Jubili Bilong Jehova—Em Taim Bilong Yumi Ken Amamas

“Yupela i mas mekim namba 50 yia i kamap holi, na yupela i mas telimautim tok long olgeta manmeri i stap long dispela graun, olsem: ‘Yupela kalabusman i ken lusim kalabus.’ Dispela yia em i yia Jubili bilong yupela, . . . Em i mas kamap samting holi bilong yupela. . . . Na bai yupela i stap gutpela long dispela graun.”—LEVITIKAS 25:10-12, 18, NW.

PLANTI man i save long stori bilong wanpela belo long Filadelfia long hap bilong Pensilvenia long Amerika, ol i kolim Belo Bilong Kamap Fri. Wanpela buk (The World Book Encyclopedia) i tok, long Julai 8, long yia 1776, ol i mekim dispela belo i krai wantaim ol belo bilong misin, bilong makim olsem Amerika i kisim indipendens. Na ol i kisim wanpela hap tok bilong Baibel long Levitikas 25:10 (NW ) na ol i raitim long dispela belo, olsem: “Yupela kalabusman i ken lusim kalabus.”

2. Yu ting olsem wanem long kamap fri? Tasol i gat wanem sampela hevi bilong dispela?

² Ol man i no laik i stap kalabus. Ol i laik i stap fri, a? Ating yu tu. Sapos yu stap aninit long sampela tok gavman o lo nogut o hatpela lo bilong politik, o sapos yu lapun o sik i bagarapim yu na dai bai painim yu, ating bai yu amamas sapos yu ken aut long ol dispela samting, a? Rot i op nau na ol dispela hevi bai tekewe long yumi. Tasol ating bai yu tok, Olsem wanem yumi ken tok olsem? Long wanem i no gat wanpela gavman i bin pinisim ol dispela hevi na helpim yumi long i stap fri. Ol man bilong saiens na ol dokta ol i no inap daunim sik, o mekim sampela samting bambai yu no ken i go lapun na dai. Tasol i gat as na bai yu ken amamas long kamap fri. Bilong yu ken save gut long dispela, yu ken skelim bikpela samting i bin kamap bipo. Dispela em i samting bilong yu tu—long nau na long bihain.

3. Jubili em i wanem samting? Wanem samting i bin kamap long dispela taim?

³ Dispela tok bilong Baibel yumi kolim pinis hia, sampela hap moa bilong en i kolim wanpela tok, olsem: “Jubili.” Bipo Jubili i olsem wanpela hap taim inap wanpela yia, na i kain olsem yia Sabat, na i bilong givim malolo long graun bilong Isrel. Ol Isrel i save makim olgeta namba 7 yia i olsem yia Sabat bilong graun bilong ol. Taim 7-pela yia Sabat i go pinis, em inap olsem 49 yia olgeta, nau yia Sabat bilong Jubili i kamap, em namba 50 yia. Ol dispela yia Sabat i bilong givim malolo long graun em Jehova i bin givim long lain bilong em, na i truim tok promis Jehova i bin mekim long Ebraham, em tumbuna bilong ol, na em ‘pren bilong Jehova.’ (Jems 2:23; Aisaia 41:8) Long taim bilong Jubili, ol man i bin wok kalabus ol i ken lusim wok kalabus na ol i ken fri. Sampela Isrel i bin i gat dinau na i no inap bekim, olsem na ol i mas wok kalabus long dispela man ol i bin dinau long em, na long taim bilong Jubili ol i kamap fri. Na bipo ol Isrel i bin skelim hap graun i go long ol wan wan Isrel, tasol hevi i bin painim sampela, long wanem ating ol i kamap rabis samting, olsem na ol i baim graun bilong ol i go long narapela man, na long taim bilong Jubili ol i ken kisim bek dispela graun bilong ol.—Levitikas 25:1-54.

4. Wanem taim ol i mas putim toksave bilong Jubili? Ol i mekim olsem wanem?

⁴ Em nau, yu kisim save pinis long ol gutpela samting i bin kamap long taim bilong Jubili, olsem na nau yu ken save, i gat as tru na ol i kolim olsem taim bilong amamas. Taim dispela yia bilong Jubili i laik kirap, ol i putim toksave bilong en na ol i mas winim biugel long De Bilong Tekewe Sin. Olsem Moses i bin tok long Levitikas 25:9, 10 (NW ): “Biugel i gat strongpela krai bilong en, yu mas winim strong long namba 7 mun, long namba 10 de bilong mun; long de bilong tekewe sin yupela i mas kirapim krai bilong biugel long olgeta hap graun bilong yupela. Yupela i mas mekim namba 50 yia i kamap holi, na yupela i mas telimautim tok long olgeta manmeri i stap long dispela graun, olsem: ‘Yupela kalabusman i ken lusim kalabus.’ Dispela yia em i yia Jubili bilong yupela, na olgeta wan wan i mas go bek long graun bilong em yet na long lain bilong em yet.” Long yia 1473 B.C.E. Josua i bringim lain Isrel na ol i brukim wara Jodan na i go insait long Graun Bilong Promis, na long dispela hap ol i mas mekim Jubili.

Em i Tokaut long Namba Wan Samting Ol i Kamap Fri long En

⁵ Tasol yu harim dispela stori bilong Jubili na yu ting dispela em i stori bilong ol samting ol i mekim pinis long bipo tasol, na em i no samting bilong yumi ol man bilong nau, na yumi no bilong lain Juda tu. Tasol Jisas Krais i bin mekim sampela samting na yumi save, yumi inap wetim tru wanpela bikpela Taim Bilong Amamas i kamap, olsem Jubili. Long dispela as yumi inap amamas tru long pasin bilong kamap fri. Tasol bilong kisim gut tingting long dispela samting, yumi mas save long ol samting Jisas i bin mekim bambai ol man long taim bilong em ol i ken kamap fri long tupela samting. Orait, bihain bai yumi stori long olsem wanem dispela i makim tupela kain pasin bilong kamap fri long taim bilong yumi yet, em i winim tru dispela samting bilong bipo. Olsem na i gat as tru bilong yumi ken amamas tru, na dispela amamas bilong yumi i bikpela moa.

6, 7. (a) Aisaia 61:1-7 i tok profet long wanem ol gutpela samting tru bai kamap? (b) Jisas i tok wanem na yumi save, em i truim dispela tok profet bilong Aisaia?

⁶ I gat wanpela tok profet long Baibel i no toktok tru long wanpela yia Jubili bilong bipo, tasol em i makim wanpela kain Jubili o taim bilong kamap fri long bihain. Dispela tok i stap long Aisaia 61:1-7, em i tok: “Spirit bilong Nambawan Bikpela Jehova i stap long mi. Long wanem em i makim mi bilong autim gutpela tok long ol man i gat pasin daun. Em i salim mi na mi kam bilong oraitim bel bilong ol man ol i bel hevi, na bilong autim tok olsem: ‘Yupela kalabusman Yupela i ken lusim kalabus i go. Yupela kalabusman i aipas yupela i ken lukluk gen’; bilong autim tok long gutpela taim bilong Jehova, wantaim de bilong God bilong yumi bilong bekim pe nogut; na bilong mekim gut bel bilong ol man i krai. . . . Bai ol i amamas inap long taim bihain bihain.” Tasol truim bilong dispela tok profet bai kamap olsem wanem, na em bai kamap long wanem taim?

⁷ Taim Jisas i wokim pinis kaikai bilong Pasova long yia 30 C.E., em i go insait long wanpela haus lotu long de Sabat. Nau em i kaunim hap tok profet bilong Aisaia na em i putim dispela tok profet i go long em yet, olsem em yet i truim dispela tok. Hap tok bilong Luk 4:16-21 i tok: “Em i opim buk, na em i painim rait i tok olsem: ‘Spirit bilong Bikpela [Jehova] i stap long mi. Em i makim mi bilong telimautim gutnius long ol rabisman. Em i salim mi na mi kam bilong telimautim tok olsem: “Yupela kalabusman i ken lusim kalabus na i go. Yupela man i aipas, yupela i ken lukluk gen.” Em i salim mi na mi kam bilong brukim kalabus bilong ol man i bagarap tru long wok kalabus, na bilong telimautim tok bilong gutpela taim bilong Bikpela [Jehova].’․․․ Orait, em i stat na i tokim ol, ‘Tude dispela rait bilong God em i kamap tru.’”

8. (a) Pastaim Jisas i helpim man long kamap fri long wanem samting? (b) I gat wanem stori long Jon 9:1-34 na yumi inap save long dispela samting?

⁸ Dispela gutpela tok Jisas i autim long ol man em i givim rot long ol Juda i bilip long dispela tok na ol i ken kamap fri long spirit. Nau ai bilong ol i op na ol i save gut long pasin bilong lotu tru long God na ol samting ol i mas mekim bilong lotu tru long em. Taim ol i kisim save long ol dispela samting, nau ol i lusim planti tingting kranki i bin pasim ol na i olsem ol i kamap fri. (Matyu 5:21-48) Dispela kain pasin bilong kamap fri, em i winim tru ol wok bilong Jisas long oraitim ol sik samting bilong ol man. Tru Jisas i bin opim ai bilong wanpela man i aipas taim mama i karim em. Tasol samting i bin helpim tru dispela man, em olsem: Dispela man i luksave olsem Jisas em i wanpela profet bilong God. Em nau, man i kisim gutpela samting tru long dispela, olsem em i kamap fri long ol samting bilong spirit. Dispela i narapela kain tru long ol bikpela man bilong lotu Juda—ol i kalabus long pasin na tok bilong ol man na ol i gat ol bilip giaman tu, olsem na ol i no stap fri long spirit olsem dispela man pastaim em i aipas. (Jon 9:1-34; Diuteronomi 18:18; Matyu 15:1-20) Pastaim ol i kamap fri long ol samting bilong spirit, tasol i gat narapela samting ol i mas kamap fri long en. Na long taim bilong Jisas yet em i helpim ol man long kamap fri long dispela narapela samting, na Jubili bilong ol Isrel bilong bipo i olsem piksa bilong dispela samting. Olsem wanem yumi inap tok olsem?

9. Sampela man long taim bilong Jisas ol i kalap fri long spirit, tasol ol i stap kalabus yet long wanem samting?

⁹ Jisas i bin tokim dispela man pastaim em i aipas: “Mi kam long dispela graun bilong skelim ol man. Olsem na ol man i aipas, bai ol i lukluk. Na ol man i save lukluk, bai ol i aipas.” Orait bihain Jisas i tokim ol Farisi: “Sapos ai bilong yupela i pas, bai yupela i no gat sin. Tasol yupela i save tok, ‘Ai bilong mipela i lait.’ Olsem na sin bilong yupela i stap yet.” (Jon 9:35-41) Em nau, dispela sin i save kamapim dai long man, dispela em i wanpela bikpela hevi. Dispela sin i kalabusim ol man long bipo, na i wankain tu long nau. (Rom 5:12) Ol Juda na ol aposel tu, em Jisas i bin helpim ol long kamap fri long spirit, ol i stap sinman yet. Ol i kalabus yet long sin na dai. Orait yumi laik save, inap Jisas i ken senisim dispela samting? Em bai mekim olsem? Sapos em bai mekim dispela samting, wanem taim bai em i mekim?

10. Jisas i tok promis olsem em bai wokim rot bambai ol man inap kamap fri long wanem arapela samting?

¹⁰ Pastaim liklik Jisas i bin tok: “Sapos yupela i holim tok bilong mi, Orait bai yupela i disaipel tru bilong mi. Na yupela bai i save long tok tru. Na tok tru em bai i mekim yupela i kamap fri.” Ol man bilong lain Juda ol i harim dispela tok bilong em na ol i tok, “Mipela i lain bilong Ebraham. I no gat wanpela taim mipela i bin i stap slev bilong wanpela man. Olsem wanem yu tok, ‘Bai yupela i kamap fri’?” Jisas i bekim tok bilong ol na em i tok: “Tru tumas mi tokim yupela: Olgeta man i save mekim sin, ol i slev bilong sin. Slev em i no save stap long haus oltaim. Nogat. Pikinini em i stap oltaim.” (Jon 8:31-36) Olsem na maski ol Juda i lain bilong Ebraham, tasol dispela samting i no inap helpim ol long lusim kalabus bilong sin. Jisas i mekim dispela bikpela toksave bilong kamap fri long sin, bambai em i ken kamapim long ples klia samting bai kamap bihain, na bai ol i ken save, dispela em i gutpela samting moa yet, winim ol samting lain Isrel i bin kisim long taim bilong Jubili bilong ol.

Jubili Bilong Ol Kristen i Kirap

¹¹ Ol Juda i no bilip olsem dispela Jubili bilong Lo bilong Moses em i olsem piksa bilong wanpela bikpela Taim Bilong Amamas o Jubili em i mas kamap bihain. (Kolosi 2:17; Efesas 2:14, 15) Samting i insait long dispela Jubili bilong ol Kristen em dispela “tok tru” em inap helpim man long kamap fri—em dispela tok i tru i kamap long rot bilong Pikinini, em Krais Jisas. (Jon 1:17) Dispela bikpela Jubili, em inap helpim ol man long lusim kalabus bilong sin tu na ol samting nogut sin i kamapim, wanem taim dispela Jubili i kirap? Em i kirap long yia 33 C.E., long de Pentikos, em tenpela de bihain long taim Jisas i go antap long heven na em i givim pe bilong ofa bilong em long God Jehova.—Hibru 9:24-28.

¹² Paslain long Jisas i no gat wanpela man i dai na i kirap bek bilong i stap oltaim. Nogat. (Rom 6:9-11) Olgeta i dai na ol i slip i stap yet inap long taim bilong kirapim bek ol manmeri. Taim Jisas i kirap bek long strong bilong God, Baibel i tok Jisas i “kirap paslain long ol man i dai pinis, olsem namba wan kaikai i redi long gaden.”—1 Korin 15:20.

12, 13. Taim Jisas i dai pinis, wanem samting i kamap na bihain wanpela narapela kain samting tru i painim ol disaipel?

¹³ Jisas i kirap bek pinis na 5-pela ten de bihain sampela samting i kamap na ol i ken save Jisas i go pinis long heven na em i kamap long ai bilong God Jehova, na em i holim pe bilong nambawan gutpela ofa bilong em na em i mekim wok pinis long en bilong helpim ol manmeri bilong graun. Dispela i kamap long de Pentikos, long yia 33 C.E. Ol disaipel i bihainim tok bilong Jisas na inap olsem 120 disaipel ol i bung wantaim long Jerusalem. Nau Krais i kapsaitim spirit holi i kam daun long ol dispela disaipel, na dispela i truim tok profet bilong Joel 2:28, 29. Samting olsem ol liklik paia i kam daun long het bilong ol, na ol i kirap autim tok long kain kain tok ples, i no tok ples bilong ol. (Aposel 2:16-21, 33) Dispela samting i makim stret olsem Jisas i go pinis antap long heven na em i kamap pinis long ai bilong God na em i holim pe bilong wanpela ofa i nambawan olgeta, bilong mekim wok long en bilong helpim ol manmeri bilong graun.

14. (a) Long dispela taim bipo, olsem wanem long ol disaipel bilong Krais na ol kontrak? (b) Nupela kontrak i gat wanem gutpela blesing tru insait long en?

¹⁴ Dispela samting i mekim wanem long ol disaipel? Wanpela samting i olsem: Ol i no pas moa long Lo kontrak bilong Moses em God i bin wokim wantaim lain Isrel tru bilong skin. Nau God i pinisim dispela Lo kontrak, olsem em i nilim long pos Jisas i karim pen long en; na nau ol disaipel i no aninit moa long en—ol i kamap fri. (Kolosi 2:13, 14; Galesia 3:13) Dispela olpela kontrak i pinis na nupela kontrak i kamap, tasol lain Isrel bilong skin i no insait long dispela nupela kontrak. Nogat. God i wokim dispela kontrak wantaim nupela “lain” Israel bilong spirit, na dispela i winim olpela kontrak. (Hibru 8:6-13; Galesia 6:16) Dispela nupela kontrak em Baibel i tok profet long en long Jeremaia 31:31-34, em i kamap long rot bilong wanpela namelman i winim profet Moses. Yumi laik save gut long rot bilong kamap fri, olsem na yumi mas skelim gut wanpela samting bilong dispela nupela kontrak. Aposel Pol i raitim stori bilong dispela, em i tok: “‘Dispela taim i pinis pastaim, orait bihain bai mi mekim narapela kontrak wantaim ol. . . . bai mi no tingting moa long sin bilong ol na long pasin nogut ol i mekim.’ Na sapos God i lusim sin pinis, orait i no gat wok moa long mekim ofa bilong tekewe sin.”—Hibru 10:16-18.

15. Olsem wanem yumi inap tok, long de Pentikos bilong yia 33 C.E. Jubili bilong ol Kristen i bin kirap long ol Kristen em spirit holi i bin makim ol? (Rom 6:6, 16-18)

¹⁵ Jisas i tingim dispela pasin bilong kalap fri long sin taim em i tok: “Sapos Pikinini i mekim yupela i kamap fri, orait yupela i fri tru.” (Jon 8:36) Tingim dispela bikpela samting—long rot bilong ofa bilong Krais ol inap lusim kalabus bilong sin na kamap fri! Kirap long de Pentikos, God i makim ol bilipman i kamap olsem stretpela man, na em i mekim ol i kamap pikinini bilong em bilong spirit, na ol i ken tingting long i stap king wantaim Krais long heven. Pol i tok: “Yupela i no bin kisim spirit i pasim yupela long wok kalabus, bai yupela i pret gen. Nogat. Yupela i bin kisim spirit i mekim yupela i kamap pikinini bilong God. . . . Orait yumi stap pikinini bilong God, na bihain bai yumi kisim samting bilong Papa tu. Yes, bai yumi kisim samting bilong God. Bai yumi kisim dispela wantaim Krais.” (Rom 8:15-17) Tru tumas, Jubili bilong ol Kristen i kirap pinis long ol Kristen em spirit holi i bin makim ol.

16. Ol manmeri i insait long Jubili bilong ol Kristen long bipo, wanem ol narapela gutpela samting ol i kisim? Na wanem samting ol inap wetim bihain?

¹⁶ Olsem na long dispela de Pentikos long yia 33 C.E., wanpela nupela lain i kamap, em lain Isrel bilong spirit. Ol manmeri bilong dispela lain, em Jehova i lusim pinis sin bilong ol long rot bilong blut bilong Krais. (Rom 5:1, 2; Efesas 1:7) Yumi save tru, ol dispela namba wan lain Isrel bilong spirit ol i bin kam insait pastaim long nupela kontrak, wanpela gutpela samting tru i bin painim ol—God i lusim pinis sin bilong ol na ol i no kalabus moa long en, olsem na ol i kamap fri. Em gutpela samting tru, a? God i mekim ol i kamap “lain manmeri bilong em,” na “lain manmeri i holi,” na ol i “stap manmeri bilong God stret, bai [ol] i ken telimautim olgeta gutpela pasin em i bin mekim long [ol]. I olsem: Em i bin singautim [ol] na [ol] i lusim tudak pinis, na em i bringim [ol] i kam. insait long gutpela lait bilong em.” (1 Pita 2:9) Tru skin bilong ol i gat sin i stap yet long en, na bihain ol i mas i dai. Tasol God i kolim ol stretpela man na em i mekim ol i kamap pikinini spirit bilong em, olsem na taim ol i dai ol i lusim dispela skin na nau ol inap kirap bek na i go antap long ‘kingdom bilong Krais i stap long heven.’—2 Timoti 4:6, 18.

17, 18. Samting ol Kristen bilong pastaim i bin kamap fri long en taim Jubili Kristen i kirap pinis, bilong wanem dispela i winim tru namba wan samting ol i kamap fri long en?

¹⁷ Yumi stori pinis long kirap bilong dispela wok bilong kamap fri, em ol bilipman bilong lain Juda ol i lusim ol bilip na tingting kranki na pasin kranki bilong lotu na ol i kamap fri, na dispela i bin helpim ol gut. Tasol Jisas i no helpim ol long kamap fri long dispela samting tasol. Nogat. Em i go moa na em i mekim ol i kamap fri long narapela samting tu. Kirap long de Pentikos bilong 33 C.E. na bihain long en, Jisas i helpim ol bilipman long lusim narapela kalabus—em i tekewe ol long “lo bilong sin na dai” na ol i kamap fri. (Rom 8:1, 2) Em nau, Jubili Kristen i kirap bilong ol Kristen em spirit holi i bin makim ol. Dispela samting ol i kamap fri long en, em i bikpela samting tru bilong helpim ol, winim arapela bilong pastaim; long wanem nau ol i ken tingting long kisim laip long heven na i stap king wantaim Krais.

¹⁸ Yumi stori pinis long tupela samting ol Kristen i bin kamap fri long en long taim bilong Jisas na ol aposel, na dispela em i samting tru bilong amamas. Na ol Kristen bilong pastaim ol i bin amamas tru long dispela samting. (Aposel 13:44-52; 16:34; 1 Korin 13:6; Filipai 4:4) Ol i amamas tru long ol i insait long Jubili Kristen, long wanem, dispela i opim rot bambai ol i ken kisim ol blesing bilong i stap oltaim oltaim long heven.—1 Pita 1:3-6; 4:13, 14.

¹⁹ Tasol olsem wanem long planti Kristen tru bilong nau, em God i no bin kolim ol stretpela man bilong kisim laip na makim ol long spirit holi? I gat as long Baibel na yumi ken bilip olsem Jubili Kristen i bilong helpim ol tu long kamap fri? Yumi ken tingim tok bilong Aposel 3:20, 21, i tok: “Nau em [Jisas] i mas i stap long heven na wetim dispela taim bai God i mekim olgeta samting i kamap nupela gen, olsem bipo yet em i tok long maus bilong ol profet holi bilong en.” (Lukim tu Aposel 17:31.) Na Jon, em wanpela aposel na spirit holi i bin makim em na em i wok long kisim ol gutpela samting bilong Jubili Kristen, em tu i stori long Jisas Krais olsem: “Em yet i mekim wok bilong tekewe sin bilong yumi. Na em i no mekim dispela wok bilong helpim yumi tasol. Nogat. Bilong helpim olgeta man i stap long graun.” (1 Jon 2:2) Yumi lukim dispela tok bilong Baibel na yumi tingim planti planti Kristen bilong nau ol i stap gut long Jehova na ol i no gat tingting bilong i go long heven. Orait, olsem wanem long ol dispela Kristen? Ol tu inap kamap fri na amamas long Jubili bilong ol Kristen? Ating dispela amamas i bilong kamap bihain tasol, o i gat sampela samting i kamap long nau tu na yumi ken amamas? Bilong kisim save long ol dispela samting, yumi mas skelim sampela samting ol Kristen i kamap fri long en na sampela samting bilong Jubili em samting bilong ol manmeri i lotu tru long Jehova long nau.

Jubili Bilong Ol Kristen i Kamap Inap Tru Long Taim Bilong 1,000 Yia

PLANTI Juda ol i stap long Ripablik bilong Isrel (i kamap long yia 1948) ol i ting olsem ol i stap aninit yet long Lo bilong Moses, tasol ol i no bin kirapim gen pasin bilong holim wanpela yia Jubili. Sapos ol i laik mekim olsem em bai hatwok tru. Bai bikpela hevi i kamap long wok mani na long wok bisnis, long wanem lo bilong Jubili i tok, ol i mas bekim graun na haus samting long papa tru Bilong en. Ripablik bilong Isrel i no holim olgeta hap graun ol 12-pela lain bilong Isrel i bin holim bipo. Na i no gat haus lotu o hetpris bilong en bilong lain Livai, long wanem ol i no save ol i bilong wanem lain.

2. Olsem wanem sampela Kristen i kirap pinis long kisim amamas em Jubili bilong ol Isrel long bipo i makim?

² Orait, olsem wanem long yumi? Yumi inap kisim ol blesing bilong wanpela taim bilong amamas o Jubili? Long yia Jubili bilong ol Isrel bipo, ol i mas bekim graun long papa tru bilong en, na ol i mas pinisim wok kalabus bilong ol Isrel i bin baim ol yet i go wok kalabus long wanpela man. (Levitikas 25:8-54) Long tok i kamap paslain long dispela, yumi kisim save olsem kontrak bilong Lo ol i bin kisim long han Bilong Moses i pinis long yia 33 C.E. na long dispela taim pasin bilong holim yia Jubili, dispela tu i pinis. (Rom 7:4, 6; 10:4) Nupela kontrak i kamap. Long rot bilong dispela nupela kontrak God inap lusim sin bilong ol man i bilip, na makim ol long spirit holi, na kisim ol i kamap pikinini bilong em bilong i go long heven. (Hibru 10:15-18) Tasol ol man i insait long dispela nupela kontrak ol i “liklik lain” tasol, inap olsem 144,000, em “God i bin baim bek ol namel long ol manmeri bilong graun.” Orait, olsem wanem ol narapela gutpela Kristen i ken lusim kalabus na kisim amamas, em Jubili bilong bipo i makim?—Luk 12:32; Revelesen 14:1-4.

Ofa Bilong Helpim Olgeta!

³ Paslain long taim bilong ol Kristen, ol samting bilong De Bilong Tekewe Sin i helpim ol Isrel inap wanpela yia tasol. Tasol ofa Bilong Bikpela bilong yumi, Krais Jisas, dispela i bilong helpim ol man inap oltaim oltaim. Olsem na i nogat wok long Hetpris Jisas i kamap man gen long olgeta yia, na givim em yet olsem ofa, na i go bek long heven na givim pe bilong ofa bilong em long God Jehova long Rum Holi Tru Bilong Em. Nogat. Baibel i tok: “Krais i kirap bek pinis long matmat, olsem na bai em i no ken i dai moa. Dai i nogat strong moa bilong daunim em.”—Rom 6:9; Hibru 9:28.

4, 5. (a) Kirap long de Pentikos long yia 33 C.E., ofa bilong Krais i mekim wanem wok bilong helpim ol man? (b) Na olsem wanem yumi save, bihain bai ofa bilong em i helpim planti man moa?

⁴ Olsem na kirap long de Pentikos long yia 33 C.E. na bihain long dispela taim, taim ol bilipman i kamap disaipel bilong Jisas na spirit holi i mekim ol i kamap pikinini bilong God, ol i bin kisim amamas bilong Jubili bilong ol Kristen. Ol i ‘tekewe pinis long lo bilong sin na dai na i no pas long en moa.’ Ol i lusim kalabus na i stap amamas. (Rom 8:1, 2) Na ol i bin autim tok Kristen bambai sin bilong sampela moa i ken tekewe, na spirit holi i ken makim ol, na ol tu i ken kamap ol pikinini spirit bilong God. Tasol olsem wanem? Sapos wanpela man i no bilong dispela liklik lain 144,000, em i no inap lusim kalabus long nau na kamap fri na i stap amamas?

⁵ Tok bilong aposel Pol long Rom 8:19-21 inap helpim yumi long save long dispela samting. Pol i tok: “Olgeta samting God i bin wokim, i litimapim het na i lukluk tru na i wetim taim bilong [ol] pikinini bilong God bai i kamap ples klia. Nau olgeta samting i stap nogut na i save bagarap [long wanem ol i gat sin na ol i no inap pinisim sin].” Na bihain Pol i mekim gutpela tok, olsem: “Bambai God i tekewe olgeta samting long dispela kalabus bilong bagarap nau ol i stap long en, na bai olgeta samting i stap gut tumas [olsem ol] pikinini bilong God.” Olsem na ol manmeri i kamap “pikinini bilong God” long heven, i no dispela lain tasol bai tekewe long dispela kalabus bilong sin. Nogat. Jon 3:16 tu i tok olsem. Na, olsem yumi tok pinis, aposel Jon i tok, Krais i “mekim wok bilong tekewe sin bilong yumi. Na em i no mekim dispela wok bilong helpim yumi tasol. Nogat. Bilong helpim olgeta man i stap long graun.”—1 Jon 2:2.

Yia 1919—O1 i Kamap Fri long Namba Wan Samting

⁶ Nau, long taim bilong yumi, ol manmeri spirit holi i bin makim ol, ol i kisim amamas bilong Jubili bilong ol Kristen, na ol i bin autim gutpela tok bilong helpim ol narapela man long lusim kalabus na kamap fri. Kirap long yia 1919 ol i bin mekim tru dispela wok. Tasol ating yu laik save bilong wanem mipela i tok, “kirap long yia 1919”? Orait nau yumi ken stori long dispela samting, long wanem rot bilong yu long lusim kalabus i insait long dispela samting.

6, 7. Kirap long yia 1919 ol i bin autim wanem tok bilong helpim ol man long lusim kalabus? Olsem wanem na kirap long yia 1919 ol i bin mekim tru dispela wok?

⁷ Sampela yia paslain long yia 1919, ol manmeri Jehova i bin makim ol long spirit bilong em, ol i bin autim ol tok i tru bilong Baibel. Ol i bin wokim sampela buk bilong kamapim ol dispela tok i tru, olsem sampela buk tok Inglis ol i kolim Studies in the Scriptures (1886-1917). Na ol i bin tilim planti liklik buk na nius long ol man bilong givim save long ol. Long taim bilong Namba Wan Pait Bilong Olgeta Hap, sampela man i birua long ol, na em i taim bilong traim man na skelim man, na wok bilong ol i slek liklik. Tasol long yia 1919, lain remnan i kirap long wok strong gen long autim ol tok i tru bilong Baibel. Long yia 30 C.E., Jisas inap tok, God i bin makim em bilong telimautim tok, olsem: “Yupela kalabusman i ken lusim kalabus na i go. Yupela man i aipas, yupela i ken lukluk gen.” Na ol manmeri long nau, em God i bin makim ol, ol tu inap tok olsem. Kibung bilong Septemba 1-7 long yia 1919a i strongim ol na ol i kirap givim bel long autim ol tok i tru i helpim planti planti man long lusim kalabus—Luk 4:18.

8, 9. Wanem samting i Olsem i kalabusim ol man na planti ol i bin lusim dispela kain kalabus? Ol i bin mekim wok long wanem samting bilong autim tok na helpim ol man long lusim dispela kain kalabus?

⁸ Long yia 1921 ol i wokim wanpela buk (The Harp of God) bilong helpim ol man long lainim ol tok bilong Baibel. Dispela buk i stori long 10-pela bikpela tok i tru. Dispela buk i tok, “planti man i no laik kisim save long ol tok bilong Baibel,” long wanem ol i pret long wanpela tok bilong ol misin, em ol i tok: “Strafe bilong ol man nogut em olsem: ․․․ bai ol i kisim pen oltaim long hel, long paia i lait long ston salfa na i no inap i dai.” Ol Witnes i wokim inap olsem 6 milion bilong dispela buk na ol man i kaunim ol i kisim save long fopela samting i makim tok bilong bikpaia i no stret, olsem: I no stret wantaim (1) tingting bilong ol man; (2) stretpela pasin; (3) pasin bilong sori; (4) na i no stret liklik wantaim tok bilong Baibel. Ol man i bin pret long bikpaia kirap long taim ol i liklik yet, ol i amamas tru long kisim dispela save. I olsem ol i lusim kalabus na kamap fri! Dispela bilip giaman i no kalabusim ol moa.

⁹ Tru tumas, dispela lain, em spirit bilong God i bin makim ol, ol i wok strong long autim tok i tru bilong Baibel na dispela samting i helpim planti man long olgeta hap bilong graun long lusim kalabus bilong ol bilip giaman na ol pasin i no stret wantaim Baibel (olsem pasin bilong lotuim ol tumbuna, pasin bilong pret long ol spirit nogut na tambaran samting, pasin bilong ol pris pasto long pulim mani). Ol i wokim planti buk bilong Baibel na nem bilong sampela i kamapim long ples klia wok bilong ol dispela buk, em bilong helpim ol man long lusim kalabus na kamap fri.b Olsem na tok bilong Jisas i stret, em i tok, ol disaipel bilong em ‘bai mekim bikpela wok i winim wok bilong em.’ (Jon 14:12) Jisas i bin telimautim tok olsem: “Yupela kalabusman i ken lusim kalabus na i go,” tasol ol wokboi bilong God long nau i bin mekim bikpela wok moa, winim dispela wok Jisas i bin mekim long pastaim bilong helpim ol man long kamap fri long ol samting bilong spirit. Ol wokboi bilong God long nau ol i bin autim tok long planti milion manmeri long olgeta hap bilong graun.

10. Bilong wanem yumi ken ting olsem bihain bai planti moa ol i lusim kalabus?

¹⁰ Tasol kirap long de Pentikos, long yia 33 C.E., ol i kamap fri long narapela samting tu. Yu tingim? Long dispela taim Jubili bilong ol Kristen i kirap bilong “liklik lain,” em sin bilong ol bai tekewe na bai ol inap kamap “pikinini bilong God” long heven. Tasol olsem wanem long taim bilong yumi? Olsem wanem long ol narapela milion milion Kristen i givim bel long wok? Ating ol tu inap lusim kalabus bilong sin na kisim amamas bilong wanpela taim bilong Jubili? Tru tumas. Aposel Pita i makim olsem taim em i tok long wanpela taim “bai God i mekim olgeta samting i kamap nupela gen, olsem bipo yet em i tok long maus bilong ol profet holi bilong en.”—Apose1 3:21.

Wanpela Jubili Bilong Planti Milion Man

¹¹ Tupela taim long Levitikas sapta 25 Jehova i tokim ol Isrel, long ai bilong em ol i “wokboi” bilong em na em i bin helpim ol long lusim wok kalabus long Isip. (Levitikas 25:42, 55, NW ) Dispela sapta i stori long yia Jubili em i stori tu long sampela ‘man bilong narapela hap’ ol i stap wantaim ol Isrel. Ol dispela manmeri i olsem piksa na ol i makim ‘bikpela lain manmeri’ long nau, em ol i wok wantaim ol Isrel bilong spirit long autim gutpela tok bilong ol Kristen.

12. Kirap long yia 1935 wanem gutpela samting i bin kamap?

¹² Kirap long yia 1935, “gutpela wasman” Krais Jisas em i bin bringim ol “arapela sipsip” i kam bung wantaim lain remnan na ol i wok wantaim ol. Em i “bringim” ol i kam na ol i kamap “wanpela lain sipsip tasol” aninit long “wanpela wasman tasol.” (Jon 10:16) Lain “arapela sipsip” long nau ol inap olsem sampela milion. Sapos yu insait long dispela lain, em ol i stap amamas, orait God i tingim yu i olsem stretpela man, olsem pren bilong em, na yu wanpela bilong ‘olgeta man God i bin wokim,’ olsem na yu ken wet long “God i tekewe olgeta [man] long dispela kalabus bilong bagarap nau ol i stap long en.” Dispela samting bai kamap long “dispela taim bai God i mekim olgeta samting i kamap nupela gen” hia long graun. Yu ken bilip tru na wetim dispela samting i kamap, long wanem em bai kamap tru.—Rom 8:19-21; Aposel 3:20, 21.

13. Yumi mas tingim wanem blesing em bai kamap bihain long taim bilong “bikpela hevi tru”?

¹³ Aposel Jon i lukim ol 144,000, em ol i kisim amamas bilong Jubili bilong ol Kristen na ol i bilong kisim laip long heven, na bihain Jon i lukim ‘bikpela lain manmeri.’ Em i stori long ol olsem: “Ol dispela man ol i bin [winim taim bilong] bikpela hevi na ․․․ ol i bin wasim klos bilong ol long blut bilong Pikinini Sipsip, na klos i kamap waitpela. Olsem na ol i save sanap long pes bilong sia king bilong God. Na long san na long nait ol i save lotu long em long haus holi bilong en.”—Revelesen 7:14, 15.

14, 15. I gat wanem samting na nau tu ol manmeri bilong ‘bikpela lain’ ol i ken amamas?

¹⁴ Nau, paslain long taim bilong bikpela hevi tru, ol dispela manmeri i bilip long blut bilong Krais na dispela ofa bilong em i helpim ol. Na ol i amamas tu, long wanem ol i lusim pinis kalabus bilong Bikpela Babilon, na bel bilong ol i stap klin long ai bilong God Jehova, na ol i gat gutpela wok ol i ken mekim, olsem ol i ken autim gutpela tok bilong Kingdom na bihain bai las de i kamap, olsem Matyu 24:14 i tok.

¹⁵ Tasol olsem wanem long dispela bikpela lain manmeri? Sin na pasin kranki i stap long skin bilong ol taim mama i karim ol, wanem taim bai dispela i tekewe long ol? Ating klostu nau bai ol i kamap fri long dispela samting i kalabusim ol? Jisas i tok, sampela manmeri i lukim taim bilong pinis i kirap ol i no i dai pinis yet na bai dispela olgeta samting i kamap. I gat gutpela as na yumi ken tok, sampela bilong dispela lain ol i stap yet. (Matyu 24:34) Olsem na pinis tru bilong ‘dispela taim nau’ em i klostu pinis.—Matyu 24:3.

Ol Gutpela Samting Bilong Jubili Bilong Ol Kristen

¹⁶ Pait bilong “dispela bikpela de bilong God I Gat Olgeta Strong” em i wok long i kam klostu hariap. Tasol lain remnan wantaim ol gutpela poroman bilong ol long ‘bikpela lain,’ bai ol i stap gut long God; ol i save God bai lukautim ol. Ol i amamas na wetim Jehova i daunim olgeta birua bilong em na stretim bek nem bilong em, olsem em i Nambawan Bikpela bilong heven na graun. Em wanpela gutpela samting bilong helpim ol Kristen long kamap fri tru!—Revelesen 16:14; 19:19-21; Habakak 2:3.

17. Olsem wanem na bihain, long wanpela bikpela taim bilong Jubili, bai planti milion i lusim kalabus?

¹⁷ Taim King Krais Jisas i winim pinis dispela pait, bihain bai em i kirap mekim wok king bilong em bilong bosim dispela graun i kamap klin pinis. Jehova em i Nambawan Bikpela bilong heven na graun na Krais Jisas bai bosim dispela graun olsem King i winim olgeta narapela king na Bikpela i winim olgeta narapela bikpela man. Long dispela taim bai Jisas i kirap mekim wok long ofa bilong em bilong helpim ol milion milion manmeri na ol manmeri i kirap bek long matmat tu, em ol i bilip na ol i laik bai God i tekewe sin bilong ol long rot bilong Krais. Ol bai save God i mekim ol i kamap fri olsem, long wanem bai God i “mekim drai olgeta wara i stap long ai bilong ol. Bai ol man i no i dai moa, na ol i no bel hevi moa, na ol i no krai na kisim pen gen.” (Revelesen 21:3, 4) Olgeta samting i kalabusim ol long bipo bai pinis. Bai ol i kamap fri tru!

18. Wanem samting bai kamap long graun long nupela taim bihain na i olsem samting i bin kamap long ol yia Jubili bilong bipo?

¹⁸ Ol man na bikpela kampani na gavman, em ol i laik kisim planti samting, bai ol i no i stap moa, olsem na ol i no ken bosim o bagarapim moa dispela graun. (Revelesen 11:18) Ol man i lotu long God tru ol bai kisim dispela graun. Bai ol i kisim gutpela wok bilong truim tok profet bilong Aisaia, em i tok: “Bai ol i wokim haus na sindaun long en; bai ol i planim gaden wain na kaikai long en. Ol i no ken wokim haus na narapela man i sindaun long en; ol i no ken planim kaikai na narapela man i kisim na kaikai. ․․․ Wok bilong ol i no ken lus nating, na ol i no ken kamapim pikinini bilong kisim hevi; long wanem ol i lain bilong Jehova na bai ol i kisim blesing.” (Aisaia 65:21-25, NW ) Krais bai bosim graun inap 1,000 yia na long pinis bilong dispela taim bai i no gat sin na pasin kranki moa. Sin ol man i kisim long Adam na ol samting nogut dispela sin i kamapim, bai tekewe olgeta. Bai Jubili inapim tru wok bilong en. Bai olgeta samting i stap gutpela olgeta, na ol manmeri long graun, em ol i stap gut long God, bai ol i amamas tru long dispela samting.—Efesas 1:10.

Bihain long 1,000 Yia Bilong Taim Bilong Jubili

¹⁹ Revelesen 20:1-3 i tok Seten bai stap kalabus long dispela 1,000 yia bilong Krais i bosim graun. Tasol taim dispela 1,000 yia i pinis, Seten wantaim ol narapela spirit nogut bai lusim kalabus inap liklik taim. Bai ol i lukim bikpela senis i kamap long graun—i no olsem long taim ol i bin bosim graun—bai ol i lukim olgeta hap bilong graun i kamap gutpela ples paradais. Bai ol i lukim ol gutpela manmeri bilong ‘bikpela lain’ ol i stap, na ol manmeri i bin kirap bek long matmat, em Krais Jisas i bin i dai bilong baim bek ol. Long pinis bilong dispela 1,000 yia, bai Jubili bilong ol Kristen inapim pinis wok bilong en long helpim ol man long lusim kalabus bilong sin. (Rom 8:21) Sapos wanpela man i laik kirap bagarapim dispela gutpela ples, em bai nogut tru! Tasol long laspela taim bai God I Gat Olgeta Strong em i larim Seten i wok long mekim. Seten bai bel nogut na kirapim pait. Revelesen 20:7-10, 14 i stori olsem:

²⁰ “Bihain bai dispela 1,000 yia i pinis, orait dua bilong haus kalabus bai i op, na Seten i lusim kalabus bilong en. Na bai em i kam ausait bilong giamanim ol lain manmeri i stap long 4-pela arere bilong graun, ol lain bilong Gok wantaim Megok. Bai Seten i bungim ol bilong kirapim pait. Namba bilong ol em i olsem wesan bilong nambis. Na ol i go long olgeta hap bilong graun, na ol i raunim kem bilong ol manmeri bilong God wantaim dispela taun God i laikim tumas. Tasol paia i kam daun long heven, na i kukim tru ol dispela ami. Seten i bin giamanim ol, olsem na God i tromoi em i go daun long bikpela hul i gat hatpela paia i lait long ston salfa.”

21. Taim Jubili bilong ol Kristen i pinis, olsem long pinis bilong dispela 1,000 yia, ol pikinini bilong God long heven bai mekim wanem olsem Jop 38:7 i tok ol i bin mekim bipo?

²¹ Wok bilong taim bilong Jubili i bilong tekewe olgeta samting i kalabusim ol man bambai ol i ken kamap fri, na bihain tu bai ol i stap fri olsem. Bai i no gat wanpela samting i kalabusim ol man o ol ensel; bai olgeta i stap fri tru na litimapim nem bilong dispela Man em wanpela tasol nem bilong em Jehova. (Sam 83:18) Ol bai stap olsem na bai Jehova i wok i go moa long kamapim laik bilong em long heven na long graun. Taim em i wokim dispela graun na em i no wokim yet ol man bilong i stap long graun, long dispela taim “ol sta bilong moningtaim i amamas na ol i singaut wantaim, na olgeta pikinini bilong God ol i kirap singaut na amamas.” Ol i amamas long lukim dispela gutpela samting God i bin wokim. (Jop 38:7, NW ) Na taim ol i lukim ol gutpela manmeri i pulap long dispela graun, em ol i bin kamapim long ples klia olsem ol i givim bel olgeta long God I Gat Olgeta Strong, bai ol dispela “pikinini bilong God” i amamas moa yet.

22. Yumi mas mekim wanem olsem Sam 150:1-6 i tok?

²² Yumi tingim olgeta dispela samting na gutpela save yumi kisim nau long Baibel na dispela i kirapim yumi long amamas wantaim ol lain bilong heven na litimapim nem bilong Jehova! Laspela Sam i tok yumi mas mekim olsem: “Litimapim nem bilong God insait long tempel bilong en. Yumi amamas long bikpela strong bilong en i stap long heven. Em i bin mekim ol bikpela wok. Olsem na yumi litimapim nem bilong en. Em i stap nambawan tru na i gat biknem i antap tumas. Yumi litimapim nem bilong en. Winim biugel na litimapim nem bilong en. Paitim ol gita samting na mekim olkain musik na litimapim nem bilong en. Paitim kundu na mekim singsing na litimapim nem bilong en. Paitim gita na winim mambu na litimapim nem bilong en. Paitim simbol na mekim krai bilong en i go na litimapim nem bilong Bikpela. Paitim simbol strong moa bai krai i kamap bikpela na litimapim nem bilong Bikpela. Yupela olgeta samting i gat laip, yupela litimapim nem bilong Bikpela! Litimapim nem bilong Bikpela!”—Sam 150:1-6.