“No Ken Bel Nogut”

3, 4. Long Song 37:​1, Devit i givim wanem gutpela tok? Bilong wanem i stret yumi bihainim dispela tok long nau?

³ Yumi stap long taim bilong “planti hevi nogut tru” na pasin nogut i pulap. Yumi lukim pinis truim bilong dispela tok bilong aposel Pol: “Ol man nogut na ol giaman profet ol bai i wok long giamanim ol manmeri. Na . . . pasin bilong ol bai i kamap nogut tru.” (2 Timoti 3:​1, 13) Taim i luk olsem ol man nogut i gat gutpela sindaun na ol samting ol i mekim i kamap gutpela tasol, dispela inap pulim yumi na yumi no strong moa long ol samting bilong spirit. Olsem na namba wan ves bilong Song 37 i tok: “Yu no ken wari long pasin ol man nogut i save mekim. Yu no ken bel nogut long ol samting bilong ol man i save mekim pasin nogut.”

⁴ Long olgeta de, ol nius na TV samting i save kamapim stori bilong ol pasin i no stret. Ol bisnisman i save paulim mani na ol i no kisim strafe. Ol raskol i mekim nogut long ol man i no inap helpim ol yet. Ol man i kilim narapela i dai ol i abrusim strafe. Ol dispela pasin i no stret inap kirapim yumi long kros, na bel i no stap isi. Na taim i luk olsem ol samting bilong ol man nogut i kamap gutpela tasol, ating dispela inap mekim na yumi jeles. Tasol sapos yumi bel hevi olsem, yu ting dispela inap helpim yumi? Sapos yumi jeles long ol samting bilong ol man nogut, yu ting dispela inap senisim wanpela samting? Nogat tru! Na tu, i no gat as na yumi mas “wari.” Bilong wanem?

6. Song 37:​1, 2 i skulim yumi long wanem samting?

⁶ Olsem na yu ting i gat as na yumi ken larim gutpela sindaun ol man nogut i kisim inap liklik taim i bagarapim bel isi bilong yumi? Samting Song 37:​1, 2 i skulim yumi long en, i olsem: Taim ol samting bilong ol man nogut i kamap gutpela, no ken larim dispela i pulim yu long lusim rot yu bin makim long mekim wok bilong Jehova. Wok long tingim ol gutpela blesing bilong spirit yu inap kisim na ol mak bilong spirit yu laik winim.​​—⁠Sindaun 23:⁠17.