Ol Pisin na Plaua i Skulim Yumi

OL MAN i gat wanem bikpela tingting long nau, winim ol narapela tingting? Planti ol i gat tingting long painim mani bilong lukautim famili long kaikai samting, o kisim gutpela sindaun.

Taim Krais Jisas i stap long graun tu, ol man i gat bikpela tingting long painim mani bilong lukautim famili. Tasol Jisas i toksave olsem, sapos man i tingim tumas dispela samting, em inap kamap olsem wanpela bikpela hevi bilong ol na ol i no inap tingim moa ol samting bilong spirit. Bilong kamapim klia dispela samting, Jisas i tokim ol disaipel long lukim ol pisin na plaua.

Ol pisin i mas kaikai long olgeta de. Maski ol i liklik tasol, ol i mas kaikai planti, long wanem, strong bilong ol i save pinis hariap hariap. Na ol i no inap planim kaikai o kamautim o bungim bilong kaikai long bihain. Tasol Jisas i lukim olsem “Papa bilong [yumi] i stap long heven em i save givim kaikai long ol.” (Matyu 6:26) Na ol naispela plaua i save kamap nabaut tu, God i givim gutpela bilas tru long ol.​—⁠Matyu 6:​28-30.

Jisas i tokim yumi, sapos yumi putim ol samting bilong skin i stap nambatu na ol samting bilong spirit i stap nambawan, God bai wokim rot na bai yumi gat kaikai na klos inap long skel bilong yumi. God Jehova i save lukautim ol pisin na plaua, olsem na em bai lukautim tu ol man i save laikim em tru na ol i “wok pastaim long painim kingdom bilong God wantaim stretpela pasin bilong em.” (Matyu 6:​33, Nupela Testamen na Ol Sam, bilong 1978) Olsem wanem long yu? Yu save putim wok bilong Kingdom i go pas long ol narapela wok bilong yu?