Yu Lukim Wanem Samting Long Glas?

LUKIM skin bilong yu long glas. Yu lukim wanem samting? Sampela taim bai yu lukim samting i kranki na bai yu stretim kwik, nogut ol narapela i lukim.

Baibel i kain olsem glas bilong lukim pes. Em inap helpim yumi long lukim gut yumi yet na kisim stretpela tingting long pasin bilong yumi, nogut yumi ting pasin bilong yumi i gutpela tumas​—⁠o i nogut tumas​—⁠long ai bilong God. (Matyu 10:​29-31; Rom 12:⁠3) Na Baibel inap helpim yumi long lukim sampela tok o pasin o tingting bilong yumi i kranki na yumi mas stretim. Sapos olsem, bai yu givim baksait long samting yu lukim?

Jems, em wanpela man bilong raitim Baibel, em i tok: “Sapos wanpela man i harim nating tok bilong God, na em i no bihainim, em i olsem man i lukim pes bilong en long glas. Em i lukim pes bilong em yet, tasol em i go na kwiktaim em i lusim tingting long em i gat wanem kain pes.”​—⁠Jems 1:​23, 24.

Tasol Jems i stori long narapela man em i ‘glasim gut dispela lo i mekim yumi i stap fri na i stret olgeta na em i bihainim tru tok bilong en.’ (Jems 1:25) Hap tok Grik ol i tanim olsem “glasim” i makim man i lindaun na i lukluk long samting. Wanpela dikseneri i tok: “Em i no pasin bilong lukluk kwik long wanpela samting.” (Theological Dictionary of the New Testament) Dispela tok i makim pasin bilong painim painim samting i hait. Wanpela man bilong kamapim as bilong ol tok bilong Baibel (R. V. G. Tasker) em i tok: “I olsem i gat wanpela bikpela samting man i laik lukim, maski i hatwok long em i lukim na kisim kwik save long en.”

Bai yu skelim gut pasin bilong yu long glas, em Baibel, na mekim ol samting Baibel i tok yu mas mekim? Jems i tok moa olsem: “Sapos wanpela man i glasim gut dispela lo na i bihainim tru tok bilong en, orait God bai i mekim olgeta wok bilong dispela man i kamap gutpela tru. Tasol em i no ken harim nating na lusim tingting hariap.”​—⁠Jems 1:25.