAIM sampela i kisim asainmen bilong mekim wanpela tok, ol i hatwok long raitim olgeta tok ol bai mekim, stat long kirap bilong tok na i go inap long pinis. Ol bai lusim planti aua long senisim na raitim dispela tok planti taim.

Yu save redim ol tok bilong yu olsem? Yu laik lain long wanpela pasin bilong redim ol tok i no hatwok long mekim? Sapos yu lain long wokim autlain, bai yu no gat wok moa long raitim olgeta tok yu laik mekim. Yu inap lusim hap taim moa long mekim traim long tok bilong yu. Bai yu no hatwok olsem bipo long mekim tok na ol man bai amamas long harim na kirap bihainim ol tok yu mekim.

Ol pablik-tok ol i mekim long kongrigesen i gat autlain ol i redim pinis. Tasol planti ol narapela tok nogat. Ating asainmen bilong yu i makim samting yu bai stori long en o wanpela tim tasol. O ol i makim yu long stori long wanpela hap bilong wanpela buk samting. O sampela taim ol bai givim sampela tok tasol long yu bilong bihainim. Long ol kain asainmen olsem, yu mas redim autlain bilong yu yet.

Long pes 41 i gat piksa bilong wanpela autlain bambai yu ken lukim na kisim sampela tingting long pasin bilong wokim autlain. Yu ken lukim olsem ol i kirap long han kais na raitim ol wan wan bikpela tok long ol bikpela leta tasol. Aninit long ol wan wan bikpela tok ol i raitim ol tok i strongim dispela bikpela tok. Orait, ol i lusim arere bilong pes long han kais na kam insait liklik na raitim ol narapela tok ol bai mekim wok long en bilong kamapim gut ol dispela tok. Skelim gut dispela autlain. Lukim olsem tupela bikpela tok i stori stret long tim bilong tok. Na tu, ol tok i stap aninit long ol bikpela tok i no stori long narapela samting, nogat, ol i wok long strongim dispela bikpela tok yet.

Ating taim yu redim wanpela autlain em bai i no luk wankain stret olsem dispela. Tasol sapos yu kisim gut lo bilong redim autlain, dispela bai helpim yu long stretim na redim gut wanpela tok, na bai yu no lusim bikpela hap taim bilong mekim olsem. Orait, bai yu mekim olsem wanem?

Skelim, Makim, na Stretim

Yu mas i gat wanpela tim bilong tok. Wanpela tok tasol i no inap makim tim bilong tok. Em i mas stret wantaim as tingting yu laik kamapim na i makim pasin yu bai bihainim bilong stori long dispela tok. Sapos ol i makim tim bilong yu, orait skelim gut olgeta wan wan bikpela tok bilong en. Sapos ol i makim ol tok bilong wanpela buk samting bilong kisim tok bilong yu long en, orait tingim tim bilong tok taim yu stadi long ol tok bilong buk ol i makim. Sapos ol i makim tok tasol yu bai stori long en, orait yu yet mas makim tim. Tasol paslain long makim, wok long painim sampela save. Sapos yu tingting gut, planti taim bai yu kisim sampela nupela tingting.

Taim yu mekim ol dispela samting, askim yu yet: ‘Bilong wanem dispela tok i bikpela samting long odiens bilong mi? Wanem as na mi mekim dispela tok?’ I no olsem yu laik kamapim tasol sampela tok o mekim tok ol man i amamas long en, nogat, yu laik bai tok bilong yu i ken helpim ol man. Taim yu luksave long olsem wanem dispela tok inap helpim ol man, raitim long wanpela hap pepa. Tingim dispela taim yu wok long redim tok bilong yu.

Taim yu tingim pinis as bilong mekim dispela tok na yu makim pinis wanpela tim i stret wantaim dispela (o yu skelim pinis olsem wanem tim bilong tok ol i makim bilong yu i stret wantaim as bilong mekim dispela tok), orait yu ken wok long painim save i stret tru long tok yu laik kamapim. Painim ol tok em inap helpim stret odiens bilong yu. No ken toktok nabaut. Painim ol tok i stret tru na em inap givim gutpela save long ol man na helpim tru ol. Bihainim savepasin na tingim hamas taim yu bai lusim long painim save. Kwiktaim bai yu painim planti tok na yu no inap kamapim olgeta, olsem na yu mas skelim gut wanem ol tok yu bai kamapim.

Luksave long ol bikpela tok yu mas stori long en bambai yu inap kamapim tim bilong yu na inapim samting yu laik bai dispela tok i mekim. Ol dispela tok bai kamap olsem bun bilong tok bilong yu, olsem autlain. I mas i gat hamas bikpela tok? Long ol sotpela tok, tupela em inap, na long ol longpela tok olsem wanpela aua, ating faipela em inap. Taim yu no gat planti bikpela tok, i no hatwok long odiens long tingim ol dispela tok.

Orait, taim tim bilong tok na ol bikpela tok i stap long tingting bilong yu, nau stretim gut ol save yu bin painim long ol buk. Tingim ol tok i helpim ol bikpela tok. Kisim ol tok em inap mekim na bai tok bilong yu i no wankain long ol narapela tok. Taim yu kisim ol skripsa bilong helpim ol bikpela tok, luksave long ol tingting em inap helpim yu long kamapim gut insait bilong ol dispela skripsa. Putim ol narapela narapela tok aninit long bikpela tok i stret long en. Sapos sampela save yu bin painim i no stret wantaim wanpela bikpela tok bilong yu, rausim—maski em i gutpela tok—o putim long wanpela fail bilong yusim long bihain. Mekim wok long ol gutpela gutpela tok tasol. Sapos yu traim long kamapim planti tok tumas, bai yu toktok hariap na bai yu no mekim gut tok bilong yu. Mobeta yu kamapim gut wan wan bikpela tok ol inap helpim tru odiens. No ken abrusim minit bilong tok.

Sapos yu no mekim yet, orait stretim gut wanem tok yu mas mekim pastaim na wanem tok long bihain. Luk, em man bilong raitim Gutnius, i bin mekim olsem. Em i bungim pinis planti tok i stori long tok em i laik kamapim na em i “raitim stret tasol, olsem ol dispela samting i bin kamap.” (Lu. 1:3) Yu inap stretim ol tok yu laik mekim, olsem: Stori long samting i bin kamap pastaim na samting i kamap bihain, o kamapim wanpela lista olsem, wanem samting i mekim na samting i kamap, o kamapim wanpela hevi na bihain stori long rot bilong stretim dispela hevi. Mekim long pasin em inap kamapim as na yu mekim dispela tok. Yu no ken stori long wanpela samting na wantu lusim na stori long narapela samting. Nogut ol man i harim tok bilong yu i hatwok long bihainim ol bikpela tok yu kamapim. Ol tok yu kamapim i mas stiaim tingting bilong ol man i go i go na ol bai kisim stretpela save long en. Taim yu wok long stretim ol bikpela tok, tingim: Odiens bai ting olsem wanem long dispela? Ol bai hatwok long kisim gut tingting yu kamapim? Ol bai kirap mekim samting yu laik bai tok bilong yu i kirapim ol long mekim?

Nau redim wanpela kirap bilong tok i kirapim odiens long putim yau long tok bilong yu na i soim ol olsem wanem dispela tok inap helpim ol. Sapos yu raitim sampela sentens bilong kirapim tok, ating dispela bai helpim yu. Laspela samting: Bilong kamapim pinis bilong tok, tingim ol tok bai kirapim ol man na i stret wantaim as na yu mekim dispela tok.

Sapos yu redim autlain pastaim tru, yu inap stretim gut paslain long taim bilong mekim tok. Ating bai yu luksave olsem, bilong helpim sampela tok bilong yu, yu mas kamapim sampela save moa, o wanpela tok piksa, o stori bilong wanpela man. Stori long samting i kamap nau o samting ol man bilong dispela hap i save tingim. Dispela bai helpim ol man long save olsem tok yu mekim em inap helpim ol. Taim yu skelim tok bilong yu, ating bai yu luksave long sampela rot moa bilong stretim dispela tok na bai em inap helpim gut odiens bilong yu. Pasin bilong skelim na stretim stretim tok em i bikpela samting bilong kamapim wanpela tok i helpim gut ol man.

Bilong helpim ol long mekim tok, sampela i mas raitim planti tok, winim sampela narapela. Tasol sapos yu stretim ol tok yu laik kamapim aninit long wan wan bikpela tok, na rausim ol tok i no save helpim ol bikpela tok, na yu bihainim gutpela tingting na raitim ol tingting bilong yu, orait bai yu lukim olsem yu no gat wok long raitim olgeta tok yu laik kamapim. Man! Bai yu no westim taim moa long raitim raitim planti tok! Na ol tok yu mekim bai kamap gutpela moa. Em bai kamap ples klia olsem skul yu kisim long Skul Tiokratik i helpim yu tru.

TAIM yu mekim ol asainmen long skul, dispela i givim rot long yu long kamap strong. Wok strong long mekim gut ol asainmen, na yu yet na ol narapela tu bai luksave olsem isi isi wok bilong yu i kamap gutpela moa. (1 Ti. 4:15) Skul bai helpim yu long kamapim moa yet ol gutpela pasin bilong yu long mekim tok.

Yu save pret liklik taim yu tingting long sanap long ai bilong kongrigesen na mekim tok? Dispela i save kamap, maski yu bin insait long skul longpela taim pinis. Tasol i gat sampela samting i ken helpim yu long daunim dispela pret. Long haus, wok long rit long maus long olgeta taim. Long ol miting bilong kongrigesen, bekim tok planti taim, na sapos yu wanpela pablisa, autim tok long olgeta taim. Long dispela rot bai yu kisim save long toktok long ai bilong ol man. Na tu, redim ol asainmen bilong skul paslain tru long taim bilong mekim, na mekim traim long maus. Tingim: Ol man yu bai toktok long ol em ol pren bilong yu. Paslain long mekim tok, beten long Jehova. Em i amamas long givim spirit holi long ol wokboi bilong em taim ol i askim em long en.—Lu. 11:13; Fl. 4:6, 7.

Kisim stretpela tingting long samting yu ting yu inap mekim. Bilong kisim save long sanap long ai bilong ol man na mekim tok na kamap gutpela tisa, yu mas mekim planti taim. (Mai. 6:8) Sapos yu nupela long skul, yu no ken ting wantu tasol bai yu mekim tok i gutpela tru. Nogat. Wok long winim wanpela hap tok kaunsel pastaim na bihain winim narapela. Stadi long hap bilong dispela buk i stori gut long dispela hap tok kaunsel. Sapos yu inap, mekim ol eksasais dispela hap i stori long en. Dispela bai givim save long yu long dispela hap tok kaunsel paslain long yu mekim asainmen bilong yu long kongrigesen. Wok bilong yu bai kamap gutpela.

Pasin Bilong Redim Asainmen Bilong Rit

Bilong redi long ritim tok long ai bilong ol man, i no olsem yu mas save long kolim ol tok i stap long asainmen bilong yu na em tasol. Nogat. Wok long kisim gut insait bilong ol tok yu bai ritim. Namba wan samting bilong mekim taim yu kisim asainmen em olsem: Ritim bilong kisim gut insait bilong en. Traim long save long as bilong olgeta wan wan sentens na as tingting ol i kamapim long olgeta wan wan paragraf bambai ritim bilong yu i kamapim stret tingting na pasin dispela tok i laik kamapim. Sapos yu inap, lukim wanpela dikseneri bilong kolim stret ol tok. Wok long save gut long ol tok. Ating ol papamama i mas helpim ol yangpela pikinini bilong ol long mekim olsem.

Olsem wanem? Ol i makim yu long ritim wanpela hap bilong Baibel o ol paragraf bilong wanpela hap bilong Wastaua? Sapos i gat ol kaset bilong Baibel o Wastaua long tok ples bilong yu, harim gut pasin bilong ol long ritim tok, long wanem, dispela inap helpim yu long pasin bilong kolim stret ol tok, na strongim sampela tok, na senisim pasin bilong toktok. Orait, traim long bihainim ol dispela pasin taim yu ritim tok.

Taim yu kirap long redim asainmen, stadi gut long dispela stadi i stori long pasin bilong mekim toktok em ol i makim yu long mekim. Sapos yu inap, riviu long dispela tok taim yu ritim pinis planti taim long maus dispela hap ol i makim yu long ritim. Wok strong long bihainim ol tok kaunsel ol i raitim.

Dispela trening bai helpim yu long wok bilong yu long autim tok. Planti taim long wok bilong autim tok bai yu gat rot long ritim tok long ol man. Tok bilong God i gat strong bilong senisim pasin bilong ol man, olsem na em i bikpela samting yu mas ritim gut. (Hi. 4:12) Yu no ken ting bai yu kisim pasin bilong ritim gut tok taim yu mekim pinis wanpela o tupela asainmen. Nogat. Aposel Pol i tok long wanpela elda Kristen i bin mekim wok inap planti yia olsem: “Wok yet long ritim buk bilong God long ol manmeri.”—1 Ti. 4:13.

As Tok na Pasin Bilong Mekim Tok

Bai yu mekim wanem taim yu kisim asainmen long skul na yu mas mekim olsem yu toktok wantaim nupela man o mekim gobek samting?

I gat 3-pela bikpela samting yu mas tingim: (1) samting ol i makim yu long toktok long en, (2) olsem wanem yu bai mekim tok, na dispela man bai yu toktok wantaim em, na (3) dispela hap tok kaunsel ol i makim yu long wok long en.

Yu mas bungim sampela tok long samting ol i makim yu long toktok long en. Tasol pastaim, tingting gut long yu bai mekim dispela tok olsem yu stap we na toktok wantaim wanem kain man, long wanem, dispela bai bosim wanem kain tok bai yu kamapim na bai yu mekim long wanem kain pasin. Bai yu mekim tok olsem yu toktok wantaim husat na long wanem taim na ples? Bai yu mekim olsem yu autim gutnius long man yu save long em? O bai yu soim samting em inap kamap taim yu bungim man long namba wan taim? Krismas bilong dispela man i antap o aninit long krismas bilong yu? Yu ting em i gat wanem tingting long samting yu laik stori long en? Em i gat sampela save pinis long dispela samting? Yu laik bai tok bilong yu i ken mekim wanem long dispela man? Bekim bilong ol dispela askim bai givim sampela tingting long yu taim yu wok long redim dispela tok.

Bai yu painim save we long samting ol i makim yu long toktok long en? Pes 33 i go inap pes 38 bilong dispela buk i toktok long “Rot Bilong Painim Save.” Ritim dispela hap, na bihain yusim ol tul bilong painim save. Ating bai yu painim planti save tumas, na yu no inap mekim wok long olgeta dispela save. Ritim na painimaut, ol buk samting i kamapim hamas save long samting yu laik stori long en. Tasol taim yu mekim olsem, tingting long yu bai mekim tok olsem yu toktok long wanem kain man na long wanem taim na ples. Putim mak long ol tok yu ting em i gutpela long kamapim.

Taim yu laik stretim gut na makim wanem save yu bai kamapim, pastaim ritim ol tok em skul-buk i kamapim long hap tok kaunsel ol i makim yu long wok long en. Wanpela bikpela as na ol i givim yu dispela asainmen, em bilong yu ken lain long bihainim dispela tok kaunsel.

Mekim tok bilong yu insait long ol minit ol i makim na bai yu kisim amamas long kamapim pinis bilong tok bilong yu, long wanem, sapos yu abrusim taim ol bai paitim belo samting bilong makim olsem taim i pinis. Tasol long wok autim tok yumi no tingting tumas long hamas minit yumi toktok wantaim man. Olsem na taim yu redim tok, tingim hamas minit yu inap mekim toktok, tasol tingting strong long mekim gutpela wok tisa.

Toksave Long Pasin Bilong Mekim Tok Olsem Wanem. Skelim ol tok i stap long pes 82, na makim wanpela pasin em i stret long hap yu save mekim wok autim tok long en na i stret tu wantaim tok ol i makim yu long kamapim. Sapos yu bin insait long skul longpela taim, orait tingim dispela i olsem rot bilong mekim wok autim tok bilong yu i kamap gutpela moa.

Sapos wasman Skul Tiokratik i makim olsem wanem yu bai mekim dispela tok, orait amamas na traim long mekim olsem. Klostu olgeta taim bai yu mekim olsem yu autim tok. Sapos yu no bin autim tok long kain taim o ples ol i makim, toktok wantaim wanpela pablisa i bin mekim olsem na kisim tingting bilong em. Sapos yu inap, paslain long taim bilong mekim tok long skul, traim long kamapim tok bilong yu long kain taim na ples olsem asainmen i makim. Dispela bai helpim yu long winim wanpela mak, em as bilong skul yu kisim.

Taim Yu Mekim Olsem Wanpela Tok

Sapos yu wanpela man, ol inap makim yu long mekim wanpela sotpela tok long kongrigesen. Ol samting yu mas tingim bilong redim ol dispela tok i wankain olsem ol samting yu mas tingim taim yu redim ol asainmen ol i mekim olsem soim. Tupela samting i narapela kain, olsem yu toktok long husat na yu mekim olsem wanem.

Em i gutpela long redim ol tok em inap helpim olgeta man i harim tok bilong yu. Klostu olgeta man i stap long miting ol i save pinis long ol as tok bilong Baibel. Ating ol i save gut long samting skul i makim yu long toktok long en. Tingim save ol i holim pinis. Wok long mekim sampela tok em inap helpim ol. Askim yu yet: ‘Samting mi laik stori long en, olsem wanem dispela i ken helpim mi wantaim odiens bilong mi long laikim Jehova moa yet? Wanem tok i stap long tok bilong mi em inap helpim mipela long save long laik bilong God? Dispela tok i ken helpim mipela olsem wanem long makim gut ol samting mipela laik mekim taim mipela i stap namel long ol man i tingting long amamasim skin tasol?’ (Ef. 2:3) Bilong kisim ol gutpela bekim bilong ol dispela askim yu mas wok long painim save. Taim yu yusim Baibel, no ken ritim ol ves tasol. Kamapim gut insait bilong ol skripsa yu mekim wok long en, na soim olsem wanem ol dispela skripsa i as bilong tingting yu laik kamapim. (Ap. 17:2, 3) No ken stori long planti samting. Kamapim ol tok long pasin i no hatwok long tingim gen.

Taim yu redim tok, yu mas tingting tu long pasin bilong yu long mekim tok. Dispela i no liklik samting. Mekim traim tok bilong yu long maus. Hatwok yu mekim long stadi na long bihainim tok kaunsel long ol pasin bilong mekim toktok bai helpim yu long mekim tok i kamap gutpela moa. Maski yu nupela long mekim ol tok o yu bin mekim planti yia, redi gut bambai yu inap mekim toktok long pasin olsem yu bilip tru long en na i stret wantaim samting yu stori long en. Taim yu mekim ol asainmen long skul, tingim as na yu mekim wok long pasin bilong toktok God i givim long yu, em bilong litimapim nem bilong Jehova.—Sng. 150:6.

OL I redim program bilong Skul Tiokratik Bilong Autim Tok bilong helpim olgeta insait long kongrigesen. Na tu, ol gutpela tok i save kamap long ol narapela miting bilong kongrigesen na long ol kibung sekit na kibung distrik. Sapos ol i bin givim yu wanpela asainmen long wanpela kain program olsem, yu bin kisim wanpela bikpela wok. Aposel Pol i bin tokim wasman Kristen Timoti long was gut long pasin bilong em long skulim ol man. (1 Ti. 4:16) Ol manmeri i save kam long ol miting Kristen ol i bin makim hap taim na kam—sampela i mekim maski em i hatwok—bilong kisim skul long pasin bilong pas gut wantaim God. Bilong givim kain skul olsem long ol em i wanpela bikpela wok tru! Olsem wanem yu ken mekim gut dispela wok?

Ol Bikpela Tok Yumi Ritim Long Baibel

As bilong dispela hap bilong skul em hap bilong Baibel sediul i makim bilong ritim long olgeta wik. Dispela hap i mas kamapim klia olsem wanem dispela tok bilong Baibel i helpim yumi long nau. Olsem Nehemia 8:8 i stori long en, Esra na ol wanwok bilong em i bin ritim Tok Bilong God long ol man, na “autim as bilong lo long ol,” na helpim ol long kisim gut. Yu ken mekim wankain pasin taim yu kamapim ol bikpela tok bilong Baibel.

Bai yu redim dispela asainmen olsem wanem? Sapos yu inap, wanpela wik samting paslain long taim bilong mekim dispela tok, ritim dispela hap bilong Baibel ol i makim yu long kamapim. Orait, nau tingting long ol samting bilong helpim kongrigesen. Beten long dispela samting. Wanem tok kaunsel, wanem ol man i stap olsem gutpela piksa, wanem ol stiatok i stap long dispela hap bilong Baibel em inap givim dispela helpim long kongrigesen?

Yu mas wok long painim sampela save, em i bikpela samting. I gat Watchtower Library long CD-ROM o Watch Tower Publications Index o Indeks Bilong Ol Skripsa long tok ples bilong yu? Sapos i gat, mekim gutpela wok long en. Taim yu skelim tok ol buk samting i bin mekim long ol ves bilong Baibel yu laik stori long en, bai yu painim sampela gutpela tingting, o tok i kamapim truim bilong sampela tok profet, o tok i stori long ol ves i lainim yumi long pasin bilong Jehova, o tok i stori long ol stiatok. No ken stori long planti samting tumas. Mobeta yu skelim gut na stori gut long wan wan ves tasol.

Ating asainmen bilong yu i makim olsem yu mas askim ol man long stori long olsem wanem hap bilong Baibel ol i ritim long wik i bin helpim ol. Wanem tok ol i bin painim i helpim stadi bilong ol yet na famili-stadi, o wok autim tok bilong ol o sindaun bilong ol? Wanem ol pasin Jehova i bin kamapim long ol manmeri na ol kantri? Ol man i ritim dispela hap ol i kisim wanem save i strongim bilip bilong ol na i helpim ol long laikim tru Jehova? No ken stori long ol liklik liklik samting. Kamapim klia mining bilong ol tok yu stori long en na olsem wanem dispela inap helpim yumi.

Instraksen-Tok

Ol i kisim dispela tok long wanpela hap bilong Wastaua o Kirap! o long wanpela hap bilong wanpela buk. Klostu olgeta taim ol tok i stap long ol dispela nius na buk, em i stret tru long inapim minit bilong tok. Yu mas mekim dispela asainmen bilong yu olsem wanem? Yu mas mekim olsem wanpela tisa, i no olsem man bilong inapim sampela pes bilong ol buk samting. Wasman i “mas save gut long pasin bilong skulim ol manmeri.”—1 Ti. 3:2.

Bilong kirap redim tok bilong yu, pastaim ritim ol tok ol i makim. Ritim olgeta skripsa. Tingim tingim. Wok long mekim olsem paslain tru long taim ol i makim bilong mekim dispela tok. Tingim tu olsem Sosaiti i save kirapim ol brata long ritim hap bilong nius o buk ol i kisim dispela tok long en paslain long miting. Wok bilong yu i no bilong stori gen long en o sotim, nogat, em bilong soim olsem wanem yumi ken bihainim dispela tok. Mekim wok long ol tok em inap helpim tru kongrigesen.

Wankain olsem ol wan wan pikinini i gat pasin bilong ol yet, olsem tasol ol wan wan kongrigesen i gat ol pasin bilong ol yet. Bilong mekim gutpela wok tisa, papa o mama i no save kolim tasol ol gutpela pasin pikinini i mas bihainim. Em i save toktok gut wantaim pikinini. Em bai tingim pasin bilong pikinini na ol pasin kranki pikinini i hatwok long daunim. Long wankain pasin, ol tisa insait long kongrigesen ol i wok long save gut long ol hevi bilong kongrigesen na kamapim ol tok bilong helpim ol. Tasol gutpela tisa i no save kamapim wanpela stori em inap semim wanpela i sindaun long odiens. Em bai stori long ol gutpela samting i kamap pinis taim ol i bihainim rot Jehova i makim, na em bai kamapim ol tok kaunsel i stap long ol skripsa em inap helpim kongrigesen long stretim ol hevi i save kamap.

Taim man i mekim gutpela wok tisa, dispela i save mekim tok i go daun long bel bilong ol man i sindaun long odiens. Bilong mekim olsem, i no olsem yu kolim tasol ol tok i stret na tru, nogat, yu mas kirapim ol man long pilim tru as bilong ol dispela tok. Tisa i mas i gat laik tru long helpim ol man em i wok long skulim ol. Ol wasman bilong kongrigesen i mas save long ol sipsip. Sapos long pasin sori ol i tingim ol hevi ol brata sista i save karim, ol inap givim tok bilong strongim ol, na soim olsem ol i pilim hevi ol i karim na ol i sori tru long ol.

Ol gutpela tisa i save, as bilong mekim wanpela tok i mas klia tru. Yu mas kamapim ol tok long pasin i save mekim na ol bikpela tok i stap ples klia na ol man inap tingim. Odiens i mas kisim sampela gutpela tingting em inap helpim sindaun bilong ol.

Miting Bilong Wok

Taim yu mekim wanpela tok yu kisim long wanpela stori i stap long Wok Kingdom Bilong Yumi, wok bilong redim dispela tok em i narapela kain liklik. Long kain tok olsem yu mas kamapim gut ol tok Wok Kingdom i stori long en, na yu no ken makim wanem ol tok yu pilim em i stret long kamapim. Helpim odiens long tingim ol skripsa i as bilong ol tok kaunsel em tok i kamapim. (Ta. 1:9) I no gat bikpela hap taim, olsem na yu no inap stori long tok bilong ol narapela buk samting.

O ol inap makim yu long lukautim wanpela hap em tok bilong en i no stap long Wok Kingdom. Ol bai makim hap bilong wanpela Wastaua o ol bai givim sampela sotpela tok tasol. Em i wok bilong yu olsem tisa bilong tingim wanem tok insait long hap ol i makim yu long lukautim em inap helpim kongrigesen. Ating yu mas mekim sotpela tok piksa o kamapim wanpela stori i stret long samting yu laik stori long en. Tingim: I no olsem yu mas kamapim sampela save long wanpela tok na em tasol, nogat. Yu mas mekim long wanpela pasin i save helpim kongrigesen long mekim wok Baibel i makim na kisim amamas long mekim olsem.—Ap. 20:20, 21.

Taim yu redim asainmen bilong yu, tingting long sindaun bilong ol manmeri bilong kongrigesen. Tok amamas long ol long wok ol i mekim pinis. Taim ol i bihainim ol tok i stap insait long dispela asainmen, olsem wanem dispela inap helpim wok autim tok bilong ol i kamap gutpela moa na ol i amamas moa long mekim?

Olsem wanem? Asainmen bilong yu i makim olsem yu mas mekim wanpela soim o inteviu? Sapos olsem, yu mas redim paslain tru. Tru, em i no hatwok long askim narapela long redim na mekim dispela soim, tasol sampela taim dispela pasin i mekim na samting i no kamap gutpela. Sapos yu inap, em i gutpela long mekim traim long dispela soim o inteviu paslain long de bilong mekim tru. Yu mas lukautim gut dispela hap bilong tok bilong yu bambai em i ken strongim ol tok yu kamapim.

Ol Kibung Sekit na Kibung Distrik

Ol brata i kisim ol gutpela pasin bilong spirit na ol i kisim pasin bilong mekim gut tok na wok tisa long ai bilong ol man, ating ol bai askim ol long insait long program bilong kibung sekit o kibung distrik. Ol dispela kibung em ol bikpela de bilong skulim yumi long pasin tiokratik. Yu inap kisim kain asainmen olsem: Tok manuskrip, autlain, tok bilong mekim pilai bilong Baibel i makim ol samting bilong nau, o wanpela paragraf i tokim yu long samting yu mas mekim. Sapos yu kisim gutpela wok olsem, stadi gut long ol tok ol i givim long yu. Skelim gut dispela tok inap yu pilim tru olsem em i bikpela samting.

Ol brata i kisim asainmen bilong mekim wanpela tok manuskrip ol i mas ritim olgeta wan wan tok. Ol i no inap senisim wanpela tok. Ol bai stadi gut long en bambai ol i save gut wanem ol tok i bikpela tok na olsem wanem tok i kamapim ol dispela bikpela tok. Ol bai mekim traim long maus planti taim, inap ol i ken kolim strong ol bikpela tok, na givim bel long mekim tok, na mekim olsem ol i sori long man na i laik mekim gut long en, na wok strong long mekim tok, na mekim olsem ol yet i bilipim dispela tok, na strong bilong nek i stret long bikpela odiens.

Ol brata i kisim asainmen bilong mekim wanpela tok autlain, ol i mas bihainim gut autlain na kamapim ol tok bilong en. Ol i no ken ritim tasol ol tok i stap long autlain o redim tok olsem wanpela manuskrip, nogat, man bilong mekim tok i mas tingim tok long tingting na bel bilong em na mekim tok. Em i bikpela samting long bihainim ol minit autlain i makim bambai ol bikpela tok bai kamap ples klia. Brata i mekim tok i mas mekim gutpela wok long ol skripsa na ol tingting i stap aninit long ol bikpela tok. Em i no ken kolim ol tok em yet i laikim na kalapim ol bikpela tok autlain i kolim. As tru bilong ol dispela tok em Baibel. Wok bilong ol elda Kristen em bilong “autim tok” bilong God. (2 Ti. 4:1, 2) Olsem na brata bilong mekim tok i mas tingim tru ol skripsa i stap insait long autlain—stori gut long ol na tokaut long olsem wanem ol i ken bihainim ol dispela skripsa.

No Ken Surikim Taim

Yu save mekim wok long wanpela kongrigesen we yu gat rot long mekim planti tok? Olsem wanem yu ken mekim gut olgeta tok bilong yu? No ken wetim taim bilong mekim tok i kam klostu na nau yu kirap redim tok.

Ol tok i save helpim tru kongrigesen em ol tok ol brata i bin tingting gut long en pastaim na ol i redim. Olsem na i gutpela sapos yu kisim pasin bilong ritim ol tok bilong asainmen bilong yu kwiktaim bihain long taim ol i givim long yu. Long dispela rot yu inap tingting long en taim yu mekim ol narapela samting. Long ol de o wik paslain long mekim dispela tok, ating yu bai harim sampela tok em inap helpim yu long save long gutpela rot bilong kamapim ol dispela tok. Na ating ol samting bai kamap i soim olsem dispela tok i kamap long taim i stret tru long mekim. Tru, pasin bilong ritim na tingting long asainmen bilong yu kwiktaim bihain long taim yu kisim, em i save kisim sampela taim bilong yu, tasol dispela bai helpim yu tru. Orait taim yu kirap redim ol tok bilong autlain, pasin bilong yu long tingim gut dispela tok paslain tru em bai helpim yu gut. Taim yu bihainim dispela kain pasin long redim ol asainmen, dispela bai daunim pasin bilong tingting planti na em bai helpim yu long kamapim ol tok long pasin i save helpim ol brata sista long kongrigesen na tok i go daun long bel bilong ol.

Taim yu wok long tingim tru dispela presen yu bin kisim bilong mekim wok insait long skul bilong Jehova long skulim ol manmeri bilong em, bai yu litimapim nem bilong em na bai yu stap olsem wanpela blesing long ol manmeri i save laikim em tru.—Ais. 54:13; Ro. 12:6-8.

LONG olgeta wik, klostu olgeta kongrigesen bilong ol Witnes Bilong Jehova ol i stretim rot bilong mekim wanpela pablik-tok em Baibel i as bilong en. Sapos yu wanpela elda o wanpela kongrigesen sevent, yu save mekim gutpela tok na wok tisa taim yu mekim tok long ai bilong ol man? Sapos olsem, ating ol bai askim yu long mekim wanpela pablik-tok. Skul Tiokratik i bin helpim planti tausen brata long winim mak bilong mekim dispela wok. Taim ol i makim yu long mekim wanpela pablik-tok, bai yu kirap redim olsem wanem?

Stadi Gut Long Autlain

Taim yu laik kirap painim save long ol buk samting, pastaim ritim autlain na tingim tingim ol tok bilong en i go inap long taim yu save gut long tok em autlain i laik kamapim. Tingim tim bilong tok, em i olsem het-tok. Yu laik lainim ol man long wanem samting? Wanem as bilong mekim dispela tok?

Save gut long ol liklik het-tok. Skelim gut ol dispela bikpela tok. Olsem wanem ol dispela bikpela tok i stret wantaim tim bilong tok? Aninit long ol wan wan bikpela tok i gat sampela tok moa, i olsem hap bilong dispela bikpela tok. Na aninit long ol i gat ol tok i save strongim ol dispela tok. Tingim: Olsem wanem wanpela hap bilong autlain i save helpim tok em autlain i kamapim pastaim, na tok bilong wanpela hap i stiaim yumi i go long narapela hap bilong tok, na olsem wanem dispela hap tok i helpim yu long kamapim samting yu laik bai dispela tok i mekim. Taim yu save gut long tim, na wok yu laik bai dispela tok i mekim, na olsem wanem ol bikpela tok i mekim dispela wok, orait nau yu redi long kirap redim ol tok i stap long autlain.

Bilong helpim yu, tingim tok bilong yu i olsem 4-pela o 5-pela sotpela tok, em olgeta wan wan i gat wanpela bikpela tok. Redim wanpela bikpela tok pastaim na bihain narapela.

Autlain i olsem wanpela tul bilong redim tok. Taim yu mekim tok, i no olsem yu ritim ol tok i stap long autlain. Nogat. Autlain i olsem bun bilong tok. I olsem yu mas putim mit long dispela bun, na givim wanpela klok na win bilong laip long en.

Yusim Ol Skripsa

As bilong ol tok Jisas Krais na ol disaipel i bin lainim ol man long en, em Baibel. (Lu. 4:​16-21; 24:27; Ap. 17:​2, 3) Yu ken mekim wankain pasin. Baibel i mas stap olsem as bilong tok bilong yu. No ken kamapim tasol insait bilong ol tok autlain i kolim na olsem wanem ol man i ken bihainim. Yu mas save olsem wanem tok bilong Baibel i strongim dispela tok, na larim tok bilong Baibel i skulim ol man.

Taim yu redim tok, skelim olgeta ves autlain i kolim. Lukluk long ol tok i stap klostu long dispela ves long autlain. Ol i putim sampela skripsa bilong stori tasol long samting bilong wanpela man o lain, o sampela samting i bin kamap. Yu no gat wok long ritim o stori long olgeta skripsa taim yu mekim tok. Kamapim ol skripsa ol inap helpim tru odiens. Sapos yu mekim wok long ol skripsa i stap long autlain, ating bai yu no gat wok long yusim sampela narapela skripsa.

Bilong tok bilong yu i ken helpim ol man, hamas skripsa yu kamapim i no bikpela samting. Bikpela samting em pasin bilong yu long mekim wok tisa. Taim yu tokim ol man long lukim ol skripsa, kamapim as na yu laik ritim ol dispela skripsa. Larim hap taim bilong kamapim as bilong ol skripsa. Taim yu ritim pinis wanpela skripsa, larim Baibel bilong yu i op i stap taim yu stori long dispela skripsa. Ating odiens bai mekim wankain pasin. Olsem wanem yu inap kirapim laik bilong ol long harim tok na helpim ol long kisim bikpela helpim moa yet long Baibel? (Neh. 8:​8, 12) Yu inap mekim olsem: Kamapim insait bilong tok, mekim tok piksa, na stori long ol samting yumi mas mekim bilong bihainim dispela tok.

Kamapim insait bilong en. Taim yu laik kamapim insait bilong wanpela bikpela skripsa, askim yu yet: ‘Wanem mining bilong dispela skripsa? Wanem as na mi kamapim dispela skripsa long tok bilong mi? Odiens i gat wanem askim long dispela ves?’ Ating yu mas skelim ol ves i stap klostu, na wanem as na ol i kamapim dispela tok, na dispela em i strongpela tok o olsem wanem, na wanem tingting bilong man God i kirapim long raitim dispela tok. Bilong mekim olsem yu mas painim save. Yu inap painim planti save long ol buk na nius em “wokboi i gat gutpela tingting” i givim long yumi. (Mt. 24:​45-47) No ken kamapim insait bilong olgeta samting bilong dispela ves, tasol kamapim as na yu bin tokim ol man long ritim dispela skripsa.

Ol tok piksa. Wok bilong ol tok piksa em bilong helpim ol man long kisim sampela save i daun tru o bilong helpim ol long tingim wanpela tok o wanpela stiatok yu bin stori long en. Ol tok piksa i save helpim ol man long kisim gut tok yu givim long ol na skelim dispela tok wantaim samting ol i save pinis long en. Jisas i bin mekim olsem taim em i mekim tok antap long maunten. Ol kain tok olsem “ol pisin,” “ol plaua i stap nabaut,” “liklik dua,” ‘haus antap long ples ston,’ dispela i mekim na tok bilong em i gat strong na i klia tru na man i no inap lusim tingting long en.​—Mt., sap. 5–7.

Rot bilong bihainim tok. Pasin bilong kamapim insait bilong tok na mekim tok piksa long wanpela skripsa bai givim save long man, tasol pasin bilong bihainim dispela save i kamapim gutpela samting. Tru, em i wok bilong odiens bilong yu long bihainim tok bilong Baibel, tasol yu inap helpim ol long luksave long samting ol i mas mekim. Taim yu pilim olsem ol man i save gut long skripsa yu kamapim na olsem wanem em i helpim tok yu mekim, nau soim ol olsem dispela tok i mas mekim wanem long bilip na pasin bilong ol. Kamapim klia ol gutpela samting i save kamap taim man i lusim ol tingting nogut na ol pasin i no stret wantaim tok i tru yu stori long en.

Taim yu tingting long yu bai mekim wanem wok long ol skripsa, orait tingim dispela samting: Ol manmeri long odiens bilong yu ol i gat kain kain sindaun na kain kain samting i painim ol. Ating i gat ol nupela man, ol yangpela, ol lapun, na sampela ol i wok long karim kain kain hevi bilong ol yet. Stori long ol samting tru tru ol inap mekim na ol samting i save kamap tru tru long sindaun bilong ol man. No ken givim tok kaunsel i olsem yu tingim wan wan man tasol.

Ol Samting Man Bilong Mekim Tok i Mas Makim

Sampela samting yu mas mekim long tok bilong yu, ol i makim pinis. Ol i makim klia ol bikpela tok, na yu mas lusim hamas minit long toktok long ol dispela tok. Tasol sampela samting em bilong yu yet long makim. Yu inap makim hamas minit yu bai lusim long stori long ol hap tok i stap aninit long wanpela bikpela tok. I no olsem yu mas lusim wankain taim long kamapim olgeta hap tok. Nogut yu mekim na yu hariap tumas na odiens i no inap kisim gut tok bilong yu. Olsem wanem yu ken save long wanem hap tok bai yu stori planti liklik long en na wanem hap tok bai yu stori liklik tasol long en? Askim yu yet: ‘Wanem hap tok bai helpim mi long kamapim as tingting bilong tok? Wanem ol hap tok inap helpim tru odiens? Sapos mi lusim wanpela skripsa na hap tok em autlain i kolim, dispela bai mekim na tok bilong mi i no gat strong long kamapim klia samting mi stori long en?’

Yu mas was gut na abrusim pasin bilong toktok long samting yumi no save tru tru olsem em bai kamap o nogat, na no ken kamapim tingting bilong yu yet. Jisas Krais yet i bin abrusim pasin bilong mekim tok ‘long tingting bilong em yet.’ (Jo. 14:10) Tingim. As na ol manmeri i save kam long ol miting bilong ol Witnes Bilong Jehova em bilong harim ol man i stori long Baibel. Sapos ol brata i ting yu man bilong mekim gutpela tok, ating as bilong dispela i olsem: Yu save litimapim tok bilong God, tok bilong yu nogat. Long dispela as ol man i laikim ol tok bilong yu.​—Fl. 1:​10, 11.

Pastaim autlain i stap olsem bun bilong tok, tasol long wok yu mekim long en, em i kamapim klia ol strongpela tok bilong Baibel. Orait nau yu mas mekim traim long dispela tok. Em i gutpela long mekim long maus. Bikpela samting em i olsem: Ol bikpela tok i mas i stap long tingting bilong yu. Yu mas bilip tru long tok yu mekim, na mekim long pasin ol man bai amamas long harim, na givim bel long mekim. Paslain long mekim tok, askim yu yet: ‘Mi laik bai dispela tok i mekim wanem? Mi kamapim klia ol bikpela tok? Baibel i as tru bilong tok bilong mi? Narapela bikpela tok i save pas gut wantaim narapela? Dispela tok i save strongim ol man long laikim Jehova na ol samting em i mekim bilong helpim yumi? Pinis bilong tok i stret long tim bilong tok, na i soim ol man long samting ol i mas mekim, na i save kirapim ol long mekim olsem?’ Sapos yu inap tok yes long ol dispela askim, orait nau yu inap “mekim ol man i laikim gutpela tingting na save,” na dispela bai helpim kongrigesen na litimapim nem bilong Jehova!​—Snd. 15:2.