Askim

Jop 1⁠:8 i makim olsem long taim bilong Jop em wanpela tasol i bin i stap gut long Jehova, o olsem wanem?

Nogat. Yumi no ken ting olsem. Jop 1:8 i tok:

“Bikpela i askim [Satan] olsem, ‘Yu lukim tu wokboi bilong mi, Jop, o nogat? Jop em i gutpela man tru na i no gat asua long ai bilong mi. Em i save lotu na aninit long mi, na i save bihainim olgeta tok bilong mi. Em i no save mekim wanpela pasin nogut. Long olgeta hap bilong graun i no gat wanpela man i olsem em.’ ” Long Jop 2:​3, God i mekim wankain tok long gutpela pasin bilong Jop.

Buk bilong Jop yet i kamapim klia olsem i no Jop wanpela tasol i bin i stap gut long God na God i orait long em. Nogat. Sapta 32 i go inap 36 i stori long Elihu. Maski Elihu i yangpela long Jop​—⁠em i stretim tingting kranki bilong Jop na em i litimapim nem bilong God tru.​—⁠Jop 32:​6–33:​6, 31-33; Jop 35:1–36:⁠2.

Olsem na taim God i tok “i no gat wanpela man i olsem em,” dispela i makim olsem Jop i gat nem olsem stretpela man long ai bilong God. Ating Jop i bin i stap bihain long taim Josep i dai long Isip na paslain long taim Moses i kirap mekim wok olsem profet bilong God. Insait long dispela hap taim planti Israel i bin i stap long Isip. Tasol i no gat as na yumi ken ting olgeta ol i bin lusim God na God i no orait long ol, nogat; ating planti bilong ol i bin bilip tru long God. (Kisim Bek 2:​1-10; Hibru 11:23) Tasol no gat wanpela i bin mekim bikpela wok olsem Josep, na no gat wanpela i bin givim bel long God tru, olsem Moses bai mekim taim em i helpim lain Israel long lusim Isip.

Tasol long narapela hap i gat wanpela man i stap em i gat nem olsem man bilong i stap gut long God. “Long kantri Us i gat wanpela man i stap, nem bilong en Jop. Jop em i gutpela man tru na i no gat asua long ai bilong God. Em i save lotu na aninit long God, na i save bihainim olgeta tok bilong en. Na em i no save mekim wanpela pasin nogut.”​—⁠Jop 1:⁠1.

Tru tumas, Jop i gat strongpela bilip na em i givim bel tru long God, olsem na Jehova inap tok olsem no gat wanpela man i olsem Jop. Esekiel na Jems, ol tu ol i tok Jop em i gutpela piksa bilong stretpela pasin na pasin bilong karim hevi na sanap strong.​—⁠Esekiel 14:14; Jems 5:⁠11.

Miting Bilong Olgeta Yia—Oktoba 3, 1992

MITING BILONG OLGETA YIA bilong ol memba bilong Sosaiti Was Taua bilong Pensilvenia bai kamap long Oktoba 3, 1992, long Haus Kibung bilong ol Witnes Bilong Jehova, 2932 Kennedy Boulevard, Jersey City, New Jersey. Ol memba tasol bai miting pastaim long 9:30 long moningtaim, na miting bilong ol narapela tu bai kirap long 10 klok.

Ol memba i mas toksave nau long Ofis bilong Seketeri sapos atres bilong ol i senis, bambai paslain long Ogas 1 ofis inap salim ol pas long ol bilong tokaut long dispela miting, na salim tu ol pepa bilong putim vot long miting, maski ol i no kam.

Ol bai salim ol pepa wantaim pas i tokaut long miting, na ol memba i mas bekim long Ofis bilong Seketeri bilong Sosaiti paslain long Ogas 15. Olgeta memba wan wan i mas raitim pepa na makim klia olsem em bai kam o nogat, na bekim kwik pepa. Olsem bai ofis inap save husat husat bai kam.

Ol i ting olgeta tok na ripot samting bilong miting bai pinis long 1 klok o bihain liklik long dispela taim. No gat hap miting long belo bek. No gat planti sia, olsem na ol man i holim tiket ol tasol inap kam insait long miting. I no gat ol narapela ples bung bilong harim ol tok long rot bilong telefon samting; nogat.

Miting bilong olgeta yia bilong International Bible Students Association bilong Papua New Guinea Incorporated bai kamap long brens-ofis long Avaka Street, Gordon, Port Moresby long 3 klok long apinun, long Oktoba 3, 1992.