-
Rot Bilong Wokim Ol Gutpela DisisenStap Amamas Oltaim!—Stadi Long Baibel
-
-
5. Rispektim maus bilong bel bilong ol narapela
Olgeta man wan wan bai wokim ol narapela narapela disisen. Olsem wanem yumi ken soim rispek long maus bilong bel bilong ol narapela? Skelim dispela tupela samting:
Namba 1: Wanpela sista i save werim trausis long ol bung o long taim em i save mekim ol wok bilong em, i muv i go long wanpela kongrigesen we planti sista bel bilong ol i gat tok taim ol i lukim ol narapela i werim trausis.
Ritim Rom 15:1 na 1 Korin 10:23, 24, na stori long ol dispela askim:
Olsem tok bilong dispela tupela skripsa i kamapim, ating dispela sista bai wokim wanem disisen? Yu bai mekim wanem sapos yu stap wantaim wanpela em maus bilong bel bilong em i gat tok long wanpela samting em maus bilong bel bilong yu i no gat tok long en?
Namba 2: Wanpela brata i save olsem Baibel i no tambuim pasin bilong dring liklik alkohol, tasol em i wokim disisen olsem em bai i no inap dring alkohol. Sampela i singautim em i go long wanpela bung we em i lukim ol brata i dring alkohol.
Ritim Eklisiastis 7:16 na Rom 14:1, 10, na stori long ol dispela askim:
Olsem tok bilong dispela tupela skripsa i kamapim, ating dispela brata bai wokim wanem disisen? Yu bai mekim wanem sapos yu lukim wanpela i mekim samting em maus bilong bel bilong yu i no orait long yu mekim?
Wanem ol samting inap helpim yu long wokim ol gutpela disisen?
1. Askim Jehova long helpim yu long wokim disisen long samting yu bai mekim.—Jems 1:5.
2. Mekim wok painimaut long Baibel na ol buk na nius bilong Baibel bilong painim ol stiatok i stret long dispela samting. Yu ken kisim tu tingting bilong ol strongpela Kristen.
3. Skelim ol samting em disisen bilong yu bai mekim long maus bilong bel bilong yu na bilong ol narapela.
-
-
Hau Bai Famili Bilong Yu Inap Stap Amamas?—Hap 1Stap Amamas Oltaim!—Stadi Long Baibel
-
-
6. Yupela inap stretim ol hevi i kamap insait long marit bilong yupela
I no gat wanpela marit i gutpela olgeta. Olsem na tupela marit i mas wok wantaim long stretim ol hevi i kamap insait long marit bilong ol. Pilaim VIDIO, na stori long ol dispela askim.
Long vidio, wanem sampela mak i soim olsem tupela marit i no moa pas gut wantaim?
Ol i mekim wanem ol samting bilong strongim marit bilong ol?
Ritim 1 Korin 10:24 na Kolosi 3:13. Bihain long yupela ritim wan wan skripsa pinis, stori long dispela askim:
Taim ol marit i bihainim dispela tok, hau bai dispela i ken strongim marit bilong ol?
Baibel i tok olsem yumi mas givim ona long narapela narapela. Pasin bilong givim ona i makim olsem yumi mas mekim gutpela pasin na soim rispek long narapela. Ritim Rom 12:10, na stori long ol dispela askim:
Yu ting ol man o meri marit i mas wet long poroman marit bilong ol i givim ona long em pastaim? Wai na yu ting olsem?, o wai na yu ting nogat?
-
-
Wai na Klos na Bilas Bilong Yumi i Bikpela Samting?Stap Amamas Oltaim!—Stadi Long Baibel
-
-
Yumi olgeta i gat laik long wanem kain klos yumi bai werim na hau yumi bai bilas. Taim yumi bihainim ol stiatok bilong Baibel, yumi bai i no tingim laik bilong yumi yet tasol, nogat, yumi bai laik tu long amamasim Jehova. Yumi ken skelim sampela bilong ol dispela stiatok.
1. Wanem ol stiatok i mas stiaim yumi long makim klos na bilas bilong yumi?
Yumi mas “bilas gut na mekim long pasin i soim rispek na gutpela tingting,” na oltaim yumi stap klin na bai ol narapela i lukim pasin bilong yumi long “lotuim God.” (1 Timoti 2:9, 10) Skelim dispela 4-pela stiatok: (1) Yumi mas “bilas gut.” Olsem yu lukim long ol miting bilong kongrigesen, lain bilong Jehova i gat narapela narapela bilas, tasol klos mipela i werim na stail bilong gras bilong mipela i soim rispek long God mipela i lotuim. (2) Taim yumi bilas na werim ol klos “long pasin i soim rispek,” dispela i makim olsem yumi no werim klos we i kirapim bel bilong ol narapela long kisim tingting nogut, o pulim ai bilong ol. (3) Yumi soim olsem yumi gat “gutpela tingting” taim yumi no bihainim olgeta kain kain nupela stail bilong klos na kain kain bilas. (4) Oltaim klos na bilas bilong yumi i mas kamapim olsem yumi “lotuim God,” so ol narapela bai save yumi lotuim God tru.—1 Korin 10:31.
2. Bilas bilong yumi inap mekim wanem long ol wanbilip bilong yumi?
Tru, yumi stap fri long makim wanem kain klos yumi laik werim, tasol yumi mas tingim olsem bilas bilong yumi inap mekim wanem long ol narapela. Yumi traim bes long no ken mekim wanpela i bel hevi, olsem na yumi “mekim ol gutpela samting i amamasim ol arapela na i helpim ol long kamap strong.”—Ritim Rom 15:1, 2.
3. Olsem wanem klos na bilas bilong yumi inap pulim ol narapela i kam long lotu i tru?
Tru, yumi save bilas gut long olgeta taim, tasol yumi mas tingim gut moa yet klos na bilas bilong yumi taim yumi go long ol miting bilong kongrigesen na long autim tok. Yumi no laik bai bilas bilong yumi i pulim ai bilong ol man na ol i no putim yau long gutnius yumi autim, nogat. Yumi laik bai bilas bilong yumi i kirapim laik bilong ol narapela long kisim save long tok i tru na i “litimapim tok bilong Seivia bilong yumi.”—Taitus 2:10.
KISIM SAMPELA SAVE MOA
Skelim ol samting yumi mas mekim na bai klos na wei bilong yumi long bilas inap helpim ol narapela long luksave olsem yumi Kristen.
Klos na bilas bilong yumi inap soim olsem yumi rispektim ol man i gat bikpela namba o nogat. Tru, Jehova i lukim bel bilong yumi, tasol klos na bilas bilong yumi i mas soim olsem yumi rispek long em
4. Taim yumi bilas gut yumi soim rispek long Jehova
Wanem nambawan bikpela risen na yumi mas tingim gut klos na bilas bilong yumi? Ritim Buk Song 47:2, na stori long ol dispela askim:
Yumi lain bilong Jehova, olsem na dispela i mas mekim wanem long pasin bilong yumi long bilas?
Yu ting i stret yumi mas tingim gut bilas bilong yumi taim yumi go long ol miting na taim yumi autim tok? Wai na yu ting olsem, o wai na yu ting nogat?
5. Rot bilong makim gut klos na bilas bilong yumi
Maski klos bilong yumi i gat bikpela pe o liklik pe tasol, ol i mas klin na i stret long ol samting yumi mekim. Ritim 1 Korin 10:24 na 1 Timoti 2:9, 10. Na stori long wai na yumi laik abrusim pasin bilong werim ol klos we i . . .
bruk bruk na i doti, na i no stret long werim
tait tumas long skin, i no karamapim gut bodi, o i kirapim ol narapela long kisim tingting nogut
Tru, ol Kristen i no stap aninit long Lo Bilong Moses, tasol dispela lo i kamapim tingting bilong Jehova. Ritim Lo 22:5, na stori long dispela askim:
Wai na yumi no ken werim ol klos na bilas we i mekim man i luk olsem meri na meri i luk olsem man?
Ritim 1 Korin 10:32, 33 na 1 Jon 2:15, 16, na stori long ol dispela askim:
Wai na yumi mas tingim gut bilas bilong yumi na bai yumi no bagarapim bel bilong sampela long komiuniti o long kongrigesen?
Ol lain long hap yu stap long en i save werim wanem kain stail bilong klos na bilas?
Yu ting sampela bilong ol dispela kain stail i no stret long Kristen i werim? Wai na yu ting olsem, o wai na yu ting nogat?
Yumi inap werim klos na bilas long kain kain wei na amamasim yet Jehova
SAMPELA MAN I TOK: “Mi gat rait long werim wanem kain klos mi laikim.”
Yu wanbel long dispela tingting? Wai na yu ting olsem, o wai na yu ting nogat?
OL BIKPELA POIN
Taim yumi mekim ol gutpela disisen long klos na bilas bilong yumi, yumi soim olsem yumi rispek long Jehova na long ol narapela.
Riviu
Wai na klos na bilas bilong yumi i bikpela samting long ai bilong Jehova?
Wanem sampela stiatok inap stiaim yumi long mekim ol disisen long ol klos na bilas bilong yumi?
Klos na bilas bilong yumi inap givim wanem tingting long ol narapela long lotu i tru?
MEKIM WOK PAINIMAUT
Skelim olsem klos bilong yu bai givim wanem tingting long ol narapela.
Kisim save long wai na i gutpela long tingting gut paslain long yu kisim tatu.
Skelim sampela moa stiatok we inap stiaim yumi long ol disisen yumi mekim.
“Bilas Bilong Yu i Givim Glori Long God?” (Wastaua, Septemba 2016)
Olsem wanem wanpela meri i kisim stretpela tingting long disisen bilong ol narapela long klos na bilas bilong ol?
“Dress and Grooming Was My Stumbling Block” (Awake!, December 22, 2003)
-