Dispela em tok bilong wanpela gel husat i gat 13 krismas. Em i mekim dispela tok taim em i kisim wanpela liklik dok olsem presen. Wanpela bisnismeri i tok taim em i stap long haiskul, Papa i givim em wanpela kompiuta olsem presen, na dispela i senisim tru laip bilong em. Na tu, wanpela nupela man marit i tok olsem nambawan presen tru em i kisim long fes-aniveseri em kat meri bilong em i bin wokim long han bilong em yet.

Long olgeta wan wan yia, planti manmeri i save lusim taim na strong bilong painim wanpela “gutpela” presen bilong givim long wanpela pren o wanfamili long ol spesel bung. Planti manmeri i laik harim kain tok olsem i stap long kirap bilong dispela atikol. Olsem wanem? Yu laik bai ol narapela i laikim tru ol presen yu givim long ol? O yu yet i laik bai narapela i givim ol presen we yu laikim tru?

Taim yu givim presen long narapela, dispela man i kisim presen bai amamas tru, tasol man bilong givim presen bai amamas moa yet long pasin em i bihainim bilong givim presen. Baibel i tok: “Amamas bilong givim samting i winim amamas bilong kisim samting.” (Aposel 20:35) Man i givim samting bai amamas moa sapos man i kisim samting i soim olsem em i laikim tru presen em i kisim.

Olsem wanem yu inap mekim pasin bilong yu long givim presen i kamap gutpela moa na givim amamas long yu na man bilong kisim presen? Sapos yu no gat rot bilong givim wanpela presen i gutpela tru, yu inap mekim wanem bambai presen yu givim inap mekim narapela i amamas tru?

I hatwok long painim wanpela presen i gutpela tru bilong givim long narapela. Tasol amamas bilong man i kisim presen bai kamapim klia olsem dispela presen i dia tumas. Wanpela kain presen bai i luk nais tru long wanpela, tasol narapela bai i no gat wankain tingting.

Olsem, ating wanpela tineja bai pilim olsem ol nupela kompiuta, teblet, o fon samting em ol nambawan gutpela presen tru ol i kisim. Tasol wanpela husat i gat bikpela krismas bai laikim tru presen em i kisim long famili olsem nambawan gutpela presen tru—kain olsem sel mani samting we i dia tumas long kalsa bilong ol. Long sampela kalsa, ol yangpela na lapun wantaim i save kisim mani olsem presen, na long dispela rot ol yet inap makim wanem samting ol i laik baim.

Maski i gat hatwok, planti manmeri i wok yet long painim gutpela presen tru we i stret long givim long wanpela spesel pren. Em tru olsem sampela taim yumi no inap painim kain presen olsem, tasol i gat sampela samting we yumi ken tingim na dispela bai helpim yumi. Yumi ken skelim 4-pela bilong ol dispela samting.

Ol samting man i laikim. Wanpela man long Belfast, Noten Aialan, i bin kisim wanpela baisikol taim em i gat 10 o 11 krismas. Em i tok dispela em nambawan gutpela presen i winim tru olgeta narapela presen em i bin kisim. Bilong wanem? Em i tok: “Mi laikim tru dispela baik.” Dispela tok i kamapim klia olsem man bai laikim tru wanpela presen sapos dispela i stret long laik bilong em. Olsem na yu mas tingim gut man yu laik givim presen long em. Painimaut long ol samting em i laikim tru. Olsem, ol bubu i save tingim tru pasin bilong lusim haptaim long stap wantaim famili. Ol bai laik tru long lukim ol pikinini na ol tumbuna pikinini bilong ol long olgeta taim. Sapos famili i go holide na ol i kisim ol bubu i go wantaim ol, dispela i olsem gutpela presen tru long ol bubu.

Sapos yu laik save gut long laik tru bilong man, orait yu mas i gat pasin bilong putim gut yau. Baibel i tokim yumi long ‘putim yau kwik long harim tok, na no ken hariap long mekim toktok.’ (Jems 1:19) Taim yu stori wantaim ol pren na ol wanfamili, putim gut yau bambai yu inap save long samting ol i laikim na samting ol i no laikim. Long dispela rot, yu inap save gut long wanem kain presen ol bai amamas tru long en.

Ol samting man i nidim. Man bai laikim tru presen yumi givim sapos dispela em samting em i nidim tru maski yumi baim long liklik mani. Tasol olsem wanem yu inap save long samting em narapela i nidim?

Wanpela rot tasol bilong save long samting narapela i nidim em long askim em. Tasol planti man i pilim olsem dispela bai tekewe amamas bilong ol long givim samting, olsem na ol i save baim tasol presen na givim. Sampela man i save amamas long stori long samting ol i laikim na samting ol i no laikim, na ol i no save stori long samting ol i nidim tru.

Dispela i soim olsem em i bikpela samting long yu mas skelim gut narapela na luksave long ol samting em i nidim. Olsem wanem? Em i yangpela, lapun, singel, marit, divos, poroman marit i dai, em i mekim wok mani, o em i ritaia long wok? Tingim gut wanem kain presen bai stret long dispela man i nidim.

Sapos yu laik save long samting em narapela i nidim, yu ken kisim tingting bilong ol narapela husat i bin gat wankain sindaun olsem em. Ating ol inap tokim yu long sampela samting we planti man i no save tingim. Long dispela rot, yu inap givim presen em narapela i nidim tru.

Taim bilong givim presen. Baibel i tok: “Sapos . . . yu wetim gutpela taim na yu mekim wanpela gutpela tok long ol, orait bai yu amamas.” (Sindaun 15:23) Dispela skripsa i kamapim klia olsem sapos yu wetim gutpela taim na yu mekim wanpela tok, dispela inap kamapim gutpela samting. Dispela i stret tu long ol pasin yumi mekim. Sapos yumi wetim taim stret na yumi givim wanpela presen, dispela inap givim bikpela amamas long man i kisim presen.

Wanpela pren bai marit. Wanpela yangpela bai gretiuet long skul. Tupela marit bai i gat wanpela nupela bebi. Ol man i save givim presen long kain taim olsem. Sampela i save wokim lista bilong ol kain bung olsem we bai kamap long ol yia bihain. Long dispela rot, ol inap wokim plen long gutpela presen ol inap baim.a

I no olsem yu mas wet tasol long taim bilong ol bikpela bung na yu givim presen, nogat. Yu ken givim presen long olgeta kain taim na kisim amamas long pasin bilong givim. Tasol yumi mas bihainim savetingting. Sapos wanpela yangpela man i baim wanpela presen na givim long wanpela meri, dispela meri inap kisim tingting olsem dispela man i laik prenim em. Dispela inap kamapim hevi. Olsem na em i bikpela samting long skelim tingting tru bilong man i givim presen.

Tingting tru bilong man i givim presen. Taim man i laik givim presen, i gutpela em i skelim sapos man i kisim presen bai kisim tingting kranki long em o nogat. Na tu, man i givim presen i mas skelim tingting tru bilong em yet long givim presen. Planti man i laik bai ol narapela i litimapim nem bilong ol taim ol i givim presen, na planti narapela i givim presen long taim bilong ol bikpela bung bikos ol i lukim ol narapela i mekim olsem. Sampela i givim samting na ol i laik bai ol narapela tu i mekim wankain long ol.

Yu ken mekim wanem bilong soim olsem yu bihainim stretpela tingting taim yu laik givim presen long narapela? Baibel i tok: “Olgeta samting yupela i mekim, yupela i mas mekim wantaim pasin laikim.” (1 Korin 16:14) Sapos pasin laikim na pasin bilong tingim tru narapela i kirapim yu long givim presen, man i kisim presen bai amamas tru long presen yu givim em, na yu bai kisim bikpela amamas moa long pasin bilong givim samting. Sapos bel i kirapim yu long givim samting, dispela bai mekim Papa bilong yumi long heven i amamas. Aposel Pol i bin tok amamas long ol Kristen long Korin long pasin bilong ol long amamas na givim ol samting bilong helpim ol wanbilip Kristen long Judia. Em i tok: “God i save laikim tumas man i amamas long givim samting.”—2 Korin 9:7.

Sapos yu tingim gut ol samting yumi stori pinis long en, dispela inap stiaim yu long givim ol presen em narapela bai amamas tru long en. Ol dispela 4-pela rot bilong givim presen i kamap klia taim God i givim nambawan gutpela presen bilong helpim ol manmeri long graun. Mipela laik kirapim yu long ritim neks atikol na kisim save long nambawan gutpela presen God i givim.

Baibel i tok: “Olgeta gutpela presen na olgeta presen i nambawan tru i kam long ples antap. Em i kam long Papa bilong ol lait bilong skai.” (Jems 1:17) Dispela skripsa i stori long gutpela pasin bilong God Jehova, em Papa bilong yumi long heven. God i givim yumi planti presen, tasol i gat wanpela presen we i nambawan tru na i winim olgeta narapela presen. Wanem dispela presen? Tok bilong Jisas long Jon 3:16 i kamapim klia dispela samting, em i tok: “God i laikim tumas olgeta manmeri bilong graun, olsem na em i givim dispela Pikinini tru bilong en long ol bai olgeta man husat i bilip long em ol inap abrusim bagarap na kisim laip oltaim.”

God i givim Pikinini tru bilong em olsem presen—dispela em nambawan presen tru bikos em i helpim yumi long kamap fri long kalabus bilong sin, hevi bilong kamap lapun, na dai. (Song 51:5; Jon 8:34) Yumi yet i no gat strong bilong lusim dispela kalabus. Tasol God i laikim tru yumi, olsem na em i givim samting yumi nidim bilong lusim dispela kalabus. Taim God Jehova i givim Pikinini tru bilong em, Jisas Krais, olsem pe bilong baim bek man, dispela i opim rot long ol manmeri inap kisim laip oltaim. Pe bilong baim bek man em wanem samting? Bilong wanem yumi nidim dispela pe? Yumi inap kisim wanem ol blesing long rot bilong dispela pe?

Pe bilong baim bek man em kain olsem pe yumi givim bilong baim bek wanpela samting o bilong helpim wanpela long lusim kalabus. Baibel i tok olsem taim God i wokim namba 1 papamama bilong yumi, Adam na Iv, ol i no gat sin. Ol inap kamapim ol pikinini na stap laip oltaim long paradais long graun. (Stat 1:26-28) Tasol sori tru olsem tupela i bin bikhet long God na mekim sin. Wanem samting i kamap? Baibel i tok: “Long rot bilong wanpela man tasol sin i kamap long graun. Na sin i bringim dai i kam. Na long dispela rot dai i painim olgeta manmeri, long wanem, olgeta i bin mekim sin.” (Rom 5:12) Pasin bikhet bilong Adam i mekim na yumi no stap laip oltaim, nogat, yumi karim hevi bilong sin, em dai.

Pe bilong baim bek wanpela samting i mas wankain stret long dispela samting i bin lus. Taim Adam i sakim tok bilong God, em i mekim sin na em i lusim laip bilong em yet, em laip i gutpela olgeta. Baibel i tok pasin bikhet bilong Adam i mekim na yumi kalabus long sin na dai. Olsem na i mas i gat narapela laip i gutpela olgeta bilong baim bek yumi—laip bilong Jisas—em i givim olsem sakrifais bambai yumi inap lusim kalabus bilong sin na dai. (Rom 5:19; Efesus 1:7) God i laikim tru yumi, olsem na em i givim dispela pe bilong baim bek yumi. Dispela i opim rot na yumi inap kisim bek samting em Adam na Iv i bin lusim—laip oltaim long paradais long graun.—Revelesen 21:3-5.

Pe bilong baim bek man i opim rot long yumi inap kisim laip oltaim, na dispela em nambawan gutpela presen tru i winim olgeta narapela presen. Orait nau yumi bai stori long hau dispela “presen i nambawan tru” inap helpim yumi, na dispela bai kirapim yumi long pilim tru samting em dispela presen inap mekim long yumi.

Inapim laik bilong yumi. Olgeta man i gat laik tru long i stap laip oltaim. (Saveman 3:11) Yumi yet i no inap mekim wanpela samting bilong inapim dispela laik, tasol pe bilong baim bek man i opim rot long yumi inap stap laip oltaim. Baibel i tok: “Pe bilong sin em dai, tasol presen God i givim em laip oltaim long rot bilong Krais Jisas, Bikpela bilong yumi.”—Rom 6:23.

Inapim samting yumi nidim. Yumi man i no inap givim pe bilong baim bek man. Baibel i tok: “Pe bilong baim bek man, em i antap tumas. Man i no inap baim God bai God i larim em i stap laip oltaim na em i no ken i dai.” (Song 49:8, 9) Olsem na yumi nidim tru helpim bilong God bambai yumi inap lusim kalabus bilong sin na dai. Tasol “long wok bilong Krais Jisas long givim pe bilong baim bek man,” God i givim yumi samting yumi nidim tru.—Rom 3:23, 24.

Givim long taim stret. Baibel i tok: “Krais i dai bilong helpim yumi taim yumi stap sinman yet.” (Rom 5:8) “Taim yumi stap sinman yet,” God i givim dispela pe bilong baim bek man, na dispela i kamapim klia pasin laikim bilong God long yumi. Maski yumi karim hevi bilong sin na dai, dispela pe bilong baim bek man i helpim yumi long bilip na wet long kisim planti gutpela blesing long bihain.

Risen na God i givim pe bilong baim bek man. Baibel i kamapim klia risen na God i givim Pikinini bilong em olsem pe bilong baim bek man, em i tok: “Pasin laikim bilong God i kamap ples klia long yumi olsem: God i salim Pikinini bilong en, em pikinini tru bilong en, i kam long dispela graun bai yumi inap kisim laip long rot bilong em. I no olsem yumi laikim God na em i mekim dispela samting, nogat. Em olsem, God i laikim yumi.”—1 Jon 4:9, 10.

Hau bai yu soim olsem yu pilim tru dispela nambawan gutpela presen i winim olgeta narapela presen? Tok i stap long Jon 3:16 i kamapim klia olsem “olgeta man husat i bilip” long Jisas, em bai kisim bek ol. Baibel i tok, taim man i bilip, dispela i kamapim klia olsem ‘samting em i bilip na wet long en bai kamap tru.’ (Hibru 11:1) Olsem na em i bikpela samting long yumi mas i gat stretpela save long Baibel. Mipela i kirapim yu long lusim sampela haptaim long kisim save long God Jehova, em Man husat i bin givim dispela “presen i nambawan tru.” Na tu, yu mas save long samting yu inap mekim bambai ofa bilong baim bek ol man i opim rot long yu inap kisim laip oltaim.

Yu ken kisim save long ol dispela samting taim yu stadi gut long ol tok bilong Baibel i stap long www.pr2711.com/tpi. Ol Witnes Bilong Jehova bai amamas long helpim yu. Mipela i bilip tru olsem taim yu kisim save long Baibel na ol gutpela samting dispela nambawan gutpela presen inap mekim long yu, dispela bai kirapim yu long tok: “Mi tenkyu long God long rot bilong Jisas Krais, Bikpela bilong yumi!”—Rom 7:25.