Baibel i Tok Wanem Long Pasin Bilong Givim?
Bekim bilong Baibel
Em gutpela pasin long givim samting long laik bilong yumi yet na yumi holim stretpela tingting. Dispela i save helpim man i kisim samting, na i helpim tu man i givim samting. (Provep 11:25; Luk 6:38) Jisas i tok: “Amamas bilong givim samting i winim amamas bilong kisim samting.”—Aposel 20:35.
Wanem taim pasin bilong givim inap helpim yu?
Pasin bilong givim i gutpela taim man i givim samting long laik bilong em yet. Baibel i tok: “Olgeta wan wan i ken givim samting ol i pasim tok long bel long givim. Ol i no ken bel hevi na givim na narapela i no ken fosim ol long givim bikos God i save laikim tumas man husat i amamas long givim samting.”—2 Korin 9:7.
Taim bel i kirapim man long givim samting, dispela tu em wanpela “pasin bilong mekim lotu” na God i orait long dispela pasin. (Jems 1:27) Man i save amamas long givim samting bilong ol man i nidim helpim, em i wok bung wantaim God—na God i tingim dispela gutpela pasin bilong givim i olsem dinau em i mas bekim. (Provep 19:17) Baibel i tok God yet bai bekim dinau long man i givim samting.—Luk 14:12-14.
Wanem taim pasin bilong givim i no stret?
Sapos man i gat tingting kranki. Eksampel:
Em i laik bai ol manmeri i givim biknem long em.—Matyu 6:2.
Em i laik bai ol i bekim samting long em.—Luk 14:12-14.
Em i laik givim mani olsem pe na bai God inap kisim bek em.—Song 49:6, 7.
Sapos pasin bilong givim i sapotim ol wok na pasin em God i no laikim. Eksampel, i no stret long givim mani long wanpela husat i save pilai laki o kisim drak o drink alkohol. (1 Korin 6:9, 10; 2 Korin 7:1) Na tu, i no stret long givim mani long wanpela husat inap long lukautim em yet long sait bilong mani, tasol em i no laik mekim olsem.—2 Tesalonaika 3:10.
Sapos pasin bilong givim i pasim man long mekim wok em God i givim long em. Baibel i tok olsem het bilong famili i mas lukautim famili bilong em long ol samting ol i nidim. (1 Timoti 5:8) I no stret long em i givim planti samting long ol narapela na dispela i putim hevi long famili bilong em yet. Olsem tasol, Jisas i givim strongpela tok long ol man husat i no laik lukautim lapun papamama bilong ol, bikos ol i tok olgeta mani bilong ol em “presen ol i dediketim long God.”—Mak 7:9-13.