Lusim Belhat na Abrusim Sik
I NO gat wanpela i no save belhat sampela taim, a? Dispela samting i painim yumi olgeta. Tasol planti taim i no gat gutpela as na yumi ken belhat olsem.
Baibel i tok: “Yu no ken kros, na yu mas lusim pasin bilong belhat. . . . Em inap pulim yu long mekim pasin nogut.” (Song 37:8) Olsem wanem? Dispela tok i stret? Pasin bilong belhat inap givim sik long yumi?
Wanpela nius (The New York Times) i tok olsem:
“Taim ol man i save belhat planti taim, o ol liklik liklik samting i skrapim bel bilong ol na ol i kros na bel nogut i stap, dispela inap bagarapim skin bilong ol.
“Ol saveman bilong skelim dispela samting ol i kisim tingting olsem taim man i belhat long olgeta taim, dispela i bagarapim tru skin bilong em na em inap dai hariap, wankain olsem pasin bilong smok o skin i patpela tru o pasin bilong kaikai planti gris.
“Na Dokta Redford Williams (Duke University Medical Center) i tok, ‘Taim man i tingting nogut long narapela man na i belhat long em, dispela inap nogutim skin bilong em, wankain olsem ol narapela samting i save bagarapim skin.’ ”
Na ol i kisim save olsem, ol man i save belhat kwik long olgeta hevi samting i save kamap long olgeta de, skin bilong ol i save kamapim planti homon, em wanpela kain marasin long skin, na sapos ol i save belhat planti taim, dispela planti homon inap mekim na gutpela gris kolestrol bai go liklik na kolestrol nogut bai kamap planti, na dispela inap kamapim bikpela sik bilong klok.
Tasol ating sampela bai tok, ‘Tru, tasol em pasin bilong mi,’ o ol bai tok, ‘Mi go bikpela olsem.’ Tru, ating em olsem, tasol yu inap lusim dispela pasin sapos yu wok strong long bihainim tok bilong God long dispela samting. Long Baibel bilong yu yet yu ken skelim ol tok bilong em long pasin bilong kros na belhat. Lukim tok bilong Sindaun 14:29, 30; 22:24, 25; Efesus 4:26; Jems 1:19, 20.
Sapos yu bihainim dispela tok, dispela inap helpim skin bilong yu na skruim sampela yia moa long laip bilong yu. Wanpela nius (Times) i tok, ‘Planti saveman bilong skelim dispela samting ol i bin tok, ol man i save kros na belhat kwik, sapos ol i lusim dispela pasin, dispela inap helpim skin bilong ol na ol i no ken dai hariap.’