Man i Bilip Tru Long Jehovah Em Bai Dediket na Baptais

“Yu mas bilip tru long God, na mekim gutpela pasin. Yu mekim olsem na bai yu stap gut oltaim long graun bilong yu, na i no gat wanpela samting i ken bagarapim yu.”−SAM 37:3.

1. Ol saveman bilong dispela graun i tok wanem na yumi save, yumi no ken bilip long ol hetman bilong graun na wetim ol i helpim yumi?

YUMI ken bilip tru long husat? Yu ting yumi ken bilip long ol hetman bilong graun? Sapos yumi bilip long ol yumi mekim longlong pasin, long wanem wok bilong ol i no bin helpim ol man. Ol saveman bilong graun tu i save dispela tok i stret! Olsem na wanpela nius bilong ol bisnisman long Yurop (Vision) i bin tok olsem: ‘Samting nogut bilong ol hevi bilong nau em olsem: I no gat wanpela man i save long rot bilong stretim ol dispela hevi.’ Na wanpela man bilong raitim stori bilong ol wok bisnis, em Robert Heilbroner, em i tok: ‘Narapela samting yumi tingting planti long en em olsem: Ating i no gat wanpela man em inap bosim ol samting na stretim ol hevi i kamap planti long nau.’

₂ Tru ol saveman bilong saiens i bin kisim bikpela save, tasol yu ting dispela save i bin helpim ol man? Nogat, a? I olsem wanpela man bilong raitim ol buk, nem bilong em Lewis Mumford, em i tok: ‘Sampela man i ting ol masin, na bikpela save ol man i bin kisim, em inap helpim ol man long i stap gutpela, tasol nogat.’ Wanpela samting nogut i kamap long wok bilong ol man em ren i gat marasin nogut long en, em i bagarapim ol wara na ol raunwara na i bagarapim planti milion diwai. Na tingim ol narapela samting nogut i kamap long graun long nau, olsem pasin raskol i kamap bikpela, na i gat pait, na pasin birua, na ol man i save kisim ol drak, na dring planti tumas, na i gat kain kain sik bilong pamuk, na planti man i stap rabis. Olgeta dispela samting i kamapim long ples klia olsem yumi no ken bilip long ol hetman bilong dispela graun na wetim ol i helpim yumi; ol i no inap helpim yumi.

₃ Baibel, em Tok Bilong God, i givim gutpela tok long yumi, olsem: “Ol king na ol man bilong graun i no inap kisim bek yu. Olsem na nogut yu bilip long ol. Taim ol i dai ol i tanim i kamap graun gen. Na long dispela taim ol i no inap mekim olgeta samting ol i bin tok long mekim.” (Sam 146:3, 4) Sapos yumi no ken bilip long ol man, orait yumi ken bilip long husat? Yumi ken bilip long Man bilong wokim heven na graun, olsem Baibel i tok: “Sapos man i bilip na wet long Jehova, na em i tingim Jehova inap helpim em, dispela man bai kisim blesing.”−Jeremaia 17:7, NW.

Bilong Wanem Yumi Mas Bilip long Jehova?

₄ I gat planti gutpela as na yumi ken bilip long Jehova. Yumi ken bilip long em, long wanem em i gat strong na bikpela save na ol gutpela pasin. Baibel i tok em i gat olgeta strong. Baibel i kolim nem long em olsem “God i Strong Olgeta.” (Jenesis 28:3) Em gutpela as tru na yumi ken bilip long Jehova! No gat wanpela man em inap sakim Jehova; no gat wanpela man inap pasim rot bilong Jehova long kamapim laik bilong Em. Na Jehova em i gat olgeta save. Taim samting i kirap nupela, long dispela taim em inap kolim ol samting bai kamap bihain−em i save long ol samting bai kamap long bihain. Ol gutpela gutpela samting Jehova i bin wokim i kamapim long ples klia olsem em i gat olgeta save na gutpela tingting. Long olgeta samting em i mekim, em i no popaia liklik. (Aisaia 46:10; Rom 11:33-35) Na yumi ken bilip tru long Jehova, long wanem olgeta pasin bilong em i stret na em i save truim tok bilong em. Em i no inap giaman. (Diuteronomi 32:4; Taitas 1:2; Hibru 6:18) Na nambawan pasin bilong em, em pasin bilong sori. Baibel i tok stret olsem: “God em i as bilong pasin bilong laikim tru ol manmeri.”−1 Jon 4:8, 16.

₅ Ol samting Jehova i bin mekim long ol man, dispela tu i kamapim long ples klia gutpela pasin bilong em, em i no save giaman, na em i God i gat olgeta strong, na save, na stretpela pasin, na pasin bilong sori. Moses i tokim ol Isrel Jehova i save truim ol tok promis em i mekim long ol man i laikim tumas em na ol i bihainim ol lo bilong em, na em i save marimari long ol. (Diuteronomi 7:9) Paslain long taim bilong Moses, Jehova i bin lukautim gutpela man Noa wantaim lain bilong em na ol i no bagarap long Bikpela Tait Wara. God i lukautim Lot wantaim tupela pikinini meri bilong em na ol i no bagarap taim paia i bagarapim Sodom na Gomora. Bihain, God i truim tok promis em i bin mekim long Ebraham na em i helpim ol Isrel long lusim Isip na em i givim graun bilong Kenan long ol. (Jenesis 7:23; 17:8; 19:15-26) Na Jehova i bin lukautim tripela Hibru taim ol man i tromoi ol long paia; na em i lukautim Danyel na ol laion i no bagarapim em.−Danyel 3:27; 6:23.

₆ Ol samting Jehova i bin mekim bilong helpim lain Witnes bilong em long nau tu i strongim yumi long bilip tru long em na wetim em i helpim yumi. Olsem: Hitler i hambak na em i tok em bai pinisim lain Witnes olgeta long Jemani. Tasol Hitler wantaim lain bilong em ol i pinis. Na long dispela taim nau lain Witnes long Jemani i kamap bikpela bikpela na i gat inap olsem 119,000 ol i stap. Planti Witnes Bilong Jehova ol i bin raitim stori bilong ol long Wastaua na Kirap! na stori bilong ol tu i kamapim long ples klia olsem yumi ken bilip tru long Jehova.

Bilong Wanem Sampela i No Bilip long Jehova?

₇ Tasol long nau liklik lain tasol ol i bilip tru long Jehova! Planti man ol i bin kisim save long ol gutpela pasin bilong Jehova na long ol wok em i bin mekim, tasol ol tu i no bilip long em. Wanpela nius (U.S. Catholic, bilong Janueri 1979) i stori long wanpela man olsem, na i tok: ‘Taim ol i askim dispela man, “Yu laikim wanem lotu?” em i tok, “Ating mi wanpela Arere Witnes.” Ol i tokim em long stori liklik long dispela samting na em i tok, “Mi gat wankain bilip olsem bilong ol Witnes Bilong Jehova, tasol mi no laik insait tru long lain bilong ol.”’ Nius i tok: “Man i laik i stap Witnes tru em i mas insait olgeta.”

₈ Bilong wanem sampela ol i no laik insait tru? Long wanem ol i no gat gutpela bel. Jisas i mekim tok piksa long wanpela man i tromoi pikinini kaikai long gaden, na em i tok ol man i harim tok i tru na ol i holimpas na karim kaikai, bel bilong ol “i stretpela na i gutpela.” (Luk 8:15) Tru tumas, ol man i no gat gutpela bel ol i no laikim tok i tru. Ol man i gat stretpela bel ol i bilip. Na ol man i gat pasin antap ol i no save laikim tok i tru bilong Baibel. Ol man i gat pasin daun ol i bilip. (Jems 4:6) Na ol man i ting ol yet i stretpela man, ol tu i no laikim tok i tru. Tasol ol man i pilim olsem ol i sot long ol samting bilong spirit na ol i laik tumas long kisim, na ol i laik tumas long kisim stretpela pasin, olsem man i hangre long kaikai na i dai long wara, na ol i hevi long ol samting nogut nogut i kamap long graun long nau, ol dispela man i save laikim tok i tru na ol i bilip.−Matyu 5:3, 6; Esikiel 9:4.

Man i Bilip Tru long Jehova Em Bai Dediket

₉ Bilong ol man i ken bilip tru long Jehova, pastaim ol i mas harim tok long em. Tasol “sapos ol i no bilip long em, olsem wanem bai ol i singaut long em? Na sapos ol i no harim tok bilong em, olsem wanem bai ol i bilip long em? Na sapos i no gat wanpela i autim tok long ol, olsem wanem bai ol i harim?” (Rom 10:14) Ol wokboi bilong Jehova ol i autim tok na ol man i gat gutpela bel ol i harim na ol i bilip, olsem planti i bin mekim long Tesalonaika long bipo. Pol i stori long ol dispela bilipman na em i tok: “Bipo yupela i kisim tok bilong God long maus bilong mipela, tasol yupela i no kisim olsem tok bilong man. Nogat. Yupela i kisim olsem tok tru bilong God. Na dispela tok i wok strong long bel bilong yupela bilipman.”−1 Tesalonaika 2:13.

₁₀ Ol dispela man i gat gutpela bel, ol i kisim save long Jehova na ol i bilip long em. Em bikpela samting, long wanem “man i no bilip long God, em i no inap bihainim laik bilong God. Long wanem sapos man i laik i go klostu long God, dispela man i mas bilip long God i stap. Na em i mas bilip long God i save givim gutpela pe long ol man i wok long painim em.” (Hibru 11:6) Na narapela bikpela samting, em olsem: Dispela man i mas bilip long Pikinini bilong God tu. “I no gat narapela man inap long helpim yumi. Long olgeta hap God i no soim narapela nem long yumi bilong kisim bek yumi.”−Aposel 4:12.

₁₁ Sapos man i bilip long Baibel, na long Jehova, na long Pikinini bilong Em, Krais Jisas, dispela bai kirapim em long bihainim strongpela tok Pita i givim long ol Juda long taim bilong em, em i tok: “Yupela i mas senisim tingting nogut bilong yupela, na tanim bel, na bai God i rausim sin bilong yupela na mekim yupela i kamap klin.” (Aposel 3:19) Sapos man i kisim save long Jehova na ol lo bilong em, long dispela rot em inap kisim save long ol samting God i laik bai em i mekim bilong kamap wanpela disaipel bilong Krais Jisas. I olsem Pita i tok: “God i singautim yupela pinis bilong bihainim dispela pasin. Long wanem Krais i bin karim pen bilong helpim yupela. Olsem na em i soim yupela dispela pasin bilong em, bai yupela i ken bihainim.” (1 Pita 2:21) Jisas i tokaut klia long ol samting yumi mas mekim bilong kamap disaipel bilong em, em i tok: “Sapos wanpela man i laik bihainim mi, em i mas daunim laik bilong em yet, na em i mas karim diwai [pos] bilong em na bihainim mi.” (Matyu 16:24) Yes, yumi mas dediket long Jehova bilong bihainim laik bilong em, na yumi mas bihainim lek bilong Krais Jisas.

Dediket i No Olsem Tok Promis Tasol

₁₂ Ol misin ol i kolim Kristen ol i tok, taim man i kamap Kristen i olsem em i mekim tok promis. Olsem na ol Evanjelikal long Amerika i strong long tok, man i kamap Kristen em i mas ‘mekim tok promis long bihainim Jisas.’ Wanpela pris Katolik i tok, ol Katolik i mas mekim tok promis long bihainim lotu bilong ol. Wanpela pris Katolik em i insait long wok politik na em i ting i no gat rong long dispela, em i tok: “Dispela wok politik mi mekim em i olsem hap wok pris mi bin tok promis long mekim.” Sampela kampani i tok promis long helpim gut ol man i baim samting long ol. Olsem na yumi inap mekim planti tok promis wantaim, olsem tok promis long mekim sampela wok bisnis, na tok promis long go long sampela pati, na tok promis long mekim sampela wok politik, na tok promis tu long mekim sampela wok lotu.

₁₃ Tasol dediket long God Jehova i no olsem wanpela tok promis tasol. Nogat. Tok promis i olsem yumi “pasim tok long mekim wanpela samting long bihain.” Tasol dediket i olsem yumi “givim skin na bel bilong yumi olgeta long lotuim wanpela god na mekim wok bilong em, o long mekim wanpela wok lotu.” Planti man i orait long mekim wanpela tok promis, tasol ol i no laik dediket. Olsem na planti man ol i no givim bel long lotu bilong ol. Ol i amamas long i go harim lotu, tasol ol i no laik bai lotu i pasim rot bilong ol long mekim samting ol yet i laik tru long mekim.

₁₄ Man i dediket long God em i mas tingim wok bilong bihainim laik bilong God em i nambawan bikpela wok bilong em. Em i mas bihainim nambawan bikpela lo i winim ol narapela lo, em Jisas i kolim taim em i tok: “Yu mas laikim tru [Jehova], God bilong yu, long bel bilong yu olgeta, na long [laip] bilong yu olgeta, na long tingting bilong yu olgeta, na long strong bilong yu olgeta.” Jisas i kamapim klia olsem yumi mas mekim wok bilong God wanpela tasol, em i tok: “I no gat wanpela man inap holim wok bilong tupela bosman wantaim. Bai em i bel nogut long wanpela na i laikim arapela. Bai em i bihainim wanpela na givim baksait long arapela. Yupela i no inap holim wok bilong God na bilong mani wantaim.” (Mak 12:30; Matyu 6:24) Olsem na Jehova i no ken orait long man i tok promis tasol long mekim wok bilong Em.

Bilong Wanem Yumi Mas Baptais long Wara?

₁₅ Taim man i dediket pinis long God, bilong wanem em i mas kisim baptais? Sapos em i laik kamap wanpela Witnes Bilong Jehova, em i no gat narapela rot. Sapos em i laik kamap wanpela Kristen, olsem wanpela man i bihainim Krais, em i mas kisim baptais. Jisas em i “man bilong autim stret olgeta tok bilong God” na em i makim pasin yumi mas bihainim−em i kisim baptais. Jon i givim baptais long ol sinman i tanim bel, olsem na em i kirap nogut long Jisas i laik kisim baptais na em i laik pasim Jisas, tasol Jisas i tokim em: “Maski, nau yu mekim olsem mi tok. Em i gutpela long yumi inapim olgeta stretpela pasin.” (Matyu 3:13-17; Revelesen 1:5) Long dispela rot Pikinini bilong God i givim em yet long Jehova na em i autim bilip bilong em long ai bilong ol man, na em i makim pasin yumi mas bihainim. Olgeta man i laik bihainim laik bilong God, ol i mas kisim baptais.

₁₆ Na taim Jisas i laik i go bek long Papa bilong em long heven, Jisas i givim tok long ol disaipel bilong em, olsem: “Yupela i go mekim olgeta lain manmeri i kamap disaipel bilong mi. Na yupela baptaisim ol long nem bilong Papa na bilong Pikinini na bilong Holi Spirit. Na yupela lainim ol long bihainim olgeta tok mi bin givim long yupela.” (Matyu 28:19, 20) Stori bilong hap bilong Baibel ol i kolim Wok Bilong Ol Aposel i kamapim long ples klia olsem ol disaipel i bin wok strong long bihainim dispela tok bilong Jisas.−Aposel 2:40, 41; 8:12; 9:17, 18; 19:5.

_17.Ol i baptaisim ol olsem wanem? Yu ting ol i tromoi liklik wara long skin bilong ol, olsem planti misin long nau i mekim? Nogat tru! Taim Jisas i kisim baptais, em i go insait long wara na bihain “em i lusim wara na i kam antap.” Olsem na yumi save em i bin go daun insait olgeta long wara. (Mak 1:9, 10) Insait bilong tok Grik ol i tanim olsem “baptais” i olsem: ‘putim i go insait long wara, subim i go daun insait long wara.’−Aposel 8:36-39.

_18.Kain baptais olsem i mak stret bilong dediket. Taim man i go daun insait long wara, dispela i makim olsem em i lusim ol pasin bipo em i bihainim, olsem em i dai. Na taim em i lusim wara i kam antap, dispela i makim olsem em i kirap bilong bihainim nupela pasin. Taim man na meri i marit long ai bilong ol man, dispela i helpim tupela long tingim marit bilong ol em i bikpela samting. Na olsem tasol, taim man i kisim baptais long ai bilong ol man, dispela inap helpim em long tingim gut dediket bilong em. Tru tumas, baptais i helpim man long tingim dediket bilong em, em nambawan bikpela samting em i bin mekim. Bikpela senis i kamap long i stap bilong em−nau em i no bihainim moa laik bilong em yet; em i bihainim laik bilong God Jehova.

₁₉ I gat narapela samting tu na yumi kisim baptais, em olsem: Yumi mas kisim baptais bambai bel bilong yumi i ken kamap klin long ai bilong God. Long 1 Pita 3:21, Baibel i tok: “Dispela wara em i olsem piksa bilong baptais, em i save kisim bek yupela. Em i no bilong rausim doti bilong skin. Nogat. Em i bilong mekim bel bilong yupela i kamap klin, na yupela inap long singautim God. Bilong mekim olsem, Jisas Krais i kirap bek pinis.”

Man i Mas i Gat Hamas Krismas na Em i Ken Baptais?

₂₀ Tok bilong Jisas long Matyu 28:19, 20 i makim olsem ol man i kamap disaipel bilong em ol i mas kisim baptais. Tasol bebi o liklik pikinini i no inap kisim baptais, long wanem em i no inapim ol mak Baibel i kolim bilong man i kisim baptais. Liklik bebi i no save long ol tok bilong God long Baibel; em i no save long God, em i Man bilong wokim olgeta samting; em i no save long Pikinini bilong God, em Krais Jisas; olsem na em i no inap bilip. Liklik bebi i no inap save spirit holi em i strong bilong God bilong mekim wok; na em i no inap tanim bel na mekim tok tru antap long bihainim laik bilong God.

₂₁ Tasol sampela Witnes Bilong Jehova i gat tingting kranki long dispela samting na ol i wetim pikinini bilong ol i winim pinis 18 o 19 krismas pastaim na bai ol i toktok wantaim pikinini long kisim baptais. Planti taim mipela harim tok olsem ol pikinini yet i kirap na dediket long God na ol i dediket tru. Olsem: Pikinini man bilong wanpela elda em i gat 11-pela o 12-pela krismas na em i laik tru long kisim baptais. Olsem na papa bilong em i tokim tripela narapela elda long toktok wantaim dispela pikinini long ol askim bilong ol man i laik kisim baptais.a Ol i toktok pinis wantaim em na olgeta wantaim i pilim olsem maski em i yangpela yet, tasol em inap long kisim baptais na kamap wanpela wokman bilong Jehova. Long dispela taim, long Ol Ailan Bahama, i gat wanpela Skul Bilong Ol Painia. Tupela painia i go long dispela Skul ol i gat liklik pikinini meri em i gat 10-pela krismas na em i baptais pinis!

₂₂ Olsem na ating sampela papamama i no mekim gut wok bilong ol. Olsem wanem? Ol i lainim gut ol pikinini long bihainim ol pasin Kristen? Ol i wokim haus long ol samting ‘i no inap paia,’ o olsem wanem? (1 Korin 3:10-15 Bilong lainim gut pikinini, papamama yet i mas tingim wok bilong lotuim Jehova em i nambawan bikpela wok. Na tu, papamama i mas bihainim gutpela tok i stap long Diuteronomi 6:6, 7 na Efesas 6:4. Sapos ol i mekim olsem, ating bai bel bilong pikinini i kirap na em i gat laik long kisim baptais hariap, na bai papamama i mas pasim em, na bihain bai ol i no gat hatwok long kirapim pikinini long kisim baptais.

₂₃ Taim man i dediket na baptais pinis na kamapim long ples klia olsem em i bilip tru long Jehova, orait em i mas wok yet long kamapim bilip bilong em. Tok i kamap bihain long dispela, nem bilong en “Mekim Wok Olsem Ol Wanwok Bilong Jehova i Bilip Tru long Em,” em bai helpim yumi long save long ol samting yumi mas mekim bilong; kamapim bilip bilong yumi.

[Futnot]

Bai Yu Bekim Wanem Tok?

◻ Wanem samting i kamapim long ples klia olsem sapos yumi bilip long ol man yumi mekim longlong pasin?

◻ Ol gutpela pasin bilong Jehova na ol samting em i bin mekim, bilong wanem dispela i gutpela as bilong kirapim yumi long bilip tru long Em?

◻ Man i bilip tru long Jehova, bilong wanem em i mas dediket long Em na em i no ken tok promis tasol long mekim wok bilong Em?

◻ Olsem wanem ol papamama i ken kirapim ol pikinini long dediket long Jehova taim ol i yangpela yet?

2. Bikpela save ol man bilong saiens i bin kisim long nau em i helpim ol man o olsem wanem?

3. Yumi mas bilip long husat, olsem Baibel i tok?

4. Kolim ol bikpela pasin bilong Jehova. Olsem wanem ol dispela pasin i olsem gutpela as na yumi ken bilip tru long Jehova?

5. Baibel i stori long wanem ol samting God i bin mekim na yumi ken bilip tru long Em?

6. Jehova i bin mekim wanem long taim bilong yumi na dispela i strongim yumi long bilip tru long em na wetim em i helpim yumi?

7. Bilong wanem wanpela man i tok em i wanpela “Arere Witnes”?

8. Man i mas i gat wanem kain pasin na bai em i laik insait tru long wok bilong Jehova?

9, 10. (a) Wanem samting i mas kamap pastaim na bai man inap bilip long Jehova? Ol man i gat gutpela bel ol i mekim wanem? (b) Ol dispela man i save bilip tru long husat?

11. Sapos man i bilip tru long Jehova, dispela bai kirapim em long bihainim wanem tok bilong aposel Pita?

12. Ol misin ol i kolim Kristen, planti taim ol i tok wanem long “mekim tok promis”?

13. Man i dediket long God, i olsem em i mekim wanem?

14. Bilong wanem Jehova i no ken orait long man i tok promis tasol long mekim wok bilong em?

15. Jisas i mekim wanem na em i autim bilip bilong em long ai bilong ol man?

16. Jisas i givim wanem tok long ol disaipel bilong em long baptais? Olsem wanem yumi save ol i bin bihainim dispela tok bilong em?

17. Pasin bilong tromoi liklik wara long skin bilong man, bilong wanem dispela i no baptais tru?

18. Bilong wanem baptais i makim stret olsem man i dediket long God?

19. I gat wanem samting moa na yumi mas kisim baptais?

20. Bilong wanem ol bebi i no inap kisim baptais?

21. I stret ol yangpela i ken baptais o nogat?

22. Sapos papamama i lainim gut pikinini long bihainim ol pasin Kristen, bai pikinini i mekim wanem?

23. Taim man i dediket na baptais pinis, em i mas mekim wanem samting moa?

[Piksa long pes 14]

Yumi ken bilip tru long Jehova, em i Man bilong kisim bek yumi