Mi Mas Beten Long Ol Santu?

Bekim bilong Baibel

Nogat. Baibel i tok yumi mas beten long God tasol, na yumi mekim long nem bilong Jisas. Jisas i tokim ol disaipel bilong em: “Yupela i mas mekim kain prea olsem, ‘Papa bilong mipela, yu stap long heven, nem bilong yu i mas i stap holi.” (Matyu 6:9, Buk Baibel) Em i tokim ol disaipel bilong em long beten long God tasol na i no long ol santu, ol ensel, o ol narapela samting.

Na tu, Jisas i tokim ol disaipel bilong em: “Mi yet mi rot, na mi as bilong tok tru, na mi as bilong laip. I no gat wanpela man inap i kam long Papa long narapela rot. Nogat. Long mi tasol.” (Jon 14:6, BB) God i makim Jisas tasol bilong i stap olsem rot bilong yumi ken toktok wantaim God.—Hibru 7:25.

Olsem wanem sapos mi beten long God na tu long ol santu?

Long hap bilong Tenpela Lo, God i tok: “Mi Bikpela, mi God bilong yupela, na mi no inap larim wanpela giaman god i senisim mi.” (Kisim Bek 20:5, BB) God i laik bai olgeta samting ol man i mekim bilong lotu—dispela i makim tu beten—i mas go long em wanpela tasol.—Aisaia 48:11.

Yumi mekim God i bel hevi sapos yumi beten long narapela man, na tu, ol santu o ol ensel holi. Taim aposel Jon i laik lotuim wanpela ensel, ensel i stopim em na tok: “Yu no ken mekim olsem! Mi tu mi wanwok bilong yu wantaim ol brata bilong yu, em yupela ol lain i save bilip long tok Jisas i autim. Yu mas lotu long God wanpela tasol.”—Kamapim Tok Hait 19:10, BB.