Ating yu harim olsem: “God i save mekim ol samting long rot yumi no inap kliagut long en.”

“Yumi no inap kliagut long Papa, Pikinini, na Holi Spirit.”​—⁠Bilip Bilong Atanesias, i stori long God Triwan em planti lotu Kristendom i skulim ol man long en.

Tok Baibel i mekim: Jisas i tok ol manmeri i “kisim save long . . . God tru,” ol bai kisim blesing. (Jon 17:⁠3) Tasol olsem wanem yumi inap kisim save long God sapos yumi no inap kliagut long em? Em i no haitim em yet, nogat, em i laik bai olgeta man i mas save long em.​—⁠Jeremaia 31:⁠34.

Tru yumi no inap save long olgeta samting long God, long wanem, tingting na pasin bilong em i antap moa winim bilong yumi.​—⁠Saveman 3:11; Aisaia 55:​8, 9.

Save bilong tok i tru i helpim yu: Sapos God i stap hait na yumi no inap kliagut long em, orait i no gat as long kisim save long em. Tasol em i helpim yumi long kisim save long em na long pas gut wantaim em. God i kolim bilipman Abraham olsem “pren bilong mi,” na King Devit bilong Israel i tok: “God em i pren tru bilong ol manmeri i save stap aninit long em.”​—⁠Aisaia 41:8; Song 25:⁠14.

Yu ting dispela tingting olsem man inap i stap pren bilong God em wanpela tingting i no gat as bilong en? Ating yu bin ting olsem, tasol lukim tok i stap long Aposel 17:​27, em i tok: “[God] i no stap longwe long yumi olgeta wan wan.” Orait olsem wanem God i no stap longwe long yumi? Long Baibel, God i kamapim ol tok bilong helpim yumi long save gut long em.a

God i tokim yumi olsem nem bilong em Jehova. (Aisaia 42:​8, NW ) Em i bin kamapim stori bilong ol wok em i bin mekim bilong helpim ol manmeri bambai yumi ken save long em i wanem kain God tru. Na tu, God i kamapim klia ol samting em i pilim long bel. Em i save ‘marimari na sori, i no save belhat kwik, laikim tru olgeta manmeri, na bihainim olgeta tok bilong em.’ (Kisim Bek 34:⁠6) Ol pasin bilong yumi inap mekim em i amamas o i bel hevi. Olsem, lain Israel bilong bipo i save mekim “em i bel hevi” taim ol i bikhet long em, na taim ol i bihainim tok bilong em, dispela i save amamasim em.​—⁠Song 78:40; Sindaun 27:⁠11.

[Futnot]

[Rait long pes 4]

Sapos God em i God Triwan i stap hait, olsem wanem yumi inap kliagut long em?

[Piksa Kredit Lain long pes 4]

The Trinity c.1500, Flemish School, (16th century) / H. Shickman Gallery, New York, USA / The Bridgeman Art Library International

Ating yu harim olsem: “Sapos i tru God i save tingim ol man, orait em bai pinisim olgeta pasin nogut long graun. Na maski i tru em i tingim ol man, em i no wari tumas long ol samting i kamap long mi.”

Tok Baibel i mekim: God Jehova i no as bilong ol pasin nogut. (Jems 1:13) Em inap pinisim olgeta pasin nogut, tasol em i larim ol dispela hevi i stap yet bambai dispela i ken stretim sampela bikpela tok i bin kamap long taim bilong namba wan man na meri. God bai helpim olgeta manmeri na pinisim tru olgeta hevi em ol man i bikhet long wok bos bilong em i bin kamapim.​—⁠Stat 3:​1-6; Aisaia 65:17.a

God i tingim tru olgeta manmeri, tasol em i kamapim klia olsem em i laikim tru yumi olgeta wan wan. Matyu 10:​29-31 i kamapim olsem God i save tingim olgeta liklik samting long i stap bilong yumi em yumi yet i no save long en, em i tok: “Ol man i save salim tupela liklik pisin long koin i gat liklik pe. Tasol i no gat wanpela bilong ol dispela liklik pisin i save pundaun long graun na Papa bilong yupela i no save long dispela. Em i kaunim pinis olgeta gras long het bilong yupela. Olsem na yupela i no ken pret. Yupela i winim tru ol dispela liklik pisin.”

Save bilong tok i tru i helpim yu: Yumi save abrusim ol manmeri em ol i gat hatpela pasin o ol i no save tingim ol narapela. Dispela tok giaman olsem God i no save tingim ol man, i mekim na planti man i no laik kisim save long em, o ol i beten tasol long em taim ol i gat hevi. Taim yu save olsem God Jehova i save tingim yu tru, dispela bai kirapim yu long kisim sampela save moa long em na kisim pasin bilong pas gut wantaim em.

Olsem: Ating yu bin beten long God, tasol yu tingting planti olsem em i save harim beten bilong yu o nogat. Baibel i tokim yumi olsem Man bilong “harim beten” i save putim gut yau long ol man husat i pilim tru long bel na i beten long em.​—⁠Song 65:⁠2.

God i singautim yu long “putim olgeta hevi bilong [yu] long han bilong em,” long wanem, em “i save wari long [yu].” (1 Pita 5:⁠7) Long taim bilong hevi tu yumi ken bilip olsem God i save tingim tru yumi, long wanem, Baibel i tok: “God i save stap klostu long ol manmeri i gat hevi. Na em i save helpim ol manmeri bilip bilong ol i bagarap.”​—⁠Song 34:⁠18.

[Futnot]

[Rait long pes 5]

Sapos God i no tingim yumi, bilong wanem em i kirapim yumi long beten long em?

Ating yu harim olsem: “God i save tingim olgeta sin bilong ol man na em i givim strafe long ol long helpaia inap oltaim oltaim.”

“God i save givim strafe long ol sinman long rot bilong ol guria na sunami samting.”

Tok Baibel i mekim: Namba 2 Pita 3:9 i tok Jehova “i no laik bai wanpela i kisim bagarap. Em i laik bai olgeta i tanim bel.” Em i no save tingim ol popaia bilong yumi, nogat, em i save tingim ol gutpela pasin bilong yumi. God “i save was gut long ol manmeri i save aninit long em wanpela tasol, maski ol i stap long wanem hap bilong graun. Em i save helpim ol na strongim ol.”​—⁠2 Stori 16:⁠9.

Ol tok bilong Baibel i no as bilong bilip bilong helpaia​—⁠dispela tingting bilong kisim pen oltaim em samting God i heitim tru. Bikpela strafe tru God bai givim long ol man nogut em long pinisim laip bilong ol. (Jeremaia 7:31; Rom 6:⁠7) God i no kamapim ol bikpela bagarap olsem guria na sunami we i save bagarapim ol gutpela man na man nogut wantaim, nogat. Ol dispela bagarap i kamapim klia olsem taim nogut i save painim olgeta man.​—⁠Saveman 9:⁠11.

Save bilong tok i tru i helpim yu: Yumi inap go klostu moa long God taim yumi luksave olsem em i redi long “rausim sin” bilong yumi, na em i no hariap long givim pe nogut long yumi. (Song 86:⁠5) Pasin bilong laikim tru Jehova i mas kirapim yumi long mekim wok bilong em, na i no olsem bel i kotim yumi o yumi pret long kisim strafe. Dispela pasin bilong laikim Jehova i save strongim yumi long givim bel tru long mekim ol samting bilong amamasim em.​—⁠Matyu 22:​36-38; 1 Jon 5:⁠3.

Tru God i laik bai olgeta man i mekim gutpela pasin, tasol em i save olsem planti man i no inap mekim olsem. Sapos em i no bagarapim ol man i strong long mekim pasin nogut, orait em i wankain olsem wanpela bikman husat i kamapim ol lo, tasol em i no strong long ol man i mas bihainim, olsem na pasin i no stret na pen na hevi i go bikpela tru. (Saveman 8:11) Yumi save olsem God i no inap larim pasin nogut i stap oltaim, na dispela i helpim yumi long wetim ol gutpela samting i kamap bihain. God i tok promis long pinisim ol manmeri husat i strong yet long mekim pasin nogut, bambai “ol manmeri i daunim nem bilong ol yet” ol i ken stap laip oltaim long graun olsem em i bin tingting pinis long en long pastaim tru.​—⁠Song 37:​10, 11, 29.a

[Futnot]

[Rait long pes 6]

Yu ting God i laik yumi mas lotuim em, long wanem, yumi pret long kisim strafe?

[Piksa Kredit Lain long pes 6]

Engravings by Doré

Ating yu harim olsem: “God i bosim dispela graun, na olgeta samting i kamap long laik bilong em. Graun i pulap long pasin bilong daunim narapela, pasin i no stret, na pasin bilong mekim nogut long man, olsem na God yet i kamapim ol dispela hevi.”

Tok Baibel i mekim: God i no as bilong ol pasin nogut long graun. Baibel i tok pasin bilong Jehova “i gutpela na stretpela tasol.”​—⁠Lo 32:⁠4.

God i save mekim gutpela pasin long olgeta man, na long ol man i save mekim pasin nogut tu. Olsem, “em i save mekim san bilong en i kam antap long ol man nogut na ol gutpela man, na em i save mekim ren i kam daun long ol stretpela man na ol man i no mekim stretpela pasin.” (Matyu 5:45) Em i mekim wankain pasin long ol man bilong olgeta kain skin na sindaun, olsem Aposel 10:​34, 35 i tok: “God i save mekim wankain pasin long olgeta man. Na em i save laikim man husat i save pret long em na bihainim stretpela pasin maski em i bilong wanem lain.”

Wanem samting i as bilong ol pasin nogut? Planti man i save mekim wansait pasin na ol i no bihainim pasin bilong God long mekim gut long olgeta kain man. (Lo 32:⁠5) Na tu, Baibel i soim olsem God i larim birua bilong em, Satan, long bosim graun.a (1 Jon 5:19) Tasol klostu nau God bai pinisim wok bos bilong Satan. Em i stretim pinis rot bilong “bagarapim ol samting Satan i kamapim.”​—⁠1 Jon 3:⁠8.

Save bilong tok i tru i helpim yu: Ating yu kirap nogut olsem oltaim yu wok long harim ol ripot bilong pasin korapsen, pasin bilong daunim man, na pasin i no stret. Taim yu kisim save long husat tru i kamapim ol dispela hevi, dispela bai helpim yu long kliagut long as na ol pasin nogut i go nogut moa yet, na hatwok bilong ol man long stretim hevi i lus nating. (Song 146:⁠3) Sapos yu lusim bikpela haptaim na strong bilong yu long kamapim ol senis, ol dispela senis bai i stap sotpela taim tasol. Olsem na mobeta yu bilip tru long ol tok promis bilong God long ol gutpela samting bai kamap bihain.​—⁠Revelesen 21:​3, 4.

Taim yumi kliagut long husat i as bilong ol pasin nogut, dispela bai helpim yumi taim hevi i kamap. Sapos ol man i mekim nogut long yumi, yumi laik mekim wankain tok long God olsem Habakuk i bin mekim: “Ol manmeri i no bihainim lo bilong yu na ol i ting lo em i samting nating. Na oltaim ol man i no bihainim stretpela pasin.” (Habakuk 1:⁠4) God i no krosim Habakuk taim em i mekim dispela tok. God i tokim dispela wokman bilong em olsem Em i makim pinis taim bilong stretim ol dispela hevi, na em i helpim Habakuk long stap amamas maski i gat planti hevi. (Habakuk 2:​2-4; 3:​17, 18) Olsem tasol, sapos yu bilip long tok promis bilong God long pinisim ol pasin nogut, dispela inap helpim yu long stap amamas na i stap bel isi, maski yu stap namel long ol manmeri i mekim wansait pasin.

[Futnot]

[Rait long pes 7]

Yu ting God i as bilong ol pen na hevi na pasin nogut?

[Piksa Kredit Lain long pes 7]

© Sven Torfinn/Panos Pictures

Ating yu harim olsem: “I gat planti kain kain rot bilong bihainim long i go long wanpela hap, na olsem tasol, i gat planti pasin bilong lotuim God. Wan wan man yet i mas makim wanem pasin em i laik bihainim bilong lotuim God.”

Tok Baibel i mekim: Yumi mas givim bel tru long lotuim God, na no ken giaman tasol long mekim. Jisas i tokim ol hetman bilong lotu long taim bilong em long as na God i sakim ol, em i tok: “Aisaia i tok profet long yupela ol man bilong tupela maus, em i raitim tok olsem: ‘Ol dispela manmeri i save onarim mi long maus, tasol bel bilong ol i stap longwe long mi.’” (Mak 7:⁠6) Olsem na maski yumi givim bel tru long lotu, dispela tasol i no makim olsem God bai orait long lotu bilong yumi.

Jisas i tokaut long dispela samting taim em i kamapim klia bikpela rong bilong ol hetman bilong lotu na ol man i bihainim ol. Em i tokim ol long tok bilong God olsem: “Ol i lotu nating long mi, long wanem, ol samting ol i skulim ol arapela long en, em ol tok bilong man tasol.” (Mak 7:⁠7) Ol i “lotu nating,” long wanem, ol i strong long bihainim pasin bilong ol tumbuna long lotu, na ol i no mekim ol samting God i laik yumi mas mekim.

Baibel i no mekim wanpela tok bilong strongim dispela tingting olsem i gat planti rot bilong lotuim God, nogat. Baibel i tok i gat wanpela rot tasol. Matyu 7:​13, 14 i tok: “Yupela i mas go insait long liklik geit, long wanem, rot i go long bagarap i bikpela na i op tumas, na planti manmeri i bihainim dispela rot na i go. Tasol geit i go long laip em i liklik na rot i go long dispela hap em i liklik tru. Na wan wan manmeri tasol i save lukim na bihainim dispela rot.”

Save bilong tok i tru i helpim yu: Tingim, bai yu pilim olsem wanem sapos yu bin kisim trening inap sampela mun bilong insait long wanpela resis, na yu ran long dispela resis na yu kam fes, tasol yu no kisim prais, long wanem, yu bin popaia na brukim wanpela lo bilong resis? Yu bai pilim olsem olgeta hatwok bilong yu i lus nating. Yu ting wankain samting olsem inap painim yumi long sait bilong lotu?

Aposel Pol i tok pasin bilong lotu i kain olsem wanpela resis, em i tok: “Sapos wanpela man i insait long resis, em i mas bihainim ol lo bilong resis na bai em i ken kisim prais.” (2 Timoti 2:⁠5) God bai orait long yumi taim yumi “bihainim ol lo” bilong em na lotuim em long pasin em yet i makim. Yumi no inap bihainim rot yumi yet i makim bilong i go long God, wankain olsem man bilong resis i no inap ran long ol rot em yet i laik bihainim na long pinis bilong resis em bai kisim prais, nogat.

Bilong lotu long pasin God i orait long en, yumi no ken tru bilip long ol tok giaman ol man i mekim long God. Jisas i tok: “Ol man i lotu tru long Papa, ol bai lotuim em long spirit na long pasin i tru.” (Jon 4:23) Long Baibel yumi kisim save long stretpela rot bilong lotuim God.​—⁠Jon 17:17.a

[Futnot]

[Rait long pes 8]

Yu ting olgeta lotu i skulim ol man long lotuim God long pasin em yet i orait long en?