‘Ol i Autim Tok Bilong God na Ol i No Pret’

GOD JEHOVA inap givim strong long ol wokboi bilong em bambai ‘ol i autim tok bilong God na ol i no pret.’ (Aposel 4:31) Ol nupela man i no bin bihainim tok i tru bilong Baibel longtaim na ol i no save gut long pasin bilong autim tok, God inap strongim ol tu na bai ol i no surik na pret long autim tok. Long Aivori Kos, tupela man bilong autim gutnius i go long haus bilong ol man na ol i bungim wanpela profesa bilong yunivesiti. Seriki em i yangpela bilong dispela tupela Witnes na em i pilim olsem em i no save tumas long pasin bilong toktok wantaim wanpela bikpela saveman olsem; em i larim narapela Witnes i mekim ol tok.

Profesa i tingting planti long pasin bilong narapela lain i tingting nogut long ol narapela lain na em i ting God i gat asua long ol hevi i save kamap namel long ol manmeri bilong narapela narapela lain na skin, long wanem God i bin wokim ol man i gat kain kain skin. Witnes i toktok wantaim profesa inap longtaim liklik, tasol i olsem ol tok bilong em i lus nating tasol. Nau Seriki i kirap strongim bel bilong em na em i toktok. (1 Tesalonaika 2:⁠2) Seriki i lukim olsem profesa i bin bilasim haus bilong em long kain kain naispela kala na em i askim profesa olsem: “Bilong wanem yu no laik bilasim haus bilong yu long wanpela kala tasol?”

Profesa i tok: “Nogut yu ting mi kranki!” Seriki i tok: “Nogat. Tasol bilong wanem yu ting God i mas wokim olgeta samting na olgeta man i wanpela kala tasol?” Seriki i mekim gutpela tok piksa, maski pastaim em i pret long autim tok, na profesa i pilim tru tok bilong em na kisim gut as bilong en.