God i Save Harim Beten Bilong Husat?
LONG yia 1850 samting, wanpela man bilong Inglan, nem bilong em Alfred Tennyson, em i tok: “Ol man i no save long ol planti samting beten i save kamapim.” Tasol planti man i bin beten bambai skin bilong ol i ken i stap gutpela o ol i ken i stap amamas o bel isi, o ol i ken kisim gutpela sindaun, na ol i no kisim. Olsem na sampela man i pilim olsem God i no save harim beten bilong ol man. Tasol Baibel i tok, God i “save harim beten bilong [yumi].”—Buk Song 65:2.
Olsem na ating yu laik save, husat dispela God em i save harim beten? Olsem wanem? I gat sampela samting yumi mas mekim na bai em i harim beten bilong yumi? Yumi mas beten olsem wanem? God i save harim beten bilong husat?
God i Harim Beten Bilong Ol
Taim ol man i bin kamap long graun long pastaim tru, ol i save beten. Tingim Abel, em wanpela pikinini bilong namba wan tumbuna papamama bilong yumi, em Adam na Iv. Taim Abel i mekim gutpela ofa God i amamas long en, yumi save Abel i bin beten tu wantaim na askim God long helpim em na litimapim nem bilong God.—Stat 4:1-5.
Inap olsem 850 yia paslain long Krais, wanpela profet bilong God, em Jona, em “i stap insait long bel bilong pis” God i bin salim bilong daunim em, na Jona i beten long God. Olsem wanem? God Jehova i harim dispela beten? Em i harim na em i helpim Jona. Em i “tokim pis, na pis i go trautim Jona long nambis.” Na nau Jona i kirap i go mekim dispela wok God i bin givim long em—em i go long Ninive.—Jona 1:17; 2:1, 10; 3:1-5.
Taim ol birua i banisim Devit bilong lain Israel long bipo, em i krai long God Jehova na em i tok: “Bikpela, mi laik bai yu harim [beten] bilong mi. Putim yau long krai bilong mi. Yu stretpela na yu save tok tru oltaim, plis, harim beten bilong mi.” (Buk Song 143:1) God i harim beten bilong Devit na kisim bek em long han bilong ol birua na ol i no kilim Devit i dai. Olsem na Devit inap tok olsem: “Wanem ol manmeri i save bel tru na i singaut long [Jehova], em i save stap klostu long ol.”—Buk Song 145:18.
Ol Bikpela Samting Yu Mas Mekim na Bai God i Harim Beten Bilong Yu
Em nau, God i save harim beten bilong ol wokboi bilong em long bipo na em i helpim ol. Tasol ol i no save beten nating tasol long wanpela God i no gat nem. Nogat. Ol i bilip tru na ol i beten long Jehova, em “God Antap Tru” na em i “save bosim olgeta hap bilong graun.” (Buk Song 83:18) Olsem na sapos yumi laik bai God i harim beten bilong yumi, i gat wanem ol bikpela samting yumi mas mekim?
Beten long Jehova tasol. Sapos yu beten long ol god giaman, bai ol beten bilong yu i lus nating tasol—na i no stret yu mekim olsem, long wanem Baibel i tambuim dispela pasin. Ol god giaman i no gat laip. Ol i gat maus, tasol ol i no inap toktok, ol i gat yau, tasol ol i no inap harim toktok, ol i gat han, tasol ol i no inap holim samting, ol i gat lek, tasol ol i no inap wokabaut, na ol i no inap mekim wanpela singaut o wanpela krai. (Buk Song 115:5-7; 1 Jon 5:21) Tasol God Jehova em i no olsem ol dispela god giaman, em ol i no inap helpim yu. Nogat. Jehova i save helpim ol manmeri i givim bel long em na ol i mekim wok bilong em. Planti handet yia bipo, long taim bilong profet Elaija, ol profet bilong god giaman Bal i bin beten askim Bal long salim paia i kam kukim ofa. Ol i beten, kirap long moningtaim i go inap long apinun, tasol Bal i no helpim ol. Orait, nau Elaija i kirap beten long Jehova, na wantu Jehova i helpim Elaija—em i salim paia i kam daun, na paia i kukim tru ofa ol i bin putim long alta.—1 King, sapta 18.
Beten long God long rot bilong Krais Jisas tasol. God i bin salim Pikinini bilong em, Krais Jisas, long graun bilong baim bek ol manmeri long sin na i dai. (Jon 3:16, 36; Rom 5:12; 6:23) Taim God i mekim olsem, em i opim nupela rot bilong beten long em, na ol manmeri i bilip long ol dispela samting em i bin mekim, ol i ken beten long em long dispela nupela rot. Ol wokboi bilong Jehova long bipo, olsem Devit, ol i save beten stret long Jehova. (Buk Song 4:1; 17:1; 55:1; 102:1) Tasol nau ol wokboi bilong Jehova i mas beten long em long rot bilong Jisas, olsem Jisas i bin tok: “I no gat wanpela man inap i kam long Papa long narapela rot. Nogat. Long mi tasol. Olgeta samting yupela i askim long nem bilong mi, em bai mi mekim.” (Jon 14:6, 14) I no gat wanpela tok long Baibel i tok yumi mas beten long God long rot bilong narapela man. Yumi mas beten long God long rot bilong Jisas tasol.
Olsem na taim yumi save pinis long dispela samting, orait yumi mas beten long God long rot bilong Pikinini bilong em tasol. Sapos yumi beten long narapela rot, bai God i no ken harim. Tasol i gat sampela as moa na Jehova i no save harim beten bilong planti man.
I Gat Wanem As na God i No Harim?
Maski yumi brukim skru o daunim het samting, dispela samting tasol i no inap kirapim God long harim beten bilong yumi. Baibel i no tok yumi mas mekim wanpela pasin, olsem brukim skru samting taim yumi beten. Tasol sapos yumi brukim skru, dispela inap makim olsem yumi daun long God. Maski yumi sanap, o yumi sindaun, o yumi slip long bet, o yumi mekim ol wok bilong yumi, yumi ken beten. (Daniel 6:10, 11; Mak 11:25) Na sapos yumi beten long bel tasol na yumi no kolim long maus, Jehova i save harim! Nehemia i bin beten olsem “long God bilong heven.” Banis bilong Jerusalem i bagarap pinis na Nehemia i laik i go wokim gen, na taim em i laik tokim king bilong Persia long dispela samting, pastaim em i beten kwik long bel. Jehova i harim dispela beten na helpim Nehemia. (Nehemia 2:1-6) Orait, sapos pasin bilong brukim skru samting i no bikpela samting, i gat wanem as na God i no harim beten bilong planti man?
Jehova i no save amamas long beten bilong ol man nogut. Tru tumas, “sapos man i givim baksait long lo, orait God bai i no inap harim beten bilong en.” (Sindaun 28:9) Lain bilong God long bipo ol i bikhet long em, olsem na long maus bilong profet Aisaia em i tokim ol: “Taim yupela i apim han na [beten] long mi, bai mi no ken lukim yupela. Maski yupela i [beten] planti taim, bai mi pasim yau bilong mi. Long wanem, blut bilong ol man yupela i bin kilim, em i pas yet long ol han bilong yupela.” (Aisaia 1:15) God i no save harim beten bilong ol man nogut, maski ol i beten long em long rot bilong Krais.
God i no save harim beten bilong ol man bilong giaman. Krais Jisas i tok: “Taim yupela i mekim [beten], yupela i no ken mekim olsem ol man bilong giaman i save mekim. Ol i laikim tumas long sanap na mekim [beten] insait long ol haus lotu, na long ol kona bilong bikrot, bai ol man i ken lukim ol. Mi tok tru long yupela, ol i kisim pinis pe bilong ol.” Na Jisas i tok moa olsem: “Tasol taim yu laik mekim [beten], yu mas i go insait long rum bilong yu na pasim dua na beten long Papa bilong yu i stap long ples hait. Na Papa bilong yu i save lukim ol samting i stap hait, em bai i bekim pe long yu.” (Matyu 6:5, 6) Taim Jisas i tok olsem em i no tambuim olgeta pasin bilong beten long ai bilong ol man, long wanem em yet i bin beten olsem. (Matyu 14:19) Tasol em i laik makim olsem i no stret sapos man i beten long ai bilong ol man bambai ol i ken lukim em na litimapim nem bilong em na long dispela as tasol em i beten.
Jehova i no save harim beten bilong man i beten nating na em i mekim planti toktok nating. Jisas i tok: “Taim yupela i mekim [beten], maski long mekim planti toktok nating, olsem ol haiden i save mekim. Ol i ting sapos ol i mekim planti toktok bai God i harim ol. Yupela i no ken bihainim pasin bilong ol. Taim yupela i no opim maus yet long askim Papa bilong yupela long wanpela samting, em i save pinis long olgeta samting yupela i sot long en.” (Matyu 6:7, 8) Planti manmeri long hap bilong Esia samting ol i save raitim ol beten long ol hap pepa na pulimapim long wanpela liklik dram na ol i tanim tanim dram, na ol i ting long dispela pasin i olsem ol i kolim gen ol dispela beten na ol i mekim planti beten. Na planti milion manmeri i save kaunim bis, olsem korona, taim ol i beten o ol i kolim kolim ol beten bilong wanpela buk beten. Tasol ol manmeri i laik bai God i harim beten bilong ol, ol i no ken mekim olsem. Ol i no ken mekim planti toktok nating. Na ol i mas tingim gut sampela tok moa Jisas i bin mekim long pasin bilong beten.
‘Yupela i Mas Beten Olsem’
Jisas i mekim pinis ol dispela tok long pasin bilong beten na bihain em i kolim wanpela beten i makim kain beten yumi ken mekim. (Matyu 6:9-13) Em i tok: “Yupela i mas mekim kain [beten] olsem, ‘Papa bilong mipela, yu stap long heven, nem bilong yu i mas i stap holi.’ ” Jisas i kolim God olsem “Papa bilong mipela.” Dispela i makim olsem i gat ol narapela man tu insait long lain bilong God na ol i save lotuim em. Wok bilong mekim nem bilong God Jehova i stap holi em i nambawan bikpela wok. God bai mekim wanem bambai nem bilong em i ken i stap holi? Em bai pinisim olgeta man nogut, na pinisim olgeta samting ol man i bin mekim na i bagarapim nem bilong em. Long dispela rot bai em i stretim bek nem bilong em, na bai nem bilong em i stap holi.—Esikiel 38:23.
Na Jisas i tok: “Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.” Klostu nau Kingdom bilong God long han bilong Pikinini bilong em, Krais Jisas, bai kam na pinisim olgeta birua bilong wok king bilong God. Bai ol i pinis olgeta long graun. (Daniel 2:44) Tasol wanem insait bilong dispela tok olsem ‘mipela i mas bihainim laik bilong God long graun olsem ol i bihainim long heven’? Em i olsem: Yumi laik bai God Jehova i kamapim laik bilong em long graun, na pinisim olgeta birua bilong em.—Kamapim Tok Hait 16:14-16; 19:11-21.
Taim Jisas i lainim ol man long dispela beten, em i kolim ol bikpela samting pastaim, olsem samting bilong God na mekim nem bilong God i stap holi na laik bilong God. Na bihain Jisas i tok: “Nau yu ken givim mipela kaikai inap long dispela de.” Sapos yumi beten askim Jehova long helpim yumi bambai yumi inap kisim ol samting yumi mas kisim “inap long dispela de,” dispela bai kirapim yumi long bilip tru olsem em inap tru long lukautim ol manmeri i lotuim em, na bai ol inap kisim ol samting ol i mas kisim bilong i stap laip “long dispela de.” I no olsem ol i tingim skin bilong ol yet tasol na ol i beten askim God long givim planti samting tru long ol. Nogat.
Na Jisas i tok moa, olsem: “ ken lusim ol rong bilong mipela, olsem mipela i save lusim ol rong ol arapela i mekim long mipela.” (Luk 11:4 i kolim ol dispela rong olsem “ol sin.”) Yumi mas lusim rong ol arapela i mekim long yumi bambai God i ken lusim rong bilong yumi. (Matyu 6:14, 15) Olsem na i stret aposel Pol i tok: “Bikpela em i lusim pinis sin bilong yupela, na olsem tasol yupela tu i mas lusim sin bilong ol arapela.”—Kolosi 3:13.
Long pinis bilong dispela beten, Jisas i tok: “ no ken larim ol traim i kamap long mipela, tasol yu ken tekewe mipela long ol samting nogut.” Jehova i no save “pulim [man] long mekim sin.” Nogat. (Jems 1:13) Satan yet i save pulim ol man long mekim sin. Tasol Baibel i stori long God i larim sampela samting i kamap na Baibel i tok, i olsem God yet i mekim dispela samting: (Rut 1:20, 21; Saveman 7:13) Taim yumi beten long God na yumi tok, “Yu no ken larim ol traim i kamap long mipela,” Jehova i harim na em i helpim yumi. Tru, em i larim ol traim i painim ol wokboi bilong em, tasol taim traim i painim ol, em i no lusim ol. Baibel i tok: “God i save bihainim tok bilong en, na em bai i no inap larim wanpela bilong ol traim i kamap long yupela, em i winim strong bilong yupela. Nogat. Sapos traim i kamap long yupela, orait God bai i wokim rot bilong helpim yupela. Dispela rot i olsem: Em bai i mekim yupela i sanap strong, na dispela traim bai i no inap daunim yupela.”—1 Korin 10:13.
Taim yumi beten askim God long tekewe yumi long ol samting nogut o long ‘man bilong mekim ol pasin nogut,’ yumi askim God long helpim yumi bambai Satan i no ken daunim yumi ol wokboi bilong Jehova na yumi no ken lusim Jehova. Sapos yumi stap gut long Jehova, yumi ken bilip tru olsem Jehova bai harim kain beten olsem bilong yumi na em bai helpim yumi, long wanem aposel Pita i tok: “Sapos traim i kamap long ol man i bihainim God, orait Bikpela i save long rot bilong kisim bek ol long dispela traim.” (2 Pita 2:9) Em i bikpela samting yumi mas beten askim God long tekewe yumi long dispela man nogut, Satan, olsem dispela beten i tok, long wanem Satan “em i olsem wanpela laion i singaut strong. Oltaim em i save raun bilong painim ol manmeri bilong kaikai.”—1 Pita 5:8.
I Gat Wanem As na God i Harim Beten Bilong Ol?
God i save harim beten bilong ol manmeri i save lotuim em na ol i stap gut long em. I gat wanem as na em i save harim beten bilong ol na helpim ol? Wanpela as bilong dispela i olsem: Ol i save beten long em wanpela tasol, long rot bilong Krais Jisas. Na tu ol i save sakim ol pasin nogut na ol i no giaman na mekim planti toktok nating taim ol i beten. Ol Witnes Bilong Jehova i no save kolim nating planti taim dispela beten Jisas i bin lainim ol man long en. Nogat. Tasol ol i larim ol tok bilong dispela beten i stiaim tingting bilong ol na soim rot long ol bambai ol i ken kamapim gut long God ol tingting tru i stap long bel bilong ol. Tasol i gat sampela as moa na God i save harim beten bilong ol.
Ol i bin mekim ol samting ol i mas mekim pastaim bambai God i ken harim ol beten bilong ol. Pol i kolim sampela samting ol i mas mekim, olsem: “Man i laik i go klostu long God, em i mas bilip olsem God i stap, na em i mas bilip olsem God i save mekim gut tru long ol man i wok long painim em.” (Hibru 11:6) Em nau, Jehova i save harim beten bilong (1) ol man i bilip long em, em ol i bilip olsem em i stap, na em i save harim beten bilong (2) “ol man i wok long painim em.”
Wanpela man i bin mekim olsem long taim bilong ol aposel, em wanpela man bilong ol arapela lain, em i no bilong lain Juda, nem bilong em Kornilius. Em i bilip olsem God em i stap, na em i wok strong long painim God. Taim Kornilius i kisim pinis stretpela save long God, em i bin mekim wanem? Em i givim bel olgeta long God Jehova na givim skin bilong em bilong mekim laik bilong God. Bilong makim dispela samting em i kisim baptais. Bihain long dispela Kornilius i pas gut wantaim God, na dispela samting i mekim na nau God i harim ol beten bilong em na helpim em.—Aposel 10:1-44.
Taim Kornilius i no baptais yet, God i “harim” beten bilong em. (Aposel 10:4) Tasol taim Kornilius i bilip long ofa bilong Krais na em i dediket long God na kisim baptais, em i givim skin bilong em olgeta long God Jehova. Dispela samting i mekim na nau em i pas tru wantaim God na em i givim bel tru long God, olsem na i no gat wanpela samting i pasim rot bilong em long beten. (Jems 4:8) Em inap beten long Papa bilong em long heven long rot bilong Krais Jisas na em i ken save, God bai harim beten bilong em na helpim em. Dispela gutpela samting i save painim olgeta manmeri ol i dediket long God long rot bilong Krais na ol i kisim baptais. I no gat wanpela samting i pasim rot bilong ol long beten.
Yu tu yu laik bai God i harim ol beten bilong yu, a? Olsem na sapos yu no kirap yet long mekim wok bilong Jehova na yu no dediket yet long em na lotu long em, orait yu mas wok strong long painim em. Sapos yu mekim olsem bai yu bihainim gutpela tingting! Yu mas bihainim pasin olsem bilong Kornilius, na bai God i harim ol beten bilong yu.
[Piksa long pes 7]
Taim Kornilius i dediket long God na kisim baptais, olsem wanem nau long ol beten bilong em?