Save We i Bringim Yumi i Go Klostu Long God
Krieta bilong yumi i gat bikpela strong, na tu, em i gat ol gutpela pasin. Na em i laik yumi kisim save long em na go klostu long em. (Jon 17:3; Jems 4:8) Dispela i as na em i kamapim klia em i husat tru.
Krieta Bilong Yumi i Gat Nem Bilong Em Yet
“Ol manmeri i ken save olsem yu, nem bilong yu, Jehova, yu wanpela tasol yu God Antap Tru na yu bosim olgeta hap bilong graun.”—BUK SONG 83:18.
Baibel i tok olsem Jehova wanpela tasol em i God tru. Em i Krieta bilong yunives na olgeta samting i gat laip. I stret yumi lotuim em wanpela tasol.—Revelesen 4:11.
Jehova Em God i Gat Pasin Laikim
“God em i pasin laikim.”—1 JON 4:8.
Long rot bilong Baibel na ol samting em i wokim, Jehova i kamapim klia ol pasin bilong em. Pasin laikim em nambawan bikpela pasin bilong em. Olgeta samting em i mekim, pasin laikim i kirapim em long mekim. Taim yumi kisim save moa long Jehova bai yumi laikim em tru.
Jehova Em God i Redi Long Lusim Ol Rong
“God, yu man bilong redi long lusim rong.” —NEHEMIA 9:17.
Jehova i save olsem yumi no gutpela olgeta. Olsem na em i “redi long lusim rong” bilong yumi. Taim yumi tokim em olsem yumi sori na wok strong long lusim ol pasin nogut, em i redi long fogivim yumi na i no tingim ol sin yumi mekim long pastaim. —Buk Song 103:12, 13.
Jehova i Laik Yumi Beten Long Em
“Jehova i save stap klostu long ol manmeri i save singaut long em . . . Em i save harim krai bilong ol long kisim helpim, na em i save kisim bek ol.”—BUK SONG 145:18, 19.
Jehova i no laik bai yumi yusim wanpela kain pasin o yusim ol imis long lotuim em. Em i save putim yau long ol beten bilong yumi, wankain olsem papamama i save putim yau long ol pikinini bilong ol.