Yu Ting Sampela Tok Bilong Baibel i Pait Long Narapela?

WANPELA man (Henry Van Dyke) i stori long Baibel na i tok: ‘Em i kamap long hap bilong Is, na ol stori na rait bilong en i olsem bilong ol man long hap bilong Is. Em i go long planti hap bilong graun. Em i kamap long planti handet tok ples. Ol pikinini i putim yau long ol stori bilong en na ol i amamas, na ol saveman i tingim ol dispela stori i helpim sindaun bilong man. Ol man nogut na ol man i gat pasin antap, ol i pret long ol strongpela tok bilong Baibel, tasol ol man i gat bikpela bel hevi ol i pilim olsem tok bilong Baibel i gutpela samting tru. Sapos man i gat Baibel bilong em yet, em i no stap olsem rabisman na em i no stap olsem wanpis.’

Ol i bin tanim sampela hap bilong Baibel long 1,970 samting tok ples. Planti milion manmeri i ting Baibel i olsem wanpela presen i kam long God, na ol i amamas long kaunim bambai tok bilong en i helpim ol. Tasol sampela i ting, sampela tok bilong Baibel i pait long narapela, olsem na yumi no ken bilipim tok bilong en. Tasol sapos yumi skelim gut dispela samting, bai yumi kisim wanem save?

God i bin kirapim ol bilipman long raitim tok bilong Baibel. Taim yumi skelim gut tok bilong Baibel yumi save, inap olsem 40 man i bin raitim tok bilong Baibel insait long 1,600 yia. Sampela bilong ol i man bilong lukautim sipsip, kisim pis, kisim takis, mekim wok dokta, wokim haus sel, pris, profet, king. Planti taim ol i save stori long sampela man na sampela pasin em yumi no save long en long nau. Na planti taim, ol dispela man bilong raitim Baibel ol tu i no save long insait bilong ol tok ol i raitim. (Daniel 12:​8-10) Olsem na taim yumi kaunim Baibel, yumi no ken kirap nogut sapos sampela tok i hatwok long save long en.

Olsem wanem? Yumi inap kisim save long ol dispela tok? Tru sampela tok bilong Baibel i pait long narapela? Bilong save long dispela samting, yumi ken lukim sampela tok bilong Baibel em ol man i ting em i pait long narapela tok bilong Baibel.

Tru Ol Dispela Tok i Pait Wantaim?

▪ Kein i kisim we meri bilong em? (Stat 4:17)

Ating sampela man i ting, taim Kein i kilim i dai Abel, Kein wantaim Adam na Iv tasol i stap. Tasol Adam na Iv i gat planti pikinini. Stat 5:3, 4 i tok Adam i gat wanpela pikinini man, nem bilong em Set. Baibel i tok: “Adam i . . . kamap papa bilong . . . Set. Adam i stap 800 yia moa na em i gat ol arapela pikinini man na meri tu.” Olsem na Kein i maritim susa bilong em, o pikinini meri bilong wanpela brata o susa bilong em. Bipo skin bilong ol man i gutpela, tasol nau nogat, olsem na sapos ol wanblut i marit na kamapim pikinini, inap skin bilong pikinini i kamap nogut.

▪ Husat i baim Josep i go long Isip?

Stat 37:27 i tok ol brata bilong Josep i baim em i go long ol Ismael. Tasol ves 28 i tok: “Sampela bisnisman bilong Midian i kam lukim Josep i stap long hul. Na ol [brata bilong Josep] i pulim em i kam antap, na salim em long ol Ismael olsem wokboi nating. Ol Ismael i givim 20 mani silva long ol Midian, na ol i kisim Josep i go long Isip.” Ol i baim Josep i go long ol Midian o ol Ismael? Ating Ismael em i narapela nem bilong ol Midian, long wanem Abraham em i tumbuna bilong ol. O ating ol Midian i wokabaut wantaim ol Ismael. Tasol yumi ken save, ol brata bilong Josep i bin salim em, long wanem bihain Josep i tokim ol: “Mi brata bilong yupela. Bipo yupela i bin larim ol bisnisman i baim mi . . . na ol i bringim mi i kam long Isip.”​—⁠Stat 45:⁠4.

▪ Hamas Israel i dai taim ol i bin mekim pasin pamuk wantaim ol meri Moap na lotuim god Bal bilong Peor?

Namba 25:9 i tok: “Bikpela i bin mekim wanpela sik nogut i kamap long ol Israel [long wanem ol i bin mekim pasin nogut] na bagarapim 24,000 manmeri na ol i dai.” Tasol aposel Pol i tok: “Yumi no ken mekim pasin pamuk, olsem sampela bilong ol [lain Israel i stap long ples nating] i bin mekim, na long wanpela de tasol 23,000 bilong ol i bin lus.” (1 Korin 10:⁠8) Planti manmeri i dai, winim 23,000 i go inap 24,000, olsem na i no gat rong long tok 23,000 i dai na i no gat rong long tok 24,000 i dai. Tasol buk Namba i tok “olgeta hetman” bilong lain Israel em ol i bin mekim rong, ol hetman olsem jas i bin kilim ol i dai. (Namba 25:​4, 5) Ating inap olsem 1,000 hetman i bin mekim rong, na taim yumi bungim dispela lain wantaim 23,000 em Pol i stori long en, em i kamap olsem 24,000. Jehova i bin kilim i dai 23,000 long dispela sik nogut, tasol inap olsem 24,000 i dai, long wanem Jehova yet i tok long kilim i dai ol man i bin mekim rong.​—⁠Lo 4:⁠3.

▪ Agak i stap long taim bilong King Sol, olsem na ating Balam i popaia taim em i kolim nem Agak long king bilong ol Amalek?

Long yia 1473 samting paslain long Krais, Balam i tok wanpela king bilong Israel bai daunim “King Agak.” (Namba 24:⁠7) I no gat narapela stori bilong Agak inap long taim bilong King Sol (yia 1117-1078 paslain long Krais). (1 Samuel 15:⁠8) Tasol Balam i no popaia long kolim nem Agak, long wanem ating dispela nem Agak em i wanpela biknem bilong king, kain olsem nem Fero long Isip. Na ating em wanpela nem tru ol king bilong ol Amalek i bin mekim wok long en.

▪ Husat i kirapim Devit long kaunim ol Israel?

Long 2 Samuel 24:​1, Baibel i tok: “Wanpela taim moa Bikpela i kros long ol Israel, na em i givim tingting [wanpela i givim tingting] long Devit bilong Devit i ken bringim hevi long ol. Bikpela i tokim Devit olsem, ‘Yu go kaunim ol man bilong Israel na Juda.’ ” Tasol Jehova i no bin kirapim King Devit long mekim rong, long wanem 1 Stori 21:1 i tok: “Satan i laik givim hevi long ol Israel, olsem na em i givim tingting long Devit long kaunim ol manmeri bilong Israel.” God i kros long ol Israel, na em i larim Satan i givim dispela hevi long ol. Olsem na taim yumi kaunim tok bilong 2 Samuel 24:1 yumi ting olsem God yet i bin givim dispela hevi long lain Israel.

▪ Taim Devit i kaunim ol manmeri bilong Israel na Juda, olsem wanem na Baibel i kolim narapela narapela namba bilong ol?

Long 2 Samuel 24:9 Baibel i tok i gat 800,000 Israel na 500,000 Juda, tasol 1 Stori 21:5 i tok Israel i gat 1,100,000 ol inap mekim wok soldia, na Juda i gat 470,000. Inap olsem 288,000 man i mekim wok soldia, na ol i bruk long 12-pela lain, na olgeta wan wan lain inap 24,000 i mekim wok soldia inap wanpela mun insait long yia. Na i gat 12,000 man moa, em ol i helpim 12-pela hetman bilong Israel. Sapos yumi bungim dispela tupela lain wantaim, em inap olsem 300,000. Ating 1 Stori 21:5 i bungim dispela lain 300,000 wantaim ol narapela i putim pinis nem bilong ol na i kamap 1,100,000, tasol long 2 Samuel 24:9 ol i no mekim olsem. (Namba 1:16; Lo 1:15; 1 Stori 27:​1-22) Stori bilong ol Juda long 2 Samuel 24:9 i bungim 30,000 soldia bilong was em ol i stap long boda bilong ol Filistia, wantaim ol narapela Juda. Tasol ol i no bungim dispela namba long 1 Stori 21:⁠5. (2 Samuel 6:⁠1) Tupela man i bin raitim dispela tupela hap bilong Baibel, na ol i gat narapela narapela tingting na ol i laik kamapim narapela narapela bikpela tok, olsem na yumi ken save bilong wanem namba bilong Israel na Juda i narapela narapela kain.

▪ Husat i papa bilong Sealtiel?

Sampela hap bilong Baibel i tok Jekonia (King Jehoiakin) em i papa tru bilong Sealtiel. (1 Stori 3:​16-18; Matyu 1:12) Tasol Luk i tok, “Sealtiel em i pikinini bilong Neri.” (Luk 3:27) Ating Neri i givim pikinini meri bilong em long Sealtiel bilong kamap meri bilong em. Na ol Hibru i save kolim man bilong pikinini meri bilong ol olsem pikinini man bilong ol, olsem na long lista bilong tumbuna bilong ol, Luk inap tok olsem Sealtiel em i pikinini bilong Neri. Na Luk i tok Josep em i pikinini bilong Heli, tasol Heli em i papa bilong meri bilong Josep, em Maria.​—⁠Luk 3:23.

Skelim Gut Ol Toki Stori Long Jisas

▪ Jisas i rausim ol spirit nogut long hamas man na nau ol dispela spirit nogut i go insait long wanpela bikpela lain pik?

Matyu i tok Jisas i mekim olsem long tupela man, tasol Mak na Luk i stori long wanpela man tasol. (Matyu 8:28; Mak 5:2; Luk 8:⁠27) Ating Mak na Luk i stori long wanpela man tasol, long wanem Jisas i bin toktok long em. Ating dispela man i wel moa yet, o ol spirit nogut i bin bosim em longtaim. Ating bihain, dispela wanpela man tasol i laik bihainim Jisas. (Mak 5:​18-20) Na Matyu i stori long tupela aipas em Jisas i mekim orait ai bilong ol, tasol Mak na Luk i stori long wanpela aipas tasol. (Matyu 20:​29-34; Mak 10:46; Luk 18:35) Tok bilong ol i no pait, long wanem yumi save, i gat wanpela aipas i bin i kam long Jisas.

▪ Long de Jisas i dai, em i pasim klos i gat wanem kala?

Long Mak 15:17 na Jon 19:⁠2 long sampela Baibel, Baibel i tok, ol soldia i putim wanpela laplap long Jisas em kala pepel. Tasol long Matyu 27:​28, Baibel i tok ol soldia i putim wanpela “retpela klos” long Jisas. Tasol bilong wokim kala pepel, ol i mas tanim kala ret na blu wantaim, olsem na tok bilong Mak na Jon i stret. Taim lait i sutim dispela klos, ating ol man inap lukim dispela klos i narapela narapela kala, na Matyu na Mak na Luk i lukim dispela laplap bilong Jisas, o ol i bin toktok wantaim sampela man i bin lukim dispela laplap, na ol i raitim dispela kala ol yet i ting i stret. Tok bilong ol i stret, maski i narapela kain liklik, olsem na yumi save ol i no bin pasim tok wantaim na raitim tok bilong ol.

▪ Husat i karim diwai pos bilong Jisas?

Jon (19:17) i tok: “Jisas . . . i karim diwai [pos] bilong en, na em i lusim taun na i go long wanpela hap graun ol i kolim Bun Bilong Het.” Tasol Matyu (27:32) na Mak (15:21) na Luk (23:26) i tok, ‘ol soldia i kisim Saimon bilong taun Sairini na mekim em i karim diwai pos bilong Jisas.’ Jisas i karim diwai pos bilong em olsem Jon i tok. Jon i no stori long olgeta samting i bin kamap, olsem na em i no stori olsem bihain ol i bin subim Saimon long karim diwai pos bilong Jisas. Olsem na tok bilong Matyu Mak Luk na Jon i stret; tok bilong ol i no pait.

▪ Judas Iskariot i dai olsem wanem?

Matyu 27:5 i tok Judas i hangamapim em yet na em i dai, tasol Aposel 1:18 i tok “em i pundaun long dispela graun na bel bilong en i bruk.” Matyu i stori long ol samting Judas i bin mekim bilong kilim i dai em yet, tasol long hap bilong Aposel, Baibel i stori long ol samting i bin kamap. Ating Judas i bin pasim rop long han bilong diwai na bihain em i pasim dispela rop long nek bilong em yet na em i kalap i go daun long arere bilong maunten bambai em inap hangamapim em yet. Tasol ating rop yet o han bilong diwai i bruk, na skin bilong em i go pundaun long ol ston na i bruk olgeta.

Bai Yu Kisim Wanem Kain Tingting?

Sapos yumi ting sampela tok bilong Baibel i pait long narapela tok bilong Baibel, gutpela sapos yumi save olsem, sampela taim ol man i mekim wanpela tok na i olsem em i pait long narapela tok bilong en, tasol yumi inap save long tok bilong en. Olsem: Wanpela bisnisman bai tokim seketeri bilong em long raitim pas. Tasol sapos yu askim em, husat i raitim dispela pas, em bai tok em yet i bin raitim. Tasol seketeri bilong em i bin raitim long taipraita na salim i go, olsem na seketeri inap tok olsem em yet i bin raitim dispela pas. Na i wankain tu long tok bilong Matyu na Luk. Matyu (8:⁠5) i tok wanpela kepten bilong soldia i kam askim Jisas long helpim em, tasol Luk (7:​2, 3) i tok kepten bilong soldia i salim ol hetman i go long Jisas.

Ol tok yumi lukim pinis i helpim yumi long save, sapos man i ting wanpela tok bilong Baibel i pait long narapela tok bilong en, em inap kisim stretpela tingting long dispela tok. Olsem na gutpela sapos yumi kisim stretpela tingting long ol tok bilong Baibel. Ol i bin wokim wanpela Baibel long 1876, na i gat rait olsem long en:

‘Sapos yu ting wanpela tok bilong Baibel i pait wantaim narapela tok bilong en, gutpela sapos yu rausim dispela kain tingting, na maski yu no save gut long ol tok bilong Baibel, yu mas holimpas tok i tru. Sampela disaipel i bel hevi long wanpela tok bilong Jisas, na ol i lusim em. Tasol yumi mas bihainim pasin bilong ol aposel i bin tok: “Bikpela, bai mipela i go long husat? Tok bilong yu tasol i save givim laip i stap gut oltaim oltaim. Na mipela i bilip, na i save gut olsem, yu dispela gutpela stretpela man God i bin makim bilong em yet.” Taim yumi lukim sampela tok i tru na yumi ting em i pait long narapela tok i tru, yumi mas painim rot bambai dispela tupela tok inap stret wantaim.’​—⁠Jon 6:​60-69.

Bai yu bihainim dispela kain tingting? Yumi skelim pinis sampela tok bilong Baibel bilong save olsem tok bilong Baibel i no pait, olsem na gutpela sapos yu kisim wankain tingting olsem i stap long Buk Song 119:160: “As bilong lo bilong yu em i tok tru tasol.” Ol Witnes Bilong Jehova i kisim dispela tingting long olgeta tok bilong Baibel, na ol bai amamas long tokim yu bilong wanem ol i bilipim ol tok bilong Baibel. Gutpela sapos yu toktok wantaim ol long ol tok bilong Baibel. Ol gutpela tok bilong en bai helpim yu long wetim gutpela samting bai kamap bihain na bai yu inap i stap amamas.

[Piksa long pes 7]

Olsem wanem? Yu bin askim ol Witnes Bilong Jehova, bilong wanem ol i bilip long tok bilong Baibel?