Lukim Samting Jehova i Bin Mekim Bilong Helpim Yumi!

WANPELA man i tok: “Mipela i bin beten long kain taim olsem i ken kamap.” Na narapela man i save kirap long hap tudak yet, olsem 4 klok moningtaim, na bai em i ken beten. Em i stori long dispela na em i tok: “Mipela i bin beten long Jehova i ken opim rot na bai mipela i ken lotuim em long ples klia.” Jehova i harim beten bilong ol, olsem na long Janueri 1992 long Adis Ababa i gat “Ol Man Bilong Laikim Pasin Bilong i Stap Fri” Kibung Distrik i bin kamap long Itiopia, na ol Witnes Bilong Jehova i bung.

Dispela kibung i bin kamap long Itiopia i kamapim long ples klia ol senis i wok long kamap long Afrika. Bipo gavman long 13 hap i putim tambu long ol Witnes Bilong Jehova, tasol nau ol gavman i rausim tambu na ol Witnes i amamas tru long dispela samting. Inap 34 yia i gat tambu i bin stap long ol Witnes, tasol long Novemba 11, 1991 gavman i tekewe tambu na ol Witnes i kirap long redim dispela kibung intenesenel. Inap 7,573 manmeri i bung long taun Adis Ababa long Haus Bung, em Stediam, na ol i amamas tru. Ol i no ting planti olsem bai kam. Ol i kirap nogut, long wanem, nau i no gat tambu na ol i bung long ples klia. Ol i stap fri! Planti ol i tokim narapela narapela olsem: “Brata, lukim samting God bilong yumi, em Jehova, i mekim bilong helpim yumi!”​—⁠Lukim Song 66:​1-5; 126:⁠1.

Ol i no bin bung olsem inap 34 yia, olsem na planti ol i no save long ol gutpela singsing bilong ol Witnes, em singsing bilong Kingdom. Tasol long kibung yumi save singsing! Olsem wanem na ol i lainim kwik ol dispela singsing na taim kibung i kirap ol inap mekim ol dispela singsing? Ol i tanim 40 singsing long tok ples bilong ol, em tok ples Amharik, na sampela brata sista i lain long mekim ol dispela singsing, na ol brata i putim dispela ol singsing i go long odiokaset, na ol i givim long ol kongrigesen long taun na bai ol i ken lainim. Inap hap aua paslain long miting na hap aua bihain long miting ol i lain lain long singsing, na taim ol i bung long kibung ol i givim bel tru long singsing long ol dispela gutpela singsing na i kamap gutpela tru.

Sampela hevi olsem pait samting i bin kamap long hap bilong is, olsem na rot i go long taun Diredawa na taun Harar i pas. Olsem na ol man bilong dispela hap i mas kam long balus. Pe bilong balus i bikpela tumas, tasol 8-pela brata bilong Harar i strong long kam long kibung, olsem na ol i askim ol man bilong ami long helpim ol, na ami i larim dispela 8-pela brata i kam long kibung long balus bilong ami, na ami i no laik kisim pe long ol. Ami i bringim ol nating!

Taim ol dispela brata Itiopia i lukim Jehova i bin harim beten bilong ol, aiwara bilong ol i pundaun. Inap 30 yia ol i bin karim bikpela hevi, na ol man i bin kilim sampela i dai, long wanem, ol i holimpas bilip bilong ol long tok i tru. Wanpela brata i tok: “Mi krai taim kibung i kirap, na mi krai yet.” Na narapela i tok: “Sapos yu inap save long bel bilong mi bai yu save mi amamas moa yet.” Tru tumas, Jehova i bin mekim gutpela samting tru bilong helpim ol dispela Witnes.​—⁠Song 66:​16, 19.

Ol i Fri Liklik Long Wes na Sentral Afrika

Long kantri Benin tu gavman i pinisim tambu long lain bilong Jehova na ol i amamas. Wanpela Witnes i mekim tok long miting Kristen na em i tok olsem: “Ol brata long dispela kantri nau ol i stap fri bilong lotuim Jehova, na dispela i olsem presen Jehova i givim long ol.” Tru tumas, lain bilong Jehova nau ol i amamas, long wanem, nau i no gat samting i pasim ol long bung wantaim na lotuim Jehova na long autim tok long ol man long Kingdom bilong Jehova. Yumi no ken ting dispela kain pasin bilong i stap fri em i samting nating.

Dispela brata i stori long olsem wanem ol i kamapim amamas bilong ol, na em i tok: “Mipela i save mekim wok bilong raun long ol haus na autim gutpela tok bilong Kingdom long ol man, na mipela i amamas, long wanem, nau i no gat samting i pasim rot bilong mipela long mekim olsem.” Long Benin i olsem. Long Janueri 1990 gavman i rausim tambu i bin stap long ol Witnes Bilong Jehova inap 14 yia, na nau 77 pablisa i kirap long mekim wok painia. Tupela yia bihain i gat 244 i mekim dispela wok!

Tasol taim tambu i stap yet long ol, ol i wok hait long autim tok na lotuim Jehova, olsem na gavman i kalabusim ol. Wanpela bikman bilong ami i lukim ol Witnes i kalabus long wanpela banis kalabus, tasol ol i stap strong yet, na taim ol i lusim kalabus na autim tok, ol ami i holim ol gen na kalabusim ol, olsem na planti taim dispela bikman bilong ami i save lukim ol long dispela banis kalabus. Dispela i kirapim tingting bilong em na em i tingim taim em i bin amamas long toktok wantaim ol taim ol i no kalabus yet, na em i tingting planti long dispela samting.

Nau em i pilim olsem em i sot long ol samting bilong spirit, olsem na em i wok long i go long ol lotu nabaut, tasol ol i no givim save long em long ol samting bilong spirit em i laik save long en. Orait, long Janueri 1990 gavman i rausim tambu i bin stap long ol Witnes, na nau dispela man i toktok wantaim ol long ples klia, na em i lainim ol samting bilong spirit em i laik save long en. Bihain em i kisim baptais, na nau em i mekim wok painia. Ol brata long Benin i ting samting i painim dispela man i wankain olsem samting i bin painim Sol bilong Tarsus, olsem: “Pastaim dispela man i wok long kilim yumi, tasol nau em i save autim gutnius bilong dispela pasin bilong bilip bipo em i wok long bagarapim.”​—⁠Galesia 1:23.

Long kantri Naija long Afrika long Disemba 1991 gavman i pinisim tambu long ol Witnes Bilong Jehova na ol inap rejista long gavman, na brens i stori olsem long wanpela kibung bilong ol: “Kibung i kamap long taun Maradi, na long Fraide, taim brata i mekim as tok bilong kibung ol i tokaut olsem i no gat tambu moa long ol long Naija. Ol brata i amamas na i paitim han inap sampela minit, na bihain long kibung narapela i holim narapela na ol i amamas long harim gutpela tok long ol i stap fri.” Yumi tu i amamas wantaim ol.

Nau i no gat tambu moa long ol, orait, ol bai mekim wanem? Wanpela sista painia bilong Naija i save, na em i tok: “I gat planti man long Naija ol bai i lusim Bikpela Babilon taim pinis i no yet. Mi save olsem, long wanem, mi save mekim 80 o 85 gobek long olgeta mun, na mi mekim 13 o 14 Baibel-stadi long olgeta mun, tasol mi givim pinis planti gobek na Baibel-stadi long ol narapela pablisa. Nau mi gat sik, olsem na mi no inap mekim bikpela wok bilong autim tok olsem bipo mi bin mekim. Yumi save mekim wok inap long strong bilong yumi.”

Kantri Ruwanda i stap long Sentral Afrika, na senis i painim ol Witnes Bilong Jehova long dispela hap tu. Long Epril 1992 gavman i pinisim tambu i bin stap long ol, na long dispela wik yet em taim bilong Memorial bilong ol, na 1,526 pablisa i amamas long lukim 6,228 man i kam bung long Memorial. Nau ol gutpela brata long Ruwanda i amamas long i stap fri, olsem na nau ol bai mekim bikpela wok moa. Long mun Epril ol wan wan pablisa bilong ol kongrigesen i kisim 27.4 aua na 17 gobek na ol i mekim 2.4 Baibel-stadi. Na 40 pesen bilong ol i mekim wok painia.

Tambu i Pinis Long Hap Saut Bilong Afrika

Long hap bilong saut long Afrika tupela gutpela kantri i kamap fri, em Mosambik na Angola. Long Februeri 1991 ol Witnes long Mosambik i kamap fri. Nau rot i op na Sosaiti Was Taua i salim ol misineri i go long Mosambik. Pait i bin bagarapim ples, tasol nau ol man i laik harim tok bilong Baibel na tok i tru em ol misineri i autim long ol, na ol i kisim planti buk bilong Baibel tu. Ol i moa laikim buk Sampela Askim Bilong Ol Yangpela. Insait long tupela aua na 30 minit wanpela misineri i tilim 50 buk i go long ol man.

Ol man i gat laik long harim tok ol i givim bel hariap long en. Sosaiti i givim atres bilong wanpela man long misineri, na misineri i go lukim dispela man, em man bilong ami. Em wantaim tupela wanblut i toktok gut wantaim misineri. Bihain misineri i go bek gen na toktok moa wantaim dispela man na 5-pela wanblut bilong em. Olgeta i laik kam long miting bilong pablik-tok na Stadi Wastaua, na ol dispela samting i bin kamap insait long 4-pela de tasol.

Ol Witnes i kamap fri olsem long Epril 1992, na nau ol i amamas. Yu ting ol i mekim wanem nau long taim i no gat tambu moa i stap long ol? Nau ol i raun autim tok bilong Kingdom! I gat 17,000 pablisa long Angola, na olgeta taim ol i mekim 60,000 Baibel-stadi long ol manmeri. Ol dispela 60,000 manmeri inap kam insait long tok i tru na bai lain Witnes i kamap bikpela moa bihain.

Ol Yangpela Tu i Save Autim Tok

Long ol kantri em gavman i larim ol Witnes i autim tok, ol yangpela i insait tu long dispela wok, na sampela i no baptais yet. Long Ripablik bilong Kep-Verd gavman i tekewe tambu long ol Witnes Bilong Jehova long Novemba 1990, na long wanpela kibung wanpela yangpela meri i gat 17 krismas em i sanap na autim bilip bilong em long ol manmeri long kibung bambai em i ken kisim baptais. Bihain em i baptais pinis na sampela ol i kam bungim em na amamas long em, na wanpela man i askim em, “Husat ol dispela manmeri i bungim yu?” Na meri i tok, “Em ol Baibel-stadi bilong mi.” Meri i gat 7-pela Baibel-stadi, na ol i bin kam bilong amamas wantaim em taim em i kisim baptais. Em i putim pinis pepa bilong mekim wok painia haptaim, na em i gat tingting long kamap painia oltaim long bihain.

Wanpela yangpela meri Angola, em i gat 10-pela krismas, ol i askim em long em i pablisa o nogat. Em i tok: “Mi pablisa.” “Yu gat sampela Baibel-stadi?” “Mi gat.” “Hamas?” Em i tok: “Mi gat 7-pela.”

Long Baibel long hap bilong Aposel yumi kaunim tok olsem: “Long olgeta hap bilong Judia na Galili na Samaria ol manmeri bilong [kongrigesen], ol i stap gut. Ol arapela man i no mekim nogut long ol, na [kongrigesen] i kamap strong. Ol i bihainim pasin bilong aninit long Bikpela, na Holi Spirit i strongim bel bilong ol. Na planti manmeri i kam insait.” (Aposel 9:31) Yumi beten askim Jehova long helpim ol brata long Afrika na bai ol tu i ken mekim olsem na i stap bel isi. Yumi save amamas wantaim ol long taim ol i kamap strong, na yumi beten askim Jehova long givim spirit bilong em long ol nau long taim ol i stap fri na ol i ken autim gutpela tok bilong Kingdom na ol i ken wok yet long kamap planti.

[Mep long pes 24]

(Bilong save ol dispela rait i stap we long pes, lukim buk o magasin)

Ol Kantri i Bin Rausim Tambu Long Ol Witnes Bilong Jehova

1. Gambia, Disemba 1989

2. Benin, Janueri 1990

3. Ripablik Bilong Kep-Verd, Novemba 1990

4. Mosambik, Februeri 1991

5. Gana, Novemba 1991

6. Itiopia, Novemba 1991

7. Kongo, Novemba 1991

8. Naija, Disemba 1991

9. Togo, Disemba 1991

10. Sat, Janueri 1992

11. Kenya, Mas 1992

12. Angola, Epril 1992

13. Ruwanda, Epril 1992

[Piksa long pes 23]

Long Benin wanpela pablisa bilong Kingdom i paitim kundu na salim tok bilong Matyu 24:14 i go long ol man

[Piksa long pes 25]

Long planti kantri long Afrika ol Kristen tru i stap fri na nau ol i mekim save long wok autim tok

[Piksa long pes 26]

Ol nupela Witnes i dediket long Jehova na ol i baptais long wara