Gutpela Lo Tru​—⁠Em Wanem Lo?

SAMPELA man i save tok, “Mi no save mekim nogut long ol arapela manmeri. Ol i ken mekim ol samting ol yet i laik mekim. Tasol sapos hevi i painim ol, orait mi bai mekim ol samting bilong helpim ol.” Olsem wanem? Yu gat wankain tingting? Taim bagarap i kamap, ating ol man i save mekim planti samting bilong helpim ol narapela, na planti manmeri i kirap nogut long dispela. Tasol yu ting dispela kain pasin em inap?

Sapos yu wanpela papa o mama ating yu bin tokim ol pikinini bilong yu ol i no ken skrapim bel bilong ol wanpilai bilong ol. Taim yumi yangpela yet, ating yumi bin sakim dispela tok bilong papamama na yumi bin mekim sampela samting i skrapim bel bilong ol wanpilai bilong yumi na ol i belhat na bekim nogut long yumi na mak bilong dispela i stap yet long skin bilong yumi. Yes,taim ol dispela samting i kamap long yumi, yumi lain pinis long bihainim savepasin olsem lo bilong Konfyusias, em wanpela saveman bilong Is, i kolim, em i tok: “Ol samting yu no laik bai ol man i mekim long yu, em yu no ken mekim long ol.” Ating yu save dispela tok i wankain liklik olsem gutpela lo tru bilong Baibel, tasol dispela lo bilong Konfyusias i kolim samting yumi no ken mekim, na lo bilong Baibel i kolim samting yumi mas mekim. Lo bilong Konfyusias i no gutpela olsem lo bilong Baibel.

Lo i Kolim Samting Yumi Mas Mekim

Wanpela buk (Webster’s New Collegiate Dictionary) i tok: ‘Gutpela lo tru i stap long Matyu 7:12 na Luk 6:31 em lo i kolim stretpela pasin man i mas bihainim, na i tok olgeta pasin man i laik bai ol arapela manmeri i mekim long em, ol dispela pasin tasol em i mas mekim long ol.’ Lukim blok i stap daunbilo na tingim ol tok em kain kain Baibel i raitim long Matyu sapta 7 ves 12, em ol dispela tok i kamapim long ples klia olsem dispela lo em i gutpela lo tru bilong bosim wokabaut bilong yumi.

Tru ol dispela kain kain Baibel i tanim tok bilong dispela lo narapela narapela kain liklik, tasol dispela lo i kolim ol samting yumi mas mekim, olsem Jisas i bin tok long maunten: “Yupela i mas prea na askim God long givim ol samting long yupela, na em bai i givim long yupela. Yupela i mas wok long painim samting na bai yupela i lukim. Yupela i mas paitim dua, na God bai i opim long yupela. Olgeta man i prea long God, ol i save kisim ol samting. Man i wok long painim samting, em i save lukim. Na man i paitim dua, God bai i opim dua long em.” (Matyu 7:​7, 8) I stret yumi mas askim na painim na paitim dua, em ol samting yumi mas mekim. Na Jisas i tok moa olsem: “Olgeta pasin yupela i laik bai ol arapela manmeri i mas mekim long yupela, ol dispela pasin tasol yupela i mas mekim long ol.”​—⁠Matyu 7:⁠12.

Baibel i soim olsem ol disaipel bilong Jisas tu i kirapim ol man long bihainim dispela lo. (Rom 15:2; 1 Pita 3:11; 3 Jon 11) Tasol sori tru, ol hevi i stap nau long taim bilong yumi i kamapim klia olsem maski ol manmeri i kolim ol yet i Kristen o nogat, ol i no bihainim dispela lo. Olsem na ating dispela lo i no gat strong moa? Ating em i olpela pinis na yumi ol man bilong nau i no ken bihainim?

[Blok long pes 3]

“Olgeta pasin yu laik bai ol arapela man i mekim long yu em yu mas mekim long ol.”​—⁠The Holy Bible, em R. A. Knox i tanim tok bilong en.

“Mekim pasin long ol narapela manmeri stret olsem yu laik bai ol i mekim long yu.”​—⁠The New Testament in Modern English, bilong J. B. Phillips.

“Wanem wanem kain pasin yu laik bai ol narapela man i mekim long yu na bilong helpim yu, orait dispela kain pasin tasol yu mas mekim long ol na bilong helpim ol.”​—⁠The Amplified New Testament.

“Olgeta pasin yu laik bai ol arapela i mekim bilong helpim yu em yu mas mekim bilong helpim ol.”​—⁠The New Testament in Language of Today, bilong W. F. Beck.

“Olsem na long olgeta samting yu mas mekim wankain pasin long ol narapela man olsem yu laik bai ol i mekim long yu.”​—⁠The Four Gospels, em E. V. Rieu i tanim tok bilong en.

“Yu mas wok long mekim pasin long ol narapela manmeri olsem yu laik bai ol i mekim long yu.”​—⁠The New Testament, bilong C.B. Williams.

Gutpela Lo Tru​—⁠Bilong Wanem Yumi Mas Bihainim Yet?

KALA bilong gol tru i no save lus, olsem na ol manmeri i save laikim tru ol bilas ol i wokim long gol; ol i ting em i gutpela samting tru. Ol man bilong wokim samting long gol, ol i no save tromoi ol bilas gol i bruk o bagarap. Ol i kisim gol bilong en na wokim narapela bilas long en, long wanem gol yet i no save bagarap.

Na olsem tasol wanpela lo Jisas i bin kolim em i gutpela samting tru kain olsem gol. Maski Jisas i bin kolim dispela lo inap 2 tausen yia bipo, dispela lo i no bagarap; em i stap yet olsem wanpela gutpela lo tru.

Taim yumi skelim dispela lo na yumi save bilong wanem yumi mas bihainim yet, bai yumi pilim tru olsem dispela lo i gutpela tru bilong helpim yumi long nau.

Taim Jisas i givim dispela lo long yumi na em i tok, “olgeta pasin yupela i laik bai ol arapela manmeri i mas mekim long yupela, ol dispela pasin tasol yupela i mas mekim long ol,” em i tok moa olsem: “Dispela em i as tok bilong lo, na em i as bilong tok bilong ol profet.” (Matyu 7:12) Orait, ol disaipel bilong Jisas na ol narapela man i harim dispela tok bilong em, ol i ting dispela tok bilong em i gat wanem insait bilong en?

‘As Bilong Tok Bilong Lo na Ol Profet’

Dispela tok “lo” i makim ol faipela buk long kirap bilong Baibel, em Stat i go long Lo. Ol i tokaut klia long laik bilong Jehova, em i laik kamapim wanpela pikinini em bai pinisim olgeta samting nogut. (Stat 3:15) Long dispela faipela buk i gat Lo bilong Moses i stap. Dispela Lo em olgeta lo Jehova i givim long lain Israel long rot bilong namelman Moses long Maunten Sainai long yia 1513 paslain long Krais.

Lo bilong God i mekim na lain Israel i narapela kain long ol lain haiden i stap klostu long ol. Na ol i no ken mekim wanpela samting i brukim lo bilong Jehova na bai Jehova i no amamas moa long ol. Ol i kamap lain manmeri bilong Jehova stret, na sapos ol i laik kisim ol blesing, ol i mas i stap olsem tasol. (Kisim Bek 19:5; Lo 10:​12, 13) Tru ol i gat wok long lotuim Jehova, tasol Lo bilong Moses i tok, lain Israel i gat wok tu long mekim gut long ol manmeri bilong narapela lain i stap wantaim ol. Lo bilong Moses i tok olsem: “Yupela i mas mekim gutpela pasin long ol, olsem yupela i save mekim long ol wanlain bilong yupela, ol Israel. Na yupela i mas laikim ol tru, olsem yupela i save laikim yupela yet. Yupela i bin i stap long Isip bipo, olsem na yupela i save long pasin bilong man i lusim as ples na i stap long narapela kantri. Olsem na yupela i mas mekim gut long ol dispela arapela lain i stap wantaim yupela. Mi Bikpela, mi God bilong yupela, mi tok pinis.” (Wok Pris 19:34) Taim ol king i bosim lain Israel, ol dispela manmeri bilong arapela lain i kisim planti blesing, wanpela em olsem: Ol i helpim lain Israel long wokim haus bilong God long Jerusalem.​—⁠1 Stori 22:⁠2.

Lo God i givim long lain Israel i tambuim ol long mekim pasin pamuk, kilim manmeri i dai, stil na mangalim samting bilong narapela man. Ol dispela lo wantaim “olgeta arapela lo,” em olgeta i stap insait long wanpela tok, olsem: “Yu mas laikim tru ol arapela man olsem yu laikim yu yet.” Aposel Pol i tok moa: “Man i save givim bel bilong em long arapela man, em i no save mekim pasin nogut long em. Olsem na man i save givim bel bilong em long ol arapela, em i save bihainim tru lo.”​—⁠Rom 13:​9, 10.

Sapos Lo bilong Moses em i as bilong dispela Gutpela Lo Tru Jisas i bin kolim, orait olsem wanem long as bilong “tok bilong ol profet”?

Tok bilong ol profet i stap long Olpela Testamen, dispela tu i makim olsem dispela lo i gutpela bilong yumi bihainim long nau. Ol i makim olsem Jehova em i God bilong kamapim tru laik bilong em. Em i save blesim ol gutpela wokboi i wok long bihainim laik bilong em na ol i kamapim long ples klia olsem ol i tanim bel na lusim olpela pasin bilong ol, maski ol i gat pekato. Em i tok: “Mi lukim yupela i nogut tru. Yupela go waswas, na klinim yupela yet na rausim olgeta pasin nogut i pas long yupela. Na no ken mekim sin gen. Kisim save long mekim gutpela na stretpela pasin, na wok strong long mekim dispela kain pasin i win. Givim gutpela tingting long ol man i save daunim ol arapela. Lukautim gut ol pikinini, papa bilong ol i dai pinis, na mekim gut long ol meri, man bilong ol i dai pinis. Na sapos ol man i mekim nogut long ol, orait yupela i mas helpim ol.”​—⁠Aisaia 1:​16, 17.

Taim lain bilong God i mekim stretpela pasin long ol arapela man, na ol i bihainim lo bilong em, em i promis long helpim ol. “Bikpela i tok olsem, ‘Yupela ol manmeri bilong mi, yupela i mas mekim gutpela na stretpela pasin tasol, . . . Ol manmeri i strong long bihainim gutpela pasin . . . ol i ken amamas.”​—⁠Aisaia 56:​1, 2.

Krais i Bosim Kongrigesen Bilong Em

Krais i kam bilong inapim tru tok bilong Lo na bilong ol Profet. Long dispela taim i kam inap long nau, Jehova i wok yet long kamapim laik bilong em bilong oltaim. (Matyu 5:17; Efesus 3:​10, 11, 17-19) Nupela lo i senisim Lo bilong Moses. Dispela nupela lo em bilong ol Kristen bilong lain Juda na bilong ol arapela lain em God i makim ol long spirit holi. (Jeremaia 31:​31-34) Tasol kongrigesen Kristen long nau i wok yet long bihainim dispela Gutpela Lo Tru. Na i gat narapela as na yumi mas bihainim dispela lo, em olsem: Krais em i Het bilong kongrigesen Kristen long nau. Em i no senisim ol lo bilong em. Spirit bilong God i kirapim em na em i mekim gutpela tok na dispela ol tok i gutpela inap long nau.

Paslain long em i lusim dispela graun, Jisas i tokim ol disaipel bilong em long mekim olgeta lain manmeri i kamap disaipel bilong em na lainim ol long “bihainim olgeta tok mi bin givim long yupela.” Olsem na ol i mas lainim ol tu long dispela Gutpela Lo Tru. Jisas i strongim ol disaipel bilong em, em i tok: “Harim! Mi save stap wantaim yupela olgeta de, i go inap long dispela taim i pinis.”​—⁠Matyu 28:​19, 20.

Long Luk 6:​31, Jisas i tok: “Olgeta pasin yupela i laik bai ol arapela manmeri i mas mekim long yupela, ol dispela pasin tasol yupela i mas mekim long ol.” Jisas yet i save mekim gutpela pasin long ol arapela man, olsem na em i gutpela piksa bilong yumi ken bihainim.

Taim Jisas i stap long graun na mekim wok bilong em, em i lukim gut olsem ol manmeri i gat planti hevi na em i sori tru long ol. Taim em i raun autim tok, em i lukim ol bikpela lain manmeri, na em i sori long ol. Em i stretim rot bilong helpim ol. Olsem wanem em i helpim ol? Em i salim ol disaipel i go autim tok long ol long haus bilong ol. Em i tokim ol: “Sapos yupela i go insait long wanpela taun o wanpela ples, orait yupela i mas painimaut gut, wanem man bilong dispela ples em i gutpela na stretpela man. Na yupela i mas i stap wantaim dispela man inap long taim yupela i lusim dispela ples.” Jisas yet i bosim dispela wok na Papa bilong em i blesim dispela wok. Yumi ken save long dispela, long wanem Jisas i tok moa olsem: “Man i kisim yupela na i mekim gut long yupela, em i kisim mi na i mekim gut long mi. Na man i kisim mi, em i kisim God, em i bin salim mi na mi kam. . . . Na man i ting, ‘Mi laik helpim disaipel bilong Jisas,’ na em i givim kap kol wara tasol long wanpela bilong ol dispela manmeri nating i stap long lain disaipel bilong mi, orait mi tok tru long yupela, pe bilong dispela man bai i no inap lus.”​—⁠Matyu 9:​36–10:⁠42.

Dispela Gutpela Lo Tru i kolim ol samting yumi mas mekim bilong helpim ol arapela man. Olsem na wanpela taim Jisas i tok: “Sapos yupela i laikim tasol ol man i save laikim yupela, orait husat bai i ting yupela ol gutpela manmeri? Ol man bilong mekim sin ol tu i save laikim ol man i laikim ol. Na sapos yupela i mekim gutpela pasin long ol man i mekim gutpela pasin long yupela, orait husat bai i ting yupela ol gutpela manmeri? Ol man bilong mekim sin ol tu i save mekim wankain pasin. Tasol yupela i mas laikim ol birua bilong yupela. Yupela i mas mekim gutpela pasin long ol. . . . bai yupela i gat bikpela pe moa.” (Luk 6:​32, 33, 35) Olsem na sapos yumi bihainim yet dispela Gutpela Lo Tru, dispela bai kirapim yumi long mekim gutpela pasin long ol narapela na long ol man yumi no save long ol.

I Gat Strong Yet na i Wok Yet

Ating samting i kamapim ples klia olsem dispela Gutpela Lo Tru i gat strong yet, em olsem: Ol samting i painim ol man i bihainim dispela lo. Ol Kristen i bihainim, gutpela pasin i stret wantaim ol lo bilong God long olgeta de, ol i kisim bikpela amamas, na planti taim ol i kisim ol blesing ol i no save ol bai kisim. Wanpela meri Kristen i save go planti taim long wanpela klinik na em i save mekim gutpela pasin long ol manmeri i wok long dispela klinik. Bihain em i save olsem long dispela as ol nes na ol dokta i wok strong long helpim em.

Ol Witnes Bilong Jehova i save sanapim kwik sampela Haus Kingdom insait tupela o tripela de samting na ol tu i save dispela Gutpela Lo Tru i gat strong yet. Ol i save go long haus bilong ol man i stap klostu long ples ol i laik wokim Haus Kingdom na tokim ol long ol samting ol i laik mekim. Planti i save amamas long dispela samting. Sampela manmeri bipo ol i birua long ol Witnes ol i lukim ol Witnes i mekim gutpela pasin long ol man i stap klostu long ol na ol i lukim pasin bilong lain bilong God long wok gut wantaim long mekim wok. Long dispela rot, sampela i bin kirap helpim ol long wokim Haus Kingdom, o givim sampela samting bilong wokim Haus Kingdom.​—⁠Skelim Sekaraia 8:⁠23.

Wanpela man bilong Iran, em wanpela Witnes, em i stap long London long Inglan. Taim em i baim sampela kaikai long wanpela stua, man i lukautim stua i toknogutim em long wanem em i wanpela man bilong narapela kantri. Dispela Witnes i no pret. Long pasin isi em i tokim dispela man, em i wanpela Witnes Bilong Jehova na em i no gat tingting nogut long ol man bilong narapela kantri; em i save go long haus bilong olgeta man i stap klostu na autim tok bilong Baibel long ol. Wanem samting i kamap? Man i lukautim stua i givim nating sampela kaikai moa, em gutpela kaikai tru, long dispela Witnes.

Tasol dispela Gutpela Lo Tru i no kirapim ol man long mekim ol kain liklik pasin sori tasol. Em i kirapim lain Witnes Bilong Jehova long mekim bikpela pasin sori tru, em olsem: Long olgeta hap bilong graun, ol i save go oltaim long haus bilong ol man na tokim ol long gutnius bilong Kingdom bilong God.

Bihainim Dispela Gutpela Lo Tru