“Bel Bilong Yupela i No Ken Kirap Nogut”

“Bel bilong yupela i no ken kirap nogut. Yupela i bilip long God. Yupela i mas bilip long mi tu.”−JON 14:1.

1. Tok bilong Jisas long Jon 14:1, bilong wanem dispela tok i stret long dispela taim bipo?

LONG mun Naisan, long de namba 14, long yia 33 C.E., taim san i go daun pinis, sampela man i bung long Jerusalem long wanpela rum antap. Hetman bilong dispela lain i givim laspela tok long ol bilong strongim bel bilong ol. Hap tok em i mekim i olsem: “Bel bilong yupela i no ken kirap nogut.” (Jon 14:1) I stret em i mekim dispela tok long dispela taim, long wanem sampela samting nogut tru i laik kamap. Long dispela nait ol i holim em, na putim em long kot, na kot i tok em i mas i dai.

₂ Dispela de em i bikpela de tru. Ol samting i kamap long dispela de i samting bilong helpim ol man inap long olgeta taim bihain. Dispela Hetman, Krais Jisas, em i dai olsem ofa na dispela i truim planti tok profet bilong bipo, na i opim rot bambai ol man i bilip long em ol i ken kisim laip i stap oltaim. (Aisaia 53:5-7; Jon 3:16) Tasol ol samting i bin kamap long dispela nait i mekim ol aposel i kirap nogut tru na tingting planti; inap liklik taim ol i paul nabaut na ol i pret. Pita i pret na em i tok em i no save long Jisas. (Matyu 26:69-75) Tasol taim ol dispela gutpela aposel i kisim pinis spirit holi bilong helpim ol, olsem Jisas i tok promis pinis, nau ol i no pret moa, na bel bilong ol i stap isi. (Jon 14:16, 17) Olsem na taim ol man i birua tru long Pita tupela Jon na putim tupela long kalabus, tupela i beten askim God long helpim ol bambai ol i ken “strong tru long telimautim tok” na “i no ken pret.” God i harim beten bilong tupela.−Aposel 4:1-3, 29-31.

₃ Long nau yumi stap long taim bilong planti hevi nogut tru. Pinis bilong olpela pasin i wok long i kam klostu hariap. (2 Timoti 3:1-5) Ol dispela hevi i mekim nogut long planti milion man o ol i tingting planti long en, olsem: Famili i bruk na ol man i no bihainim moa stretpela pasin, na kain kain nupela sik i kamap, na ol gavman i no stap strong, na planti man i no gat wok, na kaikai i sot, na sampela man i save birua na mekim pretim ol man, na pait nuklia inap kamap. Bel bilong planti man i pas na ol i pilim nogut tru; ol i tingting planti long ol samting i laik kamap long bihain. I olsem Jisas i tok profet pinis: “Bel bilong olgeta lain man bai i bagarap tru na ol i pret . . . Planti manmeri bai ol i tingting long ol samting i laik kamap long graun, na bai bel bilong ol i pret tru.”−Luk 21:25, 26.

₄ Ol dispela hevi inap mekim nogut long ol Kristen tu. Na i gat ol narapela hevi inap painim ol, long wanem ol man i no laikim lotu bilong ol, o ol wanblut o man i stap klostu o wanwok o wanskul o gavman i birua long ol. (Matyu 24:9) Orait, olsem wanem bel na tingting bilong yumi inap i stap isi nau long dispela taim nogut? Taim hevi i painim yumi, yumi ken mekim wanem na bai yumi inap i stap bel isi? Yumi ken mekim wanem na bai yumi no pret long ol samting i laik kamap long bihain? Long nau bel bilong planti man i bagarap na ol i tingting planti, orait wanem samting inap helpim yumi na yumi no ken tingting planti? Dispela taim nau i wankain olsem long taim Jisas i bin mekim tok bilong Jon 14:1, olsem na gutpela sapos yumi skelim gut dispela taim bipo.

Yumi Ken Mekim Wanem na Bai Yumi No Tingting Planti?

₅ Jisas i givim gutpela tok long ol aposel bilong em bilong strongim ol bambai ‘bel bilong ol i no ken kirap nogut,’ na bihain em i tokim ol: “Yupela i bilip long God. Yupela i mas bilip long mi tu.” (Jon 14:1) I gat planti gutpela tok olsem long Baibel bilong strongim bel bilong yumi, olsem: “Olgeta hevi yu karim, em yu mas givim long Bikpela, bai em i karim na bai em i strongim yu.” “Yu mas putim laip bilong yu long han bilong Bikpela. Bilip strong long em, na bai em i helpim yu.” (Sam 55:22; 37:5) Pol i givim gutpela tok long ol Filipai, olsem: “Yupela i no ken wari. Nogat. Long olgeta samting yupela i mas tokim God long samting yupela i laikim. Yupela i mas prea long em, na singaut long em, na tenkyu long em. Bel isi God i save givim yumi, em i winim olgeta save bilong man. Long wok bilong Krais Jisas bai dispela bel isi i was gut long bel bilong yupela wantaim tingting bilong yupela.”−Filipai 4:6, 7.

₆ Sapos yumi gat hevi o bikpela wok na yumi tingting planti, dispela inap givim sik long yumi o mekim yumi bel hevi. Tasol long wanpela buk (Don’t Panic), wanpela dokta i tok: “Sapos ol man inap toktok wantaim wanpela man ol i tingim em i gat gutpela tingting na save, . . . dispela inap helpim ol na bai tingting bilong ol i stap isi liklik.” Sapos pasin bilong toktok wantaim wanpela man bilong graun inap helpim yu, orait yu ting olsem wanem long pasin bilong toktok wantaim Bikpela Man Antap? Sapos yu toktok wantaim God long hevi bilong yu, dispela inap helpim yu moa yet, a? Long wanem God i gat gutpela tingting na save, winim olgeta narapela man.

₇ Olsem na ol Kristen long nau i mas pas gut wantaim Jehova. Em bikpela samting tru. Ol strongpela wokboi bilong Jehova i save pinis long dispela samting, olsem na ol i save was gut na ol i no save poroman wantaim ol man bilong dispela graun o mekim sampela samting bilong painim amamas em inap mekim na bai ol i no stap gutpela moa long ai bilong Jehova. (1 Korin 15:33) Na ol i save tu em i bikpela samting ol i mas beten toktok wantaim Jehova planti taim; i no wanpela o tupela taim tasol long wanpela san. Ol yangpela Kristen na ol nupela Kristen i mas strong moa long stadi oltaim, na tingim long bel ol tok bilong God long Baibel, na bung wantaim ol narapela Kristen, na autim tok, bambai ol inap i stap strong na pas gut wantaim Jehova. Baibel i tok: “Yupela i mas i go klostu tru long God, na bai em i kam klostu tru long yupela.”−Jems 4:8.

Gutpela Tok Bilong Jisas

₈ Long planti kantri, planti man i no gat wok na planti wok bisnis i bagarap. Ol dispela bikpela hevi i mekim ol man i tingting planti. Jisas i givim gutpela tok long yumi bilong helpim yumi long ol dispela hevi, em i tok: “Yupela i no ken tingting planti long laip bilong yupela na tok, ‘Yumi kaikai wanem samting? Yumi dring wanem samting?’ Na yupela i no ken tingting planti long bodi bilong yupela na tok, ‘Bai yumi pasim wanem klos?’ Ating laip em i win long kaikai, na bodi em i win long klos.” (Matyu 6:25) Tru tumas, laip na bodi, olsem man yet, em i bikpela samting, winim tru kaikai na klos. Ol wokboi bilong God i ken save, God bai helpim ol long kisim ol samting ol i mas kisim bilong i stap laip. Olsem na Jisas i tok: “Yupela lukim ol pisin. Ol i no save planim kaikai, na ol i no save bungim na putim long haus kaikai. Tasol Papa bilong yupela i stap long heven em i save givim kaikai long ol. Ating yupela i no win tru long ol pisin, a?” (Matyu 6:26) God i save lukautim ol pisin, olsem na yumi save em i mas lukautim tu ol man ol i stap wokboi bilong em na em i laikim tumas ol na Krais i bin lusim laip bilong em bilong helpim ol.

₉ Na bihain Jisas i stori long ol plaua long gaden, ol i no save mekim wok o wokim laplap. Jisas i tok: “Bipo Solomon i putim olgeta bilas bilong en, tasol em i no gat gutpela bilas olsem dispela plaua.” King Solomon i gat planti gutpela bilas ol i wokim long gol na silva samting. (Song Bilong Solomon 3:9, 10) Jisas i stori pinis long ol plaua na bihain em i mekim gutpela tok i mekim isi bel bilong yumi, em i tok: “Yupela i ken save tru, God bai i lukautim yupela tu.”−Matyu 6:28-32.

₁₀ Tasol ol tok Jisas i mekim bihain long dispela i makim olsem em i givim dispela gutpela tok long sampela man tasol, em ol man i “wok pastaim long painim kingdom bilong God wantaim stretpela pasin bilong em.” Ol Kristen tru long olgeta hap bilong graun, ol i save Kingdom bilong God em i wanem samting na ol i save tingim dispela Kingdom pastaim. Jisas i tokim ol dispela man: “Yupela i no ken tingting tumas long tumora. De tumora em i ken tingting long samting bilong em yet, Hevi bilong wanpela de em inap long dispela de tasol.” (Matyu 6:33, 34) I olsem Jisas i tok yumi mas stretim olgeta wan wan hevi taim hevi i kamap, na yumi no ken tingting tumas long ol hevi inap kamap long bihain.

₁₁ Tasol planti man i save tingting tumas long ol samting i laik kamap long bihain. Na taim hevi i painim ol, ol i save tingting planti moa. Tasol ol Kristen i mas bilip long Jehova. Tingim Elano (Eleanor). Man bilong Elano i gat bikpela sik na inap wanpela yia em i no inap wok. Tasol Elano i gat tupela liklik pikinini na lapun papa tu em i mas lukautim, olsem na em i no inap mekim wok mani long olgeta de. Ol i beten askim Jehova long helpim ol. Bihain liklik, long wanpela moningtaim, ol i lukim wanpela skin pas wanpela man i bin subim i kam aninit long dua bilong haus bilong ol. Insait long dispela skin pas, bikpela mani i stap−em inap lukautim ol i go inap long taim man bilong Elano inap mekim wok gen. Tupela i pilim tru dispela samting, na ol i tenkyu tru long Jehova long dispela samting bilong helpim ol. Tasol i no gat sampela tok long Baibel na yumi ken ting kain samting olsem inap painim olgeta wan wan Kristen i gat hevi. Nogat. Tasol yumi ken save tru, taim yumi beten askim Jehova long helpim yumi, em i save harim na em inap tru long helpim yumi long kain kain rot.

₁₂ Bikpela hevi i painim wanpela meri Kristen long hap bilong saut long Afrika. Man bilong em i dai pinis na em i mas painim wok bambai em inap lukautim tupela liklik pikinini bilong em. Tasol em i laik tru bai em inap wok haptaim tasol bambai em i gat bikpela hap taim liklik bilong i stap wantaim ol pikinini. Em i painim pinis wanpela wok, tasol bihain liklik em i mas lusim, long wanem bos bilong em i laik bai em i wok long olgeta de. Sista hia i stap nating na em i beten strong na askim Jehova long helpim em. Tripela wik bihain, bos i tok em i laik bai em i kam bek na em i ken wok haptaim tasol. Sista i amamas tru; em i pilim olsem Jehova i bin harim beten bilong em!

Singaut long Jehova

₁₃ Pol i tok, “Yupela i no ken wari,” na bihain em i tok: “Long olgeta samting yupela i mas tokim God long samting yupela i laikim.Yupela i mas prea long em, na singaut long em, na tenkyu long em.” (Filipai 4:6) Bilong wanem Pol i tok, yumi mas “singaut” long God? Insait bilong dispela tok i olsem “beten strong.” Taim bikpela hevi i painim yumi o wanpela samting i laik bagarapim yumi, yumi save beten strong long God. Taim Pol i stap kalabus, em i tokim ol brata Kristen ol i mas strong long mekim beten na singaut long God bai God i helpim em na em i no ken pret long “autim gutnius,” long wanem “long dispela tasol [em i] stap long kalabus.” (Efesas 6:18-20) Konilias tu i save singaut long God. Konilias em i wanpela kepten long ami bilong Rom na “oltaim em i save beten long God.” Yumi save, em i mas amamas tru taim wanpela ensel i tokim em: “God i harim pinis beten bilong yu na em i laikim pasin yu bin mekim long givim mani samting bilong helpim ol manmeri i sot.” Konilias i kisim gutpela blesing tru−em i namba wan man bilong ol arapela lain em i kisim spirit holi!−Aposel 10:1-4, 24, 44-48.

₁₄ Taim ol man i beten strong na singaut long Jehova, ol i no save mekim wanpela taim tasol. Taim Jisas i mekim tok long Maunten na em i lainim ol man, em i tok: “Yupela mas prea long God, na bai em i givim long yupela. Yupela mas wok long painim samting na bai yupela i lukim. Yupela mas paitim dua, na bai God i opim long yupela.” (Matyu 7:7) Planti Baibel i save tanim dispela tok, olsem: “Yupela mas prea . . . painim . . . paitim dua.” Tasol insait bilong tok Grik ol i raitim long pastaim i mekim olsem man i mas wok long prea na painim na paitim.a

₁₅ Taim Niemaia i stap wokboi bilong king bilong Pesia, Atakseksis, em i hetman bilong lukautim wain. Wanpela taim em i givim wain long king na king i lukim em i bel hevi na king i tokim em, “Bilong wanem yu bel hevi?” Niemaia i tok, em i bel hevi long wanem em i harim tok olsem Jerusalem i bagarap i stap. Nau king i tok: “Yu laik bai mi mekim wanem?” Kwiktaim Niemaia i beten askim Jehova long helpim em; ating em i mekim liklik beten tasol long bel. Em i tokim king, em i laik go bek na wokim gen Jerusalem. King i orait long em i mekim olsem. (Niemaia 2:1-6, NW) Tasol paslain long dispela taim, Niemaia i bin beten strong inap planti de na singaut long Jehova bai Jehova i helpim em. (Niemaia 1:4-11) Dispela i helpim yu long save long ol samting yu mas mekim, a?

Jehova i Harim

₁₆ Ebraham i bin kisim bikpela blesing−em i kisim tok i kam long Jehova long rot bilong ol ensel. (Jenesis 22:11-18; 18:1-33) Long nau God i no save toktok wantaim yumi long dispela rot, tasol yumi gat planti samting bilong helpim yumi, em Ebraham i no gat. Wanpela samting olsem em olgeta tok bilong Baibel−planti gutpela tok bilong soim rot long yumi na mekim isi bel bilong yumi i pulap long Baibel. (Sam 119:105; Rom 15:4) Planti taim Baibel inap soim rot long yumi o strongim bel bilong yumi; Jehova i helpim yumi long tingim ol tok bilong Baibel em inap mekim olsem. Na i gat ol buk na nius bilong Baibel, em God i givim long yumi long rot bilong oganaisesen bilong em, ol inap helpim yumi long kisim save long ol samting yumi mas mekim bilong karim hevi o winim hevi. Indeks tu long Wastaua na Kirap! em inap helpim yumi long kisim save yumi sot long en.

₁₇ Jehova i save bihainim ol narapela rot tu bilong helpim yumi long samting yumi beten askim em long en. Ating bai yumi harim sampela tok long wanpela tok bilong Baibel long kongrigesen o long wanpela kibung bilong ol Witnes Bilong Jehova, na dispela bai helpim yumi. O sapos yumi toktok wantaim narapela Kristen, ating long dispela rot bai yumi kisim sampela gutpela tok bilong helpim yumi. Ol elda tu inap strongim yumi na givim gutpela tok long yumi. Sampela taim sapos yumi inap kamapim olgeta tingting bilong yumi long wanpela strongpela Kristen em i save sori long ol man na putim gut yau long tok bilong ol, dispela inap helpim bel bilong yumi long i stap isi gen. Sapos dispela gutpela poroman bilong yumi i kirapim yumi long tingim sampela tok bilong Baibel, dispela inap helpim tru yumi. Taim yumi kamapim tingting na hevi bilong yumi long wanpela man na em i givim gutpela tok long yumi, dispela i save mekim isi bel na tingting bilong yumi.−Provep 12:25; 1 Tesalonaika 5:14.

₁₈ Yumi stap long taim bilong “planti hevi nogut tru,” na bel bilong planti man i bagarap na ol i stap bel hevi. (2 Timoti 3:1) I gat kain kain samting inap mekim ol man i bel hevi. Na ol dispela samting inap mekim ol Kristen tu i bel hevi, na bai ol i pilim nogut tru. Tasol planti Kristen i kisim save olsem: Sapos ol i bel hevi liklikb na ol i go autim tok, dispela samting inap mekim gut bel bilong ol. Yu bin mekim olsem? Sapos wanpela taim bel bilong yu i stap nogut na yu no amamas, orait kirap i go mekim sampela wok bilong Kingdom. Sapos yu toktok wantaim ol man long Kingdom bilong God, dispela inap helpim yu na bai yu no bel hevi moa. Taim yu tokim ol man long Jehova na autim ol tok bilong Baibel, dispela inap mekim yu i stap amamas−amamas em i wanpela gutpela pasin spirit bilong God i save kamapim. (Galesia 5:22) Wanpela yangpela painia i pilim dispela samting. Em i tok, taim em i mekim bikpela wok bilong Kingdom na em i tingim hevi bilong ol narapela man, nau em i pilim olsem ol hevi bilong em yet “i liklik tasol na i bilong liklik taim tasol.”

₁₉ Sampela taim, sapos skin bilong yumi i no i stap gutpela na yumi gat sampela hevi yumi tingting planti long en, dispela inap mekim yumi bel hevi. Ating long nait bai yumi no inap slip, long wanem tingting na bel bilong yumi i no i stap isi. Kain hevi olsem i bin painim wanpela Kristen i gat 40 krismas samting na skin bilong em i no strong. Em i tok, beten i bin helpim em. Taim em i no inap slip na em i pilim nogut, em i save stap isi na beten strong long Jehova. Kwiktaim dispela i mekim gut bel bilong em na em i stap amamas gen. Na em i save tingim sampela gutpela tok bilong Baibel, olsem tok bilong Sam 23, na em i kolim ol dispela tok. Spirit bilong Jehova i wok long rot bilong beten o long rot bilong Baibel na dispela man i no bel hevi moa; bel bilong em i stap gutpela. Bihain em inap i stap isi na tingim gut ol samting em i mas mekim bilong stretim ol hevi bilong em; o dispela samting em i mekim i helpim em long karim ol hevi na sanap strong.

₂₀ Dispela stori i makim wanpela rot bilong God long helpim man i beten long em. Tasol sampela taim yumi gat hevi na yumi beten na ating yumi pilim olsem God i no helpim kwik yumi. Wanem as bilong dispela? Ating yumi mas wetim taim bilong God bilong helpim yumi. Na sampela taim God i larim hevi i stap longtaim liklik bambai man i beten em i ken kamapim gut bel bilong em, em i laik tru long stretim dispela hevi, na em i bilip tru long God, o nogat. Dispela samting i bin painim wanpela man bilong raitim sam!−Sam 88:13, 14; lukim tu 2 Korin 12:7-10.

₂₁ Maski wanem samting i kamap, tasol pasin bilong beten toktok wantaim God I Gat Olgeta Strong, dispela pasin inap strongim bilip bilong yumi na pinisim bel hevi bilong yumi. Yumi save, God i harim beten bilong yumi na dispela samting i mekim gut bel bilong yumi! Olsem Pol i tokim kongrigesen long Filipai, yumi mas beten na singaut long God na yumi mas “tenkyu long em.” (Filipai 4:6) Tru tumas, long olgeta de yumi mas givim bel long tenkyu long Jehova. Yumi “mas tenkyu long God long olgeta samting.” (1 Tesalonaika 5:18) Dispela bai helpim yumi long pas gut wantaim Jehova, na bai yumi stap bel isi. Tok i kamap bihain i stori olsem dispela em i bikpela samting tru long ol wokboi bilong Jehova nau long dispela taim nogut.

[Ol Futnot]

Bai Yu Bekim Wanem Tok?

◻ Wanem ol samting inap givim hevi long ol Kristen na bai ol i tingting planti?

◻ Wanem samting inap helpim yumi na bai yumi no tingting planti?

◻ Bilong wanem ol Kristen inap bilip olsem God bai helpim ol long kisim ol samting ol i mas kisim bilong i stap laip?

◻ Wanem insait bilong dispela tok “singaut” long God? Ol man i singaut long God long bipo, wanem samting i painim ol na yumi ken save, Jehova i harim beten bilong ol?

◻ ehova i bihainim wanem wanem rot bilong helpim yumi long ol samting yumi beten askim em long en?

2. Bilong wanem dispela de i bikpela de tru? Wanem samting i bin helpim ol disaipel?

3. Long nau planti man i tingting planti long wanem ol samting?

4. Wanem samting inap givim hevi long ol Kristen?

5. Baibel i givim wanem ol gutpela tok long yumi bilong strongim bel bilong yumi?

6, 7. (a) Wanem wanpela rot bilong mekim isi bel? (b) Wanem samting inap helpim yumi long pas gut wantaim Jehova?

8, 9. Yumi ken bihain wanem gutpela tok sapos yumi gat hevi long wok o long mani samting?

10. (a) Jisas i givim dispela gutpela tok long husat? (b) Em i tok wanem long ol samting i laik kamap long bihain?

11, 12. Sampela Kristen i beten askim Jehova long helpim ol na ol i pilim olsem em i bin mekim wanem bilong helpim ol?

13. (a) Wanem insait bilong dispela tok “singaut” long God? (b) Baibel i stori long husat ol i bin singaut long God?

14. Olsem wanem yumi ken save taim yumi singaut long God, yumi no ken mekim wanpela taim tasol?

15. (a) Taim Niemaia i givim wain long king, bilong wanem em i bel hevi? (b) Niemaia i bin mekim wanem na em i no mekim wanpela liklik beten tasol?

16. (a) Ebraham i bin kisim wanem bikpela blesing? (b) I gat wanem ol strongpela samting bilong helpim yumi long ol samting yumi beten askim God long en?

17. Jehova i save bihainim wanem ol narapela rot bilong helpim yumi long ol samting yumi beten askim em long en? Ol gutpela Kristen i gat pasin sori, olsem wanem ol i ken helpim yumi?

18. Taim Kristen i bel hevi liklik, em i ken mekim wanem bikpela wok na dispela inap helpim em long i stap amamas gen? Olsem wanem dispela i bin helpim wanpela yangpela painia?

19. Wanpela Kristen, skin bilong em i no strong, taim em i bel hevi, em i save mekim wanem?

20. Sapos yumi pilim olsem God i no helpim kwik yumi, ating i gat wanem as bilong dispela?

21. Bilong wanem i gutpela samting tru yumi inap i stap Witnes Bilong Jehova long nau? Yumi ken mekim wanem bilong kamapim bel bilong yumi, yumi pilim tru dispela samting?

[Piksa long pes 12]

“Papa bilong yupela i stap long heven em i save givim kaikai long ol [pisin]. Ating yupela i no win tru long ol pisin, a ?”